1 Samuel 26 - Li Santil hu

¹ Eb li cui̱nk li cuanqueb saꞌ li tenamit Zif queꞌco̱eb cuiꞌchic riqꞌuin laj Saúl ut queꞌxye re nak laj David mukmu saꞌ li tzu̱l Haquila saꞌ li chaki chꞌochꞌ li cuan saꞌ li na-el cuiꞌ li sakꞌe.

² Laj Saúl quixsicꞌ ruheb oxib mil lix soldados ut queꞌco̱eb saꞌ junpa̱t chixsicꞌbal laj David saꞌ li chaki chꞌochꞌ aran Zif.

³ Queꞌxyi̱b lix muheba̱leb chire be saꞌ li tzu̱l Haquila chire li chaki chꞌochꞌ. Ut laj David quixqꞌue retal nak laj Saúl yo̱ chixsicꞌbal saꞌ li chaki chꞌochꞌ.

⁴ Laj David quixtaklaheb aj qꞌuehol etal ut queꞌril nak relic chi ya̱l laj Saúl cuan aran.

⁵ Laj David co̱ saꞌ li naꞌajej li cuanqueb cuiꞌ lix muheba̱leb laj Saúl ut quixsiqꞌui bar yo̱ chi cua̱rc laj Saúl ut laj Abner li ralal laj Ner. Laj Abner, aꞌan li nataklan saꞌ xbe̱neb li soldados. Laj Saúl yo̱ chi cua̱rc saꞌ xyi ut eb lix soldados yo̱queb chi cua̱rc chi xjun sutam.

⁶ Rochbeneb laj David cuanqueb laj Ahimelec aj heteo ut laj Abisai, lix yum lix Sarvia. Laj Abisai, aꞌan li ri̱tzꞌin laj Joab. Laj David quixye reheb: —¿Ani e̱re ta̱xic chicuix saꞌ lix muheba̱l laj Saúl? chan. —La̱in tinxic cha̱cuix, chan laj Abisai.

⁷ Chiru li kꞌojyi̱n aꞌan laj David ut laj Abisai queꞌco̱eb saꞌ lix muheba̱l laj Saúl. Laj Saúl yo̱ chi cua̱rc ut lix la̱ns xakxo saꞌ chꞌochꞌ chixcꞌatk xjolom. Laj Abner ut lix soldados yo̱queb chi cua̱rc chi xjun sutam.

⁸ Laj Abisai quixye re laj David: —Anakcuan li Dios xkꞌaxtesi saꞌ a̱cuukꞌ li xicꞌ na-iloc a̱cue. Anakcuan china̱canab chixcamsinquil riqꞌuin lix la̱ns. Jun sut ajcuiꞌ tincut li la̱ns ut tinxekꞌ saꞌ chꞌochꞌ, chan.

⁹ Abanan laj David quixye re: —Ma̱camsi aꞌan. ¿Cꞌaꞌut nak ta̱camsi li rey li quisiqꞌueꞌ ru xban li Ka̱cuaꞌ? Cuan a̱ma̱c cui ta̱camsi aꞌan, chan.

¹⁰ Ut quixye ajcuiꞌ laj David: —Saꞌ xcꞌabaꞌ li yoꞌyo̱quil Dios la̱in ninye nak li Ka̱cuaꞌ ta̱qꞌuehok re chi ca̱mc. Nak ta̱cuulak xkꞌehil, laj Saúl ta̱ca̱mk. Ma̱re xban yajel malaj ut ta̱camsi̱k saꞌ ple̱t.

¹¹ Li Ka̱cuaꞌ Dios taxak chitenkꞌa̱nk cue re nak incꞌaꞌ tinba̱nu raylal re li sicꞌbil ru xban li Dios. Anakcuan takacꞌam chikix lix la̱ns li cuan saꞌ xjolom ut takacꞌam ajcuiꞌ lix su li cuan haꞌ chi saꞌ, chan laj David.

¹² Laj David ut laj Abisai queꞌxcꞌam lix la̱ns ut queꞌxcꞌam ajcuiꞌ xnaꞌaj lix haꞌ ut queꞌco̱eb. Ma̱ ani qui-iloc reheb. Ut ma̱ ani qui-abin reheb. Ma̱ ani qui-aj ru xban nak li Ka̱cuaꞌ Dios quixcuartesiheb.

¹³ Laj David co̱ jun pacꞌal li ru takꞌa toj saꞌ xbe̱n li tzu̱l najt riqꞌuin laj Saúl.

¹⁴ Ut quixjap re ut quixye reheb lix soldado laj Saúl: —At Abner, ¿ma nacacuabi li yo̱quin chixyebal e̱re? chan. Ut laj Abner quixye: —¿Anihat la̱at nak nacajap chak a̱cue saꞌ xbe̱n li rey? chan.

