2 Crónicas 2 - Li Santil hu

¹ Li rey Salomón quixye nak tixyi̱b jun li templo re teꞌxlokꞌoni cuiꞌ li Ka̱cuaꞌ ut tixyi̱b ajcuiꞌ li rochoch aꞌan.

² Quixsiqꞌueb li ani teꞌba̱nu̱nk re li cꞌanjel. Quixxakabeb laje̱b xca̱cꞌa̱l (70,000) mil chi cui̱nk re teꞌi̱ka̱nk re li cꞌaꞌak re ru teꞌcꞌanjelak. Ut quixxakabeb ca̱cꞌa̱l mil (80,000) chi cui̱nk chi isi̱nc pec. Ut quixxakabeb oxib mil riqꞌuin cuakib ciento chi cui̱nk re teꞌjolomi̱nk re li cꞌanjel.

³ Li rey Salomón quitzꞌi̱bac riqꞌuin laj Hiram lix reyeb laj Tiro ut quixye re: —¿Ma incꞌaꞌ ta̱ru̱k ta̱takla caꞌchꞌinak incheꞌ chacalteꞌ joꞌ caba̱nu riqꞌuin laj David lin yucuaꞌ nak quixyi̱b li rochoch aꞌan?

⁴ La̱in oc cue chixyi̱banquil jun li templo re takalokꞌoni cuiꞌ li Ka̱cuaꞌ lin Dios. Aꞌanak jun santil naꞌajej bar tolokꞌoni̱nk cuiꞌ cuochbeneb lin tenamit. Aran tocꞌatok sununquil ban ut aran tomayejak caxlan cua junelic. Rajlal ekꞌela ut rajlal ecuu takacꞌat li xul li takamayeja chiru li Dios. Joꞌcan ajcuiꞌ takaba̱nu rajlal saꞌ eb li hiloba̱l cutan ut saꞌ xyoꞌlajic li po ut saꞌ eb li ninkꞌe re lokꞌoni̱nc joꞌ cꞌaynako chixba̱nunquil chalen chak junxil.

⁵ Li templo oc cue chixyi̱banquil, aꞌan kꞌaxal nim xban nak li kaDios, aꞌan li kꞌaxal nim xcuanquil saꞌ xbe̱neb chixjunileb li yi̱banbil dios.

⁶ Abanan, ¿ani ta cuiꞌ kꞌaxal cau rib chixyi̱banquil rochoch li Dios xban nak li Dios incꞌaꞌ nacuan caꞌaj cuiꞌ saꞌ junak ochoch? Cuan ban saꞌ chixjunil li ruchichꞌochꞌ joꞌ ajcuiꞌ saꞌ li choxa. ¿Anihin ta cuiꞌ la̱in nak tinyi̱b li templo usta caꞌaj cuiꞌ re xcꞌatbal li sununquil ban re xlokꞌoninquil li Dios?

⁷ Joꞌcan nak yo̱quin chixyebal a̱cue nak tina̱tenkꞌa. Ta̱takla chak cue junak cui̱nk naxnau cꞌanjelac chi us riqꞌuin li chꞌi̱chꞌ oro, plata, bronce, ut hierro. Ut tixnau ajcuiꞌ cꞌanjelac riqꞌuin li cha̱bil tꞌicr púrpura, cak ut azul. Aꞌan ta̱trabajik rochbeneb laj Judá ut laj Jerusalén, li ac tzolbileb chi cꞌanjelac. Aꞌaneb li ac sicꞌbileb ru xban laj David inyucuaꞌ chi cꞌanjelac chiru.

⁸ Ut ta̱takla ajcuiꞌ chak cue li cheꞌ chacalteꞌ, li ciprés, ut li sándalo li cuan aran Líbano. Ninnau nak eb li nequeꞌcꞌanjelac cha̱cuu nequeꞌxnau xyocꞌbal chi cha̱bil li cheꞌ. Ut la̱in tintaklaheb ajcuiꞌ li nequeꞌcꞌanjelac chicuu re nak teꞌxtenkꞌaheb.

