2 Corintios 3 - Li Santil hu

Li xya̱lal chirix li acꞌ contrato

¹ ¿Ma yo̱quin ta biꞌ chixnimobresinquil cuib nak nequecꞌoxla la̱ex nak ninye nak la̱in aj cꞌanjel chiru li Dios? ¿Ma tento ta biꞌ nak cua̱nk li kahu joꞌ nequeꞌxba̱nu li jun chꞌol chic re xyebal resil aniheb re nak te̱pa̱b li cꞌaꞌru nequeꞌxye? ¿Ma naru ta biꞌ takapatzꞌ li kahu e̱re la̱ex?

² La̱ex chanchanex li kahu tzꞌi̱banbil saꞌ li kachꞌo̱l ut chixjunileb naru teꞌril. Nak teꞌril le̱ cha̱bilal teꞌxqꞌue retal nak cha̱bil li kacꞌanjel.

³ Le̱ yuꞌam la̱ex chanchan jun li hu tzꞌi̱banbil xban li Cristo. Ut la̱o xkachꞌolob lix ya̱lal che̱ru. Li hu aꞌin moco tzꞌi̱banbil ta chiru pec chi moco tzꞌi̱banbil ta riqꞌuin tinta. Tzꞌi̱banbil ban saꞌ le̱ ra̱m xban lix Musikꞌ li yoꞌyo̱quil Dios.

⁴ Naru nakaye aꞌin xban nak cau kachꞌo̱l riqꞌuin li Dios saꞌ xcꞌabaꞌ li Jesucristo.

⁵ Ma̱ jun cꞌanjel naru nakayoꞌob kajunes, chi moco naru nakacꞌoxla xba̱nunquil. Li Dios ban naxqꞌue kacuanquil chixba̱nunquil li cꞌaꞌru nakaba̱nu.

⁶ Li Dios naxqꞌue kacuanquilal chixchꞌolobanquil lix ya̱lal li acꞌ contrato, li natauman cuiꞌ li acꞌ yuꞌam. Li acꞌ yuꞌam incꞌaꞌ natauman riqꞌuin xba̱nunquil li cꞌaꞌru tzꞌi̱banbil saꞌ li chakꞌrab xban nak li chakꞌrab naxteneb li ca̱mc saꞌ kabe̱n. Li acꞌ yuꞌam qꞌuebil ke xban li Santil Musikꞌej.

⁷ Li chakꞌrab li quiqꞌueheꞌ re laj Moisés tzꞌi̱banbil chiru pec ut quicꞌutun xlokꞌal li Dios nak quixqꞌue li chakꞌrab aꞌin. Quilemtzꞌun li riloba̱l laj Moisés ut eb laj Israel incꞌaꞌ queꞌxcuy rilbal usta junpa̱t ajcuiꞌ quicuan saꞌ li riloba̱l laj Moisés lix lokꞌal li Dios. Li najter chakꞌrab aꞌin li quicꞌamoc chak re li ca̱mc saꞌ kabe̱n quicꞌulun riqꞌuin xlokꞌal li Dios.

⁸ Abanan kꞌaxal numtajenak cuiꞌchic xlokꞌal li cꞌanjel li naxba̱nu kiqꞌuin li Santil Musikꞌej.

⁹ Cui cuan xlokꞌal li najter chakꞌrab li quicꞌamoc chak li tojba ma̱c saꞌ kabe̱n, kꞌaxal cuiꞌchic numtajenak xlokꞌal li acꞌ yuꞌam li naxqꞌue ke li Santil Musikꞌej li naqꞌuehoc xti̱quilal li kachꞌo̱l chiru li Dios.

¹⁰ Li chakꞌrab cuan xlokꞌal junxil. Abanan incꞌaꞌ naxtau xlokꞌal li acꞌ yuꞌam xban nak numtajenak cuiꞌchic xlokꞌal.

¹¹ Cui cuan xlokꞌal li najter chakꞌrab li quinumeꞌ xcuanquil, kꞌaxal cuiꞌchic nim xlokꞌal li acꞌ yuꞌam li cuan chi junelic.

¹² Xban nak nakanau nak lix lokꞌal li acꞌ yuꞌam ma̱cꞌaꞌ rosoꞌjic, joꞌcan nak kꞌaxal cau kachꞌo̱l chixchꞌolobanquil lix ya̱lal ut ma̱cꞌaꞌ nakamuk che̱ru.

¹³ Incꞌaꞌ nakaba̱nu joꞌ quixba̱nu laj Moisés najter nak quixtzꞌap li riloba̱l riqꞌuin tꞌicr re nak eb laj Israel incꞌaꞌ teꞌril nak yo̱ chi e̱lc lix lokꞌal.

¹⁴ Xban xcacuilal xchꞌo̱leb incꞌaꞌ queꞌxtau ru nak lix lokꞌal li najter chakꞌrab ta̱e̱lk. Ut chalen anakcuan incꞌaꞌ ajcuiꞌ nequeꞌxtau ru. Chanchan nak li tꞌicr aꞌan toj yo̱ chi ramoc chiruheb lix ya̱lal nak nequeꞌrabi li najter chakꞌrab. Ut li tꞌicr aꞌan na-el caꞌaj cuiꞌ riqꞌuin xpa̱banquil li Cristo.

¹⁵ Chalen anakcuan nak nequeꞌrabi lix chakꞌrab laj Moisés, chanchan nak junak tꞌicr naramoc re lix ya̱lal chiruheb ut incꞌaꞌ nequeꞌxtau ru.

¹⁶ Abanan li tꞌicr aꞌan na-el nak junak tixpa̱b li Ka̱cuaꞌ Jesucristo.

¹⁷ Ut li Ka̱cuaꞌ, aꞌan ajcuiꞌ li Santil Musikꞌej. Li ani cuan li Santil Musikꞌej riqꞌuin, aꞌan moco cuan ta chic rubel xcuanquil li chakꞌrab chi moco li ma̱c. Libre ban chic cuan.

¹⁸ La̱o aj pa̱banel moco tzꞌaptzꞌo ta li kiloba̱l riqꞌuin tꞌicr re xtzꞌapbal xlokꞌal li Dios joꞌ quixba̱nu laj Moisés. Chanchano ban jun lem nak nakacꞌut xlokꞌal li Ka̱cuaꞌ. Ut li Ka̱cuaꞌ aꞌan ajcuiꞌ li Santil Musikꞌej li nocoxjalanobresi ut naxqꞌue kalokꞌal re nak yo̱ko xcꞌutbal xlokꞌal li Cristo.