2 Corintios 8 - Li Santil hu

Chosihi̱nk chi sa saꞌ kachꞌo̱l

¹ Anakcuan, ex inherma̱n, nacuaj nak tinserakꞌi e̱re chanru nak li Dios riqꞌuin xnimal ruxta̱n yo̱ chixtenkꞌanquileb laj pa̱banel li cuanqueb Macedonia chixba̱nunquil li usilal.

² Quiyaleꞌ rix lix pa̱ba̱leb xban li qꞌuila raylal xeꞌxcꞌul. Abanan numtajenak lix sahil xchꞌo̱leb. Usta kꞌaxal nebaꞌeb, abanan chanchan biomeb xban nak nabal xeꞌxsi re xtenkꞌanquileb li rech aj pa̱banelil.

³ La̱in ninnau nak queꞌxqꞌue li joꞌ qꞌuial queꞌru xqꞌuebal ut toj queꞌxqꞌue cuiꞌchic xtzꞌakob chi anchaleb xchꞌo̱l.

⁴ Qui-ala saꞌ xchꞌo̱leb tenkꞌa̱nc. Ut queꞌxye ke nak chi anchaleb xchꞌo̱l queꞌraj xtenkꞌanquileb li rech aj pa̱banelil li cuanqueb Jerusalén.

⁵ Incꞌaꞌ xkacꞌoxla nak nabal ta teꞌxqꞌue. Queꞌxkꞌaxtesi rib chiru li Dios ut queꞌxyechiꞌi ajcuiꞌ rib chikatenkꞌanquil joꞌ naraj li Dios.

⁶ Joꞌcan nak xkatzꞌa̱ma chiru laj Tito nak ta̱xic cuiꞌchic e̱riqꞌuin re nak textenkꞌa xchoybal li cꞌanjel xetiquib xban xcha̱bilal e̱chꞌo̱l. Aꞌan ajcuiꞌ li quitiquiban re xxocbal li mayej aꞌin.

⁷ La̱ex cau e̱chꞌo̱l saꞌ le̱ pa̱ba̱l. Nequenau lix ya̱lal ut nequenau xchꞌolobanquil li ya̱l. Nequeqꞌue e̱chꞌo̱l chi cꞌanjelac joꞌ naraj li Dios, ut nocoe̱ra. Joꞌcan nak nakatzꞌa̱ma che̱ru nak cheqꞌue le̱ mayej chi anchal e̱chꞌo̱l.

⁸ La̱in incꞌaꞌ yo̱quin xminbal e̱ru. Yo̱quin ban chixyebal e̱re chanru nak eb laj Macedonia nequeꞌxqꞌue xmayej chi anchaleb xchꞌo̱l ut nacuaj ajcuiꞌ xnaubal ma chi anchal e̱chꞌo̱l nequexrahoc la̱ex.

⁹ La̱ex ac nequenau nak kꞌaxal nim li rusilal li Ka̱cuaꞌ Jesucristo. Aꞌan quixcanab chak lix biomal saꞌ choxa ut quicuan saꞌ nebaꞌil arin saꞌ ruchichꞌochꞌ yal e̱ban la̱ex. Quixba̱nu chi joꞌcaꞌin yal re nak la̱ex te̱cꞌul li biomal li naxqꞌue li Dios.

¹⁰ Nacuaj xyebal e̱re cꞌaꞌru nincꞌoxla chirix le̱ mayej. Us cui te̱choy xba̱nunquil li xetiquib jun haber. La̱ex li xbe̱n li queye nak textenkꞌa̱nk. Ut la̱ex ajcuiꞌ li xbe̱n li quetiquib xba̱nunquil.

¹¹ Joꞌcan nak us cui te̱choy xba̱nunquil li xetiquib junxil. Chi anchal e̱chꞌo̱l xetiquib tenkꞌa̱nc. Anakcuan te̱qꞌue li joꞌ nimal joꞌ chꞌinal naxqꞌue rib che̱ru.

¹² Li ani na-ala saꞌ xchꞌo̱l xqꞌuebal xmayej, li Dios naxcꞌul lix mayej aꞌ yal joꞌ nimal cuan chiru. Li Dios incꞌaꞌ naxpatzꞌ li ma̱cꞌaꞌ chiru.