⁹ Tintaklaheb re nak teꞌrisi nabal li tzꞌalam cheꞌ xban nak li templo li tinyi̱b, aꞌan kꞌaxal nim ut cꞌajoꞌ xchꞌinaꞌusal.

¹⁰ Ut la̱in tintakla lix tzacae̱mkeb li nequeꞌcꞌanjelac cha̱cuu, eb li ta̱takla chi tꞌanoc cheꞌ. Tintakla laje̱b roxcꞌa̱l mil quintal li trigo, ut laje̱b roxcꞌa̱l mil quintal li cebada. Tintakla ca̱hib ciento mil riqꞌuin caꞌcꞌa̱l mil litro li vino ut tintakla ajcuiꞌ nabal li aceite, chan laj Salomón.

¹¹ Ut laj Hiram, lix reyeb laj Tiro quixtakla re̱kaj lix hu laj Salomón ut quixye re chi joꞌcaꞌin: —Xban nak li Ka̱cuaꞌ naxraheb lix tenamit, joꞌcan nak catxqꞌue chokꞌ xreyeb.

¹² Lokꞌoninbil taxak li Ka̱cuaꞌ lix Dioseb laj Israel, li quiyi̱ban re li choxa joꞌ ajcuiꞌ li ruchichꞌochꞌ. Aꞌan quiqꞌuehoc re li rey David jun li ralal cha̱bil ut cuan xnaꞌleb. (Li ralal aꞌan, aꞌan la̱at.) La̱at ta̱yi̱b lix templo li Ka̱cuaꞌ ut ta̱yi̱b ajcuiꞌ la̱ cuochoch.

¹³ Joꞌcan nak la̱in tintakla a̱cue jun li cui̱nk naxnau cꞌanjelac chi us, aj Hiram-abi xcꞌabaꞌ.

¹⁴ Lix naꞌ, aꞌan xcomoneb li ralal xcꞌajol laj Dan ut lix yucuaꞌ yoꞌlajenak arin Tiro. Naxnau chi us xcꞌanjelanquil li oro, plata, bronce ut hierro ut naxnau xqꞌuebal xsahob ru. Naxnau ajcuiꞌ xcꞌanjelanquil li pec ut li cheꞌ. Ut naxnau ajcuiꞌ xcꞌanjelanquil li cha̱bil tꞌicr lino, li púrpura, li azul ut li cak. Ut naxnau xyi̱banquil chi us aꞌ yal chanru ta̱cuaj. Aꞌan ta̱cꞌanjelak rochbeneb li nequeꞌcꞌanjelac cha̱cuu ut rochbeneb ajcuiꞌ li queꞌcꞌanjelac chiru li Ka̱cuaꞌ David, la̱ yucuaꞌ.

¹⁵ Joꞌcan nak ka̱cuaꞌ Salomón, ta̱takla chak li trigo, li cebada, li aceite ut li vino li xayechiꞌi.

¹⁶ Takayocꞌ li cheꞌ saꞌ li naꞌajej Líbano, li joꞌ qꞌuial ta̱cꞌanjelak cha̱cuu. Ut saꞌ xbe̱n poyteꞌ takatakla li cheꞌ li ta̱cuaj saꞌ li palau toj Jope. Ut la̱at ta̱sicꞌ chanru nak ta̱cꞌam li cheꞌ toj Jerusalén, chan laj Hiram lix reyeb laj Tiro.

¹⁷ Ut li rey Salomón quixtakla rajlanquileb chixjunileb li jalaneb xtenamit li cuanqueb Israel. Quixba̱nu joꞌ quixba̱nu li rey David lix yucuaꞌ. Oꞌcꞌa̱l riqꞌuin oxlaju roxcꞌa̱l mil riqꞌuin cuakib ciento (153,600) li jalaneb xtenamit li cuanqueb Israel.

¹⁸ Quixye nak laje̱b xca̱cꞌa̱l mil chi cui̱nk teꞌi̱ka̱nk, ca̱cꞌa̱l mil chi cui̱nk teꞌisi̱nk pec saꞌ eb li tzu̱l, ut oxib mil riqꞌuin cuakib ciento chi cui̱nk teꞌtakla̱nk saꞌ xbe̱neb li teꞌcꞌanjelak.