Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

2 Crónicas 9 - Li Santil hu

1 Li reina li cuan aran Sabá quirabi resil nak kꞌaxal cuan xnaꞌleb laj Salomón. Joꞌcan nak co̱ aran Jerusalén chi patzꞌoc riqꞌuin re rilbal ma tixsume ta na li patzꞌoc li kꞌaxal chꞌaꞌaj xsumenquil. Co̱ Jerusalén riqꞌuin laj Salomón rochbeneb nabaleb aj cꞌanjel chiru. Ut nabaleb li camellos li yo̱queb chi i̱ka̱nc re li cꞌaꞌru quixcꞌam. Nabal li sununquil ban quixcꞌam ut nabal li oro. Ut quixcꞌam ajcuiꞌ nabal li terto̱quil pec. Nak quicuulac riqꞌuin laj Salomón quixye re li joꞌ qꞌuial li cuan saꞌ xchꞌo̱l nak tixye.

2 Li rey Salomón quixsume chixjunil li cꞌaꞌru quixpatzꞌ li reina. Ut ma̱ jun li patzꞌoc incꞌaꞌ ta quixsume.

3 Li reina re Sabá quixqꞌue retal nak laj Salomón cuan xnaꞌleb ut quixqꞌue ajcuiꞌ retal li palacio li quixyi̱b.

4 Ut quixqꞌue ajcuiꞌ retalil li tzacae̱mk li queꞌxtzaca joꞌ ajcuiꞌ lix naꞌajeb li nequeꞌcꞌanjelac chiru laj Salomón. Quixqꞌue ajcuiꞌ retal li rakꞌeb li nequeꞌtaklan, joꞌ ajcuiꞌ li rakꞌeb li nequeꞌcꞌanjelac. Ut quixqꞌue ajcuiꞌ retal li cꞌatbil mayej li naxqꞌue saꞌ lix templo li Ka̱cuaꞌ. Riqꞌuin chixjunil li quiril, quisach xchꞌo̱l.

5 Ut li reina quixye re li rey Salomón: —Tzꞌakal ya̱l li quicuabi resil saꞌ lin tenamit nak nabal li cꞌaꞌru a̱cue ut kꞌaxal cuiꞌchic cuan a̱naꞌleb.

6 La̱in incꞌaꞌ ninpa̱b toj xinchal arin ut riqꞌuin xnakꞌ cuu xcuil chixjunil. Ya̱l nak kꞌaxal cuan a̱naꞌleb. Ya̱l li cꞌaꞌru quicuabi resil cha̱cuix. Riqꞌuin aꞌin ninqꞌue retal nak moco tzꞌakal ta yi jach li queꞌxserakꞌi cue.

7 Us xak reheb chixjunileb li cuanqueb a̱cuiqꞌuin. Us xak reheb li nequeꞌcꞌanjelac cha̱cuu xban nak junelic yo̱queb chirabinquil li cha̱bil naꞌleb a̱cuiqꞌuin.

8 Lokꞌoninbil taxak ru li Ka̱cuaꞌ la̱ Dios xban nak xcꞌojob xchꞌo̱l saꞌ a̱be̱n ut xatxxakab saꞌ li cuanquilal saꞌ xbe̱neb laj Israel. Li Ka̱cuaꞌ junelic naxraheb laj Israel. Aꞌan naraj nak xakxo̱keb saꞌ xnaꞌajeb chi junelic. Joꞌcan nak xatxxakab chokꞌ xreyeb re nak tattakla̱nk saꞌ xbe̱neb saꞌ xya̱lal ut saꞌ ti̱quilal, chan.

9 Li reina re li tenamit Sabá quixsi re li rey Salomón caꞌchꞌin chic ma̱ jun ciento quintal li oro. Ut quixsi ajcuiꞌ re nabal li sununquil ban joꞌ ajcuiꞌ li terto̱quil pec. Ma̱ jun sut quisiheꞌ nabal li sununquil ban re li rey Salomón joꞌ li quixsi li reina.

