1 Ts 5 - Li Santil hu

Yoꞌon cua̱nko ut aj-ajak ku saꞌ li kapa̱ba̱l

¹ Ut chirix lix kꞌehil ut lix cutanquil xcꞌulunic li Ka̱cuaꞌ Jesucristo, ma̱cꞌaꞌ rajbal tintzꞌi̱bak e̱riqꞌuin xban nak ac nequenau chic lix ya̱lal.

² La̱ex nequenau chi us nak lix cutanquil lix cꞌulunic li Ka̱cuaꞌ Jesucristo, ta̱cha̱lk chi ma̱ ani nanaꞌoc re jokꞌe, joꞌ nak nachal laj e̱lkꞌ chi ma̱cꞌaꞌ saꞌ kachꞌo̱l.

³ Nak eb li tenamit yo̱keb chixyebal, “Cuanco saꞌ tuktu̱quil usilal ut ma̱cꞌaꞌ cꞌoxlac”, tojoꞌnak ta̱cha̱lk rosoꞌjiqueb saꞌ junpa̱t chi ma̱cꞌaꞌak saꞌ xchꞌo̱leb joꞌ nak nachal xraylal li yaj aj ixk chi ma̱cꞌaꞌ saꞌ xchꞌo̱l. Ut eb aꞌan incꞌaꞌ teꞌcolekꞌ chiru li raylal ta̱cha̱lk saꞌ xbe̱neb.

⁴ Aꞌut la̱ex herma̱n, moco saꞌ kꞌojyi̱n ta chic cuanquex. Ac nequenau chic lix ya̱lal. Li Jesucristo incꞌaꞌ ta̱cha̱lk chi ma̱cꞌaꞌak saꞌ e̱chꞌo̱l joꞌ nak nachal laj e̱lkꞌ.

⁵ La̱o aj pa̱banel moco cuanco ta chic saꞌ kꞌojyi̱n. Cuanco ban chikajunilo saꞌ cutan saken ut nakanau chic lix ya̱lal xban nak reho chic li Cristo.

⁶ Junelic yoꞌon taxak cua̱nko ut yo̱ko taxak chiroybeninquil lix cꞌulunic li Jesucristo. Incꞌaꞌ takaba̱nu joꞌ nequeꞌxba̱nu li jun chꞌol chic. Aj-ajak ban ku saꞌ li kapa̱ba̱l.

⁷ Eb li nequeꞌcuar, chi kꞌek nequeꞌcuar ut eb li nequeꞌcala, chi kꞌek nequeꞌcala.

⁸ Aꞌut la̱o, li ac nakanau chic xya̱lal, yoꞌon taxak cua̱nko. Li rahoc ut li kapa̱ba̱l, aꞌan taxak ta̱cꞌanjelak ke re kacolbal joꞌ nak li soldado naxcol rib riqꞌuin li chꞌi̱chꞌ li naxqꞌue chire xchꞌo̱l. Ut li kacolbal li yo̱co chiroybeninquil, aꞌan ta̱cꞌanjelak ke joꞌ nak nacꞌanjelac li punit chꞌi̱chꞌ chiru li soldado re xcolbal rib.

⁹ Li Dios incꞌaꞌ quixsicꞌ ku re nak toxqꞌue chixtojbal rix li kama̱c. Quixsicꞌ ban ku re tocolekꞌ saꞌ xcꞌabaꞌ li Ka̱cuaꞌ Jesucristo.

¹⁰ Aꞌan quicam saꞌ kacꞌabaꞌ re nak usta yoꞌyo̱co usta ac camenako chic nak ta̱cꞌulu̱nk, ta̱cua̱nk kayuꞌam chi junelic kochben aꞌan.

¹¹ Joꞌcan ut nak checꞌojob e̱chꞌo̱l che̱ribil e̱rib ut cheqꞌuehak xcacuil e̱chꞌo̱l che̱ribil e̱rib joꞌ li ac yo̱quex chixba̱nunquil.

