1 Samuel 23 - Li Santil hu

¹ Saꞌ jun li cutan laj David quirabi resil nak eb laj filisteo yo̱queb chi pletic riqꞌuineb li cuanqueb saꞌ li tenamit Keila. Ut yo̱queb chixmakꞌbal chiruheb lix trigo li tojeꞌ xeꞌrisi saꞌ rix.

² Laj David quitijoc ut quixye re li Dios: —¿Ma tinxic chi pletic riqꞌuineb laj filisteo malaj ut incꞌaꞌ? chan. Ut li Ka̱cuaꞌ quixye re: —Ayu. Pletin chak riqꞌuineb laj filisteo ut ta̱coleb li cuanqueb aran Keila, chan.

³ Abanan eb li cui̱nk li cuanqueb rochben laj David queꞌxye re: —La̱o nocoxucuac nak cuanco arin Judá. ¿Ma tojaꞌ ta chic incꞌaꞌ toxucuak chiruheb laj filisteo cui toxic chixtenkꞌanquileb laj Keila? chanqueb.

⁴ Joꞌcan nak laj David co̱ cuiꞌchic chi tijoc chiru li Ka̱cuaꞌ re xnaubal ma ta̱xic Keila chi pletic riqꞌuineb laj filisteo, malaj ut incꞌaꞌ. Ut li Ka̱cuaꞌ quixye re: —Ayu chi pletic riqꞌuineb laj filisteo xban nak la̱in tinkꞌaxtesiheb saꞌ a̱cuukꞌ, chan.

⁵ Laj David rochbeneb lix soldados queꞌco̱eb Keila ut queꞌxcamsiheb nabal laj filisteo ut queꞌre̱chani lix cuacax. Chi joꞌcaꞌin quixcoleb li tenamit Keila chiruheb laj filisteo.

⁶ Nak laj Abiatar li ralal laj Ahimelec quie̱lelic chiru laj Saúl, quixcꞌam li efod chirix. Ut quixcꞌam ajcuiꞌ chirix nak co̱ riqꞌuin laj David aran Keila.

⁷ Laj Saúl quirabi nak laj David co̱ Keila ut quixye: —Li Dios xkꞌaxtesi saꞌ cuukꞌ laj David xban nak x-oc saꞌ jun tenamit sutsu saꞌ tzꞌac. Ut li oqueba̱l re li tenamit tzꞌaptzꞌo chi us, chan.

⁸ Ut quixtakla xchꞌutubanquil lix soldados re teꞌxsut rix li tenamit Keila ut teꞌpletik riqꞌuin laj David ut riqꞌuineb li cuanqueb rochben.

⁹ Nak laj David quirabi nak laj Saúl ta̱cha̱lk chi pletic riqꞌuin, quixye re laj Abiatar laj tij: —Cꞌam chak li efod, chan.

¹⁰ Laj David quitijoc ut quixye: —At Ka̱cuaꞌ, la̱at li kaDios la̱o aj Israel. Xcuabi resil nak laj Saúl ta̱cha̱lk chixsachbal li tenamit Keila saꞌ incꞌabaꞌ la̱in.

¹¹ ¿Ma tineꞌxkꞌaxtesi saꞌ rukꞌ laj Saúl eb li cuanqueb Keila? ¿Ma ya̱l nak ta̱cha̱lk laj Saúl? At Ka̱cuaꞌ, at kaDios la̱o aj Israel, nintzꞌa̱ma cha̱cuu nak ta̱sume taxak intij, chan. Ut li Ka̱cuaꞌ quixye re: —Laj Saúl ta̱cha̱lk, chan.

¹² Ut laj David quixye cuiꞌchic: —Ut eb li cuanqueb Keila, ¿ma tineꞌxkꞌaxtesi saꞌ rukꞌ laj Saúl la̱in joꞌ eb ajcuiꞌ li cui̱nk li cuanqueb cuochben? chan. Ut li Ka̱cuaꞌ quixye re: —Eb aꞌan texkꞌaxtesiheb saꞌ rukꞌ laj Saúl, chan.

¹³ Joꞌcan nak laj David ut eb li cuanqueb rochben queꞌel Keila ut queꞌxbeni ribeb yalak bar. Cuakib ciento (600) ta na li cuanqueb rochben laj David. Nak laj Saúl quirabi nak ac x-el Keila laj David, quixjal xcꞌaꞌux ut incꞌaꞌ chic co̱ Keila.

¹⁴ Laj David quicana chi cua̱nc saꞌ li chaki chꞌochꞌ saꞌ jun li tzu̱l aran Zif. Rajlal cutan laj Saúl quixsicꞌ laj David. Abanan li Dios incꞌaꞌ quixkꞌaxtesi saꞌ rukꞌ.

