Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

2 Reyes 12 - Li Santil hu

1 Nak yo̱ xcuuk chihab roquic chokꞌ rey laj Jehú aran Israel, laj Joás qui-oc chokꞌ rey aran Judá. Caꞌcꞌa̱l chihab quicuan saꞌ xcuanquil Jerusalén. Lix naꞌ laj Joás, aꞌan lix Sibia, Beerseba xtenamit.

2 Laj Joás quixba̱nu li us chiru li Ka̱cuaꞌ xban nak laj Joiada laj tij junelic yo̱ chixqꞌuebal xnaꞌleb.

3 Laj Joás us quixba̱nu, abanan incꞌaꞌ quirisiheb li naꞌajej li najt xteram li nequeꞌlokꞌoni̱c cuiꞌ li yi̱banbil dios. Eb li tenamit toj yo̱queb chixcꞌatbal lix mayej ut yo̱queb chixcꞌatbal lix incienso saꞌ xbe̱neb li artal li cuanqueb aran.

4 Saꞌ jun li cutan laj Joás quixye reheb laj tij: —Te̱xoc ut te̱chꞌutub ru chixjunil li tumin li naqꞌueman saꞌ lix templo li Ka̱cuaꞌ, joꞌ ajcuiꞌ li joꞌ qꞌuial li tento teꞌxtoj li junju̱nk joꞌ ajcuiꞌ li na-ala saꞌ xchꞌo̱leb xqꞌuebal.

5 Li junju̱nk chi aj tij ta̱cꞌuluk re li tumin li naqꞌueman. Ut li tumin aꞌan ta̱cꞌanjelak re xyi̱banquil chi us li templo bar yi̱ba̱c naraj.—

6 Nak ac yo̱ chic oxib xcaꞌcꞌa̱l chihab roquic laj Joás chokꞌ rey, toj ma̱jiꞌ ajcuiꞌ queꞌxyi̱b chi us li templo eb laj tij.

7 Joꞌcan nak laj Joás quixbok laj Joiada, lix yucuaꞌileb laj tij, ut quixbokeb ajcuiꞌ li jun chꞌoleb chic aj tij. Quixpatzꞌ reheb: —¿Cꞌaꞌut nak toj ma̱jiꞌ nequeyi̱b li templo? Chalen anakcuan incꞌaꞌ chic te̱cꞌul li tumin li nequeꞌxqꞌue li tenamit. Te̱kꞌaxtesi ban li tumin re nak ta̱yi̱ba̱k chi us li templo, chan.

8 Eb laj tij queꞌxcꞌul xchꞌo̱l nak incꞌaꞌ chic teꞌxcꞌul li tumin. Ut queꞌxcꞌul ajcuiꞌ xchꞌo̱leb nak ma̱cuaꞌeb aꞌan li teꞌjolomi̱nk re li cꞌanjel re xyi̱banquil li templo.

9 Ut laj Joiada lix be̱nil aj tij quixsicꞌ jun li ca̱x. Quixhop saꞌ xbe̱n lix tzꞌapbal re. Ut quixqꞌue li ca̱x chixcꞌatk li artal saꞌ li nim li nequeꞌoc cuiꞌ saꞌ lix templo li Ka̱cuaꞌ. Ut eb laj tij li nequeꞌcꞌacꞌalen re li oqueba̱l re li templo queꞌxqꞌue chi saꞌ li ca̱x chixjunil li tumin li nequeꞌxqꞌue li tenamit.

10 Nak ac cuan nabal li tumin saꞌ li ca̱x li cuan saꞌ li templo, naxic laj tzꞌi̱b li nacꞌanjelac chiru li rey rochben li xbe̱nil aj tij. Nequeꞌrajla li tumin ut nequeꞌxxoc.

