1 Samuel 5 - Li Santil hu

Ra queꞌxcꞌul eb laj filisteo nak cuan li Lokꞌlaj Ca̱x saꞌ lix tenamiteb

¹ Nak queꞌre̱chani li Lokꞌlaj Ca̱x eb laj filisteo, queꞌel aran Eben-ezer ut queꞌxcꞌam toj saꞌ li tenamit Asdod.

² Queꞌxcꞌam li Lokꞌlaj Ca̱x saꞌ li rochoch laj Dagón lix dioseb ut queꞌxqꞌue chixcꞌatk lix dioseb.

³ Joꞌ cuulajak chic eb li cuanqueb Asdod queꞌcuulac aran ut queꞌxtau lix dioseb tꞌantꞌo saꞌ chꞌochꞌ chiru li Lokꞌlaj Ca̱x. Queꞌxcuaclesi laj Dagón ut queꞌxxakab cuiꞌchic saꞌ xnaꞌaj.

⁴ Saꞌ li cutan jun chic eb laj Asdod queꞌcuulac cuiꞌchic aran ut queꞌxtau cuiꞌchic laj Dagón tꞌantꞌo saꞌ chꞌochꞌ chiru lix Lokꞌlaj Ca̱x li Ka̱cuaꞌ. Tokol lix cux ut tokoleb ajcuiꞌ li rukꞌ chi xcabichal ut cuanqueb aran chiru li oqueba̱l re li ochoch. Caꞌaj chic lix nimal quicana chi incꞌaꞌ quijoreꞌ.

⁵ Xban nak quijoreꞌ laj Dagón, chalen toj anakcuan aran saꞌ li tenamit Asdod nequeꞌoc chi piscꞌonbil saꞌ li oqueba̱l re li rochoch laj Dagón eb laj tij ut eb li nequeꞌlokꞌonin re li yi̱banbil dios aꞌan. Incꞌaꞌ nequeꞌraj nequeꞌxyekꞌ li bar quinak cuiꞌ nak quitꞌaneꞌ lix dioseb.

⁶ Ut li Ka̱cuaꞌ quixqꞌueheb chixtojbal lix ma̱queb li cuanqueb Asdod. Quixtakla chak jun li yajel saꞌ xbe̱neb. Ut nabal li tumor qui-el saꞌ lix tibeleb. Ut qui-el ajcuiꞌ saꞌ xtibeleb li cuanqueb chi xjun sutam li tenamit Asdod.

⁷ Ut eb li cuanqueb saꞌ li tenamit Asdod queꞌxye: —Incꞌaꞌ naru ta̱cana̱k arin lix Lokꞌlaj Ca̱x lix Dioseb laj Israel. Kꞌaxal cau li raylal xqꞌue saꞌ kabe̱n lix Dioseb aꞌan ut saꞌ xbe̱n ajcuiꞌ laj Dagón li kadios, chanqueb.

⁸ Queꞌxtakla resil riqꞌuineb li nequeꞌtaklan saꞌ xbe̱neb laj filisteo ut queꞌxpatzꞌ reheb: —¿Cꞌaꞌru takaba̱nu riqꞌuin lix Lokꞌlaj Ca̱x lix Dioseb laj Israel? chanqueb. Eb aꞌan queꞌchakꞌoc ut queꞌxye: —Cꞌamomak saꞌ li tenamit Gat, chanqueb. Ut queꞌxcꞌam li Lokꞌlaj Ca̱x aran.

⁹ Nak ac cuan chic aran li Lokꞌlaj Ca̱x, li Dios quixqꞌue jun nimla raylal saꞌ xbe̱neb li cuanqueb saꞌ li tenamit Gat. Ut nabal li tumor queꞌel saꞌ lix tibeleb li cristian, joꞌ ni̱nk, joꞌ cocꞌ.

¹⁰ Joꞌcan nak queꞌxtakla li Lokꞌlaj Ca̱x saꞌ li tenamit Ecrón. Eb li cuanqueb aran queꞌxucuac. Japjo̱queb re chixyebal: —Xeꞌxtakla chak arin lix Lokꞌlaj Ca̱x lix Dios eb laj Israel re kacamsinquil la̱o ut eb li katenamit, chanqueb.

¹¹ Joꞌcan nak queꞌxtakla xchꞌutubanquileb chixjunileb li nequeꞌtaklan saꞌ xbe̱neb laj filisteo ut queꞌxye reheb: —Taklahomak saꞌ xnaꞌaj lix Lokꞌlaj Ca̱x lix Dios eb laj Israel. Incꞌaꞌ nakaj nak toxcamsi la̱o ut li katenamit, chanqueb. Cꞌajoꞌ nak yo̱queb chi xucuac xban nak yalak bar yo̱queb chi ca̱mc xban nak yo̱ xjoskꞌil li Dios saꞌ xbe̱neb.

¹² Ut eb li incꞌaꞌ queꞌcam, ra cuanqueb xbaneb li tumor li queꞌel saꞌ xtibeleb. Yo̱queb chixjapbal reheb xban li raylal yo̱queb chixcꞌulbal. Ut quicuulac toj saꞌ choxa lix ya̱beb.