Laj Pablo naxqꞌue xnaꞌlebeb laj pa̱banel

¹² Ex herma̱n, nakatzꞌa̱ma che̱ru nak oxlokꞌ cherileb li ani nequeꞌcꞌanjelac chiru li Ka̱cuaꞌ Jesucristo saꞌ e̱ya̱nk. Eb aꞌan nequeꞌcꞌamoc be che̱ru ut aꞌan nequeꞌqꞌuehoc e̱naꞌleb.

¹³ Che-oxlokꞌiheb ut cherahakeb chi anchal e̱chꞌo̱l xban nak nequeꞌxqꞌue xchꞌo̱l chi cꞌanjelac saꞌ e̱ya̱nk. Chexcua̱nk saꞌ usilal che̱ribil e̱rib.

¹⁴ Nakatzꞌa̱ma che̱ru, ex herma̱n, chekꞌuseb li yal subuc cutan nequeꞌxba̱nu. Cheqꞌuehak xcacuil xchꞌo̱leb li nequeꞌchꞌinan xchꞌo̱leb ut chetenkꞌa ajcuiꞌ li toj kꞌuneb xchꞌo̱l saꞌ xpa̱ba̱leb. Ut chicua̱nk e̱cuyum riqꞌuineb chixjunileb.

¹⁵ Cheqꞌuehak retal nak ma̱ ani junak saꞌ e̱ya̱nk chixqꞌue re̱kaj li ma̱usilal qui-ux re riqꞌuin ma̱usilal. Cheba̱nuhak ban chi junelic li cꞌaꞌru us che̱ribil e̱rib ut riqꞌuin chixjunileb.

¹⁶ Junelic chisahokꞌ saꞌ e̱chꞌo̱l.

¹⁷ Junelic chextijok.

¹⁸ Chextioxi̱nk riqꞌuin chixjunil li cꞌaꞌru nequecꞌul xban nak joꞌcan naraj li Dios e̱riqꞌuin la̱ex xban nak junajex chic riqꞌuin li Jesucristo.

¹⁹ Me̱risi xcuanquil li Santil Musikꞌej e̱riqꞌuin. Cheqꞌuehak ban chi cꞌanjelac e̱riqꞌuin, joꞌ naraj aꞌan.

²⁰ Me̱tzꞌekta̱na li esil li nequeꞌxye li profeta.

²¹ Cheqꞌuehak ban retal chixjunil ut checꞌu̱lahak saꞌ e̱chꞌo̱l li cꞌaꞌru us.

²² Ut chetzꞌekta̱na chixjunil li ma̱usilal.

²³ Aꞌ taxak li Dios li naqꞌuehoc tuktu̱quil usilal chisantobresi̱nk e̱re chi tzꞌakal ut aꞌan taxak chi-osobtesi̱nk re le̱ ra̱m, le̱ cꞌaꞌux ut le̱ rok e̱rukꞌ re nak texcua̱nk chi tzꞌakal e̱re e̱ru chi ma̱cꞌaꞌak e̱kꞌusbal saꞌ xcꞌulunic li Ka̱cuaꞌ Jesucristo.

²⁴ Li Dios, li quisicꞌoc e̱ru, aꞌan ti̱c xchꞌo̱l chixba̱nunquil li cꞌaꞌru naxye ut aꞌan ta̱santobresi̱nk e̱re.

Laj Pablo naxchakꞌrabiheb

²⁵ Ex herma̱n, chextijok chikix la̱o.

²⁶ Ut cheqꞌuehak xsahileb xchꞌo̱l chixjunileb li herma̱n riqꞌuin santil utzꞌuc u.

²⁷ Chi anchal inchꞌo̱l nintzꞌa̱ma che̱ru saꞌ xcꞌabaꞌ li Jesucristo nak chi-ilekꞌ xsaꞌ li hu aꞌin chiruheb chixjunileb li herma̱n.

²⁸ Aꞌ taxak li usilal li naxqꞌue ke li Ka̱cuaꞌ Jesucristo, chicua̱nk e̱riqꞌuin. Joꞌcan taxak.