1 Samuel 30 - Li Santil hu

¹ Saꞌ rox li cutan laj David ut eb li cuanqueb rochben queꞌcuulac saꞌ lix tenamit Siclag. Queꞌxqꞌue retal nak eb laj Amalec ac xeꞌoc saꞌ eb li naꞌajej Neguev ut Siclag. Queꞌxcꞌam li cꞌaꞌru cuan aran ut queꞌxcꞌat li tenamit.

² Ma̱ jun reheb queꞌxcamsi, abanan queꞌxchapeb li ixk ut queꞌxcꞌameb chirixeb nak queꞌco̱eb saꞌ xtenamiteb.

³ Nak queꞌoc saꞌ li tenamit, laj David ut li cuanqueb rochben queꞌxqꞌue retal nak cꞌatbil chic lix tenamiteb ut ac xeꞌcꞌameꞌ li rixakileb, joꞌqueb ajcuiꞌ li ralal xcꞌajoleb.

⁴ Laj David ut eb li cuanqueb rochben queꞌxjap reheb chi ya̱bac. Ut incꞌaꞌ queꞌxcanab toj retal queꞌlub.

⁵ Queꞌcꞌameꞌ ajcuiꞌ li cuib chi rixakil laj David. Aꞌaneb lix Ahinoam, Jezreel xtenamit, ut lix Abigail, li quicuan chokꞌ rixakil laj Nabal aran Carmel.

⁶ Cꞌajoꞌ lix cꞌaꞌux laj David xban nak eb li cuanqueb rochben queꞌxye nak teꞌxcut chi pec laj David xban xrahil xchꞌo̱leb. Abanan li Ka̱cuaꞌ quixqꞌue xcacuilal xchꞌo̱l laj David.

⁷ Laj David quixye re laj Abiatar, laj tij, li ralal laj Ahimelec: —Ba̱nu usilal, cꞌam chak li efod, chan. Ut laj Abiatar quixcꞌam li efod riqꞌuin.

⁸ Laj David quitijoc ut quixye re li Dios: —¿Ma us cui tinxic chirixeb chixchapbaleb laj Amalec? ¿Ma toj toxebintau saꞌ be? chan. Li Ka̱cuaꞌ quixye re: —Ayukex. Relic chi ya̱l ta̱tauheb ut ta̱coleb li xeꞌxchap ut xeꞌxcꞌam chirixeb, chan.

⁹ Joꞌcan nak queꞌco̱eb laj David rochbeneb li cuakib ciento chi cui̱nk chixsicꞌbaleb laj Amalec. Nak queꞌcuulac cuan cuiꞌ li nimaꞌ Besor,

¹⁰ aran queꞌcana cuib ciento li cui̱nk xban nak queꞌlub chi numecꞌ saꞌ li nimaꞌ. Ut li ca̱hib ciento chic queꞌco̱eb chirix laj David.

¹¹ Eb li cui̱nk li cuanqueb rochben laj David queꞌxtau jun li cui̱nk aj Egipto saꞌ li cꞌaleba̱l ut queꞌxcꞌam riqꞌuin laj David. Queꞌxqꞌue xcua rucꞌa.

¹² Queꞌxqꞌue ajcuiꞌ li chaki higo ut cuib cu̱t li chaki uvas. Ut quicꞌulun cuiꞌchic xchꞌo̱l li cui̱nk xban nak ac cuan oxib cutan ut oxib kꞌojyi̱n incꞌaꞌ naxyal cua.

¹³ Laj David quixye re: —¿Ani a̱patrón? ¿Bar xatchal chak? chan. Li cui̱nk quixye re: —La̱in aj Egipto. La̱in xmo̱s jun li cui̱nk xcomoneb laj Amalec. Oxib cutan incanabanquil arin xban lin patrón xban nak yajin.

¹⁴ La̱o xocuulac aran Neguev bar cuanqueb cuiꞌ eb laj cereteo. Ut xocuulac ajcuiꞌ aran Judá ut aran Neguev saꞌ lix naꞌaj laj Caleb. Ut xkacꞌat ajcuiꞌ li tenamit Siclag, chan.

¹⁵ Laj David quixye re: —¿Ma ta̱ru̱k tina̱cꞌam cuanqueb cuiꞌ li jun chꞌu̱tal chi aj e̱lkꞌ aꞌan? chan. Ut li cui̱nk quixye re: —Cui la̱at ta̱ye cue saꞌ xcꞌabaꞌ li Dios nak incꞌaꞌ tina̱camsi, chi moco tina̱kꞌaxtesi saꞌ rukꞌ lin patrón, la̱in tatincꞌam bar cuanqueb cuiꞌ, chan.

