1 Samuel 24 - Li Santil hu

¹ Nak quirakeꞌ chi pletic riqꞌuineb laj filisteo, quiyeheꞌ resil re laj Saúl nak laj David cuan saꞌ li chaki chꞌochꞌ aran En-gadi.

² Laj Saúl quixsiqꞌueb ru oxib mil chi cui̱nk saꞌ xya̱nkeb laj Israel ut queꞌco̱eb chixsicꞌbal laj David ut eb li cuanqueb rochben saꞌ xya̱nkeb li pec li nequeꞌcuan cuiꞌ li yuc.

³ Yo̱queb chi numecꞌ saꞌ jun li naꞌajej cuanqueb cuiꞌ xcorral li carner. Cuan jun li ochoch pec aran. Laj Saúl qui-oc saꞌ li ochoch pec chixtzꞌekbal rib. Ut saꞌ li ochoch pec aꞌan mukmu̱queb laj David ut eb li cui̱nk li cuanqueb rochben. Toj chi saꞌ cuanqueb chak.

⁴ Eb li rochben queꞌxye re laj David: —Li Ka̱cuaꞌ quixye a̱cue nak tixkꞌaxtesi saꞌ a̱cuukꞌ li xicꞌ na-iloc a̱cue ut ta̱ba̱nu li cꞌaꞌru ta̱cuaj riqꞌuin. Anakcuan xcuulac xkꞌehil li cutan aꞌan, chanqueb. Timil timil laj David quinachꞌoc riqꞌuin laj Saúl ut quixset caꞌchꞌin li rakꞌ ut laj Saúl incꞌaꞌ quixqꞌue retal.

⁵ Abanan quiyotꞌeꞌ xchꞌo̱l nak quixset jun peda̱s li rakꞌ laj Saúl.

⁶ Joꞌcan nak quixye reheb lix soldado: —Li Ka̱cuaꞌ taxak ta̱tenkꞌa̱nk cue re nak incꞌaꞌ tinba̱nu raylal re lin rey. Aꞌan cuan chokꞌ rey xban nak li Ka̱cuaꞌ quisicꞌoc ru, chan.

⁷ Ut laj David quixkꞌuseb chi cau lix soldados re nak ma̱cꞌaꞌ teꞌxba̱nu re laj Saúl. Joꞌcan nak laj Saúl qui-el saꞌ li ochoch pec ut qui-oc cuiꞌchic chi xic.

⁸ Laj David qui-el chak saꞌ li ochoch pec ut quixjap re chixyebal re laj Saúl: —At rey, chan. Ut laj Saúl qui-iloc chirix ut laj David quixcuikꞌib rib chiru re xcꞌutbal nak naxqꞌue xlokꞌal.

⁹ Laj David quixye re: —¿Cꞌaꞌut nak nacapa̱b li cꞌaꞌru nequeꞌxye li cui̱nk li nequeꞌxye nak tincuaj xba̱nunquil ma̱usilal a̱cue?

¹⁰ Qꞌue retal. Li Ka̱cuaꞌ xatxkꞌaxtesi saꞌ cuukꞌ anakcuan arin saꞌ li ochoch pec. Cuanqueb li xeꞌxye cue nak tatincamsi. Abanan xincuy a̱ma̱c ut xinye reheb nak ma̱cꞌaꞌ tinba̱nu a̱cue, at rey, xban nak la̱at li sicꞌbil a̱cuu xban li Dios.

¹¹ At inrey, il li tꞌicr li cuan saꞌ cuukꞌ. Aꞌan jun peda̱s la̱ cuakꞌ li xinset nak cuancat saꞌ li ochoch pec re xcꞌutbal cha̱cuu nak xru raj xatincamsi. Joꞌcan nak ta̱qꞌue retal nak la̱in incꞌaꞌ tinba̱nu raylal a̱cue. Chi moco tatintzꞌekta̱na. La̱at ban ta̱cuaj incamsinquil.

¹² Aꞌ taxak li Ka̱cuaꞌ chiyehok re ani cuan xma̱c, ma la̱in malaj ut la̱at. Aꞌan taxak ta̱qꞌuehok a̱cue chixtojbal a̱ma̱c xban nak yo̱cat xba̱nunquil raylal cue. Abanan la̱in ma̱cꞌaꞌ tinba̱nu a̱cue.

¹³ Cuan jun li naꞌleb queꞌxye li kaxeꞌto̱nil yucuaꞌ. “Eb li incꞌaꞌ useb xnaꞌleb, aꞌaneb li nequeꞌba̱nun ma̱usilal”, chanqueb. Joꞌcan nak la̱in ma̱cꞌaꞌ tinba̱nu a̱cue.

¹⁴ At rey, ¿cꞌaꞌut nak yo̱cat chinsicꞌbal? ¿Cꞌaꞌut nak ta̱cuaj incamsinquil? La̱in ma̱cꞌaꞌ nin-oc cuiꞌ. La̱in chanchanin jun li tzꞌiꞌ ca̱mc re. Malaj ut chanchanin jun li cꞌak.

¹⁵ Li Ka̱cuaꞌ, aꞌan li ta̱rakok a̱tin saꞌ kabe̱n saꞌ cuibal. Li Ka̱cuaꞌ naril xtokꞌoba̱l cuu. Aꞌan li natenkꞌan cue ut aꞌan ajcuiꞌ li ta̱colok cue cha̱cuu la̱at, chan laj David.

¹⁶ Nak quirakeꞌ chi a̱tinac laj David, laj Saúl quixye: —At David, at cualal, ¿ma la̱at li yo̱cat chi a̱tinac? chan. Ut qui-oc chi ya̱bac laj Saúl nak quirabi xya̱b xcux laj David.

¹⁷ Ut quixye ajcuiꞌ re: —Ya̱l ajcuiꞌ li nacaye. La̱in cuan inma̱c. Saꞌ xya̱lal cuancat cuiqꞌuin. Ut la̱in incꞌaꞌ us li ninba̱nu a̱cue.

¹⁸ Anakcuan xacꞌut chicuu nak cuancat saꞌ usilal cuiqꞌuin. Li Ka̱cuaꞌ xinixkꞌaxtesi saꞌ a̱cuukꞌ, abanan incꞌaꞌ xina̱camsi.

¹⁹ Cui junak cui̱nk naxchap li xicꞌ na-iloc re, ¿ma tixcanab ta biꞌ chi yoꞌyo chi incꞌaꞌ tixcamsi? Li Ka̱cuaꞌ Dios taxak chi qꞌuehoc re̱kaj li usilal xaba̱nu cue anakcuan.

²⁰ Anakcuan ninnau chi tzꞌakal nak la̱at tat-oc chokꞌ xrey eb laj Israel ut saꞌ a̱cꞌabaꞌ la̱at ta̱xakli̱k xcuanquil li tenamit Israel.

²¹ Caꞌaj cuiꞌ nintzꞌa̱ma cha̱cuu. Ba̱nu li juramento ut ye cue nak incꞌaꞌ ta̱camsiheb li cualal incꞌajol. Incꞌaꞌ taxak ta̱sachekꞌ lin cꞌabaꞌ chi moco lix cꞌabaꞌ lin yucuaꞌ, chan laj Saúl.

²² Ut laj David quixba̱nu li juramento ut quixye nak incꞌaꞌ tixcamsiheb li ralal xcꞌajol laj Saúl. Chirix aꞌan laj Saúl quisukꞌi saꞌ rochoch ut laj David ut eb li cuanqueb rochben queꞌco̱eb cuiꞌchic saꞌ li naꞌajej li nequeꞌxmuk cuiꞌ ribeb.