1 Samuel 20 - Li Santil hu

¹ Chirix aꞌan laj David quie̱lelic Naiot xcue̱nt Ramá ut co̱ riqꞌuin laj Jonatán. Quixye re: —¿Cꞌaꞌru li incꞌaꞌ us xinba̱nu? ¿Cꞌaꞌru inma̱c chiru la̱ yucuaꞌ? ¿Cꞌaꞌut nak ta̱raj incamsinquil? chan.

² Quixye laj Jonatán: —Moco ya̱l ta. La̱at incꞌaꞌ tatxcamsi. Lin yucuaꞌ ma̱cꞌaꞌ naxba̱nu chi incꞌaꞌ ta tixye cue la̱in. Yalak cꞌaꞌru naxba̱nu, naxye cue. Ma̱ jokꞌe tixmuk chicuu li cꞌaꞌru tixba̱nu. Aꞌan incꞌaꞌ tatxcamsi, chan laj Jonatán.

³ Laj David quixye re: —La̱ yucuaꞌ naxnau nak raro̱quin a̱ban. Incꞌaꞌ naraj xqꞌuebal xrahil a̱chꞌo̱l. Joꞌcan nak incꞌaꞌ naxye a̱cue. Saꞌ xcꞌabaꞌ li nimajcual Dios ut saꞌ a̱cꞌabaꞌ ajcuiꞌ la̱at, la̱in ninye a̱cue nak ta̱raj incamsinquil, chan.

⁴ Laj Jonatán quixye re: —¿Cꞌaꞌru ta̱cuaj tinba̱nu? Ye cue ut la̱in tinba̱nu, chan.

⁵ Laj David quixye re: —Cuulaj nequeꞌxninkꞌei li xyoꞌlajic li po ut la̱in cꞌaynakin chi cꞌojla̱c saꞌ li me̱x cuochben la̱ yucuaꞌ. Abanan ta̱qꞌue inlese̱ns re nak la̱in tinmuk cuib saꞌ li cꞌaleba̱l toj saꞌ li ecuu saꞌ rox li cutan.

⁶ Cui la̱ yucuaꞌ tinixpatzꞌ, la̱at ta̱ye re nak xintzꞌa̱ma cha̱cuu nak tina̱canab chi xic saꞌ lin tenamit Belén xban nak eb li cuechꞌalal nequeꞌninkꞌei̱c aran rajlal chihab.

⁷ Cui la̱ yucuaꞌ tixye nak us nak xco̱in, ta̱cꞌojla̱k inchꞌo̱l. Abanan cui najoskꞌoꞌ, aꞌan retalil cha̱cuu nak aꞌan ta̱raj incamsinquil.

⁸ Ba̱nu usilal cue saꞌ xcꞌabaꞌ li juramento li kaba̱nu chi kibil kib. China̱tenkꞌa la̱in aj cꞌanjel cha̱cuu. Cui ut la̱in cuan inma̱c, china̱camsi la̱at anakcuan. Incꞌaꞌ tento nak tina̱cꞌam riqꞌuin la̱ yucuaꞌ re nak aꞌan tinixcamsi, chan laj David.

⁹ Laj Jonatán quixye re: —Matcꞌoxlac. Cui la̱in tinnau nak lin yucuaꞌ ac xcꞌoxla xba̱nunquil ma̱usilal a̱cue, la̱in tinye resil a̱cue, chan.

¹⁰ Laj David quixye: —¿Ani ta̱yehok cue nak la̱ yucuaꞌ tatxsume saꞌ joskꞌil? chan.

¹¹ Laj Jonatán quixye re: —Yoꞌo saꞌ cꞌaleba̱l, chan. Ut queꞌco̱eb xcabichaleb saꞌ li cꞌaleba̱l.

¹² Ut laj Jonatán quixye re laj David: —Saꞌ xcꞌabaꞌ li Ka̱cuaꞌ li kaDios la̱o aj Israel, la̱in ninye a̱cue nak saꞌ ajcuiꞌ li ho̱nal aꞌin cuulaj malaj ut caꞌbej, la̱in tina̱tinak riqꞌuin lin yucuaꞌ. Cui sa saꞌ xchꞌo̱l a̱cuiqꞌuin, la̱in tintakla xyebal a̱cue.

¹³ Cui ut ta̱raj tixba̱nu raylal a̱cue, li Ka̱cuaꞌ chixba̱nuhak raylal cue cui incꞌaꞌ tintakla resil a̱cue ut tatintenkꞌa xcolbal a̱cuib. Li Ka̱cuaꞌ taxak chicua̱nk a̱cuiqꞌuin joꞌ nak quicuan riqꞌuin lin yucuaꞌ.

