2 Corintios 7 - Li Santil hu

¹ Joꞌcan ut ex inherma̱n, chixjunil aꞌin yechiꞌinbil ke la̱o. Joꞌcan nak chikacanabak chixjunil li ma̱usilal li namuxuc ru li katibel ut li ka̱m. Xban nak nakaxucua ru li Dios chikaqꞌue kachꞌo̱l chi cua̱nc saꞌ santilal.

Laj Pablo quisahoꞌ saꞌ xchꞌo̱l nak queꞌxjal xcꞌaꞌuxeb laj Corinto

² Nintzꞌa̱ma che̱ru nak choe̱ra. Ma̱cꞌaꞌ xkaba̱nu e̱re. Ma̱ ani xkaba̱nu raylal re ut ma̱ ani xkapoꞌ xchꞌo̱l ut ma̱ ani xkabalakꞌi.

³ Incꞌaꞌ xinye aꞌin re e̱kꞌusbal. Ac xinye e̱re nak junelic nequexinra. Junelic cua̱nkex saꞌ inchꞌo̱l nak yoꞌyo̱kin ut chalen toj saꞌ lin camic.

⁴ Cau inchꞌo̱l e̱riqꞌuin ut nasahoꞌ inchꞌo̱l xyebal e̱resilal. Cꞌojcꞌo inchꞌo̱l e̱ban. Usta yo̱quin chixcꞌulbal li raylal, abanan kꞌaxal sa saꞌ inchꞌo̱l.

⁵ Chalen kacꞌulunic arin Macedonia ma̱ bar naru nocohilan. Yalak bar nocorahobtesi̱c ut nequeꞌraj pletic kiqꞌuin. Ut yo̱ ajcuiꞌ kacꞌaꞌux che̱rix la̱ex.

⁶ Abanan li Dios naxcꞌojob xchꞌo̱leb li raheb saꞌ xchꞌo̱l. Ut aꞌan quixqꞌue xcacuilal kachꞌo̱l riqꞌuin lix cꞌulunic laj Tito.

⁷ Moco caꞌaj cuiꞌ ta riqꞌuin xcꞌulunic laj Tito nak quisahoꞌ inchꞌo̱l. Riqꞌuin ban ajcuiꞌ rabinquil nak laj Tito sa saꞌ xchꞌo̱l e̱riqꞌuin. Quixserakꞌi ke nak la̱ex te̱raj rilbal cuu ut quixye cue nak xyotꞌeꞌ e̱chꞌo̱l nak xrahoꞌ inchꞌo̱l e̱ban. Ut quixye ajcuiꞌ cue nak niquine̱cꞌoxla. Kꞌaxal cuiꞌchic quisahoꞌ inchꞌo̱l chirabinquil aꞌan.

⁸ Usta xrahoꞌ inchꞌo̱l junxil nak xrahoꞌ e̱chꞌo̱l la̱ex xban li hu quintakla e̱riqꞌuin, abanan incꞌaꞌ nayotꞌeꞌ inchꞌo̱l nak quintakla xban nak ninnau nak junpa̱t ajcuiꞌ xrahoꞌ e̱chꞌo̱l xban.

⁹ Anakcuan nasahoꞌ saꞌ inchꞌo̱l. Moco xban ta nak xrahoꞌ e̱chꞌo̱l inban. Riqꞌuin ban nak xyotꞌeꞌ e̱chꞌo̱l ut xejal e̱cꞌaꞌux. Xecuy li raylal aꞌan joꞌ naraj li Dios. Anakcuan nequetau ru nak moco ra ta xkaba̱nu e̱re.

¹⁰ Cui junak narahoꞌ xchꞌo̱l xban li incꞌaꞌ us naxba̱nu, li jun aꞌan naxtau lix colbal xban nak nayotꞌeꞌ xchꞌo̱l ut naxjal xcꞌaꞌux joꞌ naraj li Dios. Ut ma̱ ani narahoꞌ xchꞌo̱l xban li colba-ib. Abanan cui junak narahoꞌ xchꞌo̱l xban li incꞌaꞌ us naxba̱nu ut incꞌaꞌ nayotꞌeꞌ xchꞌo̱l, li jun aꞌan incꞌaꞌ naxtau li colba-ib.

¹¹ Qꞌuehomak retal chanru nak xextenkꞌa̱c xban nak xecuy li raylal joꞌ naraj li Dios. Quixqꞌue xcacuil e̱chꞌo̱l saꞌ le̱ pa̱ba̱l. Anakcuan nequeraj rilbal cuu ut nequeraj xpatzꞌbal xcuybal le̱ ma̱c. Nachal chic e̱joskꞌil ut e̱xiu xban li incꞌaꞌ us li nequeꞌxba̱nu li cuanqueb saꞌ e̱ya̱nk. Nequeraj nak laj ma̱c teꞌxtoj rix lix ma̱queb. Riqꞌuin chixjunil aꞌin nacꞌutun nak la̱ex ma̱cꞌaꞌ e̱ma̱c riqꞌuin li cꞌaꞌru quicꞌulman.

¹² Joꞌcan ut nak xintzꞌi̱ba li hu aꞌan incꞌaꞌ xinba̱nu saꞌ xcꞌabaꞌ li quiba̱nun ma̱usilal chi moco saꞌ xcꞌabaꞌ li quicꞌuluc raylal. Xinba̱nu ban re nak chicꞌutu̱nk chiru li Dios nak cꞌojcꞌo e̱chꞌo̱l cuiqꞌuin.

¹³ Xban nak xeba̱nu li cꞌaꞌru xinye e̱re, quicꞌojla lin chꞌo̱l. Ut kꞌaxal cuiꞌchic nasahoꞌ lin chꞌo̱l riqꞌuin lix sahil xchꞌo̱l laj Tito e̱riqꞌuin la̱ex nak xeqꞌue xcacuilal xchꞌo̱l.

¹⁴ Nequenau nak junelic ninye e̱re lix ya̱lal. Ut incꞌaꞌ xincꞌut inxuta̱n nak xinye re laj Tito nak la̱ex cha̱bilex xban nak x-el ajcuiꞌ chi ya̱l li cꞌaꞌru xinye re laj Tito nak xecꞌut le̱ cha̱bilal chiru.

¹⁵ Ut laj Tito kꞌaxal cuiꞌchic nequexra nak najulticoꞌ re chanru nak xecꞌul aꞌan saꞌ xya̱lal ut xeqꞌue xcuanquil nak xeba̱nu li cꞌaꞌru quixye e̱re.

¹⁶ Nacꞌojla inchꞌo̱l riqꞌuin li cꞌaꞌru nequeba̱nu ut sa inchꞌo̱l e̱riqꞌuin.