2 Corintios 5 - Li Santil hu

Acꞌ chic li katzꞌejcual takacꞌul saꞌ choxa

¹ Li katzꞌejcual arin saꞌ ruchichꞌochꞌ chanchan jun li ochoch li na-osoꞌ. La̱o nakanau nak li katzꞌejcual arin saꞌ ruchichꞌochꞌ na-osoꞌ. Abanan ta̱cua̱nk chic jun katzꞌejcual saꞌ choxa li tixqꞌue ke li Dios. Moco joꞌ ta li ochoch arin saꞌ ruchichꞌochꞌ li na-osoꞌ xban nak yi̱banbil xban cui̱nk. Li katzꞌejcual aran saꞌ choxa incꞌaꞌ ta̱osokꞌ. Cua̱nk ban chi junelic.

² Nak cuanco saꞌ li tzꞌejcualej aꞌin, noco-ayaynac ut nakaj ta ac xkatau li katzꞌejcual saꞌ li choxa li tixqꞌue ke li Dios.

³ Ma̱cuaꞌako musikꞌej chi ma̱cꞌaꞌ li katzꞌejcual. Ta̱cua̱nk ban li katzꞌejcual li tixqꞌue ke li Dios.

⁴ Nak cuanco arin saꞌ ruchichꞌochꞌ riqꞌuin li katzꞌejcual aꞌin, noco-ayaynac xban li raylal nakacꞌul. Incꞌaꞌ raj chic nakaj li katzꞌejcual li na-osoꞌ. Ma̱cuaꞌ xban nak nakaj ca̱mc. Xban nak nakaj ta ac xkatau li katzꞌejcual saꞌ choxa li ta̱cua̱nk chi junelic.

⁵ Aꞌ li Dios aꞌan li coxcauresi re nak naru takacꞌul li katzꞌejcual saꞌ choxa. Ut quixqꞌue ke li Santil Musikꞌej re nak takanau chi tzꞌakal nak takacꞌul li cꞌaꞌru naxyechiꞌi ke.

⁶ Joꞌcan nak junelic cau kachꞌo̱l riqꞌuin li Dios nak cuanco saꞌ ruchichꞌochꞌ. Nakanau nak joꞌ najtil cuanco saꞌ ruchichꞌochꞌ, moco cuanco ta chak riqꞌuin li Ka̱cuaꞌ Jesucristo saꞌ choxa.

⁷ Nak yoꞌyo̱co arin saꞌ ruchichꞌochꞌ, toj ma̱jiꞌ nakil ru li Ka̱cuaꞌ. Abanan cau kachꞌo̱l nak li Ka̱cuaꞌ cuan kiqꞌuin.

⁸ La̱in ninye nak cau kachꞌo̱l riqꞌuin li Dios. Nakaj raj ca̱mc ut xcanabanquil li katzꞌejcual aꞌin re nak naru toxic saꞌ choxa chi cua̱nc riqꞌuin li Ka̱cuaꞌ Jesucristo.

⁹ Joꞌcan nak junelic nakaqꞌue kachꞌo̱l chixba̱nunquil li cꞌaꞌru naraj li Ka̱cuaꞌ usta cuanco arin saꞌ ruchichꞌochꞌ malaj saꞌ li Santil Choxa.

¹⁰ Nakanau nak chikajunilo toxkacꞌut kib chiru li Cristo re nak aꞌan ta̱rakok a̱tin saꞌ kabe̱n. Ut li junju̱nk tixcꞌul lix kꞌajca̱munquil aꞌ yal chanru lix yehom xba̱nuhom nak xcuan saꞌ ruchichꞌochꞌ, ma us malaj incꞌaꞌ us quixba̱nu.

Chocua̱nk chi sum a̱tin riqꞌuin li Dios

¹¹ Joꞌcan nak nakaxucua ru li Dios ut nakaqꞌue kachꞌo̱l chixchꞌolobanquil lix ya̱lal. Ut li Dios naxnau chi tzꞌakal nak ti̱c li kachꞌo̱l. Ut la̱in nacuaj nak te̱nau ajcuiꞌ la̱ex.

