1 Samuel 2 - Li Santil hu

Lix tij lix Ana

¹ Lix Ana quitijoc chiru li Dios ut quixye chi joꞌcaꞌin: —At Ka̱cuaꞌ, la̱in nasahoꞌ saꞌ inchꞌo̱l a̱cuiqꞌuin xban nak la̱at nacaqꞌue incacuilal re nak naru ninsumeheb li xicꞌ nequeꞌiloc cue. Cꞌajoꞌ xsahil inchꞌo̱l xban nak la̱at xattenkꞌan cue, chan lix Ana saꞌ lix tij.

² Ut quixye ajcuiꞌ: —Ma̱cꞌaꞌ chic junak Dios santo joꞌ li nimajcual Dios. Ma̱ ani naru nacoloc ke. Caꞌaj cuiꞌ li Ka̱cuaꞌ. Ma̱ ani chic junak joꞌ aꞌan.

³ Ma̱ ani ta teꞌxnimobresi rib chi moco teꞌxkꞌetkꞌeti rib riqꞌuin li cꞌaꞌru nequeꞌxye xban nak li Ka̱cuaꞌ, aꞌan naxnau chixjunil. Ut aꞌan naxqꞌue retal ut narakoc a̱tin saꞌ xbe̱n li junju̱nk riqꞌuin li cꞌaꞌru naxba̱nu.

⁴ Aꞌan quixsach ru li tzimaj li nacꞌanjelac chiruheb li cauheb rib chi pletic ut aꞌ chic li ma̱cꞌaꞌeb xmetzꞌe̱u, aꞌaneb chic li cauheb rib.

⁵ Li cuanqueb nabal cꞌaꞌru eb re nak xeꞌcuan, anakcuan ma̱cꞌaꞌ chic cꞌaꞌru reheb. Yo̱queb chi trabajic chi cau re nak ta̱cua̱nk caꞌchꞌinak xtzacae̱mkeb. Ut eb li ma̱cꞌaꞌ cuan reheb re teꞌtzaca̱nk nak xeꞌcuan, anakcuan cuan chic cꞌaꞌruheb re. Ut li ixk li incꞌaꞌ naqꞌuiresin, xeꞌcuan cuukub xcocꞌal. Abanan li ixk li xcuan nabal xcocꞌal, anakcuan incꞌaꞌ chic naqꞌuiresin.

⁶ Li nimajcual Dios, aꞌan li ya̱l re saꞌ xbe̱n chixjunil. Li ani naraj naxqꞌue xyuꞌam ut li ani naraj narisi xyuꞌam. Cui ani naraj tixcuaclesiheb cuiꞌchic chi yoꞌyo, ut cui aꞌan naraj tixcanabeb chi camenak.

⁷ Cui li Dios naraj nak nebaꞌak junak, li jun aꞌan nebaꞌ. Ut cui li Dios naraj nak biomak, biomak ajcuiꞌ. Ut li ani naraj, narisi xcuanquil. Ut li ani naraj xqꞌuebal xcuanquil, naxqꞌue xcuanquil.

⁸ Aꞌan narisiheb li nebaꞌ saꞌ nebaꞌil ut aꞌan ajcuiꞌ na-isin reheb saꞌ nebaꞌil li nequeꞌxtzꞌa̱ma xcua chire cablal. Naxqꞌueheb chi cua̱nc saꞌ xya̱nkeb li cuanqueb xcuanquil ut naxqꞌueheb saꞌ jun li naꞌajej kꞌaxal lokꞌ. Naxba̱nu chi joꞌcan xban nak aꞌan ya̱l re saꞌ xbe̱n li nacu̱tun re li ruchichꞌochꞌ, ut aꞌan ajcuiꞌ li quiqꞌuehoc re li ruchichꞌochꞌ saꞌ xnaꞌaj.

⁹ Aꞌan narileb li ti̱queb xchꞌo̱l, aban eb li incꞌaꞌ useb xnaꞌleb naxcanabeb chi ca̱mc saꞌ xkꞌojyi̱nal ru li ma̱c xban nak ma̱ ani cau rib yal xjunes rib.

¹⁰ Li Ka̱cuaꞌ tixsacheb ru li xicꞌ nequeꞌiloc re. Aꞌan ta̱rakok a̱tin saꞌ xbe̱neb li cuanqueb saꞌ ruchichꞌochꞌ. Chanchan nak na-ecꞌan chak li ca̱k toj saꞌ choxa. Aꞌan tixqꞌue xcuanquil li rey li quixsicꞌ ru ut tixqꞌue ajcuiꞌ xlokꞌal lix cuanquil, chan lix Ana.

¹¹ Chirix aꞌan, laj Elcana quisukꞌi saꞌ rochoch aran Ramá. Abanan laj Samuel, li chꞌina al, quicana ut yo̱ chi cꞌanjelac chiru li Dios. Ut laj Elí, laj tij, yo̱ chi cꞌamoc be chiru.

Eb li ralal laj Elí queꞌxba̱nu li ma̱usilal

¹² Eb li ralal laj Elí incꞌaꞌ useb xnaꞌleb ut incꞌaꞌ queꞌxqꞌue xlokꞌal li Ka̱cuaꞌ Dios.