11 Nak ac xeꞌxtzꞌi̱ba retalil li tumin, nequeꞌxkꞌaxtesi reheb li nequeꞌjolomin re li cꞌanjel saꞌ lix templo li Ka̱cuaꞌ. Ut aꞌan eb chic li nequeꞌtojoc reheb laj cablanel ut eb laj pechꞌ,

12 joꞌqueb ajcuiꞌ laj tzꞌac ut eb li nequeꞌjoroc pec. Ut nequeꞌxqꞌue ajcuiꞌ xtzꞌak li cheꞌ ut li pec li ta̱cꞌanjelak re xyi̱banquil li templo.

13 Abanan li tumin aꞌan incꞌaꞌ queꞌrocsi re xyi̱banquil li secꞌ plata, chi moco li ucꞌal, chi moco li trompeta. Incꞌaꞌ quicꞌanjelac re xyi̱banquil li chꞌi̱chꞌ li nacꞌanjelac re xyi̱banquil li lámparas, chi moco quicꞌanjelac re li cꞌaꞌak chic re ru yi̱banbil riqꞌuin oro ut plata li ta̱cꞌanjelak saꞌ lix templo li Ka̱cuaꞌ.

14 Quikꞌaxtesi̱c ban reheb li nequeꞌjolomin re li cꞌanjel re nak chiru li tumin aꞌan teꞌxyi̱b lix templo li Ka̱cuaꞌ.

15 Incꞌaꞌ tento nak nequeꞌxbir rix li tumin li joꞌ qꞌuial nequeꞌxsach xban nak eb li cui̱nk aꞌan queꞌcꞌanjelac saꞌ xya̱lal ut ti̱queb xchꞌo̱l.

16 Ut li tumin li nequeꞌxqꞌue re xpatzꞌbal xcuybal xma̱queb, aꞌan incꞌaꞌ nequeꞌxqꞌue saꞌ li ca̱x xban nak li tumin aꞌan nacꞌanjelac chiruheb laj tij.

17 Saꞌ eb li cutan aꞌan laj Hazael lix reyeb laj Siria co̱ saꞌ li tenamit Gat chi pletic ut quire̱chani li tenamit. Ut quixye ajcuiꞌ nak ta̱xic chi pletic aran Jerusalén.

18 Ut laj Joás lix reyeb laj Judá, quixchꞌutub chixjunil li mayej li ac kꞌaxtesinbil chi cꞌanjelac saꞌ li templo xbaneb laj Josafat, laj Joram, ut laj Ocozías lix xeꞌto̱nil yucuaꞌ, li queꞌcuan chok xreyeb laj Judá junxil. Ut laj Joás quixcꞌam li oro li cꞌu̱lanbil saꞌ li templo ut saꞌ li palacio. Quixcꞌam ajcuiꞌ li quixxoc aꞌan. Ut quixqꞌue chixjunil re laj Hazael. Joꞌcan nak laj Hazael incꞌaꞌ chic quipletic riqꞌuineb laj Jerusalén.

19 Chixjunil li quixba̱nu li rey Joás tzꞌi̱banbil retalil saꞌ li hu Crónicas li tzꞌi̱banbil cuiꞌ retalil li quilajeꞌxba̱nu lix reyeb laj Judá.

20 Eb li nequeꞌcꞌanjelac chiru li rey Joás queꞌxcꞌu̱b ru chanru nak teꞌxcamsi. Ut queꞌxcamsi laj Joás saꞌ li cab li cuan Milo nak yo̱ chi xic Sila.

21 Laj Josacar, li ralal laj Simeat ut laj Jozabad, li ralal laj Somer, li queꞌcꞌanjelac chiru laj Joás, aꞌaneb li queꞌcamsin re. Nak quicam, laj Joás quimukeꞌ saꞌ li naꞌajej li queꞌmukeꞌ cuiꞌ lix xeꞌto̱nil xyucuaꞌ saꞌ lix tenamit laj David. Ut aꞌ chic laj Amasías li ralal qui-oc chokꞌ rey chokꞌ re̱kaj.

© 2019, Wycliffe Bible Translators. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