1 Samuel 19 - Li Santil hu

¹ Laj Saúl quixye re laj Jonatán ut reheb ajcuiꞌ chixjunileb lix mo̱s nak teꞌxcamsi laj David. Abanan laj Jonatán, li ralal laj Saúl, quixra laj David.

² Joꞌcan nak laj Jonatán quixye re laj David: —Lin yucuaꞌ ta̱raj a̱camsinquil. Joꞌcan nak cuulaj ta̱ba̱nu cue̱nt. Muk a̱cuib saꞌ junak naꞌajej bar incꞌaꞌ tateꞌril.

³ La̱in tinxic cuochben lin yucuaꞌ saꞌ li cꞌaleba̱l nachꞌ cuancat cuiꞌ. Tina̱tinak cha̱cuix. Cꞌaꞌ na ru tixye lin yucuaꞌ, la̱in tinye cuiꞌchic a̱cue, chan.

⁴ Ut laj Jonatán quia̱tinac riqꞌuin lix yucuaꞌ. Us li quixye chirix laj David. Quixye re: —At inyucuaꞌ, matma̱cob riqꞌuin xba̱nunquil li incꞌaꞌ us re laj David laj cꞌanjel cha̱cuu. Aꞌan ma̱cꞌaꞌ xba̱nu incꞌaꞌ ta us. Us ban chixjunil li quixba̱nu re a̱tenkꞌanquil.

⁵ Quixkꞌaxtesi rib chi ca̱mc nak quixcamsi laj Goliat. Ut li Ka̱cuaꞌ quixcoleb laj Israel. La̱at xacuil nak xcamsi laj Goliat ut quisahoꞌ saꞌ a̱chꞌo̱l. ¿Cꞌaꞌut nak tatma̱cobk anakcuan riqꞌuin xcamsinquil laj David? Aꞌan ma̱cꞌaꞌ xma̱c cha̱cuu, chan.

⁶ Quixcꞌul xchꞌo̱l li cꞌaꞌru quixye laj Jonatán ut quixba̱nu li juramento ut quixye: —Saꞌ xcꞌabaꞌ li yoꞌyo̱quil Dios, incꞌaꞌ ta̱camsi̱k laj David, chan.

⁷ Joꞌcan nak laj Jonatán quixbok laj David ut quixye re chixjunil li quixye laj Saúl. Quixcꞌam cuiꞌchic riqꞌuin laj Saúl ut laj David quicꞌanjelac chiru joꞌ junxil.

⁸ Eb laj filisteo queꞌoc cuiꞌchic chi pletic riqꞌuineb laj Israel. Laj David cau quipletic ut queꞌnumta saꞌ xbe̱neb toj retal nak eb laj filisteo queꞌe̱lelic chiruheb.

⁹ Saꞌ jun li cutan li Dios quixtakla cuiꞌchic li ma̱us aj musikꞌej riqꞌuin laj Saúl nak chunchu saꞌ rochoch ut cuan lix la̱ns saꞌ rukꞌ. Laj David yo̱ chixchꞌeꞌbal lix arpa.

¹⁰ Laj Saúl quixcut lix la̱ns re tixcamsi laj David. Abanan laj David quixcol rib chiru ut lix la̱ns quixlap rib saꞌ li tzꞌac. Joꞌcan nak laj David quie̱lelic saꞌ li kꞌojyi̱n aꞌan.

¹¹ Saꞌ ajcuiꞌ li kꞌojyi̱n aꞌan laj Saúl quixtaklaheb li cui̱nk chixcꞌacꞌalenquil li rochoch laj David re teꞌxcamsi nak ta̱sake̱uk. Abanan, lix Mical li rixakil quixye re laj David: —Cui incꞌaꞌ tate̱lelik ut ta̱col a̱cuib chiru li kꞌojyi̱n aꞌin, cuulaj tateꞌxcamsi, chan re.

¹² Ut lix Mical quixcubsi laj David saꞌ li ventana. Laj David quie̱lelic re nak tixcol rib.