¹³ Ac chꞌolchꞌo chanru teꞌxba̱nu eb laj tij nak li tenamit nequeꞌmayejac. Nak yo̱ chixchikbal li tib, lix mo̱s laj tij tixcꞌam jun li chꞌi̱chꞌ oxib ruꞌuj.

¹⁴ Lix mo̱s naxchꞌic li chꞌi̱chꞌ saꞌ li ucꞌal, malaj li secꞌ, li yo̱ cuiꞌ chi chakꞌac li tib. Nak quirisi li chꞌi̱chꞌ, li joꞌ qꞌuial li narisi chak chi ruꞌuj li chꞌi̱chꞌ, aꞌan re laj tij. Joꞌcan nequeꞌxba̱nu riqꞌuineb chixjunileb laj Israel li queꞌchal chi mayejac aran Silo.

¹⁵ Ut nak toj ma̱jiꞌ nacꞌatman lix xe̱bul li tib li ta̱mayeja̱k, lix mo̱s laj tij nachal ut naxye reheb li cristian: —Qꞌue caꞌchꞌinak xtib laj tij re tixpom, xban nak aꞌan incꞌaꞌ naxcꞌul li tib nak ac chikbil. Caꞌaj cuiꞌ li tib toj rax naxcꞌul, chan.

¹⁶ Abanan cuan nak li cristian queꞌchakꞌoc ut queꞌxye: —Incꞌaꞌ. Kaba̱nuhak ban saꞌ xya̱lal. Kacꞌatak cuan xbe̱n cua lix xe̱b, tojoꞌnak te̱cꞌam li joꞌ qꞌuial te̱raj.— Ut cui xsume chi joꞌcan, quijoskꞌoꞌ lix mo̱s laj tij ut quixye: —Qꞌue cue anakcuan. Cui incꞌaꞌ nacaqꞌue cue anakcuan, la̱in tinchap chi pue̱rs, chan.

¹⁷ Kꞌaxal cuiꞌchic nimla ma̱c chiru li Ka̱cuaꞌ li queꞌxba̱nu li ralal laj Elí nak queꞌxmux ru li mayej li queꞌxmayeja li tenamit chiru li Ka̱cuaꞌ.

¹⁸ Laj Samuel, li sa̱j al, yo̱ chi cꞌanjelac chiru li Dios, ut quixqꞌue chirix li efod yi̱banbil riqꞌuin lino joꞌ nequeꞌrocsi laj tij.

¹⁹ Rajlal chihab naxic lix naꞌ saꞌ rochoch li Dios rochben lix be̱lom chixqꞌuebal lix mayej chiru li Ka̱cuaꞌ. Naxyi̱b jun rakꞌ laj Samuel, naxcꞌam ut naxqꞌue re.

²⁰ Ut laj Elí naxtzꞌa̱ma chiru li Dios nak ta̱rosobtesi laj Elcana ut lix Ana ut quixye reheb: —Aꞌ taxak li Ka̱cuaꞌ tixqꞌue nabal chic a̱cualal a̱cꞌajol riqꞌuin li ixk aꞌin chokꞌ re̱kaj li xakꞌaxtesi re li nimajcual Dios, chan reheb. Ut chirix aꞌan, queꞌsukꞌi saꞌ li rochocheb.

²¹ Li Dios quirosobtesi lix Ana. Queꞌcuan oxib chic lix yum ut cuib lix coꞌ. Ut laj Samuel yo̱ chi qꞌui̱c ut yo̱ chi cꞌanjelac chiru li Dios.

²² Ac ti̱x chic chi us laj Elí ut yo̱ chirabinquil resil li incꞌaꞌ us nequeꞌxba̱nu eb li ralal riqꞌuineb chixjunileb laj Israel. Quirabi ajcuiꞌ resil nak nequeꞌcuar riqꞌuineb li ixk li nequeꞌtrabajic chire li oqueba̱l re li tabernáculo li nequeꞌxlokꞌoni cuiꞌ li Ka̱cuaꞌ.

²³ Laj Elí quixye reheb li ralal: —¿Cꞌaꞌut nak nequeba̱nu li incꞌaꞌ us aꞌin? Chixjunileb li tenamit yo̱queb chixyebal cue nak incꞌaꞌ us yo̱quex.

²⁴ Ex cualal, canabomak xba̱nunquil li ma̱usilal. Yibru li yo̱queb chixyebal che̱rix lix tenamit li Dios.

²⁵ Cui junak cui̱nk nama̱cob chiru li ras ri̱tzꞌin, narakeꞌ a̱tin saꞌ xbe̱n xban laj rakol a̱tin. Abanan, li ani nama̱cob chiru li Ka̱cuaꞌ, ¿ma cuan ta biꞌ junak ta̱oque̱nk chirix? chan. Abanan incꞌaꞌ queꞌabin chiru lix yucuaꞌeb xban nak ac cuan saꞌ xchꞌo̱l li Dios nak tento nak teꞌca̱mk.

