2 Reyes 11 - Li Santil hu

¹ Nak lix Atalía lix naꞌ laj Ocozías quirabi resil nak quicamsi̱c laj Ocozías, quixtakla xcamsinquil chixjunileb li ralal xcꞌajol li rey Ocozías, lix yum.

² Abanan lix Josaba lix rabin li rey Joram quixcol laj Joás li ralal laj Ocozías. Quirisi saꞌ xya̱nkeb li ralal laj Ocozías li oqueb re chi camsi̱c. Quixcꞌam laj Joás rochben li ixk li na-iloc re ut quixmukeb saꞌ jun li cuariba̱l re nak incꞌaꞌ teꞌtaꞌekꞌ xban lix Atalía. Joꞌcaꞌin nak lix Josaba li ranab laj Ocozías quixcol laj Joás re nak incꞌaꞌ ta̱camsi̱k.

³ Lix Josaba quixmuk laj Joás saꞌ lix templo li Ka̱cuaꞌ ut aꞌan qui-iloc re chiru cuakib chihab nak lix Atalía cuan chokꞌ reina saꞌ li tenamit.

⁴ Nak yo̱ chic xcuuk chihab laj Joiada laj tij quixtakla xbokbaleb li nequeꞌtaklan saꞌ xbe̱neb li soldado ut eb li capitán joꞌ eb ajcuiꞌ li soldado li nequeꞌcꞌacꞌalen. Nak queꞌcuulac, quirocsiheb saꞌ lix templo li Ka̱cuaꞌ. Nak cuanqueb aran queꞌxcꞌu̱b ru cꞌaꞌru teꞌxba̱nu ut queꞌxba̱nu li juramento saꞌ xcꞌabaꞌ li Ka̱cuaꞌ. Tojoꞌnak laj Joiada quixcꞌut chiruheb laj Joás li ralal li rey Ocozías.

⁵ Ut quixye reheb: —Te̱cauresi oxib chꞌu̱tal chi soldados li teꞌcꞌanjelak saꞌ li hiloba̱l cutan. Jun chꞌu̱tal te̱qꞌueheb saꞌ li palacio chi cꞌacꞌale̱nc.

⁶ Li jun chꞌu̱tal chic te̱qꞌueheb saꞌ li oqueba̱l re li templo Shur xcꞌabaꞌ. Ut li rox chꞌu̱tal te̱qꞌueheb saꞌ li oqueba̱l li cuan chak chirix li templo.

⁷ Ut li cuib chꞌu̱tal li incꞌaꞌ nequeꞌcꞌanjelac saꞌ li hiloba̱l cutan, eb aꞌan teꞌcꞌacꞌale̱nk saꞌ lix templo li Dios chixcꞌacꞌalenquil li rey Joás.

⁸ Sutsu̱k e̱ban li naꞌajej li cuan cuiꞌ li rey. Cua̱nk saꞌ le̱ rukꞌ le̱ chꞌi̱chꞌ nak yo̱kex chixcꞌacꞌalenquil. Texxic chirix yalak bar ta̱xic. Li ani ta̱raj numecꞌ saꞌ e̱ya̱nk ta̱camsi̱k, chan.

⁹ Ut eb li nequeꞌtaklan saꞌ xbe̱neb li soldado queꞌxba̱nu joꞌ quixye laj Joiada laj tij. Queꞌxcꞌam riqꞌuin chixjunileb li soldado li nequeꞌcꞌacꞌalen saꞌ li hiloba̱l cutan, joꞌ eb ajcuiꞌ li incꞌaꞌ nequeꞌcꞌacꞌalen saꞌ li hiloba̱l cutan.

¹⁰ Laj tij quixkꞌaxtesi reheb li nequeꞌtaklan saꞌ xbe̱neb li soldado li lanza ut li chꞌi̱chꞌ li nequeꞌxcol cuiꞌ re xchꞌo̱leb. Li chꞌi̱chꞌ aꞌan, aꞌan li queꞌcꞌanjelac re li rey David ut xocxo̱queb saꞌ li templo.

¹¹ Eb li soldado queꞌxtau xnaꞌajeb saꞌ li templo. Jun tzol queꞌxqꞌue rib saꞌ li nim ut jun tzol chic queꞌxqꞌue rib saꞌ li tzꞌe chi xjun sutam li artal. Chixjunju̱nkaleb cuan lix chꞌi̱chꞌeb saꞌ rukꞌeb ut yo̱queb chixcꞌacꞌalenquil li rey.

