1 Samuel 29 - Li Santil hu

¹ Eb laj filisteo queꞌxchꞌutub lix solda̱deb aran Afec ut eb laj Israel cuanqueb aran Jezreel cuan cuiꞌ li yuꞌam haꞌ.

² Yo̱queb chi numecꞌ chi ubej eb li nequeꞌcꞌamoc be saꞌ xbe̱neb laj filisteo. Queꞌco̱eb chi pletic chi chꞌu̱tal. Cuanqueb chꞌu̱tal jun mil lix solda̱deb. Ut cuanqueb ajcuiꞌ jun ciento lix solda̱deb. Laj David rochbeneb lix soldados yo̱queb chi xic chirixeb rochben laj Aquis.

³ Eb li nequeꞌtaklan saꞌ xbe̱neb laj filisteo queꞌxye re laj Aquis: —¿Cꞌaꞌru yo̱queb laj hebreo saꞌ kaya̱nk la̱o? chanqueb. Laj Aquis quixye reheb: —Aꞌin laj David, jun li xtaklan saꞌ xya̱nkeb lix soldados laj Saúl. Junxil na-oc cuiqꞌuin. Ma̱cꞌaꞌ xpaltil chicuu chalen xchalic cuiqꞌuin toj chalen anakcuan, chan.

⁴ Eb laj filisteo queꞌjoskꞌoꞌ riqꞌuin laj Aquis ut queꞌxye re: —Taklaheb cuiꞌchic saꞌ li naꞌajej li xaqꞌue reheb. Incꞌaꞌ teꞌxic chi pletic kochben. Ma̱re anchal aꞌan chic teꞌsukꞌi̱k chak saꞌ kabe̱n nak yo̱ko chi pletic. ¿Ma incꞌaꞌ ta biꞌ ta̱sahokꞌ cuiꞌchic xchꞌo̱l laj Saúl riqꞌuin cui toxcamsi la̱o? chanqueb.

⁵ Cꞌoxla chi us. ¿Ma ma̱cuaꞌ ta biꞌ chirix aꞌan queꞌxajoc eb li ixk ut queꞌbichan nak queꞌxye, “Laj Saúl xcamsiheb jun mil li cui̱nk; abanan laj David xcamsiheb laje̱b mil”? chanqueb.

⁶ Ut laj Aquis quixbok laj David riqꞌuin ut quixye re: —Saꞌ xcꞌabaꞌ li yoꞌyo̱quil Dios, la̱in ninye a̱cue nak la̱at ti̱c a̱chꞌo̱l. Ma̱cꞌaꞌ a̱paltil chicuu chalen nak xatcꞌulun cuiqꞌuin. Nacuaj raj nak tatxic chicuix saꞌ li ple̱t aꞌin. Abanan eb li nequeꞌtaklan saꞌ xbe̱neb li soldados incꞌaꞌ nequeꞌraj nak tatxic kochben.

⁷ Joꞌcan nak nintzꞌa̱ma cha̱cuu nak tatsukꞌi̱k cuiꞌchic saꞌ la̱ naꞌaj saꞌ usilal. Incꞌaꞌ nacuaj nak eb li nequeꞌcꞌamoc be saꞌ xya̱nkeb li soldado teꞌxic chi pletic chi incꞌaꞌ sa saꞌ xchꞌo̱leb, chan.

⁸ Laj David quixye re: —At rey, ¿cꞌaꞌru incꞌaꞌ us xinba̱nu? ¿Cꞌaꞌru inma̱c cha̱cuu nak incꞌaꞌ ta̱ru̱k tinxic cha̱cuix chi pletic? chan.

⁹ Laj Aquis quixye re: —La̱in ninnau nak la̱at cha̱bilat. Chanchanat jun x-ángel li Dios. Abanan eb li nequeꞌtaklan xeꞌxye nak incꞌaꞌ naru texxic chikix saꞌ li ple̱t.

¹⁰ Joꞌcan nak tatcuacli̱k ekꞌela cuulaj ut tatsukꞌi̱k la̱at a̱cuochbeneb chixjunileb li cui̱nk li xeꞌel riqꞌuin laj Saúl, chan.

¹¹ Cuulajak chic nak toj ekꞌela, laj David ut eb li cuanqueb rochben, queꞌcuacli ut queꞌsukꞌi cuiꞌchic saꞌ xtenamiteb laj filisteo. Ut eb laj filisteo queꞌco̱eb Jezreel.