2 Reyes 10 - Li Santil hu

¹ Laje̱b xca̱cꞌa̱l (70) li ralal laj Acab cuanqueb saꞌ li tenamit Samaria. Laj Jehú quixtzꞌi̱baheb li hu ut quixtakla reheb li nequeꞌtaklan saꞌ li tenamit Jezreel ut reheb li nequeꞌcꞌamoc be. Quixtakla ajcuiꞌ reheb li nequeꞌiloc reheb li ralal laj Acab. Saꞌ li hu quixye chi joꞌcaꞌin:

² —La̱ex li nequextaklan saꞌ xbe̱neb li ralal laj Acab. La̱ex yal e̱re saꞌ xbe̱neb li carruajes, li cacua̱y, li cꞌaꞌak re ru nacꞌanjelac re pletic, joꞌ ajcuiꞌ li tenamit li teꞌxcol cuiꞌ ribeb. Nak te̱cꞌul li hu aꞌin,

³ te̱sicꞌ ru saꞌ xya̱nkeb li ralal li kꞌaxal ti̱c xchꞌo̱l ut cha̱bil. Te̱xakab aꞌan chokꞌ rey chokꞌ re̱kaj lix yucuaꞌ. Ut texpletik re xcolbal rix, chan.

⁴ Cꞌajoꞌ nak queꞌxucuac eb li nequeꞌtaklan. Queꞌxye chi ribileb rib: —¿Ani ta cuiꞌ ta̱cuyuk pletic riqꞌuin laj Jehú? Chi moco li rey Joram chi moco li rey Ocozías queꞌxcuy pletic riqꞌuin, chanqueb.

⁵ Joꞌcan nak li nataklan saꞌ li palacio ut li nataklan saꞌ xbe̱n li tenamit rochbeneb li nequeꞌcꞌamoc be ut li nequeꞌiloc reheb li ralal laj Acab queꞌxjunaji ribeb ut queꞌxtakla resil riqꞌuin laj Jehú. Queꞌxye chi joꞌcaꞌin: —La̱o aj cꞌanjel cha̱cuu. Takaba̱nu li cꞌaꞌru ta̱cuaj la̱at. Ma̱ ani takaxakab chokꞌ karey. Ba̱nu li cꞌaꞌru nacacꞌoxla nak us xba̱nunquil, chanqueb.

⁶ Laj Jehú quitzꞌi̱ba cuiꞌchic xcaꞌ sut riqꞌuineb ut quixye chi joꞌcaꞌin saꞌ lix hu: —Cui ya̱l nak tex-oque̱nk chicuix ut te̱ba̱nu li cꞌaꞌru ninye e̱re, te̱cꞌameb chak cuiqꞌuin lix jolomeb li ralal li rey Acab. Joꞌcaꞌin ho̱nal cuulaj cua̱nkex arin Jezreel, chan. Li laje̱b xca̱cꞌa̱l chi ralal laj Acab cuanqueb rochbeneb li nequeꞌcꞌamoc be aran Samaria xban nak aꞌaneb li queꞌqꞌuiresin reheb.

⁷ Nak queꞌxcꞌul li hu li quixtakla laj Jehú, eb li nequeꞌcꞌamoc be aran Samaria queꞌxcamsiheb li laje̱b xca̱cꞌa̱l chi ralal laj Acab. Queꞌxqꞌue lix jolomeb saꞌ chacach ut queꞌxtakla Jezreel riqꞌuin laj Jehú.

⁸ Li takl quicuulac riqꞌuin laj Jehú ut quixye re: —Xeꞌcꞌulun li xeꞌcꞌamoc chak re lix jolomeb li ralal li rey Acab, chan. Laj Jehú quixye re: —Qꞌuehomak saꞌ cuib tu̱b saꞌ li oqueba̱l re li tenamit ut canabomak aran toj cuulaj, chan.

⁹ Cuulajak chic laj Jehú co̱ saꞌ li oqueba̱l re li tenamit. Quixakli chiruheb li tenamit ut quixye reheb: —La̱in xincꞌu̱b ru nak xincamsi li rey Joram. La̱ex ma̱cꞌaꞌ e̱ma̱c. Abanan, ¿aniheb li xeꞌcamsin reheb li ralal xcꞌajol?

¹⁰ Chenauhak nak li cꞌaꞌru quixye li Ka̱cuaꞌ Dios chirixeb li ralal xcꞌajol laj Acab ta̱cꞌulma̱nk. Incꞌaꞌ ta̱cana̱k yal chi joꞌcan. Li Ka̱cuaꞌ xba̱nu anakcuan li cꞌaꞌru quixye re li profeta Elías, chan laj Jehú.

¹¹ Joꞌcan nak laj Jehú quixtakla xcamsinquil chixjunileb li rechꞌalal laj Acab, li cuanqueb Jezreel. Queꞌcamsi̱c chixjunileb li nequeꞌtaklan, chixjunileb li rechꞌalal joꞌ eb ajcuiꞌ chixjunileb laj tij li queꞌcꞌanjelac chiru laj Acab. Ma̱ jun chic reheb queꞌcana chi yoꞌyo.

