2 Corintios 11 - Li Santil hu

Laj Pablo naxchꞌolob xya̱lal chirixeb li nequeꞌxqꞌue rib chokꞌ apóstol

¹ Usan cui tine̱cuy chic caꞌchꞌinak usta to̱ntil a̱tin che̱ru la̱ex li cꞌaꞌru tinye ut cherabihak li cꞌaꞌru tinye e̱re.

² La̱in kꞌaxal nequexincꞌoxla joꞌ nak li Dios nequexcꞌoxla. Ut nacuaj nak caꞌaj cuiꞌ li Cristo te̱ta̱ke. Joꞌ nak li yucuaꞌbej naxkꞌaxtesi lix rabin chi sumla̱c riqꞌuin jun chi cui̱nk, joꞌcan ajcuiꞌ nak xexinkꞌaxtesi riqꞌuin li Cristo. Aꞌan joꞌ li be̱lomej.

³ Abanan yo̱quin chi cꞌoxlac che̱rix xban nak ninnau chanru nak quibalakꞌi̱c lix Eva xban li cꞌantiꞌ. Ma̱re anchal texbalakꞌi̱k la̱ex ut ma̱re incꞌaꞌ chic te̱pa̱b li Cristo chi anchal e̱chꞌo̱l ut ma̱re incꞌaꞌ chic te̱lokꞌoni.

⁴ Nincꞌoxlac che̱rix xban nak cuan li nequeꞌcuulac saꞌ e̱ya̱nk ut nequeqꞌue e̱chꞌo̱l chirabinquil li cꞌaꞌru nequeꞌxye, usta jalan nequeꞌxcꞌut che̱ru chirix li Jesucristo. Ut nequepa̱b li cꞌaꞌru nequeꞌxye usta jalan nequeꞌxye chirix li Santil Musikꞌej. Ut naxcꞌul e̱chꞌo̱l nak jalan nequeꞌxcꞌut che̱ru chirix li colba-ib li ac xepa̱b xbe̱n cua.

⁵ Eb aꞌan nequeꞌxye nak apostoleb ut nequeꞌxnimobresi rib ut nequeꞌxye nak kꞌaxal cha̱bileb. ¿Ma cubenak ta biꞌ incuanquil la̱in chiruheb aꞌan?

⁶ Ma̱re incꞌaꞌ ninnau a̱tinac chi cha̱bil, abanan ninnau chi tzꞌakal lix ya̱lal li ra̱tin li Dios. Ut junelic nincꞌut che̱ru chi tzꞌakal lix ya̱lal.

⁷ La̱in xinchꞌolob che̱ru lix ya̱lal li ra̱tin li Dios ut ma̱cꞌaꞌ cꞌaꞌru xexinchꞌiꞌchꞌiꞌi cuiꞌ. Yal chi ma̱tan xinchꞌolob lix ya̱lal li colba-ib che̱ru ut xincubsi incuanquil re nak texcolekꞌ. ¿Ma ra ta biꞌ xinba̱nu e̱re?

⁸ Cuan nak xincꞌul intenkꞌanquil re xnumsinquil li cutan riqꞌuin li kech aj pa̱banelil li cuanqueb saꞌ jalan tenamit. Joꞌcan nak xru xincꞌanjelac e̱riqꞌuin la̱ex. ¿Ma incꞌaꞌ ta biꞌ us li xinba̱nu?

⁹ Nak quincuan chak e̱riqꞌuin, cuan nak ma̱cꞌaꞌ cuan cue. Abanan incꞌaꞌ xexinchꞌiꞌchꞌiꞌi riqꞌuin intzacae̱mk. Nak queꞌcuulac li herma̱n aj Macedonia, aꞌan eb queꞌqꞌuehoc intumin. Joꞌcan nak incꞌaꞌ quinqꞌue saꞌ e̱be̱n xqꞌuebal intzacae̱mk chi moco tinqꞌue saꞌ e̱be̱n anakcuan.

¹⁰ Xban nak li Cristo cuan cuiqꞌuin, joꞌcan nak ninye li ya̱l ut saꞌ chixjunil li naꞌajej Acaya, chixjunileb teꞌnaꞌok re nak incꞌaꞌ xinqꞌue saꞌ e̱be̱n intenkꞌanquil.

¹¹ ¿Cꞌaꞌru xya̱lal aꞌin? ¿Ma naraj ta biꞌ naxye nak incꞌaꞌ nequexinra? Li Dios naxnau nak nequexinra.

