1 Ts 2 - Li Santil hu

Lix cꞌanjel laj Pablo aran Tesalónica

¹ Ex inherma̱n, la̱ex ac nequenau nak moco xcana ta chi ma̱cꞌaꞌ rajbal nak xocuulac e̱riqꞌuin.

² Usta ac xkacꞌul li rahobtesi̱c ut usta ac xohobeꞌ aran Filipos, abanan li Dios xqꞌuehoc xcacuil kachꞌo̱l chixyebal resil li colba-ib e̱re la̱ex. Incꞌaꞌ xoxucuac usta cuanqueb li kꞌaxal xicꞌ nequeꞌiloc ke.

³ Moco yo̱co ta chixbalakꞌinquil kib. Tzꞌakal ya̱l ban li yo̱co xyebal e̱re. Moco cuan ta junak kacꞌaꞌux incꞌaꞌ us saꞌ e̱be̱n, chi moco yo̱co ta che̱balakꞌinquil.

⁴ Nakachꞌolob ban xya̱lal joꞌ naraj li Dios xban nak aꞌan cꞌojcꞌo xchꞌo̱l saꞌ kabe̱n ut aꞌan quixakaban ke re xyebal resil li evangelio. Incꞌaꞌ nakaba̱nu joꞌ nequeꞌcuulac chiru li cristian. Nakaba̱nu ban joꞌ nacuulac chiru li Dios li nanaꞌoc re chanru li kacꞌaꞌux.

⁵ La̱ex nequenau nak ma̱ jun cua xoa̱tinac e̱riqꞌuin yal re e̱kꞌunbesinquil. Li Dios naxnau nak la̱o incꞌaꞌ xoa̱tinac e̱riqꞌuin yal xban nak cuan li cꞌaꞌru nakaj.

⁶ Chi moco xkasicꞌ ta kalokꞌal riqꞌuineb li cristian, chi moco e̱riqꞌuin chi moco riqꞌuineb jalan, usta xru raj xkaye e̱re nak te̱qꞌue kalokꞌal xban nak la̱o x-apóstol li Jesucristo.

⁷ Saꞌ tu̱lanil ban xocuan saꞌ e̱ya̱nk joꞌ junak naꞌbej naxqꞌuiresiheb saꞌ tu̱lanil lix cocꞌal.

⁸ Kꞌaxal nequexkara. Ma̱cuaꞌ raj caꞌaj cuiꞌ xyebal resil li colba-ib li naxqꞌue li Dios li xkaba̱nu. Xru aj raj cuiꞌ xkakꞌaxtesi li kayuꞌam saꞌ e̱cꞌabaꞌ la̱ex xban nak kꞌaxal nequexkara.

⁹ La̱ex herma̱n, ac nequenau chanru nak xocꞌanjelac chi kꞌek chi cutan re nak incꞌaꞌ texkachꞌiꞌchꞌiꞌi riqꞌuin li cꞌaꞌru ke ut re nak xru xkaye e̱re resil li colba-ib li naxqꞌue li Dios.

¹⁰ La̱ex nequenau chi tzꞌakal, ut naxnau ajcuiꞌ li Dios, chanru nak cocuan saꞌ santilal ut saꞌ ti̱quilal saꞌ e̱ya̱nk. Ma̱cꞌaꞌ cꞌaꞌru cokꞌuseꞌ cuiꞌ nak cocuan saꞌ e̱ya̱nk la̱ex aj pa̱banel.

¹¹ Joꞌ naxba̱nu junak li yucuaꞌbej riqꞌuineb li ralal xcꞌajol, joꞌcan ajcuiꞌ xkaba̱nu la̱o e̱riqꞌuin nak xkaqꞌue e̱naꞌleb che̱junju̱nkalex.

¹² Xkaqꞌue xcacuilal e̱chꞌo̱l ut xkatzꞌa̱ma ajcuiꞌ che̱ru nak texcua̱nk saꞌ xya̱lal joꞌ xcꞌulubeb li ralal xcꞌajol li Dios li quisicꞌoc e̱ru re nak textzꞌako̱nk ajcuiꞌ la̱ex riqꞌuin lix nimajcual cuanquilal ut lix lokꞌal.

¹³ Junelic nakabantioxi chiru li Dios nak quepa̱b li ra̱tin li Dios li xkachꞌolob che̱ru. Moco ra̱tin cui̱nk ta quepa̱b. Ra̱tin li Dios ban quepa̱b. Ut ya̱l ajcuiꞌ nak aꞌan ra̱tin li Dios. Ut aꞌan li yo̱ chi jaloc re le̱ yuꞌam la̱ex aj pa̱banel.

¹⁴ Ut la̱ex herma̱n xecꞌul ajcuiꞌ li raylal joꞌ queꞌxcꞌul li ralal xcꞌajol li Dios li nequeꞌpa̱ban saꞌ xcꞌabaꞌ li Jesucristo li cuanqueb Judea. Xexrahobtesi̱c xban le̱ rech tenamitil joꞌ queꞌxcꞌul eb aꞌan xbaneb laj judío, li rech tenamitil.

¹⁵ Eb laj judío queꞌxcamsi li Ka̱cuaꞌ Jesucristo ut queꞌxcamsi ajcuiꞌ eb li profeta ut coeꞌxyo̱lesi la̱o. Incꞌaꞌ nequeꞌxba̱nu li nacuulac chiru li Dios ut kꞌaxal xicꞌ nequeꞌril li ras ri̱tzꞌineb.

¹⁶ Xicꞌ nequeꞌrecꞌa nak nakachꞌolob xya̱lal chiruheb li ma̱cuaꞌeb aj judío re nak teꞌcolekꞌ. Ut riqꞌuin li ma̱usilal nequeꞌxba̱nu rajlal, kꞌaxal cuiꞌchic nanumta lix ma̱queb. Abanan yal jun nak quichal xjoskꞌil li Dios saꞌ xbe̱neb.

Laj Pablo ta̱raj cuiꞌchic xic chirilbaleb laj pa̱banel li cuanqueb Tesalónica

¹⁷ Ex herma̱n, usta ma̱ aniho saꞌ e̱ya̱nk, abanan junelic nequexkacꞌoxla. Tojeꞌ ajcuiꞌ xo-el e̱riqꞌuin nak ac takaj cuiꞌchic rilbal e̱ru.

¹⁸ Xkaj raj xic e̱riqꞌuin. La̱in laj Pablo. Cuib oxib sut xinyal xic che̱rilbal. Abanan laj tza quiramoc chiku. Joꞌcan nak incꞌaꞌ co̱o.

¹⁹ ¿Cꞌaꞌru nakoybeni ut cꞌaꞌru lix saylal li kachꞌo̱l? ¿Ut cꞌaꞌru li tokꞌajca̱mu̱k cuiꞌ nak tol-e̱lk cuiꞌchic li Ka̱cuaꞌ Jesucristo? ¿Ma incꞌaꞌ ta biꞌ saꞌ e̱cꞌabaꞌ la̱ex takacꞌul li kakꞌajca̱munquil?

²⁰ La̱ex li kalokꞌal ut lix saylal li kachꞌo̱l.