1 Samuel 16 - Li Santil hu

¹ Li Ka̱cuaꞌ quixye re laj Samuel: —¿Joꞌ najtil chic rahak a̱chꞌo̱l chirix laj Saúl? La̱in incꞌaꞌ chic nacuaj ta̱cua̱nk chokꞌ rey. Ta̱qꞌue li aceite saꞌ li xucub ut tatxic aran Belén riqꞌuin laj Isaí xban nak la̱in xinsicꞌ ru jun reheb li ralal re ta̱oc chokꞌ rey, chan li Ka̱cuaꞌ.

² Laj Samuel quixye: —At Ka̱cuaꞌ, la̱in incꞌaꞌ naru ninba̱nu aꞌan. Cui laj Saúl ta̱rabi resil, tinixcamsi, chan. Li Dios quixye re: —Ta̱cꞌam jun li chꞌina ba̱c nak tatxic. Ut ta̱ye re laj Saúl nak xic a̱cue chi mayejac chicuu.

³ Nak tatcuulak Belén, ta̱ye re laj Isaí nak ta̱xic cha̱cuix nak ta̱qꞌue li mayej. La̱in tincꞌut cha̱cuu cꞌaꞌru ta̱ba̱nu. Li ani tinye a̱cue la̱in, ta̱qꞌue li aceite saꞌ xjolom retalil nak aꞌan ta̱oc chokꞌ rey, chan li Dios.

⁴ Ut laj Samuel quixba̱nu joꞌ quiyeheꞌ re xban li Ka̱cuaꞌ. Quicuulac saꞌ li tenamit Belén. Ut eb li nequeꞌcꞌamoc be saꞌ li tenamit queꞌel chixcꞌulbal chi yo̱queb xxiu ut queꞌxpatzꞌ re: —¿Ma saꞌ usilal xatchal saꞌ li katenamit? chanqueb.

⁵ Laj Samuel quixye: —Saꞌ usilal xinchal. La̱in tinmayejak chiru li Ka̱cuaꞌ. Santobresihomak e̱rib ut texxic chicuix, chan. Ut laj Samuel quixsantobresi laj Isaí ut eb li ralal ut quixye reheb nak teꞌxic chirix nak ta̱mayejak.

⁶ Nak queꞌcuulac saꞌ li naꞌajej li cuan cuiꞌ laj Samuel, laj Samuel quiril laj Eliab ut quixye saꞌ xchꞌo̱l: —Relic chi ya̱l li cui̱nk aꞌin, aꞌan li sicꞌbil ru xban li Dios, chan.

⁷ Ut li Dios quixye re: —Ma̱cuaꞌ li riloba̱l ta̱qꞌue retal, chi moco lix najtil rok. Aꞌan ma̱cuaꞌ li sicꞌbil ru inban. La̱in ma̱cuaꞌ riqꞌuin li riloba̱l ninsicꞌ ruheb joꞌ nequeꞌxba̱nu li cui̱nk. Li cui̱nk naril chanru na-iloc junak. Abanan la̱in nacuil chanru lix naꞌleb, chan li Dios.

⁸ Ut laj Isaí quixbok laj Abinadab li ralal jun chic ut quixxakab chiru laj Samuel. Ut laj Samuel quixye: —Chi moco aꞌin li sicꞌbil ru xban li Dios, chan.

⁹ Ut laj Isaí quixbok laj Sama li ralal jun chic. Ut laj Samuel quixye cuiꞌchic: —Chi moco aꞌin li sicꞌbil ru xban li Dios, chan.

¹⁰ Ut laj Isaí quixcꞌuteb cuukub li ralal chiru laj Samuel. Abanan laj Samuel quixye re nak ma̱ jun reheb aꞌan li sicꞌbileb ru xban li Dios.

¹¹ Ut quixye re: —¿Ma caꞌaj eb cuiꞌ aꞌin la̱ cualal? chan. Laj Isaí quixye: —Cuan chic jun li i̱tzꞌinbej. Aꞌan li yo̱ chak chi iloc reheb li carner, chan. Ut laj Samuel quixye re: —Takla xbokbal chi junpa̱t xban nak incꞌaꞌ tocuaꞌak cui toj ma̱jiꞌ nacꞌulun, chan.