¹³ Incꞌaꞌ yo̱quin chixyebal aꞌin re nak li jun chꞌol teꞌtenkꞌa̱k chi nabal ut la̱ex texcana̱k chi ma̱cꞌaꞌ chic cuan e̱re. Nacuaj ban nak cua̱nk e̱re la̱ex ut cua̱nk ajcuiꞌ reheb li jun chꞌol chic re nak ma̱ ani ta̱cana̱k chi ma̱cꞌaꞌ cuan re.

¹⁴ Anakcuan riqꞌuin li joꞌ qꞌuial cuan e̱re, chetenkꞌaheb li ma̱cꞌaꞌ cuan reheb. Ma̱re saꞌ jun cutan ma̱cꞌaꞌ cua̱nk e̱re la̱ex ut aꞌan eb chic teꞌtenkꞌa̱nk e̱re riqꞌuin li joꞌ qꞌuial cuan reheb aꞌan.

¹⁵ Joꞌcaꞌin tzꞌi̱banbil saꞌ li Santil Hu chirix li maná li quixqꞌue li Dios: Li ani quixxoc nabal, ma̱cꞌaꞌ qui-elaꞌan chiru. Ut li ani caꞌchꞌin quixxoc, quitzꞌakloc ajcuiꞌ chiru. (Ex. 16:18)

Laj Tito quitakla̱c chixtenkꞌanquileb laj Corinto

¹⁶ Ninbantioxi chiru li Dios xban nak laj Tito naxqꞌue xchꞌo̱l che̱tenkꞌanquil joꞌ nak ninqꞌue inchꞌo̱l la̱in.

¹⁷ Quintzꞌa̱ma chiru laj Tito nak ta̱xic e̱riqꞌuin ut quixcꞌul xchꞌo̱l. Toj ma̱jiꞌ ajcuiꞌ nintzꞌa̱ma chiru nak aꞌan ac x-ala saꞌ xchꞌo̱l nak ta̱xic e̱riqꞌuin.

¹⁸ Yo̱co chixtaklanquil jun chic li herma̱n e̱riqꞌuin rochben laj Tito. Aꞌan naꞌno ru xbaneb chixjunileb laj pa̱banel yalak bar xban nak cha̱bil li cꞌanjel naxba̱nu re xchꞌolobanquil lix ya̱lal li colba-ib.

¹⁹ Aꞌan li quixakaba̱c xbaneb laj pa̱banel re ta̱xic chikix nak toxic chixcanabanquil li ma̱tan aꞌin. Li ma̱tan aꞌin, aꞌan re xqꞌuebal xlokꞌal li Ka̱cuaꞌ ut re nak teꞌxnau li kech aj pa̱banelil nak nakaj xtenkꞌanquileb.

²⁰ Yo̱co chixba̱nunquil li cꞌanjel aꞌin chi us re nak ma̱ ani ta̱cuechꞌok rix li kacꞌanjel nak toxic chixcanabanquil li nimla ma̱tan aꞌin.

²¹ Nakaqꞌue kachꞌo̱l chixba̱nunquil li cꞌaꞌru us; moco caꞌaj cuiꞌ ta chiru li Dios. Chiruheb aj ban cuiꞌ li cui̱nk.

²² Ut yo̱co chixtaklanquil jun chic li kaherma̱n chirixeb. Qꞌuila cua xkaqꞌue retal nak naxqꞌue xchꞌo̱l chixba̱nunquil li cꞌaꞌak re ru re xtenkꞌanquil li rech aj pa̱banelil. Xban nak aꞌan cau xchꞌo̱l e̱riqꞌuin, joꞌcan nak sa xchꞌo̱l chi xic e̱riqꞌuin.

²³ Cui ani teꞌpatzꞌok chirix laj Tito, te̱ye reheb nak aꞌan cuech aj cꞌanjelil. Cuochben che̱tenkꞌanquil. Ut eb li cuib chic chi herma̱n, aꞌan taklanbileb xbaneb laj pa̱banel. Xban nak ti̱queb xchꞌo̱l saꞌ lix pa̱ba̱l, nequeꞌxqꞌue xlokꞌal li Cristo.

²⁴ Nak teꞌcuulak e̱riqꞌuin checꞌulakeb saꞌ xya̱lal. Checꞌut chiruheb nak nequera le̱ rech aj pa̱banelil. Chi joꞌcan yalak bar ta̱qꞌuehekꞌ retal nak ya̱l li cha̱bil esil li xinye che̱rix.