1 Timoteo 4 - Li Santil hu

Li ma̱us aj musikꞌej naxcꞌut li tijleb incꞌaꞌ ya̱l

¹ Li Santil Musikꞌej naxcꞌut lix ya̱lal chi tzꞌakal nak saꞌ eb li cutan cha̱lel cuan li teꞌxcanab xpa̱banquil li tijleb li tzꞌakal ya̱l. Ut teꞌbalakꞌi̱k xban li tijleb li incꞌaꞌ ya̱l li nequeꞌxqꞌue li ma̱us aj musikꞌej.

² Ticꞌtiꞌ li nequeꞌxcꞌut eb laj balakꞌ. Incꞌaꞌ chic nequeꞌrecꞌa nak incꞌaꞌ us yo̱queb. Chanchan nak cꞌatbil riqꞌuin chꞌi̱chꞌ lix cꞌaꞌuxeb xban li ticꞌtiꞌ li nequeꞌxye. Joꞌcan nak incꞌaꞌ nequeꞌxqꞌue retal nak incꞌaꞌ us yo̱queb chixba̱nunquil.

³ Eb aꞌan nequeꞌxye nak incꞌaꞌ us li sumla̱c ut nequeꞌxye ajcuiꞌ nak cuan li tzacae̱mk incꞌaꞌ us xtzacanquil. Abanan moco ya̱l ta li nequeꞌxye. Li Dios quiqꞌuehoc re li tzacae̱mk aꞌin re nak ta̱tzaca̱k. Ut la̱o aj pa̱banel li nakanau lix ya̱lal, nakatzaca ut nakabantioxi chiru li Dios nak quixqꞌue ke li katzacae̱mk.

⁴ Chixjunil li quixyoꞌobtesi li Dios, aꞌan cha̱bil. Ma̱cꞌaꞌ xtzꞌekta̱nanquil. Nakabantioxi chiru li Dios ut nakatzaca.

⁵ Ma̱cꞌaꞌ xtzꞌekta̱nanquil xban nak li Dios quixye nak us xtzacanquil ut xban nak nocotijoc saꞌ xbe̱n. Joꞌcan nak osobtesinbil chic xban.

Quiqꞌueheꞌ xnaꞌleb laj Timoteo re nak ta̱cua̱nk saꞌ ti̱quilal

⁶ At Timoteo, cui nacachꞌolob xya̱lal li tijleb aꞌin chiruheb laj pa̱banel, la̱akat jun cha̱bil aj cꞌanjel chiru li Jesucristo. Ut la̱at yo̱kat chi qꞌui̱c saꞌ la̱ pa̱ba̱l riqꞌuin lix ya̱lal ut riqꞌuin li cha̱bil tijleb li yo̱cat chixpa̱banquil.

⁷ Chatzꞌekta̱na chi jun aj cua chixjunil li najter serakꞌ li yal to̱ntil naꞌleb naxye, li ma̱cꞌaꞌ na-oc cuiꞌ. Ut qꞌue a̱chꞌo̱l chixba̱nunquil li cꞌaꞌru naraj li Dios.

⁸ Nayeman nak us nak takatzol kib chixchꞌolaninquil kib re nak cauhako. Abanan li kꞌaxal cuiꞌchic lokꞌ aꞌan xtzolbal kib re nak cauhak kachꞌo̱l saꞌ li kapa̱ba̱l xban nak riqꞌuin li kapa̱ba̱l cuan li rusilal li Dios kiqꞌuin anakcuan arin saꞌ ruchichꞌochꞌ ut cua̱nk ajcuiꞌ li kayuꞌam chi junelic.

⁹ Relic chi ya̱l nak aꞌan li tzꞌakal xya̱lal li yo̱quin chixyebal, ut chixjunileb taxak teꞌpa̱ba̱nk re.

¹⁰ Xban nak li yoꞌyo̱quil Dios, aꞌan li kayoꞌon, joꞌcan nak yo̱co xyalbal kakꞌe chi cꞌanjelac chiru. Aꞌan naxyechiꞌi li colba-ib reheb chixjunileb. Abanan, caꞌaj cuiꞌ li ani teꞌpa̱ba̱nk re, aꞌaneb li teꞌcolekꞌ.

¹¹ Aꞌan aꞌin li tijleb li ta̱cꞌut chiruheb la̱ cuech aj pa̱banelil. Ta̱chꞌolob lix ya̱lal chiruheb.

¹² Ut la̱at, at Timoteo, chatcua̱nk saꞌ xya̱lal ut chat-a̱tinak saꞌ xya̱lal. Charaheb la̱ cuas a̱cui̱tzꞌin. Cauhak taxak a̱chꞌo̱l saꞌ la̱ pa̱ba̱l ut ti̱cak taxak la̱ yuꞌam. Joꞌcan taxak ta̱ba̱nu re nak ma̱ ani chitzꞌekta̱na̱nk a̱cue xban la̱ sa̱jilal. Cheꞌxtzol ban ribeb a̱cuiqꞌuin xban nak yo̱kat chixcꞌambaleb xbe saꞌ ti̱quilal.

¹³ Roybeninquil tincuulak e̱riqꞌuin, qꞌue a̱chꞌo̱l chi rilbal xsaꞌ li Santil Hu chiruheb laj pa̱banel. Qꞌueheb xnaꞌleb ut ta̱chꞌolob xya̱lal chiruheb.

¹⁴ Chaqꞌue taxak a̱chꞌo̱l chi cꞌanjelac joꞌ quiqꞌueheꞌ a̱cue xban li Dios. Li cꞌanjel aꞌin qꞌuebil a̱cue nak eb li profeta queꞌa̱tinac cha̱cuix ut nak eb laj cꞌamol be saꞌ xya̱nkeb laj pa̱banel queꞌxqꞌue li rukꞌeb saꞌ a̱be̱n.

¹⁵ Qꞌue a̱chꞌo̱l chixba̱nunquil chixjunil li xinye a̱cue re nak chixjunileb teꞌxqꞌue retal nak ti̱c la̱ yuꞌam ut teꞌxqꞌue ajcuiꞌ retal nak us yo̱ chi e̱lc li cꞌanjel yo̱cat chixba̱nunquil.

¹⁶ Qꞌue retal chi us li cꞌaꞌru ta̱ba̱nu joꞌ ajcuiꞌ li cꞌaꞌru ta̱tzoleb cuiꞌ. Cui ta̱ba̱nu chi joꞌcan, tatcolekꞌ la̱at ut teꞌcolekꞌ ajcuiꞌ li ani teꞌabi̱nk re li cꞌaꞌru ta̱ye.