2 Corintios 12 - Li Santil hu

Li cꞌaꞌru quicꞌutbesi̱c chiru laj Pablo xban li Dios

¹ Ninnau nak ma̱cꞌaꞌ tinra chirix nak tinnimobresi cuib. Abanan cui tento nak tinba̱nu, nacuaj xserakꞌinquil e̱re cꞌaꞌru quicuil chanchan matqꞌuenbil quinba̱nu. Ut nacuaj xserakꞌinquil cꞌaꞌru quixcꞌutbesi chicuu li Ka̱cuaꞌ.

² Ca̱laju chihab anakcuan nak quincꞌameꞌ toj saꞌ li rox tasal li choxa. Incꞌaꞌ ninnau ma matqꞌuenbil quinba̱nu malaj quincꞌameꞌ chi tzꞌakal. Caꞌaj cuiꞌ li Dios naxnau.

³ Incꞌaꞌ ninnau chan ta cuiꞌ ru nak co̱in saꞌ choxa. Abanan ninnau nak quincꞌameꞌ ut li Dios naxnau chanru quixba̱nu nak quinixcꞌam saꞌ choxa.

⁴ Ut li cꞌaꞌru quicuabi aran incꞌaꞌ naru nina̱tinac chirix xban nak moco xcꞌulub ta junak cui̱nk a̱tinac chirix ut incꞌaꞌ natauman junak a̱tin re xyebal xban nak kꞌaxal numtajenak xlokꞌal.

⁵ Naru raj tinnimobresi cuib riqꞌuin li cꞌaꞌru quicuabi chak saꞌ choxa. Abanan caꞌaj cuiꞌ tina̱tinak chirix li cꞌaꞌru naxcꞌut nak ma̱cꞌaꞌ incuanquil injunes xban nak yal cui̱nkin.

⁶ La̱in naru raj tinnimobresi cuib xban nak ya̱l li cꞌaꞌru quicuabi chak, abanan incꞌaꞌ ninba̱nu re nak ma̱ ani tixcꞌoxla nak kꞌaxal nim incuanquil. Caꞌaj cuiꞌ li nacuaj, aꞌan nak la̱ex te̱qꞌue retal lin yehom inba̱nuhom.

⁷ Li Dios incꞌaꞌ quiraj nak tinnimobresi cuib xban li kꞌaxal lokꞌ quilajxcꞌutbesi chak chicuu. Joꞌcan nak quiqꞌueheꞌ jun li raylal saꞌ inbe̱n. Chanchan li cuan qꞌuix saꞌ intibel nak nacuecꞌa. Aꞌan xtakl laj tza re inrahobtesinquil. Cuan li raylal aꞌin re nak incꞌaꞌ tinnimobresi cuib.

⁸ Oxib sut xintijoc ut xintzꞌa̱ma chiru li Ka̱cuaꞌ nak chirisihak li raylal aꞌin li yo̱ chi rahobtesi̱nc cue.

⁹ Abanan li Ka̱cuaꞌ quixye cue: “Incꞌaꞌ nacuisi la̱ raylal. Abanan tatintenkꞌa re nak ta̱cuy xnumsinquil. La̱in ninqꞌue lin cuanquil re li ani naxnau nak ma̱cꞌaꞌ xcuanquil xjunes,” chan cue. Joꞌcan nak nasahoꞌ saꞌ inchꞌo̱l riqꞌuin li raylal re nak lix cuanquil li Cristo cua̱nk cuiqꞌuin.

¹⁰ Joꞌcan nak nasahoꞌ saꞌ inchꞌo̱l nak ma̱cꞌaꞌ incuanquil injunes ut nak ninhobeꞌ joꞌ ajcuiꞌ nak nincꞌul li raylal, li chꞌaꞌajquilal ut li rahobtesi̱c saꞌ xcꞌabaꞌ li Jesucristo. Nasahoꞌ saꞌ inchꞌo̱l xban nak cui ma̱cꞌaꞌ incuanquil injunes cuib, ninnau nak cuan incuanquil saꞌ xcꞌabaꞌ li Jesucristo.

Laj Pablo yo̱ xcꞌaꞌux chirixeb laj pa̱banel li cuanqueb Corinto

¹¹ Chanchan nak ma̱cꞌaꞌ innaꞌleb nak ninserakꞌi e̱re chixjunil li xincꞌul. Incꞌaꞌ raj xinye e̱re. Abanan e̱ban la̱ex nak xinba̱nu xban nak la̱ex incꞌaꞌ nequeqꞌue incuanquil chokꞌ apóstol. La̱ex raj li xexqꞌuehoc incuanquil. Moco cubenak ta incuanquil la̱in chiruheb li nequeꞌxqꞌue rib chokꞌ apóstol usta ma̱cꞌaꞌ incuanquil injunes.