¹² Nak cuanqueb saꞌ xnaꞌajeb li soldado, laj Joiada quirisi chak laj Joás li ralal li rey Ocozías. Quixqꞌue li corona saꞌ xjolom retalil nak xeꞌxxakab chokꞌ rey. Ut quixqꞌue saꞌ rukꞌ li hu li tzꞌi̱banbil cuiꞌ li chakꞌrab. Quixqꞌue li aceite saꞌ xjolom ut queꞌxxakab chokꞌ xreyeb. Queꞌxpokꞌpokꞌi li rukꞌeb ut queꞌxjap re chixyebal: —¡Najt taxak chicua̱nk li karey! chanqueb.

¹³ Lix Atalía quirabi nak yo̱queb chixjapbal reheb li yo̱queb chi cꞌacꞌale̱nc joꞌ eb ajcuiꞌ li tenamit. Co̱ saꞌ junpa̱t saꞌ li templo ut qui-oc saꞌ xya̱nkeb li tenamit.

¹⁴ Quiril li rey xakxo chixcꞌatk li rokechal li templo li cuan saꞌ li oqueba̱l joꞌ cꞌaynakeb chixba̱nunquil li rey. Laj Joás sutsu xbaneb li nequeꞌtaklan saꞌ xbe̱neb li soldado joꞌ eb ajcuiꞌ li nequeꞌxya̱basi li trompeta. Eb li tenamit yo̱queb chixjapbal reheb xban xsahil xchꞌo̱leb ut yo̱queb chixya̱basinquil li trompeta. Lix Atalía quixpej li rakꞌ ut quixjap re chixyebal: —¡Xineꞌxbalakꞌi! chan.

¹⁵ Laj Joiada quixye reheb li nequeꞌtaklan saꞌ xbe̱neb li soldado: —Isihomak lix Atalía saꞌ lix neba̱l li templo ut camsihomak li ani nata̱ken re, chan. Quixye chi joꞌcan xban nak incꞌaꞌ quiraj nak ta̱camsi̱k saꞌ li templo.

¹⁶ Eb li soldado queꞌxchap lix Atalía ut queꞌrisi saꞌ li be li nequeꞌnumeꞌ cuiꞌ li nequeꞌxic chirix cacua̱y re teꞌoc saꞌ li palacio. Ut aran queꞌxcamsi.

¹⁷ Laj Joiada quixba̱nu li contrato riqꞌuin li Ka̱cuaꞌ ut riqꞌuin li rey, joꞌ eb ajcuiꞌ li tenamit. Joꞌcan ajcuiꞌ li rey quixba̱nu li contrato riqꞌuineb li tenamit ut queꞌxye nak aꞌanakeb chic lix tenamit li Dios.

¹⁸ Chirix aꞌan eb li tenamit queꞌco̱eb saꞌ lix templo li dios Baal ut queꞌxtꞌan. Ut queꞌxjuqꞌui chixjunileb li artal ut queꞌxjucꞌ ajcuiꞌ chixjunileb li yi̱banbil dios. Ut queꞌxcamsi chiru li artal laj Matán laj tij li quicꞌanjelac chiru laj Baal. Ut laj Joiada laj tij quixqꞌueheb li soldado chixcꞌacꞌalenquil lix templo li Ka̱cuaꞌ Dios.

¹⁹ Laj Joiada rochbeneb li capitán ut eb li nequeꞌtaklan saꞌ xbe̱neb li soldado, joꞌ eb ajcuiꞌ li nequeꞌcꞌacꞌalen, queꞌel chak saꞌ lix templo li Ka̱cuaꞌ ut queꞌxcꞌam li rey Joás saꞌ li templo. Ut chixjunileb li tenamit yo̱queb chixta̱kenquileb. Laj Joás qui-oc saꞌ li palacio saꞌ li oqueba̱l li nacꞌacꞌale̱c cuiꞌ li rochoch li rey. Quicꞌojla saꞌ lix cꞌojariba̱l li queꞌcꞌojla cuiꞌ eb li rey.

²⁰ Chixjunileb li tenamit saheb saꞌ xchꞌo̱l ut queꞌcuan saꞌ xya̱lal nak ac xcamsi̱c lix Atalía nachꞌ riqꞌuin li rochoch li rey.

²¹ Cuukub chihab cuan re laj Joás nak qui-oc chokꞌ xreyeb laj Judá.