Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 Samuel 7 - Li Santil hu

1 Joꞌcan nak eb li cuanqueb Quiriat-jearim queꞌcuulac Bet-semes ut queꞌxcꞌam lix Lokꞌlaj Ca̱x li Ka̱cuaꞌ ut queꞌxqꞌue saꞌ rochoch laj Abinadab li cuan saꞌ xbe̱n bol. Ut queꞌxkꞌaxtesi saꞌ rukꞌ li Dios laj Eleazar li ralal, re nak aꞌan ta̱ilok re li Lokꞌlaj Ca̱x.


Laj Samuel narakoc a̱tin saꞌ xbe̱neb laj Israel

2 Lix Lokꞌlaj Ca̱x li Ka̱cuaꞌ quicuan aran Quiriat-jearim junmay chihab. Ut chixjunileb laj Israel teꞌraj raj nak teꞌtenkꞌa̱k xban li Dios.

3 Ut laj Samuel quixye reheb laj Israel: —Cui la̱ex texsukꞌi̱k cuiꞌchic riqꞌuin li Ka̱cuaꞌ chi anchal e̱chꞌo̱l, tento nak te̱tzꞌekta̱na chi junaj cua chixjunileb li jalanil dios li cuanqueb saꞌ e̱ya̱nk joꞌ ajcuiꞌ li yi̱banbil dios xAstarot ut kꞌaxtesihomak e̱rib re li Ka̱cuaꞌ. Junes aꞌan chic te̱lokꞌoni. Ut li Ka̱cuaꞌ ta̱colok e̱re saꞌ rukꞌeb laj filisteo, chan.

4 Joꞌcan nak eb li ralal xcꞌajol laj Israel queꞌxtzꞌekta̱naheb li yi̱banbil dios laj Baal ut lix Astarot ut caꞌaj chic li Ka̱cuaꞌ queꞌxlokꞌoni.

5 Laj Samuel quixye reheb: —Che̱junilex la̱ex aj Israel, chꞌutubomak e̱rib aran Mizpa ut la̱in tintijok che̱rix chiru li Ka̱cuaꞌ, chan.

6 Ut queꞌxchꞌutub ribeb aran Mizpa. Queꞌrisi li haꞌ saꞌ li becbil haꞌ ut queꞌxhoy chiru li Ka̱cuaꞌ chokꞌ xmayejeb. Queꞌxba̱nu x-ayu̱n chiru li cutan aꞌan. Queꞌxxo̱to xma̱queb ut queꞌxye: —Xoma̱cob chiru li Ka̱cuaꞌ, chanqueb. Ut aran Mizpa laj Samuel quicana chokꞌ aj rakol a̱tin saꞌ xbe̱neb li ralal xcꞌajol laj Israel.

7 Eb li nequeꞌtaklan saꞌ xbe̱neb laj filisteo queꞌrabi nak cuanqueb aran Mizpa eb laj Israel. Queꞌco̱eb chi pletic riqꞌuineb. Nak queꞌrabi resil nak yo̱queb chi cha̱lc laj filisteo, cꞌajoꞌ nak queꞌxucuac laj Israel.

8 Queꞌxye re laj Samuel: —Ma̱canab xtzꞌa̱manquil chiru li Ka̱cuaꞌ li kaDios re nak aꞌan toxcol chiruheb laj filisteo, chanqueb.

9 Laj Samuel quixcamsi jun li chꞌina carner ut quixcꞌat chi jun chokꞌ xmayej chiru li Ka̱cuaꞌ. Quixtzꞌa̱ma xtenkꞌanquileb laj Israel. Ut li Ka̱cuaꞌ quirabi lix tij.

10 Nak laj Samuel yo̱ chixmayejanquil li cꞌatbil mayej, eb laj filisteo queꞌcuulac chi pletic riqꞌuineb laj Israel. Abanan li Ka̱cuaꞌ quixcꞌutbesi lix cuanquil saꞌ choxa nak quixqꞌue chi mok chi kꞌaxal cau li ca̱k saꞌ xbe̱neb ut eb laj filisteo queꞌxsach xnaꞌleb ut queꞌe̱lelic chiruheb laj Israel.

11 Eb laj Israel queꞌel aran Mizpa ut queꞌco̱eb chira̱linanquileb laj filisteo. Yo̱queb chixcamsinquileb nak yo̱queb chi xic saꞌ li takꞌa li cuan nachꞌ riqꞌuin Bet-car.

12 Laj Samuel quixchap jun li pec ut quixxakab saꞌ xyi li cuib chi tenamit Mizpa ut Sen. Ut quixqꞌue chokꞌ xcꞌabaꞌ “Eben-ezer” ut quixye: —Toj chalen anakcuan li Ka̱cuaꞌ yo̱ chi tenkꞌa̱nc ke, chan.

13 Joꞌcaꞌin nak queꞌnumta laj Israel saꞌ xbe̱neb laj filisteo. Incꞌaꞌ chic queꞌoc saꞌ lix tenamiteb laj Israel chi pletic. Joꞌ najtil yoꞌyo laj Samuel, li Ka̱cuaꞌ incꞌaꞌ quixcanabeb laj filisteo chi oc saꞌ lix naꞌajeb.

14 Ut eb laj Israel queꞌre̱chani cuiꞌchic li tenamit li queꞌmakꞌeꞌ chiruheb xbaneb laj filisteo. Eb li tenamit aꞌan naticla Ecrón ut nacuulac toj Gat. Joꞌcan nak eb laj Israel queꞌxcol cuiꞌchic lix chꞌochꞌeb chiruheb laj filisteo. Ut queꞌcuan saꞌ usilal riqꞌuineb laj amorreo.

15 Ut laj Samuel quicuan chi takla̱nc saꞌ xbe̱n li tenamit Israel joꞌ najtil yoꞌyo.

16 Rajlal chihab naxic saꞌ eb li tenamit Bet-el, Gilgal, ut Mizpa ut narakoc a̱tin saꞌ xbe̱neb laj Israel li cuanqueb saꞌ eb li naꞌajej aꞌan.

17 Ut chirix aꞌan nasukꞌi Ramá xban nak aran cuan li rochoch. Toj aran narakoc chak a̱tin saꞌ xbe̱neb li tenamit Israel. Ut quixyi̱b jun li artal re xlokꞌoninquil li Ka̱cuaꞌ saꞌ li tenamit aꞌan.

© 2019, Wycliffe Bible Translators. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