¹⁶ Ut li cui̱nk aꞌan quixcꞌameb laj David bar cuanqueb cuiꞌ laj e̱lkꞌ. Eb laj Amalec cuanqueb yalak bar saꞌ li naꞌajej aꞌan. Yo̱queb chi ninkꞌei̱c. Yo̱queb chi cuaꞌac ut yo̱queb chi ucꞌac xban xsahil xchꞌo̱leb xban nak nabal li cꞌaꞌak re ru queꞌrelkꞌa.

¹⁷ Nak quisake̱u, laj David ut li cuanqueb rochben queꞌpletic riqꞌuineb chalen ekꞌela toj retal qui-ecuu saꞌ li cutan aꞌan. Quilajeꞌxcamsiheb chixjunileb. Caꞌaj cuiꞌ ca̱hib ciento chi sa̱j cui̱nk queꞌe̱lelic chirix camello.

¹⁸ Laj David quixmakꞌ chiruheb chixjunil li cꞌaꞌru queꞌrelkꞌa eb laj Amalec, joꞌ ajcuiꞌ li cuib chi rixakil.

¹⁹ Queꞌre̱chani cuiꞌchic chixjunil li cꞌaꞌru quimakꞌeꞌ chiruheb. Ma̱cꞌaꞌ quisach chiruheb. Quixcoleb ajcuiꞌ li ixk ut eb li cocꞌal.

²⁰ Ut queꞌxcꞌam chixjunil li carner ut li cuacax. Queꞌxberesiheb chiruheb nak queꞌsukꞌi cuiꞌchic saꞌ xtenamiteb. Ut eb li cuanqueb rochben yo̱queb chixyebal: —Chixjunil aꞌin xre̱chani chak laj David, chanqueb.

²¹ Queꞌsukꞌi cuiꞌchic saꞌ li nimaꞌ Besor li queꞌcana cuiꞌ li cuib ciento chi cui̱nk li incꞌaꞌ queꞌru chi xic chirix laj David xban xlubiqueb. Chi saheb saꞌ xchꞌo̱l queꞌco̱eb chixcꞌulbal laj David ut li cuanqueb rochben. Ut laj David quixqꞌue xsahileb xchꞌo̱l.

²² Abanan cuanqueb saꞌ xya̱nkeb li queꞌco̱eb chirix laj David incꞌaꞌ us xnaꞌlebeb. Queꞌxye re laj David: —Eb aꞌan incꞌaꞌ xeꞌco̱eb chikix. Incꞌaꞌ naru teꞌxcꞌul li cꞌaꞌru xke̱chani chak. Caꞌaj cui li rixakileb ut lix cocꞌaleb teꞌqꞌuehekꞌ reheb, chanqueb.

²³ Abanan laj David quixye reheb: —Ex cuas cui̱tzꞌin, incꞌaꞌ naru takaba̱nu chi joꞌcan. Aꞌ li Dios, aꞌan li xqꞌuehoc re chixjunil li xke̱chani. Aꞌan li quicoloc ke ut aꞌan ajcuiꞌ xtenkꞌan ke chi numta̱c saꞌ xbe̱neb laj Amalec, li queꞌelkꞌan re li cꞌaꞌru ke.

²⁴ Ma̱ ani tixcꞌul xchꞌo̱l li cꞌaꞌru yo̱quex chixyebal. Juntakꞌe̱t takacꞌul chikajunilo, joꞌ li nequeꞌcana riqꞌuin li cꞌaꞌru cuan ke, joꞌ ajcuiꞌ li nequeꞌxic chi pletic. Juntakꞌe̱t takacꞌul chikajunilo, chan.

²⁵ Chalen saꞌ li cutan aꞌan toj anakcuan, joꞌcan nequeꞌxba̱nu eb laj Israel.

²⁶ Nak laj David quicuulac aran Siclag, quixtakla xma̱taneb li rami̱g li nequeꞌcꞌamoc be aran Judá. Quixye reheb: —Li ma̱tan aꞌin xcomon li xkamakꞌ chiruheb li xicꞌ nequeꞌiloc re li Ka̱cuaꞌ Dios, chan.

²⁷ Ut quixtakla ajcuiꞌ xma̱taneb li cuanqueb Bet-el, li cuanqueb Ramot re Neguev, ut reheb ajcuiꞌ li cuanqueb Jatir,

²⁸ joꞌ ajcuiꞌ eb li cuanqueb Aroer, eb li cuanqueb Sifmot, eb li cuanqueb Estemoa,

²⁹ eb li cuanqueb Racal, joꞌ eb ajcuiꞌ li cuanqueb saꞌ eb li tenamit aran Jerameel ut eb lix tenamiteb laj Ceneo.

³⁰ Quixtakla ajcuiꞌ reheb li cuanqueb Horma, ut eb li cuanqueb Corasán, ut eb li cuanqueb Atac,

³¹ joꞌ eb ajcuiꞌ li cuanqueb Hebrón. Ut quixtakla ajcuiꞌ reheb chixjunileb li naꞌajej li quicuan cuiꞌ laj David rochbeneb li cui̱nk li nequeꞌoquen chirix.