2 Crónicas 4 - Li Santil hu

¹ Ut quixyi̱b ajcuiꞌ jun li artal bronce. Bele̱b metro xnajtil rok, bele̱b metro xnajtil ru, ut ca̱hib metro riqꞌuin media metro lix najtil xteram.

² Quixyi̱b ajcuiꞌ jun li nimla pila sursu riqꞌuin bronce. Aꞌan ta̱cꞌanjelak chokꞌ xnaꞌaj li haꞌ. Ca̱hib metro riqꞌuin media metro xnimal li re. Cuib metro riqꞌuin o̱b xcaꞌcꞌa̱l centímetro xteram. Ut oxlaju metro riqꞌuin media metro xnimal xsaꞌ.

³ Ut chire li pila queꞌxyi̱b cuib tzol retalil li cꞌum. O̱b roxcꞌa̱l centímetro xya̱nk li laje̱tk chi cꞌum. Jun cuacaj queꞌxyi̱b lix sahob ru nak queꞌxyi̱b li pila.

⁴ Li pila aꞌin queꞌxtochob saꞌ xbe̱neb cablaju chi bo̱yx yi̱banbileb riqꞌuin bronce. Oxib li bo̱yx nequeꞌiloc saꞌ li norte. Ut oxib nequeꞌiloc saꞌ li occidente. Ut oxib chic nequeꞌiloc saꞌ li sur ut oxib nequeꞌiloc saꞌ li oriente. Li pila queꞌxchunub saꞌ xbe̱neb li bo̱yx ut li rokeb li bo̱yx li cuan chirix queꞌcana rubel li pila.

⁵ Cuakxakib centímetros xpimal li tzꞌac re li pila. Li xyi̱banquil li re li pila chanchan li utzꞌuꞌuj azucena. Cuakib xca̱cꞌa̱l mil (66,000) litro li haꞌ na-oc chi saꞌ li pila aꞌan.

⁶ Quixyi̱b ajcuiꞌ laje̱b li cocꞌ pila. O̱b quixqꞌue saꞌ xnim li templo ut li o̱b chic quixqꞌue saꞌ xtzꞌe. Saꞌ eb li pila aꞌin queꞌxchꞌaj li tib li teꞌxcꞌat chokꞌ xmayejeb. Abanan li nimla pila quicꞌanjelac reheb laj tij re teꞌchꞌajok.

⁷ Quixyi̱b ajcuiꞌ laje̱b li candelero joꞌ li retalil li quiqꞌueheꞌ re. Ut quixqꞌueheb saꞌ li templo. O̱b quixqꞌue saꞌ li nim ut li o̱b chic quixqꞌue saꞌ li tzꞌe.

⁸ Quixyi̱b ajcuiꞌ laje̱b li me̱x ut quixqꞌueheb saꞌ li templo. O̱b quixqꞌue saꞌ li nim ut o̱b quixqꞌue saꞌ li tzꞌe. Ut quixyi̱b ajcuiꞌ jun ciento li ni̱nki secꞌ riqꞌuin oro.

⁹ Quixyi̱b ajcuiꞌ li neba̱l reheb laj tij ut li nimla neba̱l joꞌ eb ajcuiꞌ lix puertas. Ut quixletz li bronce chiruheb li puertas.

¹⁰ Ut quixqꞌue li nimla pila saꞌ li nim re li templo li nacana saꞌ li sureste.

¹¹ Laj Hiram quixyi̱beb ajcuiꞌ li ucꞌal ut eb li pala joꞌ eb ajcuiꞌ li ni̱nki secꞌ. Joꞌcan nak laj Hiram quixchoy li cꞌanjel li quixba̱nu re li rey Salomón chokꞌ re lix templo li Ka̱cuaꞌ.

¹² Aꞌan aꞌin li quixba̱nu. Quixyi̱b li cuib chi okech ut li cuib chi sursu̱quil chꞌi̱chꞌ li queꞌqꞌueheꞌ saꞌ xjolomeb li cuib chi okech, joꞌ ajcuiꞌ li cadena li tzꞌulbil ru.

¹³ Quixyi̱b li ca̱hib ciento retalil li granada li queꞌqꞌueheꞌ saꞌ cuib tzol chiru li sursu̱quil chꞌi̱chꞌ li quiqꞌueheꞌ saꞌ xjolomeb li cuib chi okech.

¹⁴ Quixyi̱b ajcuiꞌ li cꞌochleba̱l ut saꞌ xbe̱neb aꞌan quixqꞌueheb li laje̱b chi cocꞌ pila.

¹⁵ Quixyi̱b li nimla pila ut eb li cablaju chi bo̱yx li quicꞌochoba̱c cuiꞌ li nimla pila.

¹⁶ Ut quixyi̱b ajcuiꞌ eb li ucꞌal, li pala ut eb li chꞌi̱chꞌ li queꞌxchap cuiꞌ li tib. Chixjunil li cꞌaꞌak re ru li ta̱cꞌanjelak saꞌ lix templo li Dios li quixyi̱b laj Hiram-abi re li rey Salomón, aꞌan yi̱banbil riqꞌuin li cha̱bil bronce.

¹⁷ Li rey quixtakla xyi̱banquileb saꞌ li ru takꞌa re li nimaꞌ Jordán saꞌ li naꞌajej li se̱b ru li cuan saꞌ xyi li cuib chi tenamit Sucot ut Seredata.

¹⁸ Kꞌaxal cuiꞌchic nabal li cꞌaꞌak re ru li quixqꞌue chi yi̱ba̱c riqꞌuin bronce li rey Salomón. Incꞌaꞌ queꞌru xbisbal xban xqꞌuial.

¹⁹ Laj Salomón quixqꞌue chi yi̱ba̱c chixjunil li cꞌaꞌak re ru li quicꞌanjelac saꞌ lix templo li Dios. Aꞌaneb aꞌin li quiyi̱ba̱c: li artal yi̱banbil riqꞌuin oro, eb li me̱x li quiqꞌueheꞌ cuiꞌ li mayejanbil caxlan cue,

²⁰ eb li candelero joꞌ eb ajcuiꞌ li candil li nequeꞌxqꞌue saꞌ xbe̱n yi̱banbil riqꞌuin cha̱bil oro li queꞌqꞌueheꞌ chiru li Lokꞌlaj Santil Naꞌajej ut queꞌxloch xxamlel joꞌ quiyeheꞌ reheb;

²¹ ut li retalil li utzꞌuꞌuj qꞌuebil chokꞌ xsahob ru li candelero, joꞌ eb ajcuiꞌ li candil ut eb li chapleb chꞌi̱chꞌ. Eb aꞌan yi̱banbileb riqꞌuin cha̱bil oro.

²² Quixqꞌue ajcuiꞌ chi yi̱ba̱c riqꞌuin cha̱bil oro eb li chꞌi̱chꞌ re xyi̱banquil lix mechil li candil, eb li secꞌ li quixoqueꞌ cuiꞌ li quicꞌ, eb li lecleb joꞌ eb ajcuiꞌ li sansar. Ut quixqꞌue chi yi̱ba̱c riqꞌuin oro li oqueba̱l re li templo, eb li puertas re li Lokꞌlaj Santil Naꞌajej, joꞌ eb ajcuiꞌ li puertas re li Santil Naꞌajej.