2 Crónicas 3 - Li Santil hu

¹ Laj Salomón quixtiquib xyi̱banquil lix templo li Ka̱cuaꞌ aran Jerusalén saꞌ li tzu̱l Moriah saꞌ li naꞌajej li quixcꞌutbesi cuiꞌ rib li Ka̱cuaꞌ chiru laj David lix yucuaꞌ. Li naꞌajej aꞌan, aꞌan li naꞌajej li quirisi cuiꞌ rix lix trigo laj Ornán aj jebuseo, li ac cauresinbil xban laj David re xyi̱banquil li templo.

² Laj Salomón quixtiquib xyi̱banquil li templo saꞌ li cuib xbe li xcab po re li xca̱ chihab roquic chokꞌ rey.

³ Aꞌan aꞌin xbisbal lix cimiento lix templo li Ka̱cuaꞌ li quixyi̱b li rey Salomón: lix nimal rok, aꞌan cuukub xcaꞌcꞌa̱l metro ut lix nimal ru, aꞌan bele̱b metro.

⁴ Li naꞌajej li cuan saꞌ li oqueba̱l, aꞌan bele̱b metro xnajtil rok, joꞌ xnimal ru li templo. Ut lix najtil xteram, aꞌan bele̱b metro. Ut quixletz li tzꞌakal oro chi saꞌ.

⁵ Saꞌ li Santil Naꞌajej quixtzꞌap li tzꞌac chi saꞌ riqꞌuin li cheꞌ ciprés. Ut quixtzꞌap li ru riqꞌuin li tzꞌakal oro. Ut quixqꞌue xsahob ru retalil li cheꞌ palmera ut li cadena.

⁶ Ut quixletz li terto̱quil pec chiru li templo re xqꞌuebal xsahob ru. Li oro, aꞌan li quichal chak Parvaim.

⁷ Joꞌcaꞌin nak quixletz li oro saꞌ li templo chiru li tzꞌamba, chiru lix marquil li puertas, ut chiruheb li tzꞌac, joꞌ eb ajcuiꞌ li puertas. Ut quixyi̱b li retalileb li querubín chiruheb li tzꞌac.

⁸ Ut quixyi̱b ajcuiꞌ li Lokꞌlaj Santil Naꞌajej. Bele̱b metro xnimal rok. Ut lix nimal ru, aꞌan bele̱b metro joꞌ xnimal ru li templo. Li cha̱bil oro li quixletz chiru, aꞌan numenak o̱b ciento (500) quintal.

⁹ Li claux yi̱banbil riqꞌuin oro ut numenak jun libra ra̱lal li junju̱nk. Quixletz ajcuiꞌ li oro chiruheb li cocꞌ cab li cuanqueb saꞌ xcaꞌ tasalil li templo.

¹⁰ Saꞌ li Lokꞌlaj Santil Naꞌajej quixyi̱b cuib li querubines riqꞌuin cheꞌ. Ut quixletz li oro chiruheb.

¹¹ Bele̱b metro xnimal ru lix xiqꞌueb li cuib chi querubines. Cuib metro riqꞌuin o̱b xcaꞌcꞌa̱l centímetro xni̱nkal li junju̱nk. Jun li xicꞌ nocoxtau li tzꞌac jun pacꞌal. Ut li xicꞌ jun chic nocoxcꞌul rib riqꞌuin lix xicꞌ li querubín jun chic.

¹² Joꞌcan ajcuiꞌ li querubín jun chic. Jun lix xicꞌ cuib metro riqꞌuin o̱b xcaꞌcꞌa̱l centímetro xnimal ut nocoxtau li tzꞌac li cuan saꞌ li jun pacꞌal chic. Ut lix xicꞌ jun chic nocoxcꞌul rib riqꞌuin lix xicꞌ li querubín jun chic.

¹³ Eb li querubines aꞌin helho lix xiqꞌueb. Bele̱b metro oquenak chixjunil. Xakxo̱queb li querubines ut yo̱queb chi iloc saꞌ li Santil Naꞌajej.

¹⁴ Ut quixyi̱b ajcuiꞌ li nimla tꞌicr li ta̱ramok re lix Lokꞌlaj Santil Naꞌajej riqꞌuin li nokꞌ azul, joꞌ ajcuiꞌ púrpura ut cak. Yi̱banbil riqꞌuin li bakbil nokꞌ lino. Chokꞌ xsahob ru quixqꞌue retalil li querubines chiru.

¹⁵ Ut quixyi̱b ajcuiꞌ cuib li ni̱nki okech re tixqꞌue chiru li templo. Caꞌchꞌin ma̱ cuaklaju metro xni̱nkal rok. Ut li chꞌi̱chꞌ li quixyi̱b re xchꞌicbal saꞌ xjolomeb li cuib chi okech, aꞌan cuib metro riqꞌuin o̱b xcaꞌcꞌa̱l centímetro xni̱nkal rok.

¹⁶ Ut quixyi̱b ajcuiꞌ li cadena re xqꞌuebal saꞌ xbe̱n li okech. Ut quixyi̱b ajcuiꞌ jun ciento li granadas riqꞌuin chꞌi̱chꞌ ut quixletz chiru li cadena.

¹⁷ Quixqꞌue li okech chiru li templo. Li jun li quicana saꞌ lix nim quixqꞌue Jaquín chokꞌ xcꞌabaꞌ Ut li okech jun chic li quicana saꞌ li tzꞌe quixqꞌue Boaz chokꞌ xcꞌabaꞌ.