1 Samuel 28 - Li Santil hu

¹ Saꞌ jun li cutan eb lix solda̱deb laj filisteo queꞌxchꞌutub ribeb re teꞌxic chi pletic riqꞌuineb laj Israel. Laj Aquis quixye re laj David: —Tento nak la̱at ut eb la̱ soldados texxic chikix chi pletic, chan.

² Laj David quixye: —Matcꞌoxlac. La̱o aj cꞌanjel cha̱cuu. La̱at ta̱cuil cꞌaꞌru takaba̱nu, chan. Laj Aquis quixye re: —Tatinxakab chokꞌ aj cꞌamol be chiruheb li nequeꞌcꞌacꞌalen cue, chan.

³ Laj Samuel ac quicam ut eb laj Israel queꞌrahoꞌ xchꞌo̱leb ut queꞌya̱bac chirix. Aran Ramá queꞌxmuk saꞌ lix tenamit. Ut laj Saúl ac xrisiheb aran Judá eb laj kꞌe ut eb laj ilonel.

⁴ Nak queꞌxchꞌutub ribeb laj filisteo, queꞌco̱eb ut queꞌxyi̱b lix muheba̱leb aran Sunem. Ut laj Saúl quixchꞌutubeb laj Israel ut queꞌxyi̱b lix muheba̱leb aran Gilboa.

⁵ Nak laj Saúl quiril lix muheba̱leb laj filisteo, cꞌajoꞌ nak quixucuac ut qui-oc xcꞌaꞌux.

⁶ Laj Saúl quixpatzꞌ re li Dios cꞌaꞌru tixba̱nu. Abanan li Dios incꞌaꞌ chic quixsume chi moco saꞌ xmatcꞌ, chi moco riqꞌuin li Urim, chi moco xbaneb li profetas.

⁷ Laj Saúl quixbokeb li nequeꞌtaklan saꞌ xbe̱neb lix soldados. Quixye reheb: —Sicꞌomak chak junak li ixk aj kꞌe ut la̱in tinxic chi a̱tinac riqꞌuin aꞌan, chan. Eb li cui̱nk queꞌxye re: —Cuan jun li ixk aj kꞌe aran Endor li naxnau kꞌehi̱nc, chanqueb.

⁸ Laj Saúl jalan li rakꞌ li quixqꞌue chirix. Aꞌan quiraj nak incꞌaꞌ ta̱naꞌekꞌ ru. Ut quixcꞌam chirix cuib li cui̱nk nak co̱ chi kꞌek chirilbal li ixk. Quixye re: —Nacuaj nak tat-a̱tinak riqꞌuineb li musikꞌej re nak ta̱ye cue cꞌaꞌru ta̱cꞌulma̱nk. Ta̱bok lix musikꞌ li cui̱nk li tinye a̱cue, chan.

⁹ Li ixk quixye re: —La̱at nacanau nak li rey Saúl quirisiheb chixjunileb laj kꞌe saꞌ li naꞌajej aꞌin. ¿Cꞌaꞌru yo̱cat chixba̱nunquil? ¿Cꞌaꞌut nak yo̱cat chinqꞌuebal saꞌ chꞌaꞌajquilal? ¿Ma ta̱cuaj nak tineꞌxcamsi? chan.

¹⁰ Laj Saúl quixye re: —Saꞌ xcꞌabaꞌ li nimajcual Dios, la̱in ninye a̱cue nak ma̱ jun raylal ta̱cha̱lk saꞌ a̱be̱n cui ta̱ba̱nu li cꞌaꞌru nintzꞌa̱ma cha̱cuu, chan.

¹¹ Li ixk quixye re: —¿Ani ta̱cuaj tinbok xmusikꞌ? chan. Laj Saúl quixye re: —Nacuaj nak ta̱bok xmusikꞌ laj Samuel, chan.

¹² Nak li ixk quiril laj Samuel, quixjap re xban xxiu ut quixye:

¹³ —¿Cꞌaꞌut nak xina̱balakꞌi? La̱at li rey Saúl, chan. Laj Saúl quixye re: —Matxucuac. Ye cue cꞌaꞌru yo̱cat chirilbal, chan. Li ixk quixye: —Nacuil jun chanchan dios yo̱ chi e̱lc saꞌ chꞌochꞌ, chan.

