1 Samuel 9 - Li Santil huLaj Saúl quisiqꞌueꞌ ru re ta̱oc chokꞌ rey 1 Saꞌ xya̱nkeb li ralal xcꞌajol laj Benjamín quicuan jun li cui̱nk aj Cis xcꞌabaꞌ. Aꞌan jun li cui̱nk naꞌno ru. Aꞌan li ralal laj Abiel. Ut laj Abiel, aꞌan li ralal laj Zeror. Ut laj Zeror, aꞌan li ralal laj Becorat. Ut laj Becorat, aꞌan li ralal laj Afía. 2 Laj Cis cuan jun li ralal aj Saúl xcꞌabaꞌ. Toj sa̱j ut cꞌajoꞌ xchakꞌal ru. Aꞌan li kꞌaxal chꞌinaꞌus ut li kꞌaxal najt rok saꞌ xya̱nkeb laj Israel. 3 Saꞌ jun li cutan queꞌsach lix bu̱r laj Cis. Quixye re laj Saúl: —Cauresi a̱cuib ut tatxic chixsicꞌbaleb lin bu̱r. Ta̱cꞌam jun li mo̱s cha̱cuix nak tatxic, chan. 4 Co̱ laj Saúl ut quixsiqꞌui saꞌ chixjunil lix naꞌajeb li ralal xcꞌajol laj Efraín, li tzu̱l ru. Ut quixsiqꞌui ajcuiꞌ saꞌ li naꞌajej Salisa. Abanan incꞌaꞌ quixtauheb lix bu̱r lix yucuaꞌ. Quixsiqꞌui ajcuiꞌ saꞌ li naꞌajej Saalim ut saꞌ lix naꞌajeb li ralal xcꞌajol laj Benjamín. Chi moco aran quixtauheb. 5 Nak queꞌcuulac saꞌ lix naꞌaj laj Zuf, laj Saúl quixye re lix mo̱s: —Sukꞌi̱ko saꞌ kochoch. Ma̱re incꞌaꞌ chic naxcꞌoxlaheb lix bu̱r lin yucuaꞌ. Ma̱re chikix chic la̱o yo̱ xcꞌaꞌux, chan. 6 Li mo̱s quixye re: —Saꞌ li tenamit aꞌin cuan jun li profeta naꞌno ru xban nak chixjunil li cꞌaꞌru naxye nacꞌulman. Toxic chirilbal. Ma̱re aꞌan tixye ke bar takatau eb li bu̱r, chan. 7 Laj Saúl quixye re: —Us. Yoꞌo riqꞌuin. Aban, ¿cꞌaꞌru takasi re li profeta? Ma̱cꞌaꞌ chic cuan ke. Ma̱cꞌaꞌ chic kacua saꞌ li kabo̱ls, chan. 8 Li mo̱s quixye: —Cuan jun inchꞌina tumin plata. Takasi aꞌan re li profeta re nak tixcꞌut chiku li be takacꞌam, chan. 9 (Saꞌ eb li cutan aꞌan cui queꞌraj xnaubal cꞌaꞌru naraj li Dios, queꞌxye, “Yoꞌo riqꞌuin laj kꞌe”, chanqueb, xban nak junxil “aj kꞌe” nequeꞌxye reheb. Anakcuan profeta chic nequeꞌxye reheb.) 10 Ut laj Saúl quixye re: —Us li xaye. Yoꞌo.— Ut queꞌco̱eb saꞌ li tenamit riqꞌuin lix profeta li Dios. 11 Nak yo̱queb chi taksi̱nc saꞌ li tzu̱l, queꞌxcꞌul li tukꞌ ixk li yo̱queb chi xic chixcꞌambal xhaꞌeb. Queꞌxpatzꞌ reheb: —¿Ma arin cuan laj kꞌe? chanqueb. 12 Eb li tukꞌ ixk queꞌxye re: —Arin cuan. Caꞌchꞌin chic ma̱ nequexcuulac. Se̱bahomak e̱rib chi xic re nak te̱tau. Xcꞌulun anakcuan xban nak tento nak ta̱mayejak chiru li Ka̱cuaꞌ saꞌ xbe̱n li artal li cuan saꞌ li tzu̱l. 13 Nak tex-oc saꞌ li tenamit, texxic riqꞌuin saꞌ junpa̱t nak toj ma̱jiꞌ naxic chi mayejac saꞌ li tzu̱l saꞌ xcꞌabaꞌeb li tenamit. Eb li bokbileb incꞌaꞌ teꞌcuaꞌak cui toj ma̱jiꞌ nacuulac aꞌan. Tento nak li profeta ta̱rosobtesi li mayej xbe̱n cua, tojoꞌnak teꞌcuaꞌak li tenamit. Ayukex anakcuan ut te̱tau li profeta, chanqueb. 14 Eb aꞌan yo̱queb chi xic toj retal queꞌcuulac saꞌ li tenamit. Nak yo̱queb chi oc saꞌ li oqueba̱l, queꞌril laj Samuel yo̱ chak chi cha̱lc cuanqueb cuiꞌ. Yo̱ chi xic saꞌ xbe̱n li tzu̱l re ta̱mayejak. 