2 Corintios 4 - Li Santil hu

Li cꞌanjel qꞌuebil ke xban li Dios kꞌaxal lokꞌ

¹ Yal xban rusilal li Dios nak quixqꞌue ke li cꞌanjel aꞌin re xchꞌolobanquil xya̱lal li acꞌ contrato. Joꞌcan nak incꞌaꞌ nachꞌinan kachꞌo̱l.

² Nakatzꞌekta̱na chi junaj cua xba̱nunquil li ma̱usilal li moco uxc ta naraj li nequeꞌxba̱nu li jun chꞌol chic. Incꞌaꞌ nocobalakꞌin. Ut incꞌaꞌ nakapoꞌ ru li ra̱tin li Dios. Nakachꞌolob ban chi tzꞌakal lix ya̱lal re nak chixjunileb teꞌxqꞌue retal nak saꞌ xya̱lal cuanco chiru li Dios.

³ Cui incꞌaꞌ natauman ru lix ya̱lal li colba-ib li nakachꞌolob la̱o, aꞌ li incꞌaꞌ nequeꞌxtau ru, aꞌan eb li nequeꞌsach.

⁴ Incꞌaꞌ nequeꞌxtau ru xban nak laj tza naramoc re lix ya̱lal chiruheb li incꞌaꞌ nequeꞌpa̱ban. Naxba̱nu aꞌan re nak incꞌaꞌ teꞌxtau ru lix ya̱lal li colba-ib li nacꞌutuc chiku lix lokꞌal li Cristo, ut lix lokꞌal li Dios.

⁵ Incꞌaꞌ yo̱co chixchꞌolobanquil che̱ru nak la̱o toe̱pa̱b. Yo̱co ban chixchꞌolobanquil xya̱lal nak li Jesucristo aꞌan li Ka̱cuaꞌ. Ut la̱o yal aj cꞌanjelo che̱ru saꞌ xcꞌabaꞌ li Jesucristo.

⁶ Nak toj kꞌojyi̱n chak ru li ruchichꞌochꞌ, li Dios quixye, “Chicua̱nk li cutan re xcutanobresinquil ru li ruchichꞌochꞌ.” Ut aꞌan ajcuiꞌ li nacutanobresin re li kacꞌaꞌux re nak naru takanau chanru lix lokꞌal li Dios. Ut li Jesucristo naxcꞌut chiku lix lokꞌal li Dios.

⁷ La̱o chanchano li chꞌochꞌ ucꞌal li naxocman cuiꞌ li terto xtzꞌak. La̱o yal tzꞌejcualo. Abanan li Dios naxcutanobresi li kacꞌaꞌux re nak ta̱cꞌutu̱nk nak lix nimajcual cuanquilal li Dios li cuan kiqꞌuin, moco ke ta. Re ban li Dios.

Cauhak kachꞌo̱l saꞌ li kapa̱ba̱l re nak takacuy xnumsinquil li raylal nakacꞌul

⁸ Qꞌuila pa̱y chi raylal nachal saꞌ kabe̱n, abanan nakacuy xnumsinquil. Cuan nak incꞌaꞌ nakatau ru li yo̱co chixcꞌulbal abanan incꞌaꞌ nachꞌinan kachꞌo̱l.

⁹ Nocorahobtesi̱c, abanan li Dios incꞌaꞌ nocoxcanab kajunes. Cuan nak nocoeꞌxsacꞌ xban nak nequeꞌraj kacamsinquil. Abanan li Dios nacoloc ke chiruheb.

¹⁰ Yalak bar nocoxic cuan ketalil chiru li katibel nak nequeꞌxyal kacamsinquil joꞌ queꞌxba̱nu re li Cristo. Nakacuy aꞌan re nak ta̱cꞌutu̱nk chiruheb chixjunileb nak li Cristo yoꞌyo ut aꞌan nacoloc ke chiru li ca̱mc.

¹¹ Junelic nequeꞌraj kacamsinquil xban nak nococꞌanjelac chiru li Jesucristo. Abanan incꞌaꞌ nocoeꞌxcamsi xban nak li Cristo yoꞌyo ut cuan xcuanquil saꞌ kabe̱n usta yal cui̱nko.

¹² Abanan xban nak nakacuy li raylal, la̱ex ta̱cua̱nk le̱ yuꞌam chi junelic.

¹³ Cau kachꞌo̱l saꞌ li kapa̱ba̱l. Joꞌcaꞌin tzꞌi̱banbil saꞌ li Santil Hu li quixye laj David. “Cuan inpa̱ba̱l. Joꞌcan nak nina̱tinac chirix”, chan. Joꞌcan ajcuiꞌ la̱o, cuan ajcuiꞌ kapa̱ba̱l. Joꞌcan nak nocoa̱tinac chirix.

¹⁴ Nakanau nak li Dios quicuaclesin cuiꞌchic re chi yoꞌyo li Ka̱cuaꞌ Jesucristo. Joꞌcan ajcuiꞌ la̱o. Nakanau nak toxcuaclesi cuiꞌchic chi yoꞌyo joꞌ nak quixcuaclesi li Jesucristo ut toxcꞌam riqꞌuin kochbenakex la̱ex.

¹⁵ Chixjunil li raylal nakacꞌul, aꞌan re e̱ra̱bal la̱ex re nak te̱cꞌul li rusilal li Dios. Cui nabaleb teꞌcꞌuluk re li rusilal li Dios, nabaleb ajcuiꞌ teꞌbantioxi̱nk chiru li Dios ut teꞌxqꞌue xlokꞌal.

¹⁶ Joꞌcan nak incꞌaꞌ nachꞌinan kachꞌo̱l. Li katibel yo̱ chi lajc, yo̱ chi osocꞌ. Abanan li ka̱m acꞌobresinbil rajlal cutan xban li Dios.

¹⁷ Li raylal li nakacꞌul arin saꞌ ruchichꞌochꞌ, aꞌan junpa̱t ajcuiꞌ ut nakacuy xnumsinquil. Li raylal nakacꞌul, yo̱ chikacauresinquil re jun li kalokꞌal ma̱cꞌaꞌ joꞌ xchakꞌal ru ut ta̱cua̱nk chi junelic.

¹⁸ Incꞌaꞌ nakaqꞌue kachꞌo̱l chirix li cuan arin saꞌ ruchichꞌochꞌ, li na-ilman ru. Nakaqꞌue ban kachꞌo̱l chirix li cuan aran saꞌ choxa, li incꞌaꞌ na-ilman ru. Li cꞌaꞌru na-ilman ru nalaj na-osoꞌ. Abanan li incꞌaꞌ na-ilman ru cuan chi junelic.