2 Corintios 6 - Li Santil hu

¹ La̱o aj cꞌanjelo chiru li Dios ut aꞌan natenkꞌan ke chixchꞌolobanquil lix ya̱lal che̱ru. La̱ex li ac xecꞌul li rusilal li Dios. Nintzꞌa̱ma che̱ru nak incꞌaꞌ te̱canab chi ma̱cꞌaꞌ rajbal. Cheqꞌuehak ban xcuanquil.

² Joꞌcaꞌin tzꞌi̱banbil saꞌ li Santil Hu: Nak xcuulac xkꞌehil, xaya̱ba incꞌabaꞌ ut xatcuabi. Saꞌ xkꞌehil xcꞌulbal li colba-ib, xatintenkꞌa, chan li Dios. (Isa. 49:8) Joꞌcan nak la̱in ninye e̱re nak anakcuan xkꞌehil xcꞌulbal li rusilal li Dios. Anakcuan ajcuiꞌ naru texcolekꞌ.

³ La̱o incꞌaꞌ nakaj xba̱nunquil li cꞌaꞌak re ru li ta̱ramok re chiruheb li ani teꞌraj pa̱ba̱nc re nak ma̱ ani ta̱cuechꞌok rix li cꞌanjel li yo̱co chixba̱nunquil.

⁴ Chixjunil li nakaba̱nu, aꞌan nacꞌutuc re nak la̱o aj cꞌanjelo chiru li Dios. Nakacuy xnumsinquil chixjunil li raylal, li rahobtesi̱c ut li rahil chꞌo̱lejil li nakacꞌul.

⁵ Xosaqꞌueꞌ, xoqꞌueheꞌ saꞌ tzꞌalam, xeꞌxtu̱b rib saꞌ kabe̱n re kacamsinquil, xkatacuasi kib chi cꞌanjelac, xoyoꞌlec, ut xkacuy kasaꞌ xban nak ma̱cꞌaꞌ katzacae̱mk.

⁶ Riqꞌuin aꞌin nequenau nak la̱o aj cꞌanjelo chiru li Dios. Saꞌ ti̱quilal yo̱co chixba̱nunquil. Nakanau lix ya̱lal. Nabal li raylal nakacuy ut cuanco saꞌ usilal. Li Santil Musikꞌej cuan kiqꞌuin ut chi anchal kachꞌo̱l nocorahoc.

⁷ Nakachꞌolob lix ya̱lal che̱ru. Chixjunil li nakaba̱nu, nakaba̱nu riqꞌuin lix cuanquil li Dios. Junak li soldado cuan xchꞌi̱chꞌ re pletic saꞌ lix nim ukꞌ ut cuan xchꞌi̱chꞌ saꞌ lix tzꞌe re xcolbal rib. Ut li kachꞌi̱chꞌ la̱o, aꞌan xti̱quilal li kachꞌo̱l.

⁸ Cuan li nequeꞌxqꞌue kalokꞌal ut cuan ajcuiꞌ li nequeꞌxsach kacuanquil. Cuan li nequeꞌhoboc ke ut cuan ajcuiꞌ li nequeꞌoxlokꞌin ke. Ut cuan ajcuiꞌ li nequeꞌyehoc re nak la̱o aj balakꞌ. Abanan la̱o junelic nocoa̱tinac saꞌ xya̱lal.

⁹ Cuan li nequeꞌxba̱nu joꞌ li incꞌaꞌ nequeꞌxnau ku, abanan chixjunileb nequeꞌxnau ku. Caꞌchꞌin chic ma̱ xocam, abanan toj yoꞌyo̱co. Kꞌaxal ra xkacꞌul abanan li Dios incꞌaꞌ nocoxcanab chi camsi̱c.

¹⁰ Kꞌaxal ra cuanco, abanan junelic sa saꞌ kachꞌo̱l. Nebaꞌo, abanan nabal nequeꞌxcꞌul xbiomal nak nakachꞌolob chiruheb lix ya̱lal. Ma̱cꞌaꞌ cuan ke arin saꞌ ruchichꞌochꞌ, abanan nakanau nak biomo xban nak cuan li rusilal li Dios kiqꞌuin.

¹¹ Ex herma̱n, la̱ex li cuanquex Corinto, nequexinra. Joꞌcan nak xinye e̱re chixjunil li cuan saꞌ inchꞌo̱l.

¹² La̱in nequexinra la̱ex, abanan la̱ex nacꞌutun che̱ru nak incꞌaꞌ niquine̱ra.

¹³ Yo̱quin chi a̱tinac e̱riqꞌuin joꞌ nak naa̱tinac junak li yucuaꞌbej riqꞌuin li ralal xcꞌajol. Nintzꞌa̱ma che̱ru nak tine̱ra joꞌ nak nequexinra la̱in.

Me̱lokꞌoni chic li yi̱banbil dios

¹⁴ Me̱junaji e̱rib riqꞌuineb li toj ma̱jiꞌ nequeꞌpa̱ban. ¿Ma naru ta biꞌ ta̱cua̱nk saꞌ comonil li ti̱quilal riqꞌuin li ma̱usilal? ¿Ma naru ta biꞌ ta̱cua̱nk chi sum a̱tin li santilal riqꞌuin li ma̱c?

¹⁵ ¿Ma naru ta biꞌ ta̱cua̱nk chi sum a̱tin li Cristo riqꞌuin laj tza? ¿Ma naru ta biꞌ teꞌcua̱nk chi sum a̱tin laj pa̱banel riqꞌuineb li toj ma̱jiꞌ nequeꞌpa̱ban?

¹⁶ ¿Ma xcꞌulubeb ta biꞌ li yi̱banbil dios nak teꞌcua̱nk saꞌ rochoch li yoꞌyo̱quil Dios? Ma̱min ta̱ru̱k. La̱in ninye e̱re nak la̱o aj pa̱banelo, la̱o li rochoch li yoꞌyo̱quil Dios. Li Dios, aꞌan li quixye chi joꞌcaꞌin: La̱in tincua̱nk riqꞌuineb ut tincuochbeniheb. La̱inak lix Dioseb aꞌan, ut aꞌanakeb li cualal incꞌajol, chan. (Lev. 26:12)

¹⁷ Ut li Ka̱cuaꞌ quixye cuiꞌchic chi joꞌcaꞌin: Joꞌcan utan chex-e̱lk saꞌ xya̱nkeb li nequeꞌxlokꞌoni li yi̱banbil dios. Me̱ba̱nu chic li nequeꞌxba̱nu li jun chꞌol chic nak nequeꞌxlokꞌoni li yi̱banbil dios. Checanabak chi junaj cua ut la̱in texincꞌul chi sa saꞌ inchꞌo̱l.

¹⁸ Ut la̱inak chic le̱ Yucuaꞌ ut la̱exak chic li cualal incꞌajol, chan li Ka̱cuaꞌ li kꞌaxal nim xcuanquil. (Isa. 52:11)