1 Samuel 8 - Li Santil hu

Eb laj Israel teꞌraj xreyeb

¹ Nak ac xti̱x laj Samuel, quixxakabeb li ralal chi rakoc a̱tin saꞌ xbe̱neb li tenamit Israel.

² Lix cꞌabaꞌ li xbe̱n ralal, aꞌan aj Joel. Ut lix cꞌabaꞌ li i̱tzꞌinbej, aꞌan aj Abías. Eb aꞌan nequeꞌrakoc a̱tin saꞌ li tenamit Beerseba.

³ Abanan eb li alalbej incꞌaꞌ queꞌrakoc a̱tin saꞌ xya̱lal joꞌ quixba̱nu li yucuaꞌbej. Yo̱queb chixrahinquil ru li tumin. Nequeꞌtumina̱c ru. Ut incꞌaꞌ nequeꞌrakoc a̱tin saꞌ ti̱quilal.

⁴ Joꞌcan nak eb li nequeꞌcꞌamoc be saꞌ xya̱nkeb laj Israel queꞌxchꞌutub ribeb ut queꞌco̱eb Ramá chi a̱tinac riqꞌuin laj Samuel.

⁵ Ut queꞌxye re: —La̱at ac ti̱xat chic ut eb la̱ cualal incꞌaꞌ nequeꞌxba̱nu li us joꞌ nacaba̱nu la̱at. Joꞌcan nak nakatzꞌa̱ma cha̱cuu nak ta̱xakab junak karey re nak aꞌan chic ta̱takla̱nk saꞌ kabe̱n joꞌ na-uxman saꞌ eb li xni̱nkal ru tenamit, chanqueb.

⁶ Ut laj Samuel incꞌaꞌ quicuulac chiru nak queꞌxtzꞌa̱ma xreyeb. Joꞌcan nak quitijoc chiru li Ka̱cuaꞌ.

⁷ Ut li Ka̱cuaꞌ quixye re laj Samuel: —Ba̱nu li yo̱queb chixtzꞌa̱manquil a̱cue li tenamit. Ma̱cuaꞌ la̱at yo̱queb cha̱tzꞌekta̱nanquil. La̱in ban yo̱queb chintzꞌekta̱nanquil xban nak eb aꞌan incꞌaꞌ nequeꞌraj nak la̱in tintakla̱nk saꞌ xbe̱neb.

⁸ Chalen nak queꞌcuisi chak Egipto, yo̱queb chintzꞌekta̱nanquil toj chalen anakcuan nak yo̱queb chixlokꞌoninquil li jalanil dios. Joꞌcan ajcuiꞌ yo̱queb a̱cue la̱at anakcuan.

⁹ Joꞌcan ut ba̱nu li yo̱queb chixtzꞌa̱manquil cha̱cuu. Abanan ta̱ye reheb chi tzꞌakal lix ya̱lal chanru li cua̱nc rubel xcuanquil junak rey, chan li Ka̱cuaꞌ.

¹⁰ Ut laj Samuel quixye reheb li tenamit li yo̱queb chixpatzꞌbal xreyeb chixjunil li cꞌaꞌru quixye li Ka̱cuaꞌ.

¹¹ Laj Samuel quixye reheb: —Aꞌan aꞌin li tixba̱nu li rey. Tixchapeb le̱ ralal re teꞌoc chokꞌ soldado. Cuanqueb li tixqꞌue chi be̱c saꞌ eb li carruaje. Cuanqueb li teꞌxic chirix cacua̱y ut cuanqueb ajcuiꞌ li teꞌxic chi rokeb chiru lix carruaje li rey.

¹² Cuanqueb li tixxakab chi takla̱nc saꞌ xbe̱neb jun mil chi soldado. Cuanqueb ajcuiꞌ li tixqꞌue chi takla̱nc saꞌ xbe̱neb laje̱b roxcꞌa̱l. Ut cuanqueb li tixqꞌue chixtrabajinquil lix chꞌochꞌ ut chixkꞌolbal li ru li racui̱mk. Cuanqueb li tixqꞌue chixyi̱banquil li chꞌi̱chꞌ re pletic. Ut cuanqueb ajcuiꞌ li tixqꞌue chixyi̱banquil lix carruaje re pletic.

¹³ Ut tixqꞌueheb ajcuiꞌ le̱ rabin chi cꞌanjelac chiru. Cuanqueb li tixqꞌueheb chixyi̱banquil lix sununquil ban. Cuanqueb ajcuiꞌ li tixqꞌueheb chixyi̱banquil lix tzacae̱mk. Ut cuanqueb ajcuiꞌ li tixqꞌueheb chixyi̱banquil lix caxlan cua.

¹⁴ Tixmakꞌ che̱ru li cha̱bil chꞌochꞌ ut li uvas li kꞌaxal cha̱bil, joꞌ eb ajcuiꞌ li cha̱bil cheꞌ olivo. Ut tixqꞌue reheb li nequeꞌcꞌanjelac chiru.

¹⁵ Tixye e̱re nak tento te̱qꞌue xlaje̱tkil le̱ racui̱mk trigo ut uvas re tixqꞌue reheb li nequeꞌtenkꞌan re ut reheb li nequeꞌtaklan saꞌ xbe̱neb li tenamit.

¹⁶ Tixmakꞌ ajcuiꞌ che̱ru le̱ mo̱s, joꞌ cui̱nk joꞌ ixk. Tixmakꞌ ajcuiꞌ che̱ru le̱ cha̱bil bo̱yx ut le̱ bu̱r ut tixqꞌueheb chi cꞌanjelac saꞌ lix cꞌanjel.

¹⁷ Tixye e̱re nak tento te̱qꞌue li junju̱nk saꞌ xlaje̱tkil le̱ queto̱mk. Ut tento nak la̱ex texcꞌanjelak chiru.

¹⁸ Ta̱cuulak xkꞌehil nak la̱ex incꞌaꞌ chic te̱cuy li raylal li tixba̱nu e̱re li rey li te̱xakab. Te̱ya̱ba raj chic xcꞌabaꞌ li Ka̱cuaꞌ saꞌ eb li cutan aꞌan. Abanan, li Dios incꞌaꞌ chic ta̱rabi le̱ tij.

¹⁹ Abanan eb li tenamit incꞌaꞌ queꞌraj rabinquil li cꞌaꞌru quixye laj Samuel. Queꞌxye: —Incꞌaꞌ ta̱cꞌulma̱nk chi joꞌcan. La̱o takaj junak karey re ta̱takla̱nk saꞌ kabe̱n.

²⁰ La̱o takaj junak karey re nak aꞌan chic ta̱takla̱nk saꞌ kabe̱n joꞌ na-uxman saꞌ eb li xni̱nkal ru tenamit. Aꞌan ta̱cꞌamok be chiku nak toxic chi pletic riqꞌuineb li xicꞌ nequeꞌiloc ke, chanqueb.

²¹ Laj Samuel quirabi li cꞌaꞌru queꞌxye ut quixnumsi chixjunil chiru li Ka̱cuaꞌ.

²² Ut li Ka̱cuaꞌ quixye re: —Ba̱nu li cꞌaꞌru nequeꞌraj. Ta̱xakab junak lix reyeb, chan. Ut laj Samuel quixtaklaheb li cui̱nk saꞌ lix tenamiteb.