1 Ts 4 - Li Santil hu

Li Dios naraj nak tzꞌakalak re ru li kayuꞌam

¹ Ut anakcuan ex inherma̱n, cuan cuiꞌchic cꞌaꞌru nacuaj xtzꞌa̱manquil che̱ru saꞌ xcꞌabaꞌ li Ka̱cuaꞌ Jesucristo. Aꞌan aꞌin: nak chexcua̱nk taxak saꞌ ti̱quilal joꞌ naraj li Dios ut rajlal yo̱kex chixba̱nunquil chi joꞌcan joꞌ xkacꞌut che̱ru la̱o. Ac yo̱quex chixba̱nunquil, abanan kꞌaxal cuiꞌchic te̱ba̱nu.

² La̱ex ac nequenau le̱ taklanquil qꞌuebil kaban saꞌ xcꞌabaꞌ li Ka̱cuaꞌ Jesucristo.

³ Li Dios naraj nak texcua̱nk saꞌ santilal. Mexcoꞌbe̱tac mexyumbe̱tac.

⁴ Eb laj pa̱banel tento nak teꞌsumla̱k saꞌ xya̱lal ut cheꞌxnauhak cua̱nc saꞌ ti̱quilal chi ribileb rib ut teꞌxqꞌue xlokꞌal chi ribileb rib.

⁵ Eb li incꞌaꞌ nequeꞌxnau ru li Dios, nequeꞌxba̱nu li yibru naꞌleb li nequeꞌxrahi ru xba̱nunquil. Me̱ba̱nu joꞌ nequeꞌxba̱nu eb aꞌan.

⁶ Ma̱ ani tixmux rib riqꞌuin xmakꞌbal rixakil junak cui̱nk ut ma̱ ani tixmux rib riqꞌuin xmakꞌbal xbe̱lom junak ixk. Incꞌaꞌ teꞌxba̱nu chi joꞌcan xban nak li Ka̱cuaꞌ Jesucristo ta̱rakok a̱tin saꞌ xbe̱n chixjunileb li nequeꞌba̱nun re li naꞌleb aꞌan, joꞌ ac yebil e̱re kaban.

⁷ Li Dios incꞌaꞌ quixsicꞌ ku re nak yo̱ko chixba̱nunquil li ma̱usilal. Quixsicꞌ ban ku re nak tocua̱nk saꞌ santilal.

⁸ Joꞌcan nak li ani natzꞌekta̱nan re li tijleb aꞌin, ma̱cuaꞌ cui̱nk li naxtzꞌekta̱na. Aꞌ ban li Dios li naqꞌuehoc ke li Santil Musikꞌej, aꞌan li naxtzꞌekta̱na.

⁹ Incꞌaꞌ tento nak tintzꞌi̱bak e̱riqꞌuin chirix chanru nak te̱ra e̱rib che̱ribil e̱rib xban nak ac cꞌutbil ajcuiꞌ che̱ru xban li Dios nak tento te̱ra e̱rib che̱ribil e̱rib.

¹⁰ Us yo̱quex nak nequeraheb chixjunileb li cuanqueb Macedonia. Abanan nintzꞌa̱ma che̱ru, ex herma̱n, nak kꞌaxal cuiꞌchic cheba̱nu chi joꞌcan.

¹¹ Cheqꞌuehak e̱chꞌo̱l chi cua̱nc saꞌ xya̱lal. Me̱chꞌiꞌchꞌiꞌi li ani cuan cꞌaꞌru re. Chexcꞌanjelak re nak ta̱cua̱nk cꞌaꞌru e̱re re xnumsinquil li cutan junju̱nk joꞌ xexkatakla cuiꞌ.

¹² Cui te̱ba̱nu chi joꞌcan, oxlokꞌ tex-ilekꞌ xbaneb li ma̱cuaꞌeb aj pa̱banel, ut incꞌaꞌ yo̱kex chixchꞌiꞌchꞌiꞌinquil jalan re li cꞌaꞌru te̱raj.

Li Ka̱cuaꞌ Jesucristo ta̱cha̱lk cuiꞌchic

¹³ Nakaj ut ex herma̱n nak te̱tau xya̱lal chirixeb li ac xeꞌcam re nak incꞌaꞌ ta̱rahokꞌ e̱chꞌo̱l joꞌ nequeꞌxba̱nu li jun chꞌol chic li ma̱cꞌaꞌ nequeꞌroybeni.

¹⁴ La̱o nakapa̱b nak li Jesús quicam ut quicuacli cuiꞌchic chi yoꞌyo. Ut nakapa̱b ajcuiꞌ nak li joꞌ qꞌuialeb queꞌpa̱ban re li Cristo, li Dios tixcuaclesiheb cuiꞌchic chi yoꞌyo saꞌ xya̱nkeb li camenak ut tixcꞌameb chak rochben nak ta̱cha̱lk cuiꞌchic li Jesucristo.

¹⁵ Aꞌin ra̱tin li Ka̱cuaꞌ Jesucristo nakaye e̱re, nak cui la̱o toj yoꞌyo̱ko saꞌ lix cꞌulunic li Ka̱cuaꞌ Jesucristo, ma̱cuaꞌ la̱o li tocꞌamekꞌ xbe̱n cua. Aꞌ li ac camenakeb, aꞌan eb li teꞌcꞌamekꞌ xbe̱n cua riqꞌuin li Ka̱cuaꞌ.

¹⁶ Ut nak ta̱cubek chak li Ka̱cuaꞌ Jesucristo saꞌ choxa, tixjap re chi takla̱nc. Li xbe̱nil ángel tixjap re chi bokoc, ut ta̱ya̱basi̱k xtrompeta li Dios. Ut li teꞌcuacli̱k xbe̱n cua, aꞌaneb li ac camenakeb, li queꞌpa̱ban re li Cristo.

¹⁷ Acaꞌ chic la̱o li toj yoꞌyo̱ko tosapu̱k takecꞌ saꞌ li chok kochbenakeb aꞌan re xcꞌulbal li Ka̱cuaꞌ Jesucristo saꞌ ikꞌ. Ut cua̱nko junelic riqꞌuin li Ka̱cuaꞌ Jesucristo.

¹⁸ Joꞌcan ut nak checꞌojob e̱chꞌo̱l che̱ribil e̱rib riqꞌuineb a a̱tin aꞌin.