1 Samuel 3 - Li Santil huLi Ka̱cuaꞌ quia̱tinac riqꞌuin laj Samuel 1 Laj Samuel yo̱ chi cꞌanjelac chiru li Dios saꞌ xsa̱jilal ut laj Elí naxcꞌut chiru chanru tixba̱nu. Saꞌ eb li cutan aꞌan li Ka̱cuaꞌ incꞌaꞌ quira̱tinaheb li tenamit rajlal, ut moco junelic ta quixcꞌut li visión chiruheb. 2 Laj Elí ac ti̱x chic ut ac yo̱ chi mutzꞌocꞌ li xnakꞌ ru. Saꞌ jun li kꞌojyi̱n yocyo saꞌ xcuarib. 3 Ut laj Samuel yo̱ chi cua̱rc saꞌ li tabernáculo bar cuan cuiꞌ li Lokꞌlaj Ca̱x. Lix lámpara li Ka̱cuaꞌ toj lochlo. 4 Li Ka̱cuaꞌ Dios quixye: —At Samuel.— Quichakꞌoc laj Samuel ut quixye: —Cueꞌquin, chan. 5 Ut co̱ saꞌ junpa̱t cuan cuiꞌ laj Elí ut quixye: —Cueꞌquin, ka̱cuaꞌ. ¿Cꞌaꞌru ta̱cuaj tinba̱nu? chan. Ut laj Elí quixye re: —La̱in incꞌaꞌ xatinbok. Ayu cuiꞌchic chi cua̱rc, chan. Ut laj Samuel co̱ cuiꞌchic chi yoclac. 6 Ut li Ka̱cuaꞌ quixye: —At Samuel.— Ut laj Samuel quicuacli ut co̱ cuiꞌchic riqꞌuin laj Elí ut quixye re: —Cueꞌquin, ka̱cuaꞌ. Xcuabi nak xina̱bok, chan. Laj Elí quixye re: —At Samuel, la̱in incꞌaꞌ xatinbok. Ayu cuiꞌchic chi cua̱rc, chan. 7 Laj Samuel toj ma̱jiꞌ naxnau nak li Ka̱cuaꞌ Dios yo̱ chi bokoc re xban nak li Ka̱cuaꞌ toj ma̱ jun sut naa̱tinac riqꞌuin. 8 Ut laj Samuel quia̱tina̱c cuiꞌchic xban li Ka̱cuaꞌ saꞌ rox sut. Quicuacli ut co̱ riqꞌuin laj Elí ut quixye re: —Xcuabi nak xina̱bok. Cueꞌquin. ¿Cꞌaꞌru ta̱cuaj tinba̱nu? chan. Ut laj Elí quixqꞌue retal nak aꞌ li Ka̱cuaꞌ, aꞌan li quibokoc re. 9 Joꞌcan nak quixye re: —Ayu cuiꞌchic saꞌ la̱ cuarib ut cui tatbokekꞌ cuiꞌchic ta̱ye re, “A̱tinan, at Ka̱cuaꞌ. La̱in aj cꞌanjel cha̱cuu. Tincuabi li cꞌaꞌru ta̱ye,” chaꞌkat re.— Ut laj Samuel co̱ cuiꞌchic saꞌ xcuarib. 10 Quicuulac li Ka̱cuaꞌ riqꞌuin laj Samuel ut quixbok cuiꞌchic joꞌ quixba̱nu xbe̱n sut ut quixye re: —At Samuel, at Samuel, chan li Ka̱cuaꞌ. Laj Samuel quichakꞌoc ut quixye re: —La̱in aj cꞌanjel cha̱cuu, at Ka̱cuaꞌ. Ye cue cꞌaꞌru ta̱cuaj, chan. 11 Li Ka̱cuaꞌ quixye re laj Samuel: —La̱in tinba̱nu jun li naꞌleb reheb laj Israel. Ut ta̱rahokꞌ saꞌ xxiqueb li teꞌabi̱nk re xban nak nimla raylal li tinba̱nu. 12 Saꞌ li cutan aꞌan la̱in tinba̱nu riqꞌuineb li ralal xcꞌajol laj Elí chixjunil li xinye re. 13 Ac xinye nak tinrakok a̱tin saꞌ xbe̱neb li ralal xcꞌajol laj Elí. Tinsach ruheb chi junaj cua xban lix ma̱usilaleb. Laj Elí naxnau nak ac xnumta xyibal ru xnaꞌlebeb li ralal ut incꞌaꞌ naxkꞌuseb. 14 Joꞌcan nak ac xinye nak tinrakok a̱tin saꞌ xbe̱neb li ralal xcꞌajol laj Elí. Lix ma̱usilal ma̱ jokꞌe ta̱ru̱k xcuybal xsachbal riqꞌuin li mayejac xul chi moco riqꞌuin lix mayejeb, chan li Ka̱cuaꞌ. 15 Laj Samuel quicana saꞌ xcuarib toj quisake̱u. Tojoꞌnak quicuacli ut quixte li oqueba̱l re li tabernáculo. Abanan quixucuac ut incꞌaꞌ quixye re laj Elí cꞌaꞌru quicꞌutbesi̱c chiru xban li Ka̱cuaꞌ. 16 Joꞌcan nak laj Elí quixbok laj Samuel ut quixye re: —At Samuel.— Ut laj Samuel quixye: —Cueꞌquin, chan. 17 Laj Elí quixye: —¿Cꞌaꞌru xye a̱cue li Ka̱cuaꞌ? Ma̱muk chicuu li cꞌaꞌru quixye. Li Dios taxak ta̱qꞌuehok a̱cue chixtojbal a̱ma̱c cui incꞌaꞌ ta̱ye cue chixjunil li quixye a̱cue, chan. 18 Joꞌcan nak laj Samuel quixye re chixjunil li quixye li Ka̱cuaꞌ. Ma̱cꞌaꞌ quixmuk chiru. Ut laj Elí quixye: —Li Ka̱cuaꞌ, aꞌan li nimajcual Dios. Chixba̱nu taxak li cꞌaꞌru naxcꞌoxla nak us xba̱nunquil, chan. 19 Laj Samuel quiniman ut li Ka̱cuaꞌ cuan riqꞌuin ut aꞌan yo̱ chi tenkꞌa̱nc re. Ut quicꞌulman chixjunil joꞌ quixye laj Samuel. 20 Ut chixjunileb laj Israel li cuanqueb saꞌ li naꞌajej Dan toj saꞌ li naꞌajej Beerseba queꞌxqꞌue retal nak laj Samuel, aꞌan tzꞌakal xprofeta li Ka̱cuaꞌ. 21 Ut li Ka̱cuaꞌ quixcꞌutbesi cuiꞌchic rib chiru laj Samuel saꞌ li naꞌajej Silo bar naa̱tinac cuiꞌ li Ka̱cuaꞌ riqꞌuin. |
© 2019, Wycliffe Bible Translators. All rights reserved.
Wycliffe Bible Translators, Inc.