2 Reyes 14 - Li Santil hu

¹ Yo̱ xcab chihab roquic chokꞌ xreyeb laj Israel laj Joás, li ralal laj Joacaz, nak qui-oc laj Amasías li ralal laj Joás chokꞌ xreyeb laj Judá.

² O̱b xcaꞌcꞌa̱l chihab cuan re laj Amasías nak qui-oc chokꞌ rey. Bele̱b xcaꞌcꞌa̱l chihab quicuan saꞌ xcuanquil saꞌ li tenamit Jerusalén. Lix naꞌ xJoadán xcꞌabaꞌ. Jerusalén xtenamit.

³ Laj Amasías quixba̱nu li us chiru li Ka̱cuaꞌ. Abanan incꞌaꞌ quicuan saꞌ xya̱lal chi tzꞌakal joꞌ li rey David lix xeꞌto̱nil yucuaꞌ. Quixba̱nu ban joꞌ quixba̱nu laj Joás lix yucuaꞌ.

⁴ Incꞌaꞌ quirisi li naꞌajej li najt xteram li queꞌlokꞌoni̱c cuiꞌ li yi̱banbil dios. Ut eb li tenamit toj yo̱queb chixqꞌuebal lix cꞌatbil mayej ut yo̱queb chixcꞌatbal li incienso saꞌ eb li naꞌajej aꞌan.

⁵ Nak ac xakxo saꞌ xnaꞌaj lix cuanquil li rey Amasías quixcamsiheb li queꞌcamsin re lix yucuaꞌ nak cuan chokꞌ rey. Aꞌaneb li queꞌcꞌanjelac chiru.

⁶ Abanan incꞌaꞌ quixcamsiheb li ralal xcꞌajoleb. Quixba̱nu ban li quixye li Ka̱cuaꞌ joꞌ tzꞌi̱banbil saꞌ li chakꞌrab li quiqꞌueheꞌ re laj Moisés nak li Ka̱cuaꞌ quixye: —Eb li naꞌbej yucuaꞌbej incꞌaꞌ teꞌcamsi̱k xban li ma̱c li queꞌxba̱nu li alal cꞌajolbej, chi moco li alalbej cꞌajolbej teꞌcamsi̱k xban lix ma̱queb lix naꞌ xyucuaꞌeb. Li junju̱nk ta̱ca̱mk xban li ma̱c tixba̱nu.—

⁷ Laj Amasías quixcamsiheb laje̱b mil chi soldado aj Edom saꞌ li ru takꞌa cuan cuiꞌ li atzꞌam. Saꞌ li ple̱t aꞌan quire̱chani li tenamit Sela ut Jocteel quixqꞌue chokꞌ xcꞌabaꞌ toj chalen anakcuan.

⁸ Li rey Amasías quixtakla xyebal re laj Joás lix reyeb laj Israel nak ta̱cha̱lk chi pletic riqꞌuin. Laj Joás, aꞌan li ralal laj Joacaz ut ri laj Jehú.

⁹ Abanan laj Joás lix reyeb laj Israel quixtakla xyebal re laj Amasías lix reyeb laj Judá chi joꞌcaꞌin: —Saꞌ jun li cutan jun li to̱n qꞌuix cuan aran Líbano quixtakla xyebal re li cheꞌ cedro li a̱tin aꞌin, “Qꞌue la̱ rabin chokꞌ rixakil li cualal,” chan. Ut jun li joskꞌ aj xul quinumeꞌ ut quixyekꞌi saꞌ rok li jun to̱n chi qꞌuix.

¹⁰ At rey Amasías, la̱in ninnau nak xatnumta saꞌ xbe̱neb laj Edom. Joꞌcan nak yo̱cat chixnimobresinquil a̱cuib. Ma̱cꞌaꞌ nacuaj re nak ta̱nimobresi a̱cuib. Cana̱kat saꞌ la̱ tenamit. ¿Cꞌaꞌru aj e nak ta̱chꞌic a̱cuib saꞌ chꞌaꞌajquilal la̱at ut ta̱chꞌiqueb laj Judá saꞌ chꞌaꞌajquilal? chan li rey Joás.

¹¹ Abanan li rey Amasías incꞌaꞌ qui-abin chiru. Joꞌcan nak laj Joás lix reyeb laj Israel co̱ chi pletic riqꞌuineb laj Judá aran Bet-semes li cuan saꞌ xcue̱nt Judá.

¹² Eb lix soldado laj Joás, lix reyeb laj Israel, queꞌnumta saꞌ xbe̱neb lix soldado laj Amasías, lix reyeb laj Judá. Ut eb li soldado aj Judá queꞌe̱lelic ut queꞌco̱eb saꞌ rochocheb.

¹³ Laj Joás lix reyeb laj Israel quixchap laj Amasías lix reyeb laj Judá saꞌ li tenamit Bet-semes. Laj Amasías, aꞌan li ralal laj Joás ut ri laj Ocozías. Chirix aꞌan laj Joás lix reyeb laj Israel co̱ Jerusalén. Queꞌxjucꞌ jun ciento metro riqꞌuin ca̱cꞌa̱l metro (180) li tzꞌac li sutsu cuiꞌ li tenamit Jerusalén. Naticla cuan cuiꞌ li oqueba̱l Efraín ut nacuulac cuan cuiꞌ li oqueba̱l li cuan saꞌ xuc.