¹³ Lix Mical quixchap jun li yi̱banbil dios ut quixyocob saꞌ li cuarib. Quixqꞌue li rix jun li chiba̱t saꞌ xjolom ut quixtzꞌap riqꞌuin tꞌicr.

¹⁴ Nak laj Saúl quixtaklaheb lix takl re teꞌxchap laj David, lix Mical quixye reheb: —Laj David yaj, chan.

¹⁵ Laj Saúl quixtaklaheb cuiꞌchic lix takl ut quixye reheb: —Cꞌamomak chak laj David, usta yaj, re nak tincamsi, chan.

¹⁶ Nak eb li takl queꞌoc saꞌ li rochoch, queꞌxtau li yi̱banbil dios saꞌ lix cuarib. Ut cuan li rix chiba̱t saꞌ xjolom.

¹⁷ Laj Saúl quixye re lix Mical: —¿Cꞌaꞌut nak xina̱balakꞌi chi joꞌcaꞌin? ¿Cꞌaꞌut nak xacanab chi e̱lelic li xicꞌ na-iloc cue? chan. Ut lix Mical quixye re: —Aꞌan xye cue nak tinixcamsi cui incꞌaꞌ tintenkꞌa chi e̱lelic, chan.

¹⁸ Joꞌcan nak laj David quie̱lelic chiru laj Saúl ut co̱ riqꞌuin laj Samuel aran Ramá. Ut quixserakꞌi re laj Samuel chixjunil li qui-ux re xban laj Saúl. Ut laj David rochben laj Samuel queꞌco̱eb chi cua̱nc aran Naiot.

¹⁹ Quiyeheꞌ resil re laj Saúl nak laj David cuan aran Naiot xcue̱nt Ramá.

²⁰ Joꞌcan nak quixtaklaheb li cui̱nk re teꞌxchap ut teꞌxcꞌam riqꞌuin. Queꞌril nak eb li profeta yo̱queb chixlokꞌoninquil li Dios ut laj Samuel yo̱ chi cꞌamoc be chiruheb. Ut lix musikꞌ li Ka̱cuaꞌ quichal riqꞌuineb li takl li quixtakla laj Saúl. Ut eb aꞌan quisach xchꞌo̱leb ut queꞌoc ajcuiꞌ chixlokꞌoninquil li Dios.

²¹ Laj Saúl quirabi resil li cꞌaꞌru yo̱queb ut quixtakla jalan chic lix takl. Ut eb aꞌan queꞌxtiquib ajcuiꞌ xajoc ut chixjapbal reheb chixlokꞌoninquil li Dios. Ut laj Saúl quixtaklaheb cuiꞌchic rox sut lix takl. Ut joꞌcan cuiꞌchic queꞌxcꞌul.

²² Chirix chic aꞌan, laj Saúl co̱ Ramá. Nak quicuulac cuan cuiꞌ li nimla jul haꞌ aran Secú, quixye reheb li tenamit: —¿Bar cuanqueb laj Samuel ut laj David? chan. Ut jun li cuan aran quixye: —Cuanqueb aran Naiot xcue̱nt Ramá, chan.

²³ Laj Saúl co̱ aran Naiot xcue̱nt Ramá. Ut lix musikꞌ li Dios quichal riqꞌuin. Riqꞌuin xcuanquil lix musikꞌ li Dios, laj Saúl qui-oc chi xajoc ut chixjapbal re chixlokꞌoninquil li Dios toj retal quicuulac Naiot xcue̱nt Ramá.

²⁴ Ut laj Saúl quirisi lix tꞌicr li cuan saꞌ xbe̱n li rakꞌ joꞌ ajcuiꞌ lix chꞌi̱chꞌ re pletic. Ut qui-oc chi xajoc ut chixjapbal re chiru laj Samuel. Ut joꞌcan quixnumsi li cutan ut li kꞌojyi̱n. Chalen aꞌan quiticla xyebal: “¿Ma xcomoneb li profeta laj Saúl?” chanqueb.