2 Reyes 17 - Li Santil hu1 Yo̱ cablaju chihab roquic chokꞌ xreyeb laj Judá laj Acaz nak laj Oseas li ralal laj Ela qui-oc chokꞌ xreyeb laj Israel. Bele̱b chihab quicuan chokꞌ rey aran Samaria. 2 Laj Oseas quixba̱nu li incꞌaꞌ us chiru li Ka̱cuaꞌ. Abanan incꞌaꞌ quinumta lix ma̱usilal joꞌ xma̱usilaleb lix reyeb laj Israel li queꞌcuan xbe̱n cua. 3 Laj Salmanasar lix reyeb laj Asiria quipletic riqꞌuin laj Oseas ut quire̱chani li ple̱t. Joꞌcan nak laj Oseas quicꞌanjelac chiru ut quixtoj rix lix naꞌajeb. 4 Saꞌ jun li cutan laj Salmanasar lix reyeb laj Asiria quixqꞌue retal nak laj Oseas yo̱ chixbalakꞌinquil xban nak naxtaklaheb lix takl riqꞌuin laj So lix reyeb laj Egipto ut incꞌaꞌ chic naxtakla lix toj rajlal chihab joꞌ naxba̱nu. Joꞌcan nak lix reyeb laj Asiria quixtakla xchapbal laj Oseas ut quixqꞌue saꞌ tzꞌalam. 5 Chirix aꞌan lix reyeb laj Asiria qui-oc chi pletic riqꞌuineb laj Israel. Oxib chihab quipletic riqꞌuineb li cuanqueb Samaria. 6 Yo̱ chic xbele chihab roquic laj Oseas chokꞌ xreyeb laj Israel nak lix reyeb laj Asiria quire̱chani li tenamit Samaria ut quixcꞌameb chi pre̱xil laj Israel aran Asiria. Cuan li quixcanabeb saꞌ li naꞌajej Halah. Cuan li quixcanabeb saꞌ li naꞌajej Habor li cuan nachꞌ riqꞌuin li nimaꞌ Gozán. Ut cuan ajcuiꞌ li quixcanabeb saꞌ eb li tenamit li cuanqueb saꞌ xcue̱nt li tenamit Medo. 7 Queꞌxcꞌul chi joꞌcan eb laj Israel xban nak queꞌma̱cob chiru li Ka̱cuaꞌ Dios li qui-isin chak reheb rubel xcuanquil laj faraón aran Egipto. Ut queꞌxlokꞌoniheb li jalanil dios. 8 Eb laj Israel queꞌxba̱nu li incꞌaꞌ us joꞌ queꞌxba̱nu li jalaneb xtenamit li queꞌisi̱c xban li Dios saꞌ li naꞌajej li queꞌoc cuiꞌ. Ut queꞌxba̱nu ajcuiꞌ li incꞌaꞌ us li queꞌcꞌameꞌ cuiꞌ xbeheb xbaneb li rey li queꞌcuan aran Israel. 9 Eb laj Israel queꞌxba̱nu chi mukmu li incꞌaꞌ quicuulac chiru li Ka̱cuaꞌ lix Dioseb. Queꞌxyi̱b li naꞌajej re xlokꞌoninquileb li yi̱banbil Dios saꞌ chixjunileb li tenamit. Ut queꞌxyi̱b ajcuiꞌ saꞌ eb li cocꞌ cab najt xteram li nequeꞌcuan cuiꞌ li nequeꞌiloc re li tenamit, joꞌ eb ajcuiꞌ li tenamit li cauresinbileb re xcolbaleb rib. 10 Ut queꞌxyi̱b lix jalam u̱ch lix Asera lix dioseb ut queꞌxqꞌue saꞌ eb li tzu̱l ut queꞌxqꞌue ajcuiꞌ rubeleb li cheꞌ li ni̱nk xmuheb. Ut queꞌxxakab ajcuiꞌ li okech yi̱banbil riqꞌuin pec re xlokꞌoninquil lix dioseb. 