1 Samuel 18 - Li Santil hu

¹ Nak quirakeꞌ chi a̱tinac laj David riqꞌuin laj Saúl, laj Jonatán quixcꞌam rib saꞌ amiguil riqꞌuin laj David ut cꞌajoꞌ nak quixra.

² Chalen saꞌ li cutan aꞌan laj Saúl incꞌaꞌ quixcanab laj David chi sukꞌi̱c saꞌ rochoch lix yucuaꞌ. Quicana ban riqꞌuin re ta̱cꞌanjelak chiru.

³ Laj Jonatán ut laj David queꞌxba̱nu li juramento chi ribileb rib, ut queꞌxye nak junelic teꞌxcꞌam rib saꞌ usilal ut incꞌaꞌ teꞌxchꞌeꞌ rib xban nak laj Jonatán quixra laj David joꞌ nak naxra rib aꞌan.

⁴ Laj Jonatán quirisi chirix lix tꞌicr li naxqꞌue saꞌ xbe̱n li rakꞌ ut quixsi re laj David ut quixsi ajcuiꞌ re lix tzimaj, lix cꞌa̱mal xsaꞌ joꞌ ajcuiꞌ lix chꞌi̱chꞌ.

⁵ Joꞌ qꞌuial li quitakla̱c xba̱nunquil laj David xban laj Saúl, us qui-el xban nak naxcꞌoxla chi us cꞌaꞌru tixba̱nu. Joꞌcan nak laj Saúl quixqꞌue xcuanquil chi takla̱nc saꞌ xbe̱neb lix soldado. Ut queꞌsahoꞌ saꞌ xchꞌo̱leb li tenamit riqꞌuin laj David, joꞌqueb ajcuiꞌ li nequeꞌcꞌanjelac chiru laj Saúl.

⁶ Nak laj David ac xcamsi laj Goliat, eb li soldados queꞌsukꞌi chak saꞌ li ple̱t. Eb li ixk saꞌ chixjunileb li tenamit Israel queꞌel chixcꞌulbal li rey Saúl. Cuanqueb xpanderos saꞌ rukꞌ. Yo̱queb chi xajoc ut yo̱queb chi bicha̱nc xban xsahileb xchꞌo̱l. Ut yo̱queb chixchꞌeꞌbal lix cuajbeb.

⁷ Nak yo̱queb chi xajoc ut yo̱queb chi bicha̱nc, queꞌxye: —Laj Saúl quixcamsiheb jun mil chi cristian. Abanan laj David quixcamsiheb laje̱b mil, chanqueb.

⁸ Cꞌajoꞌ nak quijoskꞌoꞌ laj Saúl nak quirabi li yo̱queb chixyebal. Quixye: —Yo̱queb chixyebal nak laj David quixcamsi laje̱b mil ut la̱in jun mil ajcuiꞌ. Caꞌchꞌin chic ma̱ nequeꞌxxakab chokꞌ rey, chan.

⁹ Joꞌcan nak chalen saꞌ li cutan aꞌan, laj Saúl incꞌaꞌ chic sa naril laj David. Quixcakali ban.

¹⁰ Saꞌ li cutan jun chic li Dios quixtakla li ma̱us aj musikꞌej chixchꞌiꞌchꞌiꞌinquil laj Saúl saꞌ rochoch. Chanchan li lo̱c ru laj Saúl. Cuan xla̱ns saꞌ rukꞌ. Ut laj David yo̱ chixchꞌeꞌbal li arpa chiru joꞌ naxba̱nu rajlal.

¹¹ Laj Saúl quixye saꞌ xchꞌo̱l: —Tinnumsi li la̱ns saꞌ xsaꞌ laj David chiru li tzꞌac, chan. Ut quixcut lix la̱ns. Aꞌut laj David caꞌ sut quixcol rib chiru.

¹² Laj Saúl qui-oc xxiu xban laj David xban nak li Dios cuan riqꞌuin laj David ut incꞌaꞌ chic nacuan riqꞌuin laj Saúl.

¹³ Joꞌcan nak laj Saúl quirisi laj David saꞌ li rochoch. Ut quixxakab chi takla̱nc saꞌ xbe̱n jun mil chi soldados. Laj David nacꞌamoc be chiruheb nak nequeꞌxic chi pletic. Nequeꞌxic ut nequeꞌsukꞌi cuiꞌchic.

¹⁴ Li Ka̱cuaꞌ cuan riqꞌuin laj David. Joꞌcan nak us na-el riqꞌuin chixjunil li cꞌaꞌru naxba̱nu.

¹⁵ Laj David naxnau xcꞌoxlanquil chi us li cꞌaꞌru naxba̱nu. Joꞌcan nak laj Saúl kꞌaxal cuiꞌchic quixucuac chiru.

¹⁶ Chixjunileb laj Israel ut eb laj Judá queꞌxra laj David xban nak nacꞌamoc be chi us chiruheb nak nequeꞌxic chi pletic ut nak nequeꞌsukꞌi chak.