¹⁴ Li rey Joás quixcꞌam chixjunil li oro ut li plata joꞌ eb ajcuiꞌ chixjunil li secꞌ li quixtau saꞌ li templo. Quixcꞌam ajcuiꞌ chixjunil li terto xtzꞌak li cuan saꞌ rochoch li rey. Ut quixcꞌameb chi pre̱xil nabaleb li cristian nak quisukꞌi cuiꞌchic Samaria.

¹⁵ Chixjunil li quixba̱nu li rey Joás, joꞌ ajcuiꞌ li pletic li quixba̱nu riqꞌuin laj Amasías lix reyeb laj Judá, tzꞌi̱banbil retalil saꞌ li hu Crónicas, li tzꞌi̱banbil cuiꞌ retalil li quilajeꞌxba̱nu lix reyeb laj Israel.

¹⁶ Laj Joás lix reyeb laj Israel quicam ut coxtau lix xeꞌto̱nil yucuaꞌ. Quimukeꞌ aran Samaria bar queꞌmukeꞌ cuiꞌ lix reyeb laj Israel. Ut aꞌ chic laj Jeroboam li ralal qui-oc chokꞌ rey chokꞌ re̱kaj.

¹⁷ Ut laj Amasías, li ralal laj Joás, lix reyeb laj Judá, oꞌlaju chihab chic quicuan chi yoꞌyo nak ac xcam laj Joás li ralal laj Joacaz. Laj Joás, aꞌan lix reyeb laj Israel.

¹⁸ Chixjunil li quixba̱nu li rey Amasías tzꞌi̱banbil retalil saꞌ li hu Crónicas li tzꞌi̱banbil cuiꞌ retalil li quilajeꞌxba̱nu lix reyeb laj Judá.

¹⁹ Eb li tenamit queꞌxcꞌu̱b ru chanru nak teꞌxcamsi laj Amasías aran Jerusalén. Laj Amasías quie̱lelic chiruheb. Abanan queꞌxta̱ke toj saꞌ li tenamit Laquis ut aran queꞌxcamsi.

²⁰ Nak ac xeꞌxcamsi, queꞌxcꞌam Jerusalén chirix cacua̱y ut quimukeꞌ saꞌ lix tenamit laj David, li queꞌmukeꞌ cuiꞌ lix xeꞌto̱nil xyucuaꞌ.

²¹ Chirix chic aꞌan, eb li tenamit queꞌxxakab laj Azarías chokꞌ xreyeb laj Judá chokꞌ re̱kaj laj Amasías lix yucuaꞌ. Cuaklaju chihab cuan re laj Azarías nak quixakaba̱c chokꞌ rey.

²² Laj Azarías, aꞌan li quixyi̱b cuiꞌchic li tenamit Elat ut quixkꞌaxtesi reheb laj Judá chirix lix camic lix yucuaꞌ.

Laj Jeroboam II qui-oc chokꞌ xreyeb laj Israel

²³ Yo̱ oꞌlaju chihab roquic chokꞌ rey laj Amasías li ralal laj Joás li quicuan chokꞌ xreyeb laj Judá nak laj Jeroboam qui-oc chokꞌ xreyeb laj Israel chokꞌ re̱kaj laj Joás lix yucuaꞌ. Jun roxcꞌa̱l (41) chihab quicuan saꞌ xcuanquil aran Samaria.

²⁴ Laj Jeroboam quixba̱nu li incꞌaꞌ us chiru li Ka̱cuaꞌ. Junelic quixba̱nu li ma̱usilal joꞌ quixba̱nu laj Jeroboam li ralal laj Nabat li quicꞌamoc xbeheb laj Israel chi ma̱cobc.

²⁵ Laj Jeroboam quixyi̱b cuiꞌchic lix nuba̱l lix chꞌochꞌeb laj Israel joꞌ nak quicuan junxil. Naticla saꞌ li oqueba̱l re Hamat saꞌ li norte ut nacuulac toj saꞌ li palau li cuan Arabá. Quixba̱nu joꞌ quixye li Ka̱cuaꞌ lix Dioseb laj Israel re li profeta Jonás li ralal laj Amitai, li chalenak chak saꞌ li naꞌajej Gat-hefer.

²⁶ Li Ka̱cuaꞌ quixqꞌue retal nak kꞌaxal ra yo̱queb chixcꞌulbal eb laj Israel ut ma̱ jun reheb naru natenkꞌan reheb xban nak chixjunileb yo̱queb chi cꞌuluc raylal.

²⁷ Li Ka̱cuaꞌ incꞌaꞌ quixye nak teꞌsachekꞌ ruheb laj Israel chi junaj cua. Joꞌcan nak quixtakla laj Jeroboam li ralal laj Joás chixcolbaleb.

²⁸ Chixjunil li quixba̱nu laj Jeroboam, ut li pletic li quixba̱nu xban xcacuilal xchꞌo̱l tzꞌi̱banbil retalil saꞌ li hu Crónicas li tzꞌi̱banbil cuiꞌ retalil li quilajeꞌxba̱nu lix reyeb laj Israel. Ut tzꞌi̱banbil ajcuiꞌ retalil chanru nak quire̱chani cuiꞌchic chokꞌ reheb laj Israel eb li tenamit Damasco ut Hamat li queꞌcuan rubel xcuanquileb laj Judá.

²⁹ Laj Jeroboam quicam ut coxtau lix xeꞌto̱nil yucuaꞌ. Quimukeꞌ saꞌ li naꞌajej li queꞌmukeꞌ cuiꞌ lix reyeb laj Israel. Ut aꞌ chic laj Zacarías li ralal qui-oc chokꞌ xreyeb laj Israel chokꞌ re̱kaj.