11 Ut queꞌxcꞌat li pom saꞌ eb li naꞌajej li najt xteram li queꞌxyi̱b re xlokꞌoninquil li yi̱banbil dios joꞌ queꞌxba̱nu li tenamit li queꞌisi̱c saꞌ li naꞌajej aꞌan xban li Ka̱cuaꞌ Dios. Riqꞌuin li ma̱usilal queꞌxba̱nu, queꞌxchikꞌ xjoskꞌil li Dios. 12 Eb aꞌan queꞌxlokꞌoni li jalanil dios usta li Ka̱cuaꞌ Dios quixye nak incꞌaꞌ teꞌxlokꞌoni. 13 Li Ka̱cuaꞌ quixtaklaheb lix profeta ut eb lix takl riqꞌuineb laj Israel ut riqꞌuineb laj Judá. Queꞌxye chi joꞌcaꞌin: —Canabomak xba̱nunquil li ma̱usilal. Cheba̱nuhak ban li cꞌaꞌru naxye li chakꞌrab li quixqꞌue li Dios reheb le̱ xeꞌto̱nil yucuaꞌ. Cheba̱nuhak chixjunil li cꞌaꞌru xextakla̱c cuiꞌ, chanqueb li profetas laj cꞌanjel chiru li Ka̱cuaꞌ. 14 Abanan eb aꞌan incꞌaꞌ queꞌabin. Queꞌxcacuubresi ban lix chꞌo̱leb joꞌ queꞌxba̱nu lix xeꞌto̱nil xyucuaꞌeb. Incꞌaꞌ queꞌxcꞌojob xchꞌo̱l riqꞌuin li Dios. 15 Queꞌxtzꞌekta̱na ban li chakꞌrab li quixqꞌue li Dios ut queꞌxtzꞌekta̱na ajcuiꞌ li contrato li quixba̱nu li Dios riqꞌuineb lix xeꞌto̱nil xyucuaꞌeb. Queꞌxkꞌet li ra̱tin li Dios ut queꞌxlokꞌoniheb li yi̱banbil dios li ma̱cꞌaꞌ na-oc cuiꞌ. Joꞌcan nak eb aꞌan queꞌcana chi ma̱cꞌaꞌ nequeꞌoc cuiꞌ xban nak queꞌxba̱nu joꞌ nequeꞌxba̱nu li jalan tenamit li cuanqueb chi nachꞌ riqꞌuineb, usta li Dios quixye nak incꞌaꞌ teꞌxba̱nu. 16 Queꞌxtzꞌekta̱na chixjunil li chakꞌrab li quiqꞌueheꞌ reheb xban li Ka̱cuaꞌ lix Dioseb. Ut queꞌxyi̱b riqꞌuin li chꞌi̱chꞌ cuib xjalam u̱ch li cuacax ut queꞌxlokꞌoni. Queꞌxyi̱b lix jalam u̱ch lix Asera lix dioseb. Ut queꞌxlokꞌoni ajcuiꞌ laj Baal ut eb li chahim, li sakꞌe ut li po. 17 Queꞌxcꞌat li ralal xcꞌajoleb chokꞌ xmayejeb chiru li yi̱banbil dios. Queꞌco̱eb chi patzꞌoc riqꞌuineb laj kꞌe ut riqꞌuineb laj tu̱l. Ut junes li ma̱usilal queꞌxqꞌue xchꞌo̱l chixba̱nunquil. Joꞌcan nak queꞌxchikꞌ xjoskꞌil li Dios. 18 Cꞌajoꞌ nak quichal xjoskꞌil li Dios saꞌ xbe̱neb laj Israel xban li ma̱usilal queꞌxba̱nu. Joꞌcan nak quirisiheb saꞌ lix naꞌajeb. Caꞌaj chic eb li ralal xcꞌajol laj Judá queꞌcana saꞌ li naꞌajej aꞌan. 19 Abanan chi moco eb li ralal xcꞌajol laj Judá queꞌxba̱nu li cꞌaꞌru naxye saꞌ li chakꞌrab li quiqꞌueheꞌ reheb xban li Ka̱cuaꞌ lix Dioseb. Queꞌxqꞌue ban xcuanquil li chakꞌrab li quiqꞌueheꞌ xbaneb li ralal xcꞌajol laj Israel. 