¹² Nak cuanquin e̱riqꞌuin nabal quincuy ut riqꞌuin xcuanquil li Dios quilajinba̱nu li milagro ut li sachba chꞌo̱lej li nacꞌutuc re nak la̱in tzꞌakal apóstol.

¹³ Joꞌ quinba̱nu chak saꞌ xya̱nkeb laj pa̱banel li quinnumeꞌ cuiꞌ chak, joꞌcan ajcuiꞌ quinba̱nu nak cuanquin e̱riqꞌuin. Li cꞌaꞌru incꞌaꞌ xinqꞌue saꞌ e̱be̱n, aꞌan lin tenkꞌanquil. ¿Ma ma̱c ta biꞌ li xinba̱nu? Checuy inma̱c cui incꞌaꞌ us xinba̱nu.

¹⁴ Anakcuan ac xincauresi cuib re nak tinxic e̱riqꞌuin saꞌ rox sut. Abanan incꞌaꞌ texinchꞌiꞌchꞌiꞌi riqꞌuin cꞌaꞌru cue. Ma̱cuaꞌ li cꞌaꞌru e̱re ninra. La̱ex ban li nequexinra. Ma̱cuaꞌeb li cocꞌal li nequeꞌchꞌolanin re li yucuaꞌbej. Aꞌ li yucuaꞌbej, aꞌan li nachꞌolanin reheb li ralal xcꞌajol.

¹⁵ Joꞌcan nak chixjunil li cꞌaꞌru cuan cue chi anchal inchꞌo̱l tinsach re e̱tenkꞌanquil ut tintacuasi cuib re nak texcolekꞌ. Cui kꞌaxal nequexinra, ¿ma incꞌaꞌ ta biꞌ ta̱ru̱k tine̱ra la̱in?

¹⁶ Chi yal incꞌaꞌ xexinchꞌiꞌchꞌiꞌi. Abanan ma̱re cuan saꞌ e̱ya̱nk teꞌxcꞌoxla nak e̱balakꞌinquil yo̱quin.

¹⁷ ¿Chanru nak xexinbalakꞌi? ¿Ma xexbalakꞌi̱c ta biꞌ xbaneb li ani xintakla e̱riqꞌuin?

¹⁸ La̱in xintzꞌa̱ma chiru laj Tito nak ta̱xic e̱riqꞌuin ut xintakla li herma̱n chirix. ¿Ma xexbalakꞌi ta biꞌ laj Tito? ¿Ma incꞌaꞌ ta biꞌ junaj li kacꞌaꞌux cuochben laj Tito? ¿Ma incꞌaꞌ ta biꞌ junaj li kanaꞌleb?

¹⁹ Ma̱re yal re xcolbal cuib che̱ru nak nequecꞌoxla. Abanan moco joꞌcan ta. Li Dios naxnau chi tzꞌakal nak saꞌ xcꞌabaꞌ li Cristo nina̱tinac. Ex inherma̱n, chixjunil li ninba̱nu, aꞌan re e̱tenkꞌanquil re nak texqꞌui̱k saꞌ le̱ pa̱ba̱l.

²⁰ Nincꞌoxla nak tincuulak e̱riqꞌuin ma̱re incꞌaꞌ sahak e̱chꞌo̱l cuiqꞌuin, ut la̱in ma̱re incꞌaꞌ sahak inchꞌo̱l e̱riqꞌuin xban nak toj cuan li cꞌaꞌak re ru incꞌaꞌ us saꞌ e̱ya̱nk. Ma̱re toj cuan li pletic ut li cakali̱nc saꞌ e̱ya̱nk ut ma̱re toj cuan li joskꞌil ut li nimobresi̱nc ib, malaj ut li kꞌaba̱nc ut li xicꞌ iloc ut ma̱re toj cuan li kꞌetkꞌetil e̱riqꞌuin malaj ut li poꞌoj ib.

²¹ Nincꞌoxla nak tincuulak e̱riqꞌuin, te̱cꞌut inxuta̱n chiru li Dios xban li cꞌaꞌru yo̱quex chixba̱nunquil. Ma̱re tinya̱bak chirixeb li queꞌxba̱nu li incꞌaꞌ us ut toj ma̱jiꞌ nequeꞌxyotꞌ xchꞌo̱l ut toj ma̱jiꞌ xeꞌxjal xcꞌaꞌux riqꞌuin li ma̱usilal li queꞌxba̱nu joꞌ li muxuc caxa̱r, li coꞌbe̱tac yumbe̱tac ut li cꞌaꞌak chic ru chi ma̱usilal.