¹² Laj Jehú qui-el Jezreel re ta̱xic Samaria. Quicuulac Bet-equed saꞌ lix naꞌajeb laj ilol xul.

¹³ Aran quixcꞌul li ralal xcꞌajol laj Ocozías, li quicuan chokꞌ xreyeb laj Judá. Laj Jehú quixye reheb: —¿Anihex la̱ex? chan. Queꞌxye re: —La̱o ralal xcꞌajol laj Ocozías. Xic ke Jezreel chirilbal lix cocꞌaleb li reina Jezabel, joꞌqueb ajcuiꞌ li rechꞌalal, chanqueb.

¹⁴ Laj Jehú quixye reheb li cui̱nk li yo̱queb chi ta̱ke̱nc re: —Chapomakeb chi yoꞌyo, chan. Joꞌcan nak queꞌchapeꞌ chi yoꞌyo. Ut laj Jehú quixcamsiheb chi chꞌi̱chꞌ chixcꞌatk li chamal jul cuan aran saꞌ li naꞌajej li nequeꞌbeseꞌ cuiꞌ rix li carner. Cuib roxcꞌa̱l chi cui̱nk li queꞌcamsi̱c ut ma̱ jun chic reheb queꞌcana chi yoꞌyo.

¹⁵ Laj Jehú qui-el saꞌ li naꞌajej aꞌan ut co̱. Nak yo̱ chi xic, quixcꞌul laj Jonadab li ralal laj Recab. Laj Jehú quixqꞌue xsahil xchꞌo̱l ut quixye re: —¿Ma junaj la̱ cꞌaꞌux cuiqꞌuin? ¿Ma tat-oque̱nk chicuix? chan. Laj Jonadab quixye: —Junaj. Tin-oque̱nk cha̱cuix, chan. Laj Jehú quixye re: —Cui ya̱l nak joꞌcan, qꞌue la̱ cuukꞌ cue, chan. Laj Jonadab quixqꞌue li rukꞌ re ut laj Jehú quixtenkꞌa chi takecꞌ saꞌ li carruaje.

¹⁶ Laj Jehú quixye re: —Yoꞌo chicuix ut ta̱cuil chanru nak xicꞌ nacuil nak incꞌaꞌ nequeꞌxqꞌue xlokꞌal li Ka̱cuaꞌ, chan. Ut cuotz queꞌco̱eb Samaria saꞌ li carruaje.

¹⁷ Nak queꞌcuulac Samaria, laj Jehú quixcamsiheb chixjunileb li ralal xcꞌajol laj Acab li joꞌ qꞌuial chic incꞌaꞌ queꞌcamsi̱c. Ut ma̱ jun chic reheb queꞌcana chi yoꞌyo. Quicꞌulman joꞌ quixye li Ka̱cuaꞌ re li profeta Elías.

¹⁸ Chirix chic aꞌan, laj Jehú quixtakla xchꞌutubanquileb chixjunileb li tenamit ut quixye reheb: —Li rey Acab caꞌchꞌin ajcuiꞌ quixlokꞌoni li yi̱banbil dios aj Baal. Abanan la̱in kꞌaxal cuiꞌchic tinqꞌue xlokꞌal, chan.

¹⁹ Joꞌcan nak taklahomak xbokbaleb chixjunileb lix profeta laj Baal ut chixjunileb li nequeꞌcꞌanjelac chiru, joꞌ eb ajcuiꞌ laj tij. Ma̱ jun e̱re ta̱paltok chi cha̱lc xban nak la̱in xincauresi jun li cha̱bil mayej re xqꞌuebal xlokꞌal laj Baal. Ut li ani incꞌaꞌ ta̱cꞌulu̱nk ta̱camsi̱k, chan. Abanan laj Jehú yo̱ chixbalakꞌinquileb li tenamit. Quixba̱nu chi joꞌcan re nak ta̱ru̱k tixcamsiheb chixjunileb li nequeꞌlokꞌonin re li yi̱banbil dios Baal.

²⁰ Laj Jehú quixtaklaheb xtakl xyebal resil nak ta̱cua̱nk jun xnimal ninkꞌe re xlokꞌoninquil laj Baal. Ut joꞌcan qui-uxman.

²¹ Ut quixtaklaheb ajcuiꞌ lix takl chixyebal resil saꞌ chixjunil li naꞌajej Israel. Ut chixjunileb li nequeꞌlokꞌonin re laj Baal queꞌco̱eb. Ma̱ jun reheb incꞌaꞌ quicuulac. Queꞌoc saꞌ li templo li nequeꞌxlokꞌoni cuiꞌ laj Baal ut quinujac li naꞌajej xban xqꞌuialeb.

²² Laj Jehú quixye re li naxococ re li tꞌicr nak tixjeqꞌui reheb chixjunil li tꞌicr li nequeꞌrocsi nak nequeꞌcꞌanjelac chiru laj Baal.

