2 Reyes 13 - Li Santil hu

¹ Yo̱ chic oxib xcaꞌcꞌa̱l chihab roquic chokꞌ rey saꞌ li tenamit Judá laj Joás li ralal laj Ocozías nak laj Joacaz li ralal laj Jehú qui-oc chokꞌ xreyeb laj Israel. Ut cuuklaju chihab quicuan chi takla̱nc saꞌ xbe̱neb laj Israel aran Samaria.

² Laj Joacaz quixba̱nu li incꞌaꞌ us chiru li Ka̱cuaꞌ joꞌ quixba̱nu laj Jeroboam, li ralal laj Nabat, li quicꞌamoc xbeheb laj Israel chixba̱nunquil li incꞌaꞌ us. Laj Joacaz incꞌaꞌ quixcanab xba̱nunquil li ma̱usilal.

³ Xban li ma̱usilal li queꞌxba̱nu, quichal xjoskꞌil li Ka̱cuaꞌ Dios saꞌ xbe̱neb laj Israel. Najt quixcanabeb rubel xcuanquil laj Hazael lix reyeb laj Siria joꞌ ajcuiꞌ laj Ben-adad li ralal.

⁴ Laj Joacaz quitijoc chiru li Ka̱cuaꞌ ut quixtzꞌa̱ma xtenkꞌanquileb. Ut li Ka̱cuaꞌ quixsume lix tij xban nak quiril nak yo̱queb chi rahobtesi̱c laj Israel xban laj Hazael lix reyeb laj Siria.

⁵ Li Dios quixye nak tixqꞌue jun li cui̱nk re ta̱isi̱nk reheb laj Israel rubel xcuanquileb laj Siria re nak naru teꞌcua̱nk cuiꞌchic saꞌ lix naꞌajeb saꞌ xya̱lal chi ma̱cꞌaꞌ ta̱chꞌiꞌchꞌiꞌi̱nk reheb joꞌ nak queꞌcuan junxil.

⁶ Abanan eb laj Israel incꞌaꞌ queꞌxcanab xba̱nunquil li ma̱c li quicꞌameꞌ cuiꞌ xbeheb xbaneb li ralal xcꞌajol laj Jeroboam. Queꞌxba̱nu ban li ma̱usilal chiru li Ka̱cuaꞌ ut incꞌaꞌ queꞌrisi lix jalam u̱ch lix Asera aran Samaria.

⁷ Ma̱cꞌaꞌ chic xsoldado laj Joacaz queꞌcana. Mero ciento aj chic lix soldado li nequeꞌxic chirix cacua̱y, laje̱b aj chic lix carruaje ut laje̱b mil aj chic li soldado li nequeꞌxic chi rokeb. Ut eb li jun chꞌol chic queꞌsacheꞌ ruheb xbaneb laj Asiria. Chanchan nak nayekꞌi̱c li poks saꞌ chꞌochꞌ nak queꞌsacheꞌ ruheb.

⁸ Chixjunil li quixba̱nu laj Joacaz, joꞌ ajcuiꞌ li quixba̱nu riqꞌuin xcacuilal xchꞌo̱l tzꞌi̱banbil retalil saꞌ li hu Crónicas, li tzꞌi̱banbil cuiꞌ retalil li quilajeꞌxba̱nu lix reyeb laj Israel.

⁹ Laj Joacaz quicam ut coxtau lix xeꞌto̱nil yucuaꞌ ut quimukeꞌ aran Samaria. Ut aꞌ chic laj Joás li ralal qui-oc chokꞌ rey chokꞌ re̱kaj.

¹⁰ Nak yo̱ cuuklaju xcaꞌcꞌa̱l chihab roquic chokꞌ rey aran Judá laj Joás li ralal laj Ocozías, laj Joás li ralal laj Joacaz qui-oc chokꞌ xrey eb laj Israel. Cuaklaju chihab quicuan saꞌ xcuanquil aran Samaria.

¹¹ Laj Joás li ralal laj Joacaz quixba̱nu li ma̱usilal chiru li Ka̱cuaꞌ. Incꞌaꞌ quixcanab xba̱nunquil li ma̱c li quixba̱nu li rey Jeroboam, li ralal laj Nabat, li quicꞌamoc xbeheb laj Israel chi ma̱cobc chiru li Ka̱cuaꞌ.

¹² Chixjunil li quixba̱nu li rey Joás ut chanru nak quixqꞌue xchꞌo̱l chi pletic riqꞌuin laj Amasías lix reyeb laj Judá, tzꞌi̱banbil retalil saꞌ li hu Crónicas, li tzꞌi̱banbil cuiꞌ retalil li quilajeꞌxba̱nu lix reyeb laj Israel.

