1 Samuel 4 - Li Santil hu

¹ Laj Samuel quixye reheb laj Israel li cꞌaꞌru quiyeheꞌ re xban li Ka̱cuaꞌ. Saꞌ eb li cutan aꞌan eb laj filisteo queꞌxchꞌutub ribeb re nak teꞌxic chi pletic riqꞌuineb laj Israel. Eb laj Israel queꞌxyi̱b lix muheba̱leb saꞌ li naꞌajej Eben-ezer ut eb laj filisteo queꞌxyi̱b lix muheba̱leb saꞌ li naꞌajej Afec.

Eb laj filisteo queꞌxcꞌam lix Lokꞌlaj Ca̱x li Ka̱cuaꞌ

² Eb laj filisteo queꞌxtiquib pletic. Cau queꞌpletic toj retal queꞌnumta saꞌ xbe̱neb laj Israel. Ca̱hib mil na chi soldado aj Israel queꞌcamsi̱c saꞌ li ple̱t aꞌan.

³ Eb laj Israel li incꞌaꞌ queꞌcamsi̱c queꞌsukꞌi saꞌ lix muheba̱leb. Eb li nequeꞌcꞌamoc be saꞌ xya̱nkeb laj Israel queꞌxye: —¿Cꞌaꞌut nak li Ka̱cuaꞌ xoxkꞌaxtesi saꞌ rukꞌeb laj filisteo? Toxic Silo ut takacꞌam chak arin li Lokꞌlaj Ca̱x re nak cua̱nk saꞌ kaya̱nk ut li Ka̱cuaꞌ toxcol chiruheb li xicꞌ nequeꞌiloc ke, chanqueb.

⁴ Joꞌcan nak queꞌxtaklaheb li cui̱nk aran Silo re nak teꞌxcꞌam chak lix Lokꞌlaj Ca̱x li nimajcual Dios, li cuan li cuib chi querubines saꞌ xbe̱n. Ut eb laj Ofni ut laj Finees, li cuib chi ralal laj Elí, yo̱queb chi cha̱lc chixcꞌatk li Lokꞌlaj Ca̱x.

⁵ Cꞌajoꞌ nak queꞌsahoꞌ saꞌ xchꞌo̱leb laj Israel nak quicuulac li Lokꞌlaj Ca̱x riqꞌuineb. Qui-ecꞌan li chꞌochꞌ nak queꞌxjap reheb xban xsahil xchꞌo̱leb.

⁶ Eb laj filisteo queꞌrabi nak yo̱queb chixjapbal reheb ut queꞌxye: —¿Cꞌaꞌut nak yo̱queb chixjapbal reheb laj Israel? chanqueb. Ut queꞌrabi resil nak ac xeꞌxcꞌam chak li Lokꞌlaj Ca̱x saꞌ lix naꞌajeb laj Israel.

⁷ Cꞌajoꞌ nak queꞌxucuac ut queꞌxye: —Li Dios cuan saꞌ xya̱nkeb. Ma̱ jun sut quicꞌulman joꞌ aꞌin. Anakcuan xo-osoꞌ.

⁸ ¿Ani ta̱ru̱k ta̱colok ke chiruheb lix dioseb li ni̱nkeb xcuanquil? Eb li dios aꞌan, aꞌan eb li queꞌtaklan re nabal li raylal saꞌ xbe̱neb laj Egipto saꞌ li chaki chꞌochꞌ ut queꞌxsach ruheb.

⁹ Cauhak taxak kachꞌo̱l la̱o aj filisteo. Cau taxak topletik riqꞌuineb re nak incꞌaꞌ teꞌnumta̱k saꞌ kabe̱n. Ma̱re anchal tocana̱k rubel xcuanquileb joꞌ nak xeꞌcuan rubel kacuanquil la̱o, chanqueb.

¹⁰ Joꞌcan nak eb laj filisteo queꞌpletic chi cau ut queꞌnumta saꞌ xbe̱neb laj Israel. Eb laj Israel queꞌe̱lelic chiruheb ut queꞌco̱eb saꞌ lix muheba̱leb. Abanan kꞌaxal cuiꞌchic nabaleb li queꞌcamsi̱c. Laje̱b xcaꞌcꞌa̱l mil (30,000) eb laj Israel li nequeꞌxic chi rokeb queꞌcam saꞌ li cutan aꞌan.