¹⁴ Cui ut toj yoꞌyo̱kin chaba̱nuhak usilal cue joꞌ nak naxba̱nu usilal a̱cue la̱at li Ka̱cuaꞌ re nak incꞌaꞌ tincamsi̱k.

¹⁵ Chaba̱nuhak usilal reheb li cuechꞌalal chi junelic. Ut nak li Ka̱cuaꞌ acak xsach ruheb chixjunileb li xicꞌ nequeꞌiloc a̱cue, incꞌaꞌ taxak chisachk lin cꞌabaꞌ chi junaj cua, chan laj Jonatán.

¹⁶ Joꞌcaꞌin nak laj Jonatán quixba̱nu li pacto riqꞌuin laj David ut quixye: —Aꞌ taxak li Dios chiqꞌuehok reheb chixtojbal xma̱queb li xicꞌ nequeꞌiloc re laj David joꞌqueb ajcuiꞌ li ralal xcꞌajol, chan.

¹⁷ Jun sut chic laj Jonatán quixye nak teꞌxba̱nu li juramento xban nak kꞌaxal cuiꞌchic naxra laj David joꞌ nak naxra rib aꞌan.

¹⁸ Tojoꞌnak laj Jonatán quixye re laj David: —Cuulaj nequeꞌxninkꞌei li xyoꞌlajic li po. Teꞌxqꞌue retal nak ma̱ anihakat xban nak yamyo̱k la̱ naꞌaj.

¹⁹ Ut saꞌ rox li cutan kꞌaxal cuiꞌchic ta̱cꞌutu̱nk nak ma̱ anihakat. Tatxic saꞌ li naꞌajej li camuk cuiꞌ chak a̱cuib junxil. Ut ta̱muk a̱cuib chirix li jun tu̱b chi pec Ezel xcꞌabaꞌ.

²⁰ La̱in tincut oxib lin tzimaj chixcꞌatk li pec. Tinba̱nu cuib nak yo̱quin chixtzolbal cutuc.

²¹ Chirix aꞌan tintakla lin mo̱s chixsicꞌbal. Cui la̱in tinye re, “Lin tzimaj cuan nachꞌ riqꞌuin li pec. Cꞌam chak”, aꞌan retalil nak ma̱cꞌaꞌ ta̱cꞌul. Tatcha̱lk cuiꞌchic xban nak saꞌ xcꞌabaꞌ li Ka̱cuaꞌ ninye a̱cue nak ma̱cꞌaꞌ ta̱cꞌul.

²² Abanan cui tinye re lin mo̱s, “Lin tzimaj toj jun pacꞌal li pec xnak”, aꞌan retalil nak tate̱lelik xban nak li Ka̱cuaꞌ naraj nak tatxic.

²³ Ut li Ka̱cuaꞌ ta̱tenkꞌa̱nk ke re nak incꞌaꞌ takakꞌet li ka̱tin li xkaye chi kibil kib.—

²⁴ Joꞌcan nak laj David co̱ ut quixmuk rib saꞌ li cꞌaleba̱l. Nak yo̱ li ninkꞌe re xyoꞌlajic li po, laj Saúl quichunla saꞌ me̱x chi cuaꞌac.

²⁵ Laj Saúl quichunla saꞌ li naꞌajej li nachunla cuiꞌ rajlal chiru li tzꞌac. Ut laj Jonatán quichunla saꞌ xcaꞌyaba̱l. Ut laj Abner quichunla chixcꞌatk laj Saúl. Abanan li naꞌajej li nachunla cuiꞌ laj David yamyo.

²⁶ Saꞌ xbe̱n li cutan ma̱cꞌaꞌ quixye laj Saúl. Saꞌ xchꞌo̱l aꞌan nak laj David quixba̱nu cꞌaꞌak re ru incꞌaꞌ us ut incꞌaꞌ quixsantobresi rib re ta̱ru̱k ta̱cuaꞌak saꞌ li ninkꞌe. Joꞌcan nak ma̱cꞌaꞌ quixye.

²⁷ Joꞌ cuulajak chic saꞌ xcab li cutan re li ninkꞌe, laj Saúl quiril nak ma̱ ani laj David. Quixye re laj Jonatán: —Laj David incꞌaꞌ xcꞌulun chi cuaꞌac chi moco ecue̱r, chi moco anakcuan. ¿Cꞌaꞌut? chan.

²⁸ Laj Jonatán quixye re: —Laj David quixtzꞌa̱ma chicuu nak tinqꞌue xlese̱ns chi xic Belén.

