1 Samuel 15 - Li Santil hu

¹ Saꞌ jun li cutan laj Samuel quixye re laj Saúl: —Li Ka̱cuaꞌ quinixtakla re nak tatinxakab chokꞌ xreyeb laj Israel lix tenamit. Joꞌcan ut nak anakcuan chacuabi li cꞌaꞌru naxye li Ka̱cuaꞌ Dios.

² Aꞌan aꞌin li naxye li nimajcual Dios; “La̱in tinqꞌueheb chixtojbal xma̱queb li ralal xcꞌajol laj Amalec xban nak incꞌaꞌ queꞌxcanabeb laj Israel chi numecꞌ saꞌ lix naꞌajeb nak queꞌel chak aran Egipto.

³ Texxic anakcuan chi pletic riqꞌuineb laj Amalec. Te̱sach ruheb chixjunil li cꞌaꞌruheb re. Me̱ril xtokꞌoba̱l ruheb. Te̱camsiheb chixjunileb joꞌ cui̱nk, joꞌ ixk, joꞌqueb ajcuiꞌ li cocꞌal ut eb li toj cꞌulaꞌaleb. Te̱camsiheb ajcuiꞌ lix cuacax, ut eb lix carner, eb lix camelleb joꞌ eb ajcuiꞌ lix bu̱reb”, chan li Ka̱cuaꞌ.

⁴ Laj Saúl quixtakla xchꞌutubanquileb li tenamit saꞌ li naꞌajej Telaim ut aran quirajlaheb. Cuanqueb cuib oꞌcꞌa̱l mil (200,000) chi soldado re Israel li nequeꞌxic chi rokeb ut laje̱b mil (10,000) chi soldados re Judá.

⁵ Chirix aꞌan laj Saúl queꞌco̱eb saꞌ lix tenamiteb laj Amalec ut aran queꞌcana chi oybeni̱nc saꞌ li ru takꞌa.

⁶ Quixtakla xyebal reheb laj Ceneo: —Elenkex saꞌ xya̱nkeb laj Amalec re nak incꞌaꞌ texsachekꞌ rochbeneb aꞌan. Incꞌaꞌ texsachekꞌ xban nak la̱ex xeril xtokꞌoba̱l ruheb laj Israel nak queꞌel Egipto, chan. Ut eb laj Ceneo queꞌel saꞌ xya̱nkeb laj Amalec.

⁷ Ut laj Saúl quipletic riqꞌuineb laj Amalec ut queꞌra̱linaheb saꞌ li tenamit Havila toj saꞌ li tenamit Shur li cuan saꞌ xnuba̱l li naꞌajej Egipto. Laj Saúl quinumta saꞌ xbe̱neb.

⁸ Queꞌxchap chi yoꞌyo laj Agag lix reyeb laj Amalec. Abanan chixjunileb li tenamit queꞌxcamsi chi chꞌi̱chꞌ.

⁹ Laj Saúl ut eb lix soldado incꞌaꞌ queꞌxcamsi laj Agag, chi moco queꞌxcamsiheb li carner li cha̱bil, chi moco li cuacax li ni̱nkeb xtibel. Ut incꞌaꞌ queꞌxsach ru li cꞌaꞌru terto xtzꞌak. Caꞌaj cuiꞌ li cꞌaꞌru ma̱cꞌaꞌ na-oc cuiꞌ, aꞌan li queꞌxsach.

¹⁰ Ut li Ka̱cuaꞌ quia̱tinac riqꞌuin laj Samuel ut quixye:

¹¹ —Incꞌaꞌ sa saꞌ inchꞌo̱l riqꞌuin laj Saúl. Incꞌaꞌ raj xinqꞌue chokꞌ xreyeb laj Israel. Quinixtzꞌekta̱na ut quixkꞌet lin chakꞌrab, chan. Qui-oc xcꞌaꞌux laj Samuel ut quixnumsi li kꞌojyi̱n aꞌan chi tijoc chiru li Ka̱cuaꞌ.