15 Jun cutan chic ma̱ nacuulac laj Saúl, nak li Dios quia̱tinac riqꞌuin ut quixye re: 16 —Saꞌ ajcuiꞌ li o̱r aꞌin cuulaj tintakla a̱cuiqꞌuin jun li cui̱nk. Li cui̱nk aꞌan xcomoneb li ralal xcꞌajol laj Benjamín. La̱at ta̱qꞌue li aceite saꞌ xjolom xban nak aꞌan li xinsicꞌ ru re ta̱takla̱nk saꞌ xbe̱neb laj Israel lin tenamit. Aꞌan ta̱colok reheb chiruheb laj filisteo. La̱in nacuil xtokꞌoba̱l ruheb lin tenamit nak nequeꞌxya̱ba incꞌabaꞌ, chan. 17 Nak laj Samuel quiril ru laj Saúl, li Ka̱cuaꞌ quixye re: —Aꞌan aꞌin li cui̱nk li xinye a̱cue. Aꞌan ta̱takla̱nk saꞌ xbe̱neb lin tenamit, chan. 18 Nak cuanqueb saꞌ li oqueba̱l re li tenamit, laj Saúl quinachꞌoc riqꞌuin laj Samuel ut quixye re: —Ba̱nu usilal, ye cue bar cuan li rochoch laj kꞌe, chan. 19 Laj Samuel quixye re: —La̱in li profeta li nacasicꞌ. Yoꞌo saꞌ xbe̱n li tzu̱l. La̱at tatxic xbe̱n cua chicuu xban nak anakcuan tatcuaꞌak cuochben. Cuulaj tinye a̱cue li cꞌaꞌru ta̱cuaj xnaubal ut naru ajcuiꞌ tatxic cuulaj. 20 Matcꞌoxlac chic chirixeb li bu̱r li ac cuan oxib cutan xsachiqueb. Ac xeꞌtauheꞌ chic. ¿Ma ma̱cuaꞌ ta biꞌ la̱at joꞌ eb ajcuiꞌ li ralal xcꞌajol la̱ yucuaꞌ li yo̱queb chirajbal ru chixjunileb laj Israel? chan. 21 Laj Saúl quixye re: —La̱in xcomoneb li ralal xcꞌajol laj Benjamín, li incꞌaꞌ qꞌuiheb saꞌ xya̱nkeb laj Israel. Ut la̱o li ralal xcꞌajol li kayucuaꞌ, ma̱cꞌaꞌ kacuanquil saꞌ xya̱nkeb chixjunileb li ralal xcꞌajol laj Benjamín. ¿Cꞌaꞌut nak nacaye cue chixjunil aꞌin? chan. 22 Tojoꞌnak laj Samuel quixcꞌam laj Saúl rochben lix mo̱s saꞌ li nimla naꞌajej li oqueb cuiꞌ re chi cuaꞌac. Quixqꞌueheb xnaꞌajeb saꞌ xjolom li me̱x li chunchu̱queb cuiꞌ li laje̱b xcaꞌcꞌa̱l chi ulaꞌ. 23 Laj Samuel quixye re laj cꞌu̱banel: —Cꞌam chak li tib li xinqꞌue a̱cue re ta̱xoc xjunes, chan. 24 Ut laj cꞌu̱banel quixcꞌam chak li raꞌ li carner ut quixqꞌue saꞌ me̱x chiru laj Saúl. Laj Samuel quixye re: —Cueꞌ lix tibel a̱cua xocbil chokꞌ a̱cue. Cuaꞌin. Li xtibel a̱cua aꞌin xocbil chokꞌ a̱cue re ta̱tzaca saꞌ li cutan aꞌin nak xinbokeb li ulaꞌ chi cuaꞌac, chan. Ut laj Saúl quicuaꞌac rochben laj Samuel saꞌ li cutan aꞌan. 25 Chirix aꞌan, queꞌcube chak saꞌ li tzu̱l ut queꞌco̱eb saꞌ xbe̱n li rochoch. Aran quia̱tinac laj Samuel riqꞌuin. 26 Cuulajak chic nak ac sake̱uc re, laj Samuel quixbok laj Saúl ut quixye re: —Cauresi a̱cuib chi xic xban nak anakcuan tatinchakꞌrabi, chan. Laj Saúl quicuacli ut queꞌco̱eb xcabichaleb. 27 Nak queꞌcuulac chire li tenamit, laj Samuel quixye re laj Saúl: —Ye re la̱ mo̱s nak xicak chi ubej. Abanan la̱at tatcana̱k arin xban nak la̱in tinye a̱cue li cꞌaꞌru quixye li Dios, chan laj Samuel. |
© 2019, Wycliffe Bible Translators. All rights reserved.
Wycliffe Bible Translators, Inc.