¹³ Quicam laj Joás ut coxtau lix xeꞌto̱nil yucuaꞌ ut quimukeꞌ Samaria li queꞌmukeꞌ cuiꞌ lix reyeb laj Israel. Ut aꞌ chic laj Jeroboam qui-oc chokꞌ rey chokꞌ re̱kaj.

¹⁴ Saꞌ eb li cutan aꞌan li profeta Eliseo nim xyajel ut ca̱mc re. Laj Joás lix reyeb laj Israel quicuulac riqꞌuin. Ta̱ya̱bak nak quixye re: —At Eliseo, la̱at chanchanat lin yucuaꞌ. La̱at nacatcoloc reheb laj Israel, chan.

¹⁵ Laj Eliseo quixye re: —Chap la̱ tzimaj ut chap cuib oxib li jutzꞌju̱quil cheꞌ re ta̱cut, chan. Ut li rey quixchap lix tzimaj ut li jutzꞌju̱quil cheꞌ.

¹⁶ Li profeta Eliseo quixye re li rey nak tixqꞌue li rukꞌ saꞌ xbe̱n li tzimaj. Ut li rey quixqꞌue li rukꞌ saꞌ xbe̱n li tzimaj. Ut laj Eliseo quixqꞌue li rukꞌ saꞌ xbe̱n li rukꞌ li rey.

¹⁷ Laj Eliseo quixye re li rey: —Te li ventana li cuan saꞌ li este, chan. Nak quixte li ventana, laj Eliseo quixye re: —Cutun riqꞌuin la̱ tzimaj, chan. Ut li rey quicutuc riqꞌuin lix tzimaj. Ut li profeta quixye re: —Li tzimaj aꞌin, aꞌan retalil nak li Ka̱cuaꞌ ta̱colok e̱re. Li tzimaj aꞌin, aꞌan retalil nak la̱ex aj Israel texnumta̱k saꞌ xbe̱neb laj Siria. La̱ex texpletik riqꞌuineb laj Siria saꞌ li naꞌajej Afec toj retal te̱sach ruheb, chan.

¹⁸ Ut laj Eliseo quixye re li rey nak tixtochꞌ li chꞌochꞌ riqꞌuin lix tzimaj. Ut li rey quixtochꞌ li chꞌochꞌ oxib sut.

¹⁹ Quichal xjoskꞌil li profeta Eliseo saꞌ xbe̱n li rey ut quixye re: —Cui ta xatochꞌ o̱bak sut malaj ut cuakibak sut li chꞌochꞌ, la̱at raj tatnumta̱k saꞌ xbe̱neb laj Siria toj retal ta̱sach ruheb chi junaj cua. Abanan anakcuan oxib sut ajcuiꞌ tatnumta̱k saꞌ xbe̱neb laj Siria, chan.

²⁰ Ut li profeta Eliseo quicam ut quimukeꞌ. Saꞌ eb li cutan aꞌan rajlal chihab nequeꞌchal laj moabitas chi elkꞌa̱c saꞌ lix naꞌajeb laj Israel.

²¹ Saꞌ jun li cutan eb laj Israel yo̱queb chixmukbal jun li camenak. Queꞌril nak yo̱queb chak chi cha̱lc laj Moab. Cuanqueb chak xchꞌi̱chꞌ saꞌ rukꞌeb. Eb laj Israel queꞌxcut li camenak saꞌ li mukleba̱l li mukbil cuiꞌ laj Eliseo. Nak li camenak quinak saꞌ xbe̱n lix bakel li profeta Eliseo, li camenak quiyoꞌla cuiꞌchic ut quixakli.

²² Laj Hazael, lix reyeb laj Siria, quixrahobtesiheb laj Israel joꞌ najtil quicuan laj Joacaz chokꞌ xreyeb laj Israel.

²³ Abanan li Ka̱cuaꞌ Dios quiruxta̱naheb ru laj Israel ut quiril xtokꞌoba̱leb ru. Incꞌaꞌ quixcanabeb chi sachecꞌ ruheb xban li contrato li quixba̱nu riqꞌuineb laj Abraham, laj Isaac ut laj Jacob. Incꞌaꞌ quixtzꞌekta̱naheb toj chalen anakcuan.

²⁴ Quicam laj Hazael lix reyeb laj Siria. Ut aꞌ chic laj Ben-adad li ralal qui-oc chokꞌ rey chokꞌ re̱kaj.

²⁵ Ut laj Joás li ralal laj Hazael, quixmakꞌ chiru laj Ben-adad chixjunil li tenamit li quixmakꞌ laj Ben-adad chiru laj Hazael lix yucuaꞌ laj Joás. Oxib sut quinumta laj Joás saꞌ xbe̱n laj Ben-adad.