¹² Cuulajak chic nak toj ekꞌela, laj Samuel co̱ chixsicꞌbal laj Saúl. Quirabi resil nak co̱ aran Carmel laj Saúl ut nak quixxakab jun li retalil najt xteram re nak ta̱qꞌuehekꞌ xlokꞌal. Ut chirix aꞌan laj Saúl co̱ Gilgal.

¹³ Laj Samuel co̱ cuan cuiꞌ laj Saúl ut laj Saúl quixye re: —Osobtesinbilat taxak xban li Ka̱cuaꞌ. La̱in xinba̱nu li cꞌaꞌru quixye cue li Ka̱cuaꞌ, chan.

¹⁴ Laj Samuel quixye re: —Cui xaba̱nu li cꞌaꞌru xye a̱cue li Ka̱cuaꞌ, ¿cꞌaꞌut nak yo̱quin chirabinquil li carner ut li cuacax nak yo̱queb chi ya̱bac? chan.

¹⁵ Quichakꞌoc laj Saúl ut quixye: —Riqꞌuineb laj Amalec xkacꞌameb chak. Eb li soldados incꞌaꞌ queꞌxcamsi li cha̱bil saꞌ xya̱nkeb li carner ut li cuacax. Queꞌxsicꞌ ruheb re takamayeja chiru li Ka̱cuaꞌ la̱ Dios. Ut li jun chꞌol chic xkasach ruheb, chan.

¹⁶ Quixye laj Samuel re laj Saúl: —Canab a̱tinac. Abi li cꞌaꞌru quixye cue li Ka̱cuaꞌ ecue̱r chi kꞌek, chan. Ut laj Saúl quixye re: —Us. Ye, chan.

¹⁷ Quixye laj Samuel: —Usta la̱at xaye nak ma̱cꞌaꞌ a̱cuanquil, abanan la̱at xatqꞌueheꞌ chi takla̱nc saꞌ xbe̱neb laj Israel. Li Ka̱cuaꞌ quisicꞌoc a̱cuu re nak tat-oc chokꞌ xreyeb laj Israel.

¹⁸ Ut li Ka̱cuaꞌ catxtakla chi pletic riqꞌuineb laj Amalec. Ut quixye a̱cue nak tento ta̱sacheb ru chixjunileb xban nak aj ma̱queb.

¹⁹ ¿Cꞌaꞌut nak xakꞌet li cꞌaꞌru quixye a̱cue li Ka̱cuaꞌ? ¿Cꞌaꞌut nak xexoc li cꞌaꞌru reheb? ¿Cꞌaꞌut nak xaba̱nu li incꞌaꞌ us chiru li Ka̱cuaꞌ? chan laj Samuel.

²⁰ Laj Saúl quixye: —La̱in xinba̱nu li xye cue li Ka̱cuaꞌ. Xinba̱nu lin taklanquil xqꞌue cue. Xinchap ut xincꞌam laj Agag lix reyeb laj Amalec ut xkasacheb ruheb chixjunileb laj Amalec.

²¹ Abanan eb lin soldados queꞌxchapeb li cha̱bil carner ut li cha̱bil cuacax li ac kꞌaxtesinbil re sachecꞌ ut queꞌxcꞌameb chak re teꞌxmayejaheb chiru li Ka̱cuaꞌ la̱ Dios aran Gilgal, chan.

²² Laj Samuel quixye re: —¿Cꞌaꞌru li kꞌaxal lokꞌ chiru li Ka̱cuaꞌ? ¿Ma li mayejac malaj ut li abi̱nc? Chiru li Ka̱cuaꞌ li abi̱nc, aꞌan li kꞌaxal lokꞌ chiru li mayejac. Li xba̱nunquil li cꞌaꞌru naxye li Dios, aꞌan kꞌaxal lokꞌ chiru xcꞌatbal xxe̱bul li carner.

²³ Li xkꞌetbal xchakꞌrab li Dios, aꞌan nimla ma̱c joꞌ li kꞌehi̱nc. Ut li xtzꞌekta̱nanquil li ra̱tin li Dios, aꞌan nimla ma̱c ajcuiꞌ joꞌ li xlokꞌoninquil li yi̱banbil dios. Joꞌ nak la̱at xatzꞌekta̱na li ra̱tin li Ka̱cuaꞌ, joꞌcan ajcuiꞌ nak li Ka̱cuaꞌ xatxtzꞌekta̱na la̱at ut xatrisi saꞌ la̱ cuanquil. Incꞌaꞌ chic tatcꞌanjelak chokꞌ rey, chan laj Samuel.

