2 Reyes 16 - Li Santil hu

¹ Yo̱ cuuklaju chihab roquic chokꞌ xreyeb laj Israel laj Peka li ralal laj Remalías nak laj Acaz li ralal laj Jotam qui-oc chokꞌ xreyeb laj Judá.

² Junmay chihab cuan re laj Acaz nak qui-oc chokꞌ rey. Cuaklaju chihab quicuan chokꞌ rey aran Jerusalén. Laj Acaz incꞌaꞌ quixba̱nu li us chiru li Ka̱cuaꞌ lix Dios joꞌ quixba̱nu laj David lix xeꞌto̱nil yucuaꞌ.

³ Quixba̱nu ban li incꞌaꞌ us joꞌ queꞌxba̱nu lix reyeb laj Israel toj retal quixqꞌue chokꞌ cꞌatbil mayej li ralal re xlokꞌoninquil li yi̱banbil dios. Quixba̱nu li ma̱usilal joꞌ queꞌxba̱nu li tenamit li queꞌisi̱c xban li Ka̱cuaꞌ saꞌ li naꞌajej li queꞌoc cuiꞌ eb laj Israel.

⁴ Quixqꞌue lix cꞌatbil mayej ut quixcꞌat li incienso saꞌ eb li naꞌajej li najt xteram ut saꞌ eb li tzu̱l ut rubel eb li cheꞌ li ni̱nk xmuheb.

⁵ Laj Rezín lix reyeb laj Siria ut laj Peka lix reyeb laj Israel queꞌco̱eb Jerusalén chi pletic riqꞌuin li rey Acaz. Abanan incꞌaꞌ queꞌru chi numta̱c saꞌ xbe̱n. Laj Peka, aꞌan li ralal laj Remalías.

⁶ Saꞌ eb li cutan aꞌan laj Rezín lix reyeb laj Siria quire̱chani li tenamit Elat ut quicana cuiꞌchic saꞌ xcue̱nt Edom. Quirisiheb saꞌ li naꞌajej aꞌan chixjunileb laj Judá. Ut eb laj Edom queꞌco̱eb chi cua̱nc Elat. Toj chalen anakcuan cuanqueb aran.

⁷ Laj Acaz lix reyeb laj Judá quixtaklaheb lix takl riqꞌuin laj Tiglat-pileser lix reyeb laj Asiria. Quixye re: —La̱in aj cꞌanjel cha̱cuu. Chanchanin a̱cualal. Ba̱nu usilal, cha̱lkat chintenkꞌanquil chixcolbal cuib saꞌ rukꞌeb lix reyeb laj Siria ut lix reyeb laj Israel xban nak eb aꞌan teꞌraj numta̱c saꞌ inbe̱n, chan.

⁸ Ut li rey Acaz quixchap li oro ut li plata li cuan saꞌ li templo, joꞌ ajcuiꞌ li terto xtzꞌak li cuan saꞌ rochoch li rey ut quixsi re lix reyeb laj Asiria.

⁹ Lix reyeb laj Asiria quixba̱nu li cꞌaꞌru quiraj li rey Acaz. Quipletic riqꞌuineb laj Siria ut quire̱chani li tenamit Damasco. Quixcamsi li rey Rezín ut quixchapeb li cuanqueb Damasco ut quixcꞌameb chi pre̱xil toj saꞌ li tenamit Kir.

¹⁰ Tojoꞌnak li rey Acaz co̱ Damasco chixtaubal li rey Tiglat-pileser lix reyeb laj Asiria. Nak quicuulac Damasco quiril li artal cuan aran. Quixtakla retalil lix yi̱banquil riqꞌuin laj Urías laj tij re nak tixyi̱b jun li artal juntakꞌe̱t riqꞌuin aꞌan.

¹¹ Joꞌcan nak laj Urías laj tij quixyi̱b jun li artal juntakꞌe̱t riqꞌuin li cuan Damasco joꞌ li retalil li quitakla̱c xban li rey Acaz. Nak quisukꞌi chak li rey Acaz, ac xya̱loꞌ li artal.

¹² Nak quicuulac saꞌ lix tenamit, li rey Acaz quiril li artal, quinachꞌoc riqꞌuin ut quixcꞌat lix mayej saꞌ xbe̱n.

¹³ Quixmayeja lix cꞌatbil mayej, joꞌ ajcuiꞌ lix mayej re li ru li trigo ut li uvas. Ut quixrach lix quiqꞌuel li xul li quixmayeja chiru li artal re xcꞌambaleb rib saꞌ usilal.

¹⁴ Quirisi saꞌ xnaꞌaj li artal li yi̱banbil riqꞌuin bronce li cuan chiru lix templo li Ka̱cuaꞌ ut quixqꞌue chixcꞌatk li artal li toj quixyi̱b laj Urías saꞌ li norte. Li artal bronce quicana saꞌ xyi li acꞌ artal ut lix templo li Ka̱cuaꞌ.

¹⁵ Li rey Acaz quixtakla xyebal re laj Urías laj tij: —Chiru li ekꞌela ta̱cꞌat li mayej saꞌ xbe̱n li nimla artal aꞌin, joꞌ ajcuiꞌ li mayej re ecuu. Ta̱cꞌat lin mayej la̱in joꞌ eb ajcuiꞌ lix mayejeb li cristian ut te̱qꞌue ajcuiꞌ le̱ mayej vino. Ta̱rach saꞌ xbe̱n li artal aꞌin chixjunil lix quiqꞌuel li xul li teꞌmayeja̱k. Abanan li artal yi̱banbil riqꞌuin bronce, ta̱cꞌanjelak chicuu la̱in re tinpatzꞌ cꞌaꞌru us tinba̱nu, chan.

¹⁶ Ut laj Urías laj tij quixba̱nu chixjunil li quitakla̱c cuiꞌ xban li rey Acaz.

¹⁷ Li rey Acaz quixjuqꞌueb li carre̱t yi̱banbil riqꞌuin bronce li queꞌcꞌanjelac saꞌ li templo ut quirisiheb li pila li cuanqueb saꞌ xbe̱neb li carre̱t. Quirisi ajcuiꞌ li nimal pila bronce li cuan saꞌ xbe̱neb li cablaju chi cuacax yi̱banbil riqꞌuin bronce. Quixqꞌue li nimla pila saꞌ xbe̱n jun li cimiento yi̱banbil riqꞌuin pec.

¹⁸ Ut quirisi ajcuiꞌ lix naꞌaj lix cꞌojariba̱l li rey ut quixtzꞌap li oqueba̱l re li templo li qui-oc cuiꞌ li rey. Quixba̱nu chi joꞌcan re nak ta̱sahokꞌ saꞌ xchꞌo̱l lix reyeb laj Asiria.

¹⁹ Chixjunil li quixba̱nu li rey Acaz tzꞌi̱banbil retalil saꞌ li hu Crónicas li tzꞌi̱banbil cuiꞌ retalil li quilajeꞌxba̱nu lix reyeb laj Judá.

²⁰ Li rey Acaz quicam ut coxtau lix xeꞌto̱nil yucuaꞌ. Quimukeꞌ saꞌ lix tenamit laj David saꞌ li naꞌajej li queꞌmukeꞌ cuiꞌ eb li rey. Ut aꞌ chic laj Ezequías li ralal qui-oc chokꞌ rey chokꞌ re̱kaj.