2 Corintios 10 - Li Santil hu

Laj Pablo naxchꞌolob xya̱lal lix cuanquil qꞌuebil re xban li Dios

¹ Anakcuan cuan cꞌaꞌak re ru nacuaj xyebal e̱re chirixeb li nequeꞌa̱tinac chicuix. Cuan li nequeꞌyehoc chi joꞌcaꞌin: Laj Pablo tu̱lan nak cuan e̱riqꞌuin; abanan nak ma̱ ani saꞌ e̱ya̱nk jalan chic lix naꞌleb ut nak natzꞌi̱bac chak e̱riqꞌuin, kꞌaxal cau naa̱tinac, chanqueb chicuix. Ut la̱in nintzꞌa̱ma che̱ru nak chexcꞌoxlak bayak chirix li Jesucristo. Aꞌan tu̱lan ut kꞌun xchꞌo̱l.

² Joꞌcan nak incꞌaꞌ nacuaj a̱tinac chi cau. Usan cui nak tincuulak e̱riqꞌuin incꞌaꞌ tento nak toj tina̱tinak e̱riqꞌuin chi cau. La̱in naru ajcuiꞌ nequebinsume li nequeꞌa̱tinac chicuix ut nequeꞌxye nak li cꞌaꞌru yo̱quin chixba̱nunquil, aꞌan yal xnaꞌleb cui̱nk.

³ Ya̱l nak cui̱nko. Abanan incꞌaꞌ yo̱co chi pletic joꞌ nequeꞌxba̱nu li kech cui̱nkilal arin saꞌ ruchichꞌochꞌ. Riqꞌuin ban li ma̱usilal yo̱co chi pletic.

⁴ Ut li kacꞌanjeleba̱l re pletic riqꞌuin li ma̱usilal ma̱cuaꞌ joꞌ li cꞌanjeleba̱l re ruchichꞌochꞌ. Re ban li Dios ut kꞌaxal nim xcuanquil re xsachbal chixjunil lix cꞌanjel li ma̱usilal.

⁵ Nakasach xcuanquileb li nequeꞌcuechꞌin rix lix cꞌanjel li Dios. Ut nakasach ajcuiꞌ xcuanquil chixjunil lix yehom xba̱nuhom li cui̱nk li naramoc re chiruheb li kas ki̱tzꞌin li rusilal li Dios. Nakacanab saꞌ rukꞌ li Dios lix naꞌlebeb aꞌan re nak chijala̱k lix naꞌlebeb xban li Cristo ut teꞌxba̱nu li cꞌaꞌru naraj aꞌan.

⁶ Ninnau nak tincuulak e̱riqꞌuin naru tinkꞌuseb li toj yo̱queb chixba̱nunquil li incꞌaꞌ us. Abanan incꞌaꞌ nacuaj texinkꞌus la̱ex. Nacuaj ban nak te̱jal le̱ cꞌaꞌux ut te̱ba̱nu li naraj li Dios.

⁷ La̱ex nequeqꞌue retal caꞌaj cuiꞌ li cꞌaꞌru na-ilman ru ut incꞌaꞌ nequexcꞌoxlac chirix li cꞌaꞌru cuan saꞌ li ra̱meb li junju̱nk. ¿Ma cuan junak saꞌ e̱ya̱nk naxye nak aꞌan aj cꞌanjel chiru li Cristo? Cui cuan, us ajcuiꞌ. Abanan tento nak tixqꞌue retal nak joꞌcan ajcuiꞌ la̱o aj cꞌanjelo chiru li Cristo.

⁸ Ma̱re nequecꞌoxla nak yo̱quin chixnimobresinquil cuib riqꞌuin lin cꞌanjel. Abanan lin cꞌanjel qꞌuebil cue xban li Ka̱cuaꞌ re nak texintenkꞌa. Ma̱cuaꞌ re e̱sachbal. Incꞌaꞌ nincꞌoxlac riqꞌuin li cꞌaꞌru ninba̱nu xban nak li Dios xqꞌue incuanquil chixba̱nunquil.

⁹ Incꞌaꞌ nacuaj nak te̱cꞌoxla nak yal re xqꞌuebal e̱xiu nak nintzꞌi̱bac e̱riqꞌuin.

¹⁰ Cuan li nequeꞌa̱tinac chicuix ut nequeꞌxye chi joꞌcaꞌin: “Laj Pablo naxtzꞌi̱ba lix hu riqꞌuin cacuil a̱tin re nak toxucuak xban. Abanan nak cuan saꞌ kaya̱nk, yo̱ xxiu ut ma̱cꞌaꞌ na-oc cuiꞌ li cꞌaꞌru naxye,” chanqueb chicuix.

¹¹ Li nequeꞌa̱tinac chi joꞌcan cheꞌxqꞌuehak retal nak cau xina̱tinac nak xintzꞌi̱ba li hu aꞌin e̱riqꞌuin. Ut joꞌcan ajcuiꞌ tinba̱nu nak tincuulak e̱riqꞌuin.

¹² Incꞌaꞌ nakaj xba̱nunquil joꞌ nequeꞌxba̱nu li nequeꞌxnimobresi rib riqꞌuin li cꞌaꞌru nequeꞌxba̱nu. Ma̱cꞌaꞌ xnaꞌlebeb. Nequeꞌxnimobresi rib riqꞌuin lix naꞌlebeb xjuneseb rib.

¹³ La̱o incꞌaꞌ nakanimobresi kib riqꞌuin li moco qꞌuebil ta ke xba̱nunquil. Li cꞌaꞌru nocoa̱tinac chirix, aꞌan li cꞌanjel qꞌuebil ke xban li Dios re tocꞌanjelak ajcuiꞌ e̱riqꞌuin la̱ex aj Corinto.

¹⁴ La̱in li xbe̱n quincuulac e̱riqꞌuin chixchꞌolobanquil resil li colba-ib saꞌ xcꞌabaꞌ li Jesucristo. Ut incꞌaꞌ xinba̱nu li ma̱cuaꞌ cue xba̱nunquil. Tenebanbil saꞌ inbe̱n xban li Dios xyebal resil li colba-ib e̱re.

¹⁵ Incꞌaꞌ ninnimobresi cuib riqꞌuin li cꞌanjel li nequeꞌxba̱nu li jun chꞌol chic. La̱in nacuaj raj nak texqꞌui̱k saꞌ le̱ pa̱ba̱l re nak tine̱tenkꞌa chixyebal resil li colba-ib yalak bar. Abanan incꞌaꞌ tinxic bar moco qꞌuebil ta cue re tinxic.

¹⁶ Nacuaj xic saꞌ jalan naꞌajej chixchꞌolobanquil xya̱lal li colba-ib bar toj ma̱jiꞌ xrabiomeb resil li colba-ib. Incꞌaꞌ nacuaj xnimobresinquil cuib riqꞌuin li cꞌanjel ac tiquibanbil xban jalan chic aj cꞌanjel.

¹⁷ Joꞌcaꞌin tzꞌi̱banbil saꞌ li Santil Hu: Incꞌaꞌ takanimobresi kib. Chikanimobresihak ban xlokꞌal li Ka̱cuaꞌ.

¹⁸ Cuan li nequeꞌxye ribeb nak cha̱bileb. Abanan ma̱cꞌaꞌ na-oc cuiꞌ li nequeꞌxye. Aꞌ li kꞌaxal lokꞌ, aꞌan nak li Dios tixye nak li jun aꞌan cha̱bil.