20 Joꞌcan nak li Ka̱cuaꞌ quixtzꞌekta̱naheb chixjunileb laj Israel. Quixtakla li raylal saꞌ xbe̱neb ut quixcanabeb saꞌ rukꞌeb li xicꞌ nequeꞌiloc reheb toj retal nak queꞌisi̱c saꞌ lix naꞌajeb. 21 Nak li Ka̱cuaꞌ quirisiheb li ralal xcꞌajol laj Israel saꞌ xya̱nkeb li ralal xcꞌajol laj David, eb laj Israel queꞌxxakab laj Jeroboam li ralal laj Nabat chokꞌ xreyeb. Ut laj Jeroboam, aꞌan li quiqꞌuehoc reheb laj Israel chixtzꞌekta̱nanquil li Ka̱cuaꞌ ut kꞌaxal nimla ma̱c queꞌxba̱nu. 22 Eb li ralal xcꞌajol laj Israel queꞌxba̱nu li ma̱usilal li quixba̱nu li rey Jeroboam ut incꞌaꞌ queꞌxcanab ma̱cobc chiru li Dios, 23 toj retal nak li Dios quixcanabeb re nak teꞌchapekꞌ xbaneb jalan tenamit joꞌ quiyeheꞌ reheb xbaneb lix profeta li Dios. Joꞌcan nak queꞌchapeꞌ ut queꞌcꞌameꞌ Asiria. Ut aran cuanqueb toj chalen anakcuan. 24 Lix reyeb laj Asiria quixcꞌameb laj Babilonia aran Israel. Quixcꞌameb laj Cuta, eb laj Ava ut eb laj Hamat, joꞌ eb ajcuiꞌ laj Sefarvaim. Quixqꞌueheb chi cua̱nc saꞌ eb li tenamit li cuanqueb saꞌ xcue̱nt Samaria saꞌ lix naꞌajeb laj Israel. 25 Nak queꞌxtiquib cua̱nc aran eb li cristian incꞌaꞌ queꞌxlokꞌoni li Ka̱cuaꞌ. Joꞌcan nak li Ka̱cuaꞌ quixtaklaheb li cakcoj chixcamsinquileb. 26 Quiyeheꞌ re lix reyeb laj Asiria: —Eb li cristian li xataklaheb chi cua̱nc Samaria incꞌaꞌ nequeꞌxnau xlokꞌoninquil li Dios li queꞌxlokꞌoniheb laj Israel li queꞌcuan Samaria. Xban nak incꞌaꞌ yo̱queb chixba̱nunquil li naraj li Ka̱cuaꞌ lix Dioseb, joꞌcan nak quixtaklaheb li cakcoj chixcamsinquileb.— 27 Ut lix reyeb laj Asiria quixye: —Sicꞌomak chak junak aj tij li xecꞌam chak Samaria. Li jun aꞌan ta̱xic cuiꞌchic Samaria. Ta̱cua̱nk aran ut tixcꞌut chiruheb chanru xlokꞌoninquil li Ka̱cuaꞌ lix Dioseb laj Israel, chan. 28 Joꞌcan nak queꞌxtakla jun reheb laj tij li qui-isi̱c Samaria chi cua̱nc Bet-el re tixcꞌut chiruheb li tenamit chanru nak teꞌxlokꞌoni li Ka̱cuaꞌ. 29 Abanan li junju̱nk chi tenamit queꞌxyi̱b lix dioseb ut queꞌxqꞌue saꞌ eb li cab li queꞌxyi̱b laj Israel saꞌ eb li naꞌajej li najt xteram aran Samaria. 