¹² Incꞌaꞌ yo̱quin chixyebal aꞌin e̱re re xnimobresinquil cuib. Yo̱quin ban chixqꞌuebal e̱naꞌleb re nak ta̱sahokꞌ e̱chꞌo̱l cuiqꞌuin ut re nak te̱nau xsumenquil li yo̱queb chixnimobresinquil rib riqꞌuin lix yehom xba̱nuhomeb ut incꞌaꞌ nequeꞌxqꞌue xcuanquil li ti̱quil chꞌo̱lej.

¹³ Cuan nequeꞌyehoc nak incꞌaꞌ tuktu kajolom. Abanan li cꞌaꞌru nakaba̱nu, aꞌan re xqꞌuebal xlokꞌal li Dios. Cui la̱ex nequecꞌoxla nak tuktu kajolom, us, xban nak us chokꞌ e̱re la̱ex li cꞌaꞌru nakaba̱nu.

¹⁴ Xban nak kꞌaxal nocoxra li Cristo, joꞌcan nak nakaqꞌue kachꞌo̱l chi cꞌanjelac chiru. Nakanau chi tzꞌakal nak li Cristo quicam saꞌ kacꞌabaꞌ la̱o chikajunilo. Ut xban nak quicam aꞌan, chikajunilo camenako chic chiru li ma̱c.

¹⁵ Quicam saꞌ kacꞌabaꞌ chikajunilo la̱o re nak incꞌaꞌ yoꞌyo̱ko yal chi joꞌcan chixba̱nunquil li cꞌaꞌru nakaj kajunes kib. Yoꞌyo̱ko ban re nak takaba̱nu li cꞌaꞌru naraj li Cristo li quicam ut quicuacli cuiꞌchic chi yoꞌyo saꞌ kacꞌabaꞌ la̱o.

¹⁶ Incꞌaꞌ chic nakaqꞌue retal chanru nak cuanqueb li junju̱nk saꞌ ruchichꞌochꞌ. Anakcuan la̱o chic aj pa̱banel ut jalan chic li kanaꞌleb. Junxil nak toj ma̱jiꞌ nocopa̱ban incꞌaꞌ xkaqꞌue xcuanquil li Cristo xban nak xkacꞌoxla nak yal cui̱nk. Abanan anakcuan nakanau chic lix ya̱lal.

¹⁷ Joꞌcan ut cui junak xpa̱b li Cristo, acꞌobresinbil aꞌan. Lix yuꞌam quicuan junxil xnumeꞌ ut anakcuan acꞌ chic lix yuꞌam.

¹⁸ Chixjunil aꞌin xkama̱tani riqꞌuin li Dios ut aꞌan ajcuiꞌ li quicꞌamoc ke saꞌ usilal riqꞌuin saꞌ xcꞌabaꞌ li Jesucristo. Ut aꞌan ajcuiꞌ li quixakaban ke chixchꞌolobanquil xya̱lal li colba-ib re nak cuan li teꞌpa̱ba̱nk ut teꞌcua̱nk saꞌ usilal riqꞌuin li Dios.

¹⁹ Aꞌan aꞌin li yo̱quin chixyebal: Li Dios coxcꞌam cuiꞌchic saꞌ usilal riqꞌuin saꞌ xcꞌabaꞌ li Cristo. Ut incꞌaꞌ chic naxqꞌue saꞌ xchꞌo̱l li kama̱c. Li Dios quixkꞌaxtesi ke li cꞌanjel aꞌin re nak takachꞌolob xya̱lal re nak li ani teꞌpa̱ba̱nk teꞌcꞌamekꞌ saꞌ usilal riqꞌuin li Dios.

²⁰ Joꞌcan ut nak la̱o taklanbilo saꞌ xcꞌabaꞌ li Jesucristo. Li Dios naxtoꞌoni lix tzꞌu̱mal ke re nak ta̱a̱tinak e̱riqꞌuin. Saꞌ xcꞌabaꞌ li Jesucristo nakatzꞌa̱ma che̱ru nak checꞌamak e̱rib saꞌ usilal riqꞌuin li Dios.

²¹ Li Jesucristo ma̱ jun sut quima̱cob. Abanan li Dios quixqꞌue li kama̱c saꞌ xbe̱n li Cristo re nak saꞌ xcꞌabaꞌ aꞌan, la̱o takatau lix ti̱quilal kachꞌo̱l li naxqꞌue li Dios.