¹⁷ Saꞌ jun li cutan laj Saúl quixye re laj David: —La̱in tinqꞌue lix Merab, li xbe̱n inrabin, chokꞌ a̱cuixakil. Caꞌaj cuiꞌ li nacuaj la̱in nak cauhak a̱chꞌo̱l chi pletic saꞌ xcꞌabaꞌ li Ka̱cuaꞌ, chan. Laj Saúl quixye saꞌ xchꞌo̱l: —Ma̱cuaꞌ la̱in tincamsi̱nk re laj David. Aꞌaneb ban laj filisteo teꞌcamsi̱nk re, chan saꞌ xchꞌo̱l.

¹⁸ Laj David quixye: —¿Ma cuan ta biꞌ incuanquil la̱in nak tin-oc chokꞌ a̱hiꞌ, at rey? Ut, ¿ma cuanqueb ta biꞌ xcuanquil lin yucuaꞌ ut eb lix comon arin Israel? chan.

¹⁹ Abanan nak quicuulac xkꞌehil nak teꞌsumla̱k, laj Saúl quixsumub lix rabin riqꞌuin laj Adriel, Mehola xtenamit.

²⁰ Ut lix Mical, lix rabin jun chic, quixra laj David. Quiyeheꞌ resil re laj Saúl nak lix Mical naxra laj David. Ut quixcꞌul xchꞌo̱l laj Saúl nak quirabi.

²¹ Laj Saúl quixye saꞌ xchꞌo̱l: —La̱in tinsumub lix Mical riqꞌuin laj David yal re tixbalakꞌi ut ta̱camsi̱k xbaneb laj filisteo, chan. Joꞌcan nak quixye cuiꞌchic re laj David: —La̱at tat-oc chokꞌ inhiꞌ, chan.

²² Laj Saúl quixtaklaheb lix mo̱s ut quixye reheb nak teꞌa̱tinak riqꞌuin laj David chi ma̱ ani ta̱abi̱nk re ut teꞌxye re chi joꞌcaꞌin: —Laj Saúl nacatxra ut chikajunilo la̱o lix mo̱s nacatkara ajcuiꞌ. Us ta̱sume oc chokꞌ xhiꞌ li rey, chanqueb.

²³ Queꞌxye re laj David joꞌ quiyeheꞌ reheb xban laj Saúl. Ut laj David quixye reheb: —¿Ma nequecꞌoxla la̱ex nak kꞌaxal us chokꞌ re junak cui̱nk joꞌ la̱in oc chokꞌ xhiꞌ li rey? La̱in ma̱cꞌaꞌ incuanquil ut nebaꞌin, chan.

²⁴ Ut eb li mo̱s co̱eb chixyebal re laj Saúl li cꞌaꞌru quixye laj David.

²⁵ Ut laj Saúl quixye reheb nak teꞌxye re laj David li a̱tin aꞌin: —Li rey incꞌaꞌ naraj ta̱toj rix lix rabin. Caꞌaj cuiꞌ naraj nak ta̱kꞌaxtesi re jun ciento li ruꞌuj xtzꞌejcualeb laj filisteo. Chi joꞌcan tixqꞌue re̱kaj li incꞌaꞌ us xeꞌxba̱nu li xicꞌ nequeꞌiloc re, chan. Laj Saúl quixcꞌoxla nak riqꞌuin aꞌin ta̱camsi̱k laj David xbaneb laj filisteo.

²⁶ Nak laj David quirabi li cꞌaꞌru quitakla̱c xyebal re xban li rey, quixcꞌul xchꞌo̱l laj David nak aꞌan ta̱oc chokꞌ xhiꞌ li rey.

²⁷ Ma̱jiꞌ ajcuiꞌ nacuulac xkꞌehil xba̱nunquil li quixtakla laj Saúl nak laj David rochbeneb lix soldados queꞌco̱eb ut queꞌxcamsiheb cuib ciento laj filisteo. Ut quixcꞌameb chak li ruꞌuj lix tzꞌejcualeb re tixkꞌaxtesi re li rey re nak naru ta̱oc chokꞌ xhiꞌ. Joꞌcan nak laj Saúl quixsume xqꞌuebal lix Mical chokꞌ rixakil laj David.

²⁸ Laj Saúl quixqꞌue retal nak li Ka̱cuaꞌ natenkꞌan re laj David. Ut quixqꞌue ajcuiꞌ retal nak lix Mical lix rabin naxra laj David.

²⁹ Cꞌajoꞌ nak quixucuac laj Saúl xban laj David. Ut chalen saꞌ li cutan aꞌan, xicꞌ chic quiril laj David joꞌ najtil yoꞌyo.

³⁰ Rajlal nak nequeꞌchal eb laj filisteo chi pletic riqꞌuineb laj Israel, laj David, aꞌan li kꞌaxal us na-el chiruheb li jun chꞌol chic li nequeꞌcꞌanjelac chiru laj Saúl. Joꞌcan nak chixjunileb queꞌxqꞌue saꞌ xnakꞌ ruheb laj David.