30 Eb li queꞌchal Babilonia queꞌxyi̱b xjalam u̱ch laj Sucot-benot. Eb li queꞌchal Cuta queꞌxyi̱b xjalam u̱ch laj Nergal. Ut eb li queꞌchal Hamat queꞌxyi̱b xjalam u̱ch laj Asima. 31 Eb laj aveo queꞌxyi̱b xjalam u̱ch laj Nibhaz ut laj Tartac. Ut eb li queꞌchal Sefarvaim queꞌxcꞌat li ralal xcꞌajoleb chokꞌ xmayejeb re xlokꞌoninquil laj Adramelec ut laj Anamelec li cuib chi xdioseb laj Sefarvaim. 32 Queꞌxlokꞌoni li Ka̱cuaꞌ, abanan moco anchaleb ta xchꞌo̱l. Queꞌxxakab yalak ani chi cꞌanjelac chokꞌ aj tij saꞌ eb li naꞌajej li najt xteram li queꞌxlokꞌoni cuiꞌ lix dioseb. 33 Yo̱queb chixqꞌuebal xlokꞌal li Ka̱cuaꞌ, abanan yo̱queb ajcuiꞌ chixqꞌuebal xlokꞌal lix dioseb joꞌ cꞌaynakeb chixba̱nunquil saꞌ eb li tenamit li queꞌchal cuiꞌ chak. 34 Toj chalen anakcuan nequeꞌxba̱nu joꞌ queꞌxba̱nu chak najter. Incꞌaꞌ nequeꞌxlokꞌoni li Ka̱cuaꞌ chi moco nequeꞌxba̱nu li chakꞌrab ut li xtaklanquil, chi moco nequeꞌxba̱nu li cꞌaꞌru quixye li Ka̱cuaꞌ reheb li ralal xcꞌajol laj Jacob, li quixqꞌue “aj Israel” chokꞌ xcꞌabaꞌ. 35 Nak li Ka̱cuaꞌ quixba̱nu li contrato riqꞌuineb laj Israel quixchakꞌrabiheb ut quixye reheb: —Me̱lokꞌoni li jalanil dios, chi moco te̱cuikꞌib e̱rib chiruheb. Incꞌaꞌ texcꞌanjelak chiruheb chi moco texmayejak chiruheb. 36 La̱in li Ka̱cuaꞌ. La̱in quin-isin chak e̱re saꞌ li naꞌajej Egipto riqꞌuin xnimal incuanquil ut riqꞌuin sachba chꞌo̱lej. Caꞌaj cuiꞌ la̱in te̱xucua cuu. Tine̱lokꞌoni ut texmayejak chicuu. 37 Junelic te̱ba̱nu li cꞌaꞌru xinye e̱re. Te̱ba̱nu li chakꞌrab xinqꞌue e̱re. Te̱ba̱nu chixjunil li nacuaj joꞌ tzꞌi̱banbil retalil. Ut me̱lokꞌoni li jalanil dios. 38 Misach saꞌ e̱chꞌo̱l li contrato li xinba̱nu e̱riqꞌuin. Ut me̱lokꞌoni li jalanil dios. 39 Chexucua ban cuu la̱in li Ka̱cuaꞌ, le̱ Dios. La̱in li Ka̱cuaꞌ tincolok e̱re saꞌ rukꞌeb li xicꞌ nequeꞌiloc e̱re, chan li Dios. 40 Abanan eb li tenamit aꞌan incꞌaꞌ queꞌxba̱nu joꞌ quixye li Ka̱cuaꞌ. Toj yo̱queb ajcuiꞌ chixba̱nunquil lix najter naꞌlebeb. 41 Yo̱queb chixlokꞌoninquil li Ka̱cuaꞌ, abanan moco anchaleb ta xchꞌo̱l xban nak toj yo̱queb chixlokꞌoninquileb li yi̱banbil dios. Ut toj chalen anakcuan eb li ralal xcꞌajol nequeꞌxba̱nu joꞌ queꞌxba̱nu lix xeꞌto̱nil xyucuaꞌeb. |
© 2019, Wycliffe Bible Translators. All rights reserved.
Wycliffe Bible Translators, Inc.