²³ Tojoꞌnak laj Jehú qui-oc saꞌ lix templo laj Baal rochben laj Jonadab li ralal laj Recab. Laj Jehú quixye reheb li nequeꞌcꞌanjelac chiru laj Baal: —Qꞌuehomak retal nak incꞌaꞌ teꞌoc chak li nequeꞌlokꞌonin re li tzꞌakal Dios. Caꞌaj cuiꞌ la̱ex li nequexlokꞌonin re laj Baal naru nequexcuan arin, chan.

²⁴ Nak eb aꞌan queꞌoc chixqꞌuebaleb lix cꞌatbil mayej, laj Jehú quixxakab ca̱cꞌa̱l li cui̱nk chirix li templo ut quixye reheb: —Cui nae̱lelic junak li cui̱nk aꞌin che̱ru, la̱ex texcamsi̱k chokꞌ re̱kaj, chan.

²⁵ Nak queꞌrakeꞌ chixqꞌuebal lix cꞌatbil mayej, laj Jehú quixye reheb li ca̱cꞌa̱l chi cui̱nk: —Ocankex chi saꞌ ut camsihomakeb chixjunileb. Ma̱ jun reheb te̱canab chi yoꞌyo, chan. Ut eb li cui̱nk queꞌxba̱nu joꞌ quixye laj Jehú. Queꞌoc ut queꞌxcamsi riqꞌuin chꞌi̱chꞌ chixjunileb ut queꞌxqueloheb chirix cab. Chirix aꞌan queꞌoc toj chi saꞌ lix templo laj Baal.

²⁶ Ut queꞌrisiheb chak li yi̱banbil dios Baal ut queꞌxcꞌat.

²⁷ Queꞌxpoꞌ li artal ut queꞌxjucꞌ lix templo laj Baal ut queꞌxqꞌue chokꞌ xnaꞌaj li cumum ut chalen anakcuan, aꞌan chic lix cꞌanjel li naꞌajej aꞌan.

²⁸ Joꞌcaꞌin nak laj Jehú quixsach ru li yi̱banbil dios Baal aran Israel.

²⁹ Usta quixba̱nu aꞌin laj Jehú, abanan incꞌaꞌ quixcanab xba̱nunquil li ma̱usilal li quixba̱nu li rey Jeroboam, li ralal laj Nabat, li quicꞌamoc xbeheb laj Israel chi ma̱cobc. Laj Jehú incꞌaꞌ quirisiheb li cuacax oro, li queꞌxlokꞌoni aran Bet-el ut Dan.

³⁰ Ut li Ka̱cuaꞌ quixye re laj Jehú: —La̱at xaba̱nu li us chicuu xban nak xasach ruheb li ralal xcꞌajol laj Acab joꞌ xcuaj la̱in. Joꞌcan nak la̱in ninye a̱cue nak jun reheb la̱ cualal a̱cꞌajol teꞌoc chokꞌ rey toj saꞌ li xca̱ tasalileb la̱ cualal a̱cꞌajol.

³¹ Abanan laj Jehú incꞌaꞌ quixba̱nu chi anchal xchꞌo̱l li cꞌaꞌru naxye saꞌ lix chakꞌrab li Ka̱cuaꞌ lix Dioseb laj Israel. Incꞌaꞌ quixcanab xba̱nunquil li ma̱usilal li quixba̱nu laj Jeroboam li quicꞌamoc xbeheb laj Israel chi ma̱cobc chiru li Ka̱cuaꞌ.

³² Saꞌ eb li cutan aꞌan li Ka̱cuaꞌ quixtiquib xcꞌosbal lix naꞌajeb laj Israel. Laj Hazael quinumta saꞌ xbe̱neb laj Israel saꞌ eb li nuba̱l re lix naꞌajeb.

³³ Laj Hazael, lix reyeb laj Siria quixchap chokꞌ reheb li naꞌajej jun pacꞌal li nimaꞌ Jordán saꞌ xcaꞌyaba̱l li na-el cuiꞌ chak li sakꞌe. Queꞌxchap lix naꞌajeb li ralal xcꞌajol laj Gad, ut eb li ralal xcꞌajol laj Rubén ut queꞌxchap ajcuiꞌ lix naꞌajeb yi jach li ralal xcꞌajol laj Manasés. Naticla saꞌ li tenamit Aroer cuan cuiꞌ li nimaꞌ Arnón. Ut nacuulac toj Galaad ut Basán.

³⁴ Li quixba̱nu li rey Jehú riqꞌuin xcacuilal xchꞌo̱l, tzꞌi̱banbil retalil saꞌ li hu Crónicas, li tzꞌi̱banbil cuiꞌ li quilajeꞌxba̱nu lix reyeb laj Israel.

³⁵ Li rey Jehú quicam ut coxtau lix xeꞌto̱nil xyucuaꞌ ut quimukeꞌ Samaria. Ut aꞌ chic laj Joacaz li ralal qui-oc chokꞌ rey chokꞌ re̱kaj.

³⁶ Cuakxakib xcaꞌcꞌa̱l chihab quicuan laj Jehú chokꞌ xreyeb laj Israel aran Samaria.