¹² Ut laj Isaí quixtakla xbokbal li i̱tzꞌinbej. Li al aꞌan cꞌajoꞌ xchakꞌal ru ut cau rib. Chꞌinaꞌus na-iloc. Ut li Ka̱cuaꞌ quixye re laj Samuel: —Qꞌue li aceite saꞌ xjolom xban nak aꞌan aꞌin li sicꞌbil ru inban, chan.

¹³ Ut laj Samuel quixchap li xucub ut quixqꞌue li aceite saꞌ xjolom chiruheb chixjunileb li ras. Li al aꞌan aj David xcꞌabaꞌ. Chalen saꞌ li ho̱nal aꞌan lix musikꞌ li Ka̱cuaꞌ quicuan riqꞌuin laj David. Ut chirix aꞌan laj Samuel quisukꞌi cuiꞌchic saꞌ li tenamit Ramá.

¹⁴ Ut incꞌaꞌ chic quicuan lix musikꞌ li Dios riqꞌuin laj Saúl. Li Dios quixtakla jun li ma̱us aj musikꞌej chixchꞌiꞌchꞌiꞌinquil.

¹⁵ Eb lix mo̱s queꞌxye re laj Saúl: —Qꞌue retal, at rey. Li Dios quixqꞌue jun li ma̱us aj musikꞌej re tatxchꞌiꞌchꞌiꞌi.

¹⁶ La̱at naru nacaye ke la̱o aj cꞌanjel cha̱cuu nak takasicꞌ junak li cui̱nk naxnau xchꞌeꞌbal li arpa. Nak ta̱cha̱lk li ma̱us aj musikꞌej cha̱chꞌiꞌchꞌiꞌinquil, li cui̱nk aꞌan tixchꞌeꞌ li arpa, ut li ma̱us aj musikꞌej tixcanab a̱chꞌiꞌchꞌiꞌinquil ut ta̱cꞌojla̱k cuiꞌchic a̱chꞌo̱l, chanqueb.

¹⁷ Joꞌcan nak laj Saúl quixye reheb: —Ayukex biꞌ ut te̱sicꞌ chak junak li cui̱nk naxnau chi us xchꞌeꞌbal li arpa. Ut cꞌamomak chak cuiqꞌuin, chan.

¹⁸ Jun reheb lix mo̱s quixye re: —Laj Isaí li cuan aran Belén cuan jun li ralal naxnau xchꞌeꞌbal li arpa. Li al aꞌan cau rib ut naxnau pletic ut naxnau a̱tinac. Cꞌajoꞌ chakꞌal ru. Ut li Dios cuan riqꞌuin, chan.

¹⁹ Joꞌcan nak laj Saúl quixtaklaheb lix takl riqꞌuin laj Isaí ut queꞌxye re: —Li rey Saúl naraj nak ta̱takla chak riqꞌuin laj David la̱ cualal li nacꞌacꞌalen reheb li carner, chanqueb.

²⁰ Ut laj Isaí quixtakla laj David riqꞌuin laj Saúl. Ut quixtakla ajcuiꞌ nabal li caxlan cua, li vino ut jun li chiba̱t toj sa̱j chokꞌ re laj Saúl. Ut quixtakla ajcuiꞌ jun li bu̱r li ta̱i̱ka̱nk re chixjunil.

²¹ Ut laj David co̱ riqꞌuin laj Saúl ut quicana chi cꞌanjelac chiru. Laj Saúl quixra laj David ut quixye nak aꞌan li ta̱cꞌamok re lix chꞌi̱chꞌ re pletic.

²² Laj Saúl quixtakla xyebal re laj Isaí: —Ba̱nu usilal cue. Cana̱k laj David cuiqꞌuin xban nak aꞌan naqꞌuehoc xsahil inchꞌo̱l, chan.

²³ Joꞌcan nak laj David quicana riqꞌuin laj Saúl. Nak li Dios naxtakla chak li ma̱us aj musikꞌej chixchꞌiꞌchꞌiꞌinquil, laj David naxchap lix arpa ut naxchꞌeꞌ chiru. Ut li ma̱us aj musikꞌej naxcanab xchꞌiꞌchꞌiꞌinquil ut nacꞌojla cuiꞌchic xchꞌo̱l laj Saúl.