¹⁵ Laj David quixqꞌue retal nak yo̱ xsicꞌbal xban laj Saúl re xcamsinquil. Joꞌcan nak junes aj chic saꞌ li naꞌajej Hores nacuan saꞌ li chaki chꞌochꞌ Zif.

¹⁶ Saꞌ jun li cutan laj Jonatán, li ralal laj Saúl, co̱ chirilbal laj David aran Zif saꞌ li naꞌajej Hores. Quixqꞌue xcacuil xchꞌo̱l saꞌ xcꞌabaꞌ li Ka̱cuaꞌ.

¹⁷ Quixye re: —Matxucuac, at David. Lin yucuaꞌ, laj Saúl, incꞌaꞌ tatxtau. La̱at tat-oc chokꞌ xreyeb laj Israel. Ut la̱inak li xcabil chi takla̱nc. Laj Saúl lin yucuaꞌ ac naxnau aꞌan, chan.

¹⁸ Ut chi xcabichaleb queꞌxye cuiꞌchic chiru li Ka̱cuaꞌ nak junelic teꞌxra ribeb. Ut laj David quicana aran saꞌ li naꞌajej Hores li cuan Zif. Ut laj Jonatán co̱ cuiꞌchic saꞌ rochoch.

¹⁹ Eb li cristian li cuanqueb Zif queꞌco̱eb aran Gabaa chirilbal laj Saúl. Queꞌxye re: —Laj David mukmu saꞌ li kanaꞌaj aran Hores saꞌ li tzu̱l Haquila li cuan saꞌ li sur saꞌ li chaki chꞌochꞌ re Judá.

²⁰ At rey, la̱o nakanau nak ta̱cuaj xchapbal laj David. Yoꞌo saꞌ li katenamit ut takakꞌaxtesi saꞌ a̱cuukꞌ, chanqueb.

²¹ Laj Saúl quixye reheb: —Aꞌ taxak li Ka̱cuaꞌ chi-osobtesi̱nk e̱re xban nak xeril xtokꞌoba̱l cuu nak xeye cue.

²² Ayukex ut tzꞌilomak a̱tin chirix re te̱nau chi tzꞌakal bar cuan ut ani xeꞌiloc re. Xcuabi resil nak kꞌaxal cuan xnaꞌleb chixcolbal rib.

²³ Qꞌuehomak retal chi us bar cuanqueb li naꞌajej li naxmuk cuiꞌ rib. Texcha̱lk cuiꞌchic chi junpa̱t ut te̱ye cue cꞌaꞌru xerabi. Ut la̱in tinxic che̱rix cui toj cuan aran ut tinsiqꞌui toj retal tintau usta tinsiqꞌui saꞌ chixjunil li naꞌajej Judá, chan.

²⁴ Eb li cuanqueb saꞌ li tenamit Zif queꞌel xbe̱n cua chiru laj Saúl. Ut laj David ut eb li cuanqueb rochben cuanqueb saꞌ li chaki chꞌochꞌ aran Maón xcue̱nt Arabá li cuan saꞌ li sur.

²⁵ Laj Saúl rochbeneb lix soldados queꞌco̱eb chixsicꞌbal laj David. Laj David quirabi resil nak yo̱queb chi cha̱lc, ut co̱ saꞌ li chaki chꞌochꞌ aran Maón, li tzu̱l ru ut quixmuk rib saꞌ xya̱nk li pec. Ut laj Saúl co̱ chixsicꞌbal laj David.

²⁶ Laj Saúl ut eb lix soldados yo̱queb chi xic jun pacꞌal li tzu̱l ut laj David ut li cuanqueb rochben yo̱queb chi xic saꞌ li pacꞌal jun chic. Laj David yo̱ chi xic chi junpa̱t re nak ta̱e̱lelik chiru laj Saúl. Laj Saúl ut eb li cuanqueb rochben yo̱queb chi nachꞌoc riqꞌuineb re teꞌxchap.

²⁷ Quicuulac jun li takl saꞌ a̱nil ut quixye re laj Saúl: —Quimkex chi junpa̱t. Eb laj filisteo xeꞌoc saꞌ li kanaꞌaj chi pletic, chan.

²⁸ Joꞌcan nak laj Saúl quixcanab xsicꞌbal laj David ut co̱ chi pletic riqꞌuineb laj filisteo. Xban aꞌan nak queꞌxqꞌue chokꞌ xcꞌabaꞌ li naꞌajej aꞌan “Sela-hama-lecot”.

²⁹ Ut laj David qui-el saꞌ li naꞌajej aꞌan ut co̱ chi cua̱nc saꞌ li naꞌajej En-gadi ut aran quixmuk rib.