1 Samuel 14 - Li Santil hu

¹ Saꞌ jun li cutan laj Jonatán quixye re lix mo̱s li nacꞌamoc re lix chꞌi̱chꞌ li napletic cuiꞌ: —Yoꞌo. Numeko jun pacꞌal li nimaꞌ re topletik riqꞌuineb lix solda̱deb aj filisteo li yo̱queb chi cꞌacꞌale̱nc saꞌ li naꞌajej aꞌan, chan. Ut laj Jonatán incꞌaꞌ quixye re laj Saúl lix yucuaꞌ nak ta̱xic.

² Laj Saúl cuan lix muheba̱l chire li tenamit Gabaa rubel jun li nimla cheꞌ granado li cuan saꞌ li naꞌajej Migrón. Cuakib ciento na li soldados cuanqueb rochben.

³ (Laj tij li cuan lix efod chirix, aꞌan laj Ahías li ralal laj Ahitob. Laj Ahitob, aꞌan li ri̱tzꞌin laj Icabod. Ut laj Icabod, aꞌan li ralal laj Finees. Laj Finees, aꞌan li ralal laj Elí laj tij li nacꞌanjelac chiru li Dios aran Silo.) Ma̱ ani quinaꞌoc re nak laj Jonatán co̱ bar cuanqueb cuiꞌ laj filisteo.

⁴ Saꞌ xcaꞌ pacꞌalil li be re Micmas cuan li ni̱nki sako̱nac. Li jun Boses xcꞌabaꞌ ut li jun chic Sene xcꞌabaꞌ. Laj Jonatán tento ta̱numekꞌ aran re ta̱xic saꞌ li naꞌajej cuanqueb cuiꞌ li jun chꞌu̱tal chi soldados aj filisteo.

⁵ Li sako̱nac jun cuan saꞌ li norte saꞌ xcaꞌyaba̱l li tenamit Micmas. Li jun chic cuan saꞌ li sur saꞌ xcꞌayaba̱l li tenamit Gabaa.

⁶ Laj Jonatán quixye re li natenkꞌan re: —Numeko jun pacꞌal bar cuanqueb cuiꞌ laj filisteo li incꞌaꞌ nequeꞌxpa̱b li Dios. Ma̱re chan nak li Ka̱cuaꞌ toxtenkꞌa xban nak chiru aꞌan ma̱cꞌaꞌ chꞌaꞌaj. Li Dios toxtenkꞌa chi numta̱c saꞌ xbe̱neb, usta nabalo, usta cuibo ajcuiꞌ, chan.

⁷ Ut li cui̱nk li natenkꞌan re quixye: —Ba̱nu li cꞌaꞌru nacacuaj xba̱nunquil. La̱in tatintenkꞌa, chan.

⁸ Laj Jonatán quixye re: —Yoꞌo cuanqueb cuiꞌ ut takacꞌut kib chiruheb.

⁹ Cui eb aꞌan teꞌxye ke “Choe̱roybeni aran. La̱o toxic cuanquex cuiꞌ”, chaꞌkeb, la̱o takoybeniheb ut incꞌaꞌ toxic cuanqueb cuiꞌ.

¹⁰ Cui ut eb aꞌan teꞌxye nak toxic riqꞌuineb, la̱o toxic xban nak aꞌan retalil chiku nak li Ka̱cuaꞌ tixkꞌaxtesiheb saꞌ kukꞌ, chan laj Jonatán.

¹¹ Joꞌcan nak queꞌco̱eb ut queꞌxcꞌut ribeb chiruheb laj filisteo. Ut eb laj filisteo queꞌxye: —¡Ilomakeb! Eb laj Israel yo̱queb chi e̱lc saꞌ li ochoch pec li queꞌxmuk cuiꞌ ribeb, chanqueb.

¹² Ut queꞌxjap reheb chixyebal re laj Jonatán ut li natenkꞌan re: —Quimkex arin. Cuan cꞌaꞌru takaye e̱re, chanqueb. Laj Jonatán quixye re laj te̱nkꞌ re: —Yoꞌo riqꞌuineb xban nak li Ka̱cuaꞌ ac xkꞌaxtesiheb laj filisteo saꞌ kukꞌ la̱o aj Israel, chan.

¹³ Ut laj Jonatán quitakeꞌ saꞌ li naꞌajej cuanqueb cuiꞌ laj filisteo. Ut li natenkꞌan re yo̱ chi xic chirix. Laj Jonatán naxtolcꞌosiheb chak eb laj filisteo ut laj te̱nkꞌ re naxcamsiheb.

¹⁴ Saꞌ li xbe̱n ple̱t aꞌan junmay tana li soldado li queꞌxcamsiheb laj Jonatán ut li natenkꞌan re saꞌ li chꞌina naꞌajej aꞌan.

¹⁵ Chixjunileb laj filisteo li cuanqueb saꞌ lix muheba̱leb queꞌxucuac joꞌ eb ajcuiꞌ li soldados li yo̱queb chi cꞌacꞌale̱nc. Ut queꞌxucuac ajcuiꞌ li nequeꞌxic chi elkꞌac. Nequeꞌsicsot xban xxiuheb. Qui-ecꞌan li chꞌochꞌ ut li Dios quixsach xnaꞌlebeb.

¹⁶ Ut eb lix soldado laj Saúl li yo̱queb chi cꞌacꞌale̱nc aran Gabaa saꞌ xnaꞌajeb li ralal xcꞌajol laj Benjamín queꞌril nak yo̱queb chi xucuac laj filisteo ut yo̱queb chi e̱lelic yalak bar.

¹⁷ Laj Saúl quixye reheb li cuanqueb rochben: —Chꞌutubomak chixjunileb li soldado ut te̱ril ani li ma̱ aniheb saꞌ kaya̱nk, chan. Nak queꞌxchꞌutubeb chixjunileb li soldados queꞌxqꞌue retal nak ma̱ ani laj Jonatán, chi moco li cui̱nk li natenkꞌan re.

¹⁸ Laj Saúl quixye re laj Ahías laj tij: —Cꞌam chak arin lix efod li Ka̱cuaꞌ, chan. (Saꞌ eb li cutan aꞌan laj Ahías yo̱ chixcꞌambal li efod chiruheb laj Israel.)

¹⁹ Toj yo̱ ajcuiꞌ chi a̱tinac laj Saúl riqꞌuin laj tij nak quiril nak eb laj filisteo yo̱queb chixpokokinquil ribeb ut incꞌaꞌ chic nequeꞌxtau cꞌaꞌru teꞌxba̱nu. Ut laj Saúl quixye re laj Ahías: —Ma̱cꞌam chak li efod. Canab cuan, chan.

²⁰ Ut queꞌxchꞌutub ribeb chixjunileb lix soldados li cuanqueb rochben laj Saúl ut queꞌco̱eb chi pletic riqꞌuineb laj filisteo. Eb laj filisteo yo̱queb chixcamsinquil ribeb chi ribileb rib xban nak sachso̱queb chic xnaꞌlebeb.

²¹ Cuanqueb xcomoneb laj Israel queꞌco̱eb saꞌ xya̱nkeb laj filisteo junxil. Queꞌxjal xcꞌaꞌuxeb ut queꞌoquen cuiꞌchic chirixeb laj Israel li cuanqueb rochben laj Saúl ut laj Jonatán.

²² Joꞌcan ajcuiꞌ eb laj Israel li queꞌxmuk ribeb saꞌ lix naꞌajeb li ralal xcꞌajol laj Efraín, li tzu̱l ru. Queꞌril nak yo̱