1 Samuel 21 - Li Santil hu

¹ Laj David co̱ aran Nob riqꞌuin laj Ahimelec laj tij. Laj Ahimelec quisach xchꞌo̱l chirilbal laj David ut quixye re: —¿Cꞌaꞌut nak xatchal arin a̱junes? chan.

² Laj David quixye re: —Li rey xqꞌue jun intaklanquil. Ut xye cue nak ma̱ ani aj iqꞌuin tinserakꞌi cꞌaꞌru lin taklanquil. La̱in xinye reheb lin soldado bar tineꞌxcꞌul.

³ Ye cue cꞌaꞌru chi tzacae̱mkil cuan a̱cuiqꞌuin. Qꞌue cue o̱b li caxlan cua malaj ut li cꞌaꞌru cuan a̱cuiqꞌuin, chan.

⁴ Laj tij quixye re laj David: —Ma̱cꞌaꞌ cꞌaꞌak re ru chi tzacae̱mkil. Caꞌaj cuiꞌ li mayejanbil caxlan cua. Naru tinqꞌue a̱cue cui eb li cui̱nk incꞌaꞌ xeꞌcuan riqꞌuin ixk, chan.

⁵ Laj David quixye re: —Chalen cabajer eb li cui̱nk incꞌaꞌ xeꞌcuan riqꞌuin ixk. Junelic nequeꞌxra rib nak nequeꞌel chixba̱nunquil junak taklanquil. Kꞌaxal cuiꞌchic teꞌxra rib nak yo̱queb chixba̱nunquil li taklanquil aꞌin, chan.

⁶ Ut laj tij quixqꞌue li mayejanbil caxlan cua re laj David xban nak ma̱cꞌaꞌ chic cuan re. Caꞌaj cuiꞌ li caxlan cua li qui-isi̱c saꞌ li me̱x nak quiqꞌueheꞌ li caxlan cua li toj qui-el saꞌ li horno.

⁷ Jun lix mo̱s laj Saúl cuan aran saꞌ li cutan aꞌan chixba̱nunquil jun lix taklanquil chiru li Dios. Li cui̱nk aꞌan aj Doeg xcꞌabaꞌ. Edom xtenamit. Aꞌan li nataklan saꞌ xbe̱neb li nequeꞌiloc reheb lix queto̱mk laj Saúl.

⁸ Laj David quixye re laj Ahimelec: —¿Ma cuan arin jun chꞌi̱chꞌ malaj la̱ns? Li rey xinixtakla chi junpa̱t. Joꞌcan nak incꞌaꞌ xqꞌue rib chicuu xcꞌambal chak inla̱ns, chi moco eb lin chꞌi̱chꞌ re pletic, chan.

⁹ Laj tij quixye re: —Cuan arin lix chꞌi̱chꞌ laj Goliat aj filisteo li camakꞌ chiru nak cacamsi aran saꞌ li ru takꞌa re Ela. Lanlo saꞌ tꞌicr chirix li Efod. Naru ta̱cꞌam aꞌan cui ta̱cuaj. Arin ma̱cꞌaꞌ chic jalan chꞌi̱chꞌ re pletic, chan. Ut laj David quixye re: —Qꞌue cue. Ma̱cꞌaꞌ chic chꞌi̱chꞌ cha̱bil joꞌ aꞌan, chan.

¹⁰ Saꞌ li cutan aꞌan laj David quie̱lelic chiru laj Saúl ut co̱ riqꞌuin laj Aquis, lix reyeb laj Gat.

¹¹ Eb lix mo̱s laj Aquis queꞌxye re: —¿Ma ma̱cuaꞌ ta biꞌ aꞌin laj David li nacꞌanjelac chiru li rey Saúl? ¿Ma ma̱cuaꞌ ta biꞌ chirix aꞌan queꞌxye eb li ixk nak queꞌxajoc ut queꞌbichan: “Laj Saúl quixcamsiheb jun mil chi cui̱nk. Abanan laj David quixcamsiheb laje̱b mil?” chanqueb.

¹² Laj David quixqꞌue retal li cꞌaꞌru queꞌxye ut cꞌajoꞌ nak qui-oc xxiu chiru laj Aquis, lix reyeb laj Gat.

¹³ Nak cuan riqꞌuineb quixjal lix naꞌleb ut quixba̱nu rib nak lo̱c ru. Quitzꞌi̱bac chiru li oqueba̱l re li tenamit ut lix yaꞌal re yo̱ chi tꞌanecꞌ saꞌ lix mach.

¹⁴ Ut li rey Aquis quixye reheb li nequeꞌtenkꞌan re: —Li cui̱nk aꞌin lo̱c ru. ¿Cꞌaꞌut nak xecꞌam chak cuiqꞌuin?

¹⁵ ¿Ma pa̱lt ta biꞌ nequeꞌxba̱nu li lo̱c saꞌ li naꞌajej aꞌin? ¿Cꞌaꞌut nak xecꞌam chak saꞌ li cuochoch li cui̱nk aꞌin? chan.