¹² Ut incꞌaꞌ tincanab xba̱nunquil li yo̱quin chixba̱nunquil xban nak cuan li nequeꞌxye nak juntakꞌe̱t lix cꞌanjeleb riqꞌuin lin cꞌanjel la̱in. Incꞌaꞌ tincanab cꞌanjelac chi ma̱tan xban nak incꞌaꞌ nacuaj nak teꞌxjuntakꞌe̱ta ribeb cuiqꞌuin.

¹³ Eb li cui̱nk aꞌin nequeꞌxqꞌue rib chokꞌ apóstol. Abanan ma̱cuaꞌ li Cristo quiqꞌuehoc reheb chokꞌ apóstol. Eb aꞌan aj balakꞌ ut junes balakꞌi̱nc nequeꞌxba̱nu.

¹⁴ Misach e̱chꞌo̱l chirabinquil aꞌan. Joꞌcan ajcuiꞌ naxba̱nu laj tza. Cuan nak naxcꞌutbesi rib joꞌ ángel ut chanchan naxcutanobresi li kanaꞌleb.

¹⁵ Chi moco chisachk e̱chꞌo̱l chirabinquil nak eb laj cꞌanjel chiru laj tza nequeꞌxcꞌutbesi rib joꞌ aj cꞌanjel saꞌ ti̱quilal. Abanan ta̱cuulak xkꞌehil nak teꞌxtoj rix lix ma̱usilaleb.

Li raylal quixcꞌul laj Pablo saꞌ xcꞌabaꞌ lix cꞌanjel

¹⁶ Jun sut chic tinye e̱re nak cherabihak li cꞌaꞌru tinye. Ma̱ jun taxak e̱re tixcꞌoxla nak ma̱cꞌaꞌ innaꞌleb. Abanan cui nequecꞌoxla nak ma̱cꞌaꞌ innaꞌleb, cherabi li cua̱tin joꞌ nak nequex-abin chiruheb li ma̱cꞌaꞌeb xnaꞌleb. ¿Ma incꞌaꞌ ta biꞌ raj ta̱ru̱k tina̱tinak chirix lin cuanquil la̱in?

¹⁷ Li cꞌaꞌru yo̱quin chixyebal anakcuan moco qꞌuebil ta cue xban li Ka̱cuaꞌ. Abanan tinye xban nak la̱ex incꞌaꞌ nequetau xya̱lal. Yo̱quin chi a̱tinac anakcuan joꞌ nequeꞌxba̱nu li cui̱nk li nequeꞌxnimobresi rib.

¹⁸ Nabaleb nequeꞌxnimobresi rib riqꞌuin li cꞌaꞌru nequeꞌxba̱nu arin saꞌ ruchichꞌochꞌ. ¿Ma incꞌaꞌ ta biꞌ raj ta̱ru̱k tinnimobresi ajcuiꞌ cuib la̱in?

¹⁹ La̱ex cuan raj e̱naꞌleb nak nequerecꞌa e̱rib. Abanan nequeqꞌue e̱chꞌo̱l chirabinquil li cꞌaꞌru nequeꞌxye li ma̱cꞌaꞌeb xnaꞌleb.

²⁰ Cui nequexrahobtesi̱c yal nequecuy. Cui namakꞌeꞌ li cꞌaꞌru e̱re che̱ru, ma̱cꞌaꞌ nequeye. Cui nequexbalakꞌi̱c, yal nequecanab chi joꞌcan. Ut cui nequeꞌxkꞌetkꞌeti rib che̱ru, aꞌan chic li nacuulac che̱ru. Ut cui nasaqꞌueꞌ saꞌ xnakꞌ e̱ru, yal nequecuy.

²¹ ¿Ma xuta̱nal ta biꞌ chokꞌ cue nak incꞌaꞌ naru ninba̱nu e̱re joꞌ nequeꞌxba̱nu eb aꞌan? Anakcuan tina̱tinak e̱riqꞌuin joꞌ nequeꞌxba̱nu li ma̱cꞌaꞌeb xnaꞌleb ut tinye e̱re aꞌin: Cui cuan li nequeꞌxnimobresi rib riqꞌuin lix yehom xba̱nuhom, ta̱ru̱k raj ajcuiꞌ tinnimobresi cuib la̱in.

²² Nequeꞌxnimobresi rib xban nak aꞌan eb aj hebreo. La̱in ajcuiꞌ aj hebreo la̱in. Nequeꞌxnimobresi rib xban nak aꞌaneb aj Israel. Ut la̱in ajcuiꞌ aj Israel la̱in. Nequeꞌxnimobresi rib xban nak aꞌaneb ralal xcꞌajol laj Abraham ut joꞌcan ajcuiꞌ la̱in. La̱in ajcuiꞌ ralal xcꞌajol laj Abraham.