¹⁵ Laj David quixye re: —At Abner, ¿ma ma̱cuaꞌ ta biꞌ la̱at li kꞌaxal cau a̱cuib chi pletic saꞌ xya̱nkeb chixjunileb li cui̱nk aj Israel? ¿Cꞌaꞌut nak incꞌaꞌ yo̱cat chixcolbal rix li rey? Cuanqueb li xeꞌoc saꞌ lix muheba̱l re raj teꞌxcamsi li rey.

¹⁶ Incꞌaꞌ us li xaba̱nu. Saꞌ xcꞌabaꞌ li Dios ninye e̱re nak e̱cꞌulub ca̱mc, la̱at joꞌqueb ajcuiꞌ la̱ soldados xban nak incꞌaꞌ yo̱quex chixcolbal rix li rey li sicꞌbil ru xban li Dios. Qꞌuehomak retal. ¿Bar cuan lix la̱ns li rey ut lix naꞌaj lix haꞌ li cuan saꞌ xjolom li rey? Sicꞌomak ut te̱ril ma te̱tau, chan.

¹⁷ Laj Saúl quirabi nak yo̱ chi a̱tinac laj David ut quixnau nak aꞌan xya̱b xcux. Quixye: —¿Ma ma̱cuaꞌat ta biꞌ la̱at, at David, li yo̱cat chi a̱tinac? chan. Laj David quixye re: —At rey, ya̱l li xaye. La̱in laj David, chan.

¹⁸ Ut quixye ajcuiꞌ re: —At rey, ¿cꞌaꞌut nak toj yo̱cat chinsicꞌbal re tina̱camsi? ¿Cꞌaꞌru inma̱c cha̱cuu? ¿Cꞌaꞌru li incꞌaꞌ us xinba̱nu a̱cue?

¹⁹ At rey, chacuabi taxak li cꞌaꞌru tinye, la̱in aj cꞌanjel cha̱cuu. Cui li Ka̱cuaꞌ quixye a̱cue nak xicꞌ chic tina̱cuil, us raj tixcꞌu̱luban ta junak mayej re nak tixjal xcꞌaꞌux. Abanan, cui ut yal cui̱nk li yo̱queb chi yehoc a̱cue nak ta̱ba̱nu raylal cue, aꞌ taxak li Ka̱cuaꞌ chimajecua̱nk reheb xban nak xineꞌrisi saꞌ lin tenamit bar nequeꞌxlokꞌoni cuiꞌ li Ka̱cuaꞌ. Ut yo̱queb chintaklanquil re nak tinlokꞌoni li jalanil dios.

²⁰ La̱in incꞌaꞌ nacuaj ca̱mc saꞌ jalan naꞌajej bar incꞌaꞌ nequeꞌxlokꞌoni cuiꞌ li tzꞌakal Dios. At rey, ¿cꞌaꞌut nak yo̱cat chinsicꞌbal joꞌ nak nasiqꞌueꞌ junak li cꞌak? Ut, ¿cꞌaꞌut nak yo̱cat chinsicꞌbal joꞌ nak nequeꞌxsicꞌ li xul li nequeꞌrupupic saꞌ qꞌuicheꞌ?—

²¹ Ut laj Saúl quixye re: —At David, at cualal, sukꞌin chak cuiqꞌuin. Ma̱cꞌaꞌ tinba̱nu a̱cue xban nak incꞌaꞌ xina̱camsi anakcuan. Ma̱cꞌaꞌ innaꞌleb. Incꞌaꞌ us li xinba̱nu, chan laj Saúl.

²² Laj David quixye re: —At rey, cueꞌ la̱ la̱ns. Naru nacatakla chak junak la̱ soldado re tixxoc.

²³ Li Ka̱cuaꞌ naxkꞌajca̱mu li junju̱nk riqꞌuin li ti̱quilal ut li usilal li naxba̱nu. Anakcuan li Ka̱cuaꞌ xatxkꞌaxtesi saꞌ cuukꞌ, abanan la̱in incꞌaꞌ xcuaj a̱camsinquil xban nak la̱at li sicꞌbil a̱cuu xban li Dios.

²⁴ Joꞌ nak la̱in xcuil xtokꞌoba̱l a̱cuu la̱at ut incꞌaꞌ xatincamsi anakcuan, joꞌcan ajcuiꞌ nak li Ka̱cuaꞌ taxak ta̱ril xtokꞌoba̱l cuu la̱in ut tinixcol taxak ajcuiꞌ chiru li raylal li nachal saꞌ inbe̱n, chan.

²⁵ Laj Saúl quixye re: —At David, osobtesinbilat taxak xban li Dios. La̱in ninnau nak us tat-e̱lk riqꞌuin li cꞌaꞌru ta̱ba̱nu, chan. Chirix aꞌan laj Saúl quisukꞌi saꞌ rochoch ut laj David co̱ cuiꞌchic.