2 Reyes 1 - Li Santil hu

Li profeta Elías quixye nak ta̱ca̱mk li rey Ocozías

¹ Nak ac camenak chic li rey Acab, eb laj Moab queꞌpoꞌ saꞌ xbe̱neb laj Israel.

² Li rey Ocozías quitꞌaneꞌ saꞌ li ventana saꞌ xcaꞌ tasalil li rochoch li cuan Samaria ut quixtochꞌ rib. Nak nim xyajel quixye reheb lix takl: —Ayukex riqꞌuin laj Baal-zebub lix dioseb laj Ecrón. Patzꞌomak chak re ma tinqꞌuira̱k malaj ut incꞌaꞌ, chan.

³ Abanan jun x-ángel li Dios quia̱tinac riqꞌuin li profeta Elías, Tisbe xtenamit, ut quixye re: —Ayu chixcꞌulbaleb lix takl li rey ut ta̱ye reheb chi joꞌcaꞌin, “¿Cꞌaꞌut nak texxic chi patzꞌoc riqꞌuin laj Baal-zebub lix dioseb laj Ecrón? ¿Ma ma̱cꞌaꞌ ta biꞌ li Dios arin Israel?”

⁴ Ta̱ye reheb nak teꞌxye re li rey nak ta̱ca̱mk ut incꞌaꞌ chic ta̱usa̱k, chan li ángel. Ut laj Elías quixba̱nu joꞌ quiyeheꞌ re xban lix ángel li Ka̱cuaꞌ ut co̱.

⁵ Ut eb li takl queꞌsukꞌi chak ut li rey quixye reheb: —¿Cꞌaꞌut nak xexsukꞌi chak chi junpa̱t? chan reheb.

⁶ Eb aꞌan queꞌxye: —Xkacꞌul jun li cui̱nk saꞌ be. Aꞌan quixye ke nak tosukꞌi̱k chixyebal a̱cue chi joꞌcaꞌin, “¿Cꞌaꞌut nak ta̱takla la̱ takl chi a̱tinac riqꞌuin laj Baal-zebub, lix dioseb laj Ecrón? ¿Ma ma̱cꞌaꞌ ta biꞌ li Dios arin Israel? Xban nak xaba̱nu aꞌan la̱at tatca̱mk ut incꞌaꞌ chic tat-usa̱k,” chan. Aꞌan li naxye a̱cue li Ka̱cuaꞌ, chanqueb.

⁷ Ut li rey quixye: —¿Chanru na-iloc li cui̱nk li xyehoc e̱re chi joꞌcan? chan.

⁸ Eb li takl queꞌxye: —Li rakꞌ yi̱banbil riqꞌuin rix li xul. Ut lix cꞌa̱mal xsaꞌ yi̱banbil riqꞌuin tzꞌu̱m, chanqueb. Li rey quixye reheb: —Aꞌan laj Elías nacuabi, chan.

⁹ Tojoꞌnak li rey quixtakla jun li nataklan saꞌ xbe̱neb lix soldado rochbeneb laje̱b roxcꞌa̱l chi soldado re teꞌxic chixcꞌambal chak laj Elías. Li nataklan saꞌ xbe̱neb li soldado quixtau laj Elías chunchu saꞌ xbe̱n bol. Li cui̱nk quixye re: —At xprofeta li Dios, li rey xtakla xyebal a̱cue nak tatcubek saꞌ li tzu̱l aꞌin ut tatxic riqꞌuin, chan.

¹⁰ Quixye laj Elías: —Cui la̱in tzꞌakal xprofeta li Dios, chicha̱lk ta xam saꞌ choxa re tatxcꞌat ut re ajcuiꞌ nak tixcꞌateb li soldado cuanqueb a̱cuochben, chan. Saꞌ junpa̱t quichal li xam ut queꞌcꞌat li soldado joꞌ ajcuiꞌ li nataklan saꞌ xbe̱neb.

¹¹ Li rey quixtakla jun chic li cui̱nk li nataklan saꞌ xbe̱neb lix soldado rochbeneb laje̱b roxcꞌa̱l chic li soldado. Queꞌco̱eb riqꞌuin laj Elías ut queꞌxye re: —At xprofeta li Dios, li rey xtakla xyebal a̱cue nak tatcubek chi junpa̱t ut tatxic riqꞌuin, chan.

¹² Laj Elías quixye re: —Cui ya̱l nak la̱in tzꞌakal xprofeta li Dios, chicha̱lk ta xam saꞌ choxa re tatxcꞌat la̱at ut re ajcuiꞌ nak tixcꞌateb la̱ laje̱b roxcꞌa̱l chi soldado, chan. Ut li xam quichal chak saꞌ choxa ut queꞌcꞌat chixjunileb li soldado joꞌ ajcuiꞌ li nataklan saꞌ xbe̱neb.

¹³ Ut li rey quixtakla rox sut laje̱b roxcꞌa̱l chic li soldado rochben li nataklan saꞌ xbe̱neb. Queꞌtakeꞌ saꞌ li tzu̱l. Li nataklan saꞌ xbe̱neb li soldado quixcuikꞌib rib chiru laj Elías ut quixye re: —At xprofeta li Dios, chacuil taxak xtokꞌoba̱l cuu, la̱in joꞌ eb ajcuiꞌ li soldado. Incꞌaꞌ taxak tina̱qꞌue chi ca̱mc la̱in ut incꞌaꞌ taxak ta̱qꞌueheb chi ca̱mc li laje̱b roxcꞌa̱l chi soldado, li nequeꞌcꞌanjelac cha̱cuu.

¹⁴ Li jun chꞌol chic li xeꞌcꞌulun a̱cuiqꞌuin queꞌcamsi̱c xban li xam li xchal chak saꞌ choxa, eb li soldado joꞌ eb ajcuiꞌ li xeꞌtaklan saꞌ xbe̱neb. At Elías, ta̱cuil taxak xtokꞌoba̱l ku. Incꞌaꞌ taxak toca̱mk la̱o, chan.

¹⁵ Ut lix ángel li Ka̱cuaꞌ quixye re laj Elías: —Matxucuac. Cuben ut tatxic chirixeb, chan. Joꞌcan nak laj Elías quixta̱keheb li soldado ut co̱ riqꞌuin li rey.

¹⁶ Laj Elías quixye re li rey: —Joꞌcaꞌin xye li Ka̱cuaꞌ Dios, “¿Cꞌaꞌut nak xatakla xpatzꞌbal a̱naꞌleb riqꞌuin laj Baal-zebub, lix dioseb laj Ecrón? ¿Ma incꞌaꞌ ta biꞌ cuan li tzꞌakal Dios arin Israel? Xapatzꞌ raj re aꞌan. Xban nak xatakla xpatzꞌbal a̱naꞌleb re laj Baal-zebub, incꞌaꞌ chic tatqꞌuira̱k. Tatca̱mk,” chan.—

¹⁷ Quicam li rey Ocozías joꞌ quixye li Ka̱cuaꞌ re li profeta Elías. Ut aꞌ chic laj Joram li ri̱tzꞌin qui-oc saꞌ xcuanquil chokꞌ re̱kaj xban nak laj Ocozías ma̱ jun ralal quicuan. Laj Joram qui-oc chokꞌ xreyeb laj Israel nak yo̱ xcab chihab roquic chokꞌ xreyeb laj Judá laj Joram li ralal laj Josafat.

¹⁸ Chixjunil li quixba̱nu li rey Ocozías nak cuan saꞌ xcuanquil tzꞌi̱banbil retalil saꞌ li hu Crónicas, li tzꞌi̱banbil cuiꞌ li quilajeꞌxba̱nu lix reyeb laj Israel.