²³ Tinnimobresi caꞌchꞌinak cuib anakcuan ut tina̱tinak joꞌ nequeꞌxba̱nu li ma̱cꞌaꞌeb xnaꞌleb. Nequeꞌxye nak aj cꞌanjeleb chiru li Cristo. ¿Ma aꞌaneb ta biꞌ li kꞌaxal aj cꞌanjel chiru li Cristo chicuu la̱in? Incꞌaꞌ, xban nak la̱in tzꞌakalin x-apóstol li Jesucristo. Nabal li raylal nincꞌul saꞌ xcꞌabaꞌ li Cristo. Nintacuasi cuib chi cꞌanjelac. Nabal sut xinqꞌueheꞌ saꞌ tzꞌalam. Nabal sut xinsaqꞌueꞌ ut cuanqueb li nequeꞌraj incamsinquil.

²⁴ Eb laj judío quineꞌxqꞌue chi tzꞌu̱m. Jun chic ma̱ caꞌcꞌa̱l chi tzꞌu̱m nincꞌul chiru li jun sut. Ut o̱b sut quincꞌul chi joꞌcan.

²⁵ Oxib sut quinsaqꞌueꞌ riqꞌuin cheꞌ ut jun sut quineꞌxcuti chi pec. Oxib sut quijacheꞌ li jucub li cuanquin cuiꞌ nak yo̱quin chi xic jun pacꞌal li palau. Tzꞌakal jun cutan ut jun kꞌojyi̱n quincuan saꞌ li haꞌ saꞌ xyi li palau.

²⁶ Yalak bar ninxic xyebal resil li Cristo, xiu xiu cuanquin. Xiu xiu cuanquin nak ninnumeꞌ saꞌ eb li nimaꞌ. Xiu xiu cuanquin xbaneb laj e̱lkꞌ ut xbaneb li cuech tenamitil ut xbaneb li ma̱cuaꞌeb aj judío. Xiu xiu cuanquin saꞌ eb li tenamit joꞌ ajcuiꞌ saꞌ li qꞌuicheꞌ. Xiu xiu cuanquin nak ninnumeꞌ saꞌ li palau. Xiu xiu cuanquin xbaneb li nequeꞌxqꞌue rib joꞌ aj pa̱banel.

²⁷ Cau nincꞌanjelac ut xincuy li raylal. Xincuy li yoꞌlec ut cuan nak ma̱cꞌaꞌ intzacae̱mk. Xincuy intzꞌocajic ut xincuy inchaki el. Xincuy li que chi incꞌaꞌ tzꞌakal li cuakꞌ.

²⁸ Cuan chic nabal li raylal xincꞌul. Ut chirix chixjunil aꞌan, kꞌaxal cuiꞌchic nincꞌoxlac cuulaj cuulaj chirixeb chixjunileb laj pa̱banel li cuanqueb yalak bar.

²⁹ Cui cuan li kꞌun xchꞌo̱l li ma̱cꞌaꞌ xmetzꞌe̱u, kꞌaxal nintokꞌoba ruheb. Cui cuan li nequeꞌchꞌinan xchꞌo̱leb saꞌ lix pa̱ba̱leb, cꞌajoꞌ nak narahoꞌ inchꞌo̱l ut nincꞌoxlac chirixeb.

³⁰ Cui tento tina̱tinak chirix lin cꞌanjel, tina̱tinak chirix li cꞌaꞌ re ru li naxcꞌut nak ma̱cꞌaꞌ incuanquil injunes re nak incꞌaꞌ ta̱nima̱k cuu la̱in.

³¹ Li Acuabej Dios, lix Yucuaꞌ li Ka̱cuaꞌ Jesucristo naxnau nak incꞌaꞌ ninticꞌtiꞌic. Lokꞌoninbil taxak li Dios chi junelic kꞌe cutan.

³² Laj Aretas, aꞌan li acuabej saꞌ li tenamit Damasco. Nak cuanquin aran, jun li cui̱nk li nacꞌanjelac chiru laj Aretas, quixtakla xcꞌacꞌalenquil li oqueba̱l saꞌ li tenamit xban nak quiraj inchapbal.

³³ Abanan xincoleꞌ saꞌ rukꞌeb. Li tzꞌac li sutbil cuiꞌ li tenamit cuan jun lix ventanil. Ut aran quineꞌxcubsi chak saꞌ jun nimla chacach. Joꞌcan nak quincoleꞌ.