²⁴ Tojoꞌnak laj Saúl quixye re laj Samuel: —La̱in xinma̱cob. Xinkꞌet li ra̱tin li Dios ut xinkꞌet ajcuiꞌ la̱ cua̱tin la̱at. Xban nak xinxucuac chiruheb li tenamit, joꞌcan nak xinba̱nu li cꞌaꞌru xeꞌxye. Ba̱nu usilal, chacuy inma̱c.

²⁵ Ba̱nu usilal, yoꞌo chicuix re nak tinlokꞌoni li Ka̱cuaꞌ aran Gilgal, chan laj Saúl.

²⁶ Laj Samuel quixye re: —Incꞌaꞌ tinxic cha̱cuix xban nak xatzꞌekta̱na li ra̱tin li Dios. Ut li Ka̱cuaꞌ xatxtzꞌekta̱na la̱at re nak incꞌaꞌ chic tatcua̱nk chokꞌ xreyeb laj Israel, chan.

²⁷ Nak laj Samuel quixsukꞌisi rib re ta̱xic, laj Saúl quixchap li rakꞌ ut quipejeꞌ.

²⁸ Laj Samuel quixye re laj Saúl: —Li Ka̱cuaꞌ quixmakꞌ cha̱cuu la̱ cuanquil anakcuan ut quixqꞌue re jun chic kꞌaxal cha̱bil cha̱cuu la̱at.

²⁹ Li Ka̱cuaꞌ Dios, aꞌan lix lokꞌaleb laj Israel. Aꞌan incꞌaꞌ naticꞌtiꞌic, chi moco naxjal xcꞌaꞌux. Li Dios, aꞌan ma̱cuaꞌ yal cui̱nk re nak tixjal xcꞌaꞌux, chan.

³⁰ Laj Saúl quixye re: —La̱in xinma̱cob. Abanan nintzꞌa̱ma cha̱cuu nak ta̱qꞌue inlokꞌal chiruheb li nequeꞌcꞌamoc be chiruheb lin tenamit Israel ut chiruheb ajcuiꞌ chixjunileb li tenamit. Tatsukꞌi̱k cuochben re nak tinlokꞌoni li Ka̱cuaꞌ la̱ Dios, chan.

³¹ Joꞌcan nak laj Samuel co̱ chirix laj Saúl ut laj Saúl quixlokꞌoni li Ka̱cuaꞌ.

³² Ut laj Samuel quixye: —Cꞌamomak chak arin laj Agag, lix rey eb laj Amalec, chan. Quichal riqꞌuin laj Samuel laj Agag chi sa saꞌ xchꞌo̱l ut quixye saꞌ xchꞌo̱l, “Incꞌaꞌ chic tineꞌxcamsi” chan.

³³ Laj Samuel quixye re: —Riqꞌuin la̱ chꞌi̱chꞌ xacamsiheb li tenamit ut eb li naꞌbej queꞌcana chi ma̱cꞌaꞌeb chic xcocꞌal. Joꞌcan ajcuiꞌ la̱ naꞌ ta̱cana̱k chi ma̱cꞌaꞌ chic xcocꞌal, chan. Ut laj Samuel quixcamsi ut quixpedasi laj Agag chiru li Ka̱cuaꞌ aran Gilgal.

³⁴ Chirix aꞌan laj Samuel co̱ Ramá ut laj Saúl co̱ saꞌ rochoch aran Gabaa saꞌ lix naꞌaj.

³⁵ Ut laj Samuel incꞌaꞌ chic co̱ chirilbal laj Saúl chalen toj nak quicam. Abanan cꞌajoꞌ nak quirahoꞌ xchꞌo̱l xban. Ut li Ka̱cuaꞌ Dios quiyotꞌeꞌ xchꞌo̱l nak quixxakab laj Saúl chokꞌ xreyeb laj Israel.