²⁶ Nak yo̱ chi cꞌulma̱nc aꞌin, laj Samuel yo̱ chi qꞌui̱c. Quiraheꞌ xban li Dios ut quiraheꞌ ajcuiꞌ xbaneb li tenamit.

²⁷ Jun lix profeta li Dios quicuulac riqꞌuin laj Elí ut quixye re: —Joꞌcaꞌin xye li Ka̱cuaꞌ: “La̱in quincꞌutbesi cuib chiru laj Aarón, la̱ xeꞌto̱nil yucuaꞌ, nak aꞌan joꞌ eb ajcuiꞌ lix comon cuanqueb chak chokꞌ rahobtesinbil mo̱s aran Egipto.

²⁸ Saꞌ xya̱nkeb chixjunileb li xte̱paleb li ralal xcꞌajol laj Israel la̱in xinsicꞌ ru laj Aarón joꞌ eb ajcuiꞌ li ralal xcꞌajol, re nak teꞌcꞌanjelak chicuu chokꞌ aj tij. Teꞌmayejak chicuu chiru li artal. Teꞌxcꞌat li incienso ut teꞌrocsi li efod nak teꞌtijok chicuu. Ut xinye ajcuiꞌ reheb le̱ xeꞌto̱nil yucuaꞌ nak tento teꞌxcꞌul caꞌchꞌinak eb li mayej li nequeꞌxqꞌue eb laj Israel.

²⁹ ¿Cꞌaꞌut nak nacamux ru li mayej li xinye reheb li tenamit nak teꞌxmayeja chicuu chiru li tabernáculo? ¿Cꞌaꞌut nak kꞌaxal nacaqꞌue xlokꞌaleb la̱ cualal chicuu la̱in? ¿Cꞌaꞌut nak yo̱queb chi ni̱nka̱nc riqꞌuin lix cha̱bilal li tib li nequeꞌxmayeja chicuu lin tenamit Israel? chan li Ka̱cuaꞌ.”

³⁰ Joꞌcan nak li Ka̱cuaꞌ li nequeꞌxlokꞌoni laj Israel quixye chi joꞌcaꞌin, “Quinye nak eb li ralal xcꞌajol la̱ yucuaꞌ teꞌcꞌanjelak chicuu chokꞌ aj tij chi junelic kꞌe cutan. Abanan anakcuan incꞌaꞌ chic ta̱ru̱k texcꞌanjelak chicuu xban nak la̱in ninqꞌue xlokꞌal li nalokꞌonin cue ut nintzꞌekta̱na li ani natzꞌekta̱nan cue.

³¹ Chacuabi li tinye a̱cue. Ta̱cuulak xkꞌehil nak la̱in tincuisi la̱ cuanquil ut lix cuanquileb la̱ xeꞌto̱nil yucuaꞌ. Chixjunileb la̱ cualal teꞌca̱mk nak toj ma̱jiꞌ nequeꞌti̱x.

³² Raylal ta̱cha̱lk saꞌ a̱be̱n. Ut ta̱rahokꞌ a̱chꞌo̱l nak ta̱cuil nak yo̱quin chirosobtesinquileb laj Israel, ut chixjunileb li cui̱nk saꞌ xya̱nkeb la̱ cualal a̱cꞌajol teꞌca̱mk nak toj ma̱jiꞌ nequeꞌti̱x.

³³ Jun reheb la̱ cuechꞌalal, li incꞌaꞌ tincamsi, tixqꞌue nabal xrahil a̱chꞌo̱l. Incꞌaꞌ chic sa tat-ilok xban li ya̱bac ta̱ba̱nu. Ut chixjunileb la̱ cualal a̱cꞌajol teꞌca̱mk nak toj sa̱jeb.

³⁴ Aꞌan aꞌin li retalil li tinqꞌue a̱cue re nak ta̱nau nak tzꞌakal ya̱l li yo̱quin chixyebal a̱cue. Saꞌ ajcuiꞌ li cutan nak ta̱ca̱mk la̱ cualal aj Ofni, ta̱ca̱mk ajcuiꞌ la̱ cualal aj Finees.

³⁵ La̱in tinsicꞌ ru jun chic li ta̱cꞌanjelak chicuu chokꞌ aj tij. Aꞌan tixba̱nu lix cꞌanjel chi cha̱bil joꞌ nacuaj la̱in. La̱in tinqꞌue ralal xcꞌajol re nak junelic teꞌcꞌanjelak chokꞌ aj tij ut re ajcuiꞌ nak teꞌcꞌanjelak chiru li rey li tinsicꞌ ru la̱in.

³⁶ Ut eb la̱ cuechꞌalal li incꞌaꞌ teꞌca̱mk teꞌxic riqꞌuin laj tij li tinsicꞌ ru ut teꞌxtzꞌa̱ma xtzacae̱mkeb ut xtumineb re. Ut teꞌxtzꞌa̱ma chiru nak tixcanabeb chi cꞌanjelac saꞌ xya̱nkeb laj tij re nak teꞌtzaca̱nk,” chan li Ka̱cuaꞌ.—