¹¹ Ut eb laj filisteo queꞌxcꞌam li Lokꞌlaj Ca̱x ut queꞌxcamsi laj Ofni ut laj Finees, li cuib chi ralal laj Elí.

¹² Jun li cui̱nk xcomoneb li ralal xcꞌajol laj Benjamín quie̱lelic chiruheb laj filisteo. Co̱ saꞌ a̱nil ut saꞌ ajcuiꞌ li cutan aꞌan quicuulac Silo. Ac xpej li rakꞌ ut xqꞌue li poks saꞌ xjolom retalil nak ra saꞌ xchꞌo̱l.

¹³ Nak quicuulac Silo, laj Elí chunchu chire li be. Yo̱ xcꞌaꞌux chirix li Lokꞌlaj Ca̱x. Li cui̱nk quixye reheb li tenamit cꞌaꞌru quicꞌulman. Cꞌajoꞌ nak queꞌxucuac ut queꞌxjap reheb li tenamit.

¹⁴ Laj Elí quirabi li choki̱nc ut quixye: —¿Cꞌaꞌut nak yo̱queb chixjapbal reheb li tenamit? chan. Ut li cui̱nk co̱ saꞌ a̱nil riqꞌuin laj Elí re nak tixye re cꞌaꞌru quicꞌulman.

¹⁵ Laj Elí ac ti̱x chic chi us. Cuakxaklaju roꞌcꞌa̱l (98) chihab cuan re. Ut incꞌaꞌ chic na-iloc li ru.

¹⁶ Li cui̱nk quixye re: —La̱in xine̱lelic chiruheb laj filisteo anakcuan ut xinchal saꞌ a̱nil, chan. Laj Elí quixye re li cui̱nk: —¿Cꞌaꞌru xcꞌulman? chan.

¹⁷ Ut li cui̱nk quixye re: —Eb laj filisteo xeꞌnumta saꞌ xbe̱neb laj Israel. Nabaleb li kech solda̱dil xeꞌcam. Ut xeꞌcamsi̱c la̱ cualal cuib, laj Ofni ut laj Finees. Ut eb laj filisteo xeꞌxcꞌam li Lokꞌlaj Ca̱x, chan.

¹⁸ Nak laj Elí quirabi nak quicꞌameꞌ li Lokꞌlaj Ca̱x xbaneb laj filisteo, quitꞌaneꞌ saꞌ li tem li chunchu cuiꞌ chire li oqueba̱l. Nak quitꞌaneꞌ chirix, quitokeꞌ lix cux ut quicam xban nak ac ti̱x chic ut nim xtibel. Caꞌcꞌa̱l chihab quirakoc a̱tin saꞌ xbe̱neb laj Israel.

¹⁹ Li ralib laj Elí, li rixakil laj Finees, aꞌan yaj aj ixk ut ac cuulac re xkꞌehil nak ta̱qꞌuira̱k. Nak quirabi resil nak quicꞌameꞌ li Lokꞌlaj Ca̱x ut nak queꞌcam lix be̱lom ut laj Elí, quiticla lix raylal saꞌ junpa̱t ut quiyoꞌla lix cꞌulaꞌal.

²⁰ Eb li ixk li yo̱queb chi iloc re queꞌxqꞌue retal nak ca̱mc re li naꞌbej ut queꞌxye re: —Matxucuac. Xyoꞌla jun a̱cꞌulaꞌal te̱lom, chanqueb. Abanan li naꞌbej incꞌaꞌ quichakꞌoc. Quixsach xnaꞌleb.

²¹ Ut quixqꞌue aj Icabod chokꞌ xcꞌabaꞌ li cꞌulaꞌal ut quixye: “Lix lokꞌal li Dios qui-el saꞌ xya̱nkeb laj Israel”. Quixye chi joꞌcan xban nak quicꞌameꞌ li Lokꞌlaj Ca̱x xban jalan tenamit, ut queꞌcam lix be̱lom ut laj Elí, lix yucuaꞌ.

²² Quixye nak qui-el xlokꞌal eb laj Israel xban nak quicꞌameꞌ lix Lokꞌlaj Ca̱x li Ka̱cuaꞌ xban jalan tenamit.