10 Eb li nequeꞌcꞌanjelac chiru li rey Hiram ut eb li nequeꞌcꞌanjelac chiru li rey Salomón, li queꞌcꞌamoc chak re li oro aran Ofir, queꞌxcꞌam ajcuiꞌ chak li cha̱bil cheꞌ sándalo xcꞌabaꞌ joꞌ ajcuiꞌ li terto̱quil pec.

11 Li cha̱bil cheꞌ sándalo quicꞌanjelac chiru laj Salomón re xyi̱banquileb li gradas re li templo ut re ajcuiꞌ li palacio. Ut quixyi̱beb ajcuiꞌ li arpa chiru joꞌ ajcuiꞌ li salterio re ta̱cꞌanjelak chiruheb li nequeꞌcuajbac. Ma̱ jun sut chic quicuulac li cha̱bil cheꞌ aran Israel ut ma̱ jun sut chic queꞌril ru toj chalen anakcuan.

12 Li rey Salomón quixsi re li reina re Sabá li joꞌ qꞌuial li quiraj. Ut quixqꞌue ajcuiꞌ re chixjunil li joꞌ qꞌuial quixpatzꞌ re. Kꞌaxal cuiꞌchic nabal li quixcꞌam li reina chiru li quixsi re laj Salomón. Chirix aꞌan li reina quisukꞌi saꞌ lix tenamit rochbeneb lix mo̱s.

13 Numenak o̱b ciento quintal li oro li naxcꞌul laj Salomón rajlal chihab.

14 Ut ma̱cꞌaꞌ saꞌ ajl li naxcꞌul riqꞌuineb laj yaconel ut eb laj cꞌay. Ut chixjunileb li rey re Arabia joꞌ eb ajcuiꞌ li nequeꞌtaklan saꞌ li junju̱nk chi tenamit queꞌxcꞌam li oro ut li plata riqꞌuin laj Salomón.

15 Riqꞌuin li oro aꞌan quixtakla xyi̱banquil cuib ciento li chꞌi̱chꞌ li nequeꞌxcol cuiꞌ re xchꞌo̱leb li soldados. Numenak oxlaju libra li cha̱bil oro li tenbil li queꞌxyi̱b cuiꞌ li junju̱nk chi ni̱nki chꞌi̱chꞌ.

16 Ut quixqꞌue ajcuiꞌ chi yi̱ba̱c oxib ciento li cocꞌ chꞌi̱chꞌ li nequeꞌxcol cuiꞌ reheb xchꞌo̱l. Numenak cuakib libra li cha̱bil oro li tenbil li queꞌxyi̱b cuiꞌ li junju̱nk chi chꞌi̱chꞌ. Chixjunileb li chꞌi̱chꞌ aꞌin quixoqueꞌ saꞌ li palacio “Qꞌuicheꞌ re Líbano” xcꞌabaꞌ.

17 Li rey quixtakla ajcuiꞌ xyi̱banquil jun li nimla cꞌojariba̱l riqꞌuin marfil ut queꞌxletz li cha̱bil oro chiru.

18 Li cꞌojariba̱l aꞌan cuan cuakib tasal lix takleba̱l. Ut lix naꞌaj li rok, aꞌan yi̱banbil riqꞌuin oro. Xcaꞌ pacꞌalil cuan xnaꞌaj li rukꞌ. Ut xcaꞌ pacꞌalil xnaꞌaj li rukꞌ cuan retalil li cakcoj.

19 Ut saꞌ xbe̱neb li takleba̱l yi̱banbileb retalil cablaju li cakcoj. Junju̱nk saꞌ xcaꞌ pacꞌalil. Ma̱ jun reheb li tenamit queꞌxyi̱b jun li cꞌojariba̱l joꞌ li cꞌojariba̱l aꞌan.