²⁹ Quixye cue, “Ba̱nu usilal, ta̱qꞌue inlese̱ns chi xic xban nak li cuechꞌalal yo̱queb chi mayejac saꞌ li tenamit Belén. Li cuas xtakla inbokbal. Cui sa saꞌ a̱chꞌo̱l cuiqꞌuin, ta̱qꞌue inlese̱ns chi xic chirilbaleb li cuechꞌalal,” chan. Joꞌcan nak incꞌaꞌ xcꞌulun chi cuaꞌac a̱cuochben, at rey, chan laj Jonatán.

³⁰ Cꞌajoꞌ nak quijoskꞌoꞌ laj Saúl riqꞌuin laj Jonatán ut quixye re: —La̱at incꞌaꞌ us a̱naꞌleb. Ralalat jun ixk kꞌetkꞌet ut incꞌaꞌ us xnaꞌleb. Anakcuan ninnau nak la̱at tzꞌakal rami̱g li ralal laj Isaí. Xuta̱nal chokꞌ a̱cue ut chokꞌ re ajcuiꞌ la̱ naꞌ.

³¹ ¿Ma incꞌaꞌ nacaqꞌue retal nak cui li ralal laj Isaí yoꞌyo̱k, incꞌaꞌ naru tat-oc chokꞌ rey la̱at, chi moco eb la̱ cualal a̱cꞌajol? Joꞌcan nak ayu. Sicꞌ chak ut ta̱cꞌam chak cuiqꞌuin. Aꞌan tento nak ta̱ca̱mk, chan laj Saúl.

³² Laj Jonatán quixye re: —¿Cꞌaꞌut nak ta̱camsi laj David? ¿Cꞌaꞌru xma̱c cha̱cuu? chan.

³³ Xban xjoskꞌil laj Saúl quixcut lix la̱ns re tixcamsi laj Jonatán. Riqꞌuin aꞌan laj Jonatán quixqꞌue retal nak relic chi ya̱l lix yucuaꞌ ta̱raj xcamsinquil laj David.

³⁴ Ma̱ caꞌchꞌin xjoskꞌil laj Jonatán nak qui-el saꞌ li me̱x ut incꞌaꞌ quicuaꞌac saꞌ xcab li cutan nak yo̱queb chixninkꞌeinquil li xyoꞌlajic li po. Cꞌajoꞌ nak yo̱ chi cꞌoxlac chirix laj David xban nak lix yucuaꞌ ta̱raj xcamsinquil.

³⁵ Saꞌ li cutan jun chic nak toj ekꞌela laj Jonatán co̱ saꞌ cꞌaleba̱l joꞌ quixye re laj David. Ut quixcꞌam jun li sa̱j al chirix.

³⁶ Quixye re li al: —A̱linan ut ta̱xoc chak li tzimaj li tincut, chan. Li al quia̱linac ut laj Jonatán quixcut lix tzimaj toj jun pacꞌal li al.

³⁷ Nak li al quicuulac saꞌ li naꞌajej li quixcut cuiꞌ li tzimaj, laj Jonatán quixjap re chixyebal re li al: —Ayu jun pacꞌal li cuancat cuiꞌ. Aran ta̱tau.

³⁸ Ayu saꞌ junpa̱t, chan. Ut li al quixxoc li tzimaj ut quixcꞌam riqꞌuin laj Jonatán.

³⁹ Abanan incꞌaꞌ quixnau cꞌaꞌru xya̱lal li quixye laj Jonatán. Caꞌaj cuiꞌ laj Jonatán ut laj David queꞌnaꞌoc re.

⁴⁰ Ut laj Jonatán quixqꞌue lix tzimaj re li al ut quixtakla cuiꞌchic saꞌ li tenamit.

⁴¹ Nak ac xco̱ li al, laj David qui-el chak chirix li jun tu̱b chi pec. Quixcuikꞌib rib oxib sut saꞌ chꞌochꞌ. Queꞌrutzꞌ ru chi ribileb rib. Ut cꞌajoꞌ nak queꞌya̱bac. Laj David kꞌaxal cuiꞌchic quiya̱bac toj retal quicꞌojla xchꞌo̱l.

⁴² Laj Jonatán quixye re laj David: —Ayu chi ma̱cꞌaꞌ a̱cꞌaꞌux. La̱o ac xkaba̱nu li juramento saꞌ xcꞌabaꞌ li Ka̱cuaꞌ. Aꞌan ta̱tenkꞌa̱nk ke re nak incꞌaꞌ takakꞌet li ka̱tin, la̱o joꞌqueb ajcuiꞌ li kalal kacꞌajol, chan. Ut laj David co̱ ut laj Jonatán quisukꞌi saꞌ li tenamit.