¹⁴ Laj Saúl quixye: —¿Chanru na-iloc? chan. Li ixk quixye: —Aꞌan jun ti̱xil cui̱nk. Cuan jun xtꞌicr najt rok chirix, chan. Ut laj Saúl saꞌ junpa̱t quixnau nak aꞌan laj Samuel ut quixcuikꞌib rib saꞌ chꞌochꞌ re xqꞌuebal xlokꞌal.

¹⁵ Laj Samuel quixye re laj Saúl: —¿Cꞌaꞌut nak yo̱cat chinchꞌiꞌchꞌiꞌinquil? ¿Cꞌaꞌut nak xina̱bok arin? chan. Laj Saúl quixye: —Cꞌajoꞌ li raylal yo̱quin chixcꞌulbal. Eb laj filisteo yo̱queb chi pletic cuiqꞌuin. Ut li Dios xinixtzꞌekta̱na. Incꞌaꞌ chic naxsume lin tij, chi moco saꞌ inmatcꞌ, chi moco xbaneb li profetas. Joꞌcan nak xatinbok re nak ta̱ye cue cꞌaꞌru tinba̱nu, chan laj Saúl.

¹⁶ Laj Samuel quixye re: —¿Cꞌaꞌut nak nacapatzꞌ cue cꞌaꞌru ta̱ba̱nu? Li Ka̱cuaꞌ ac xatxcanab a̱junes ut xicꞌ chic nacatril.

¹⁷ Li Ka̱cuaꞌ yo̱ chixba̱nunquil li cꞌaꞌru quixye nak tixba̱nu joꞌ xinye a̱cue la̱in. Li Ka̱cuaꞌ xrisi la̱ cuanquil ut xqꞌue re laj David li quicuan chokꞌ a̱cuochben.

¹⁸ La̱at incꞌaꞌ xaba̱nu li quixye a̱cue nak yo̱ xjoskꞌil saꞌ xbe̱neb laj Amalec. Xakꞌet ban li ra̱tin. Joꞌcan nak li Ka̱cuaꞌ xrisi la̱ cuanquil anakcuan.

¹⁹ Li Ka̱cuaꞌ tatxkꞌaxtesi la̱at ut eb laj Israel saꞌ rukꞌeb laj filisteo. Cuulaj la̱at ut eb la̱ cualal cua̱nkex arin cuiqꞌuin. Ut li Ka̱cuaꞌ tixcanabeb li soldados laj Israel saꞌ rukꞌeb laj filisteo, chan.

²⁰ Usta kꞌaxal nim, abanan quixucuac laj Saúl nak quirabi li cꞌaꞌru quixye laj Samuel. Quitꞌaneꞌ saꞌ chꞌochꞌ. Ma̱cꞌaꞌ chic xmetzꞌe̱u xban nak incꞌaꞌ quicuaꞌac chiru li cutan aꞌan ut chiru li kꞌojyi̱n.

²¹ Li ixk quinachꞌoc riqꞌuin ut quiril nak ma̱cꞌaꞌ chic xmetzꞌe̱u xban xxiu. Quixye re: —At rey, la̱in xinba̱nu li cꞌaꞌru xaye cue, usta naru tincamsi̱k xban.

²² Joꞌcan nak nintzꞌa̱ma cha̱cuu nak ta̱ba̱nu li cꞌaꞌru tinye a̱cue. Tinqꞌue caꞌchꞌinak a̱tzacae̱mk re nak ta̱cua̱nk a̱metzꞌe̱u chi sukꞌi̱c, chan.

²³ Laj Saúl incꞌaꞌ raj quiraj cuaꞌac. Abanan eb li rochben queꞌxye re nak tento ta̱cuaꞌak. Joꞌcan nak quicuacli ut quichunla saꞌ li cuarib.

²⁴ Li ixk aꞌan cuan jun li cuacax toj sa̱j riqꞌuin ut nim xtibel. Quixcamsi ut quixcꞌu̱b. Quixchap li cꞌaj ut quixyi̱b ajcuiꞌ li caxlan cua ma̱cꞌaꞌ xchꞌamal.

²⁵ Quixqꞌue li tzacae̱mk reheb laj Saúl ut eb li cuanqueb rochben ut queꞌxtzaca. Nak queꞌrakeꞌ chi cuaꞌac, queꞌco̱eb chiru li kꞌojyi̱n aꞌan.