20 Chixjunil lix secꞌ li rey Salomón, aꞌan junes cha̱bil oro, joꞌ eb ajcuiꞌ chixjunil li secꞌ li cuan saꞌ li palacio “Qꞌuicheꞌ re Líbano” xcꞌabaꞌ. Ma̱cꞌaꞌ li secꞌ plata riqꞌuin xban nak saꞌ eb li cutan nak quicuan laj Salomón chokꞌ rey li plata ma̱cꞌaꞌ xtzꞌak.

21 Rajlal oxib chihab lix jucub laj Salomón nequeꞌchal chak Tarsis rochbeneb li cui̱nk li nequeꞌcꞌanjelac chiru li rey Hiram ut nequeꞌxcꞌam chak li oro, li plata, ut li marfil. Ut nequeꞌxcꞌam ajcuiꞌ chak li batzꞌ ut li pavo real.

22 Li rey Salomón aꞌan li kꞌaxal cuan xnaꞌleb ut kꞌaxal biom chiruheb chixjunileb li rey li cuanqueb saꞌ ruchichꞌochꞌ.

23 Chixjunileb li rey li cuanqueb saꞌ ruchichꞌochꞌ queꞌraj xnaubal ru laj Salomón. Ut queꞌraj rabinquil li naꞌleb li qꞌuebil re xban li Dios.

24 Rajlal chihab li nequeꞌxic chirilbal laj Salomón nequeꞌxcꞌam nabal xma̱tan. Nequeꞌxsi re li cꞌaꞌak re ru yi̱banbil riqꞌuin oro ut plata, li rakꞌeb, li sununquil ban, li chꞌi̱chꞌ re pletic, joꞌ eb ajcuiꞌ li cacua̱y ut eb li mu̱l.

25 Ca̱hib mil lix naꞌajeb lix cacua̱y ut lix carruaje li rey Salomón. Ut cablaju mil li cui̱nk li nequeꞌxic chirix cacua̱y. Cuanqueb li quixcanabeb saꞌ li tenamit li naxocman cuiꞌ lix carruaje ut cuanqueb li quixcanabeb Jerusalén.

26 Li rey Salomón, aꞌan li nim xcuanquil saꞌ xbe̱neb chixjunileb li rey li cuanqueb saꞌ eb li tenamit cuan cuiꞌ li nimaꞌ Éufrates ut nacuulac toj saꞌ lix naꞌajeb laj filisteo ut nacuulac ajcuiꞌ toj saꞌ li nuba̱l re Egipto.

27 Nak cuan chokꞌ rey laj Salomón aran Jerusalén quixchꞌutub nabal li plata. Chanchan xqꞌuial li pec. Joꞌcan ajcuiꞌ li cheꞌ chacalteꞌ. Nabal cuan. Chanchan xqꞌuial li cheꞌ higo li cuan aran Sefela.

28 Eb lix cacua̱y li rey Salomón nequeꞌcꞌameꞌ chak saꞌ li tenamit Egipto joꞌ ajcuiꞌ saꞌ eb li jun chꞌol chic tenamit.

29 Chixjunil li quixba̱nu li rey Salomón chalen saꞌ xticlajic toj saꞌ rosoꞌjic tzꞌi̱banbil retalil saꞌ eb li hu li queꞌxtzꞌi̱ba li profeta Natán, li profeta Ahías Silón xtenamit, ut li profeta Iddo li quiyehoc re li cꞌaꞌru tixcꞌul laj Jeroboam li ralal laj Nabat.

30 Laj Salomón quicuan chokꞌ rey caꞌcꞌa̱l chihab aran Jerusalén ut quitaklan saꞌ xbe̱neb chixjunileb laj Israel.

31 Laj Salomón quicam ut quimukeꞌ saꞌ lix tenamit laj David lix yucuaꞌ, li queꞌmukeꞌ cuiꞌ lix xeꞌto̱nil yucuaꞌ. Ut laj Roboam, li ralal, aꞌan chic li qui-oc chokꞌ rey chokꞌ re̱kaj.

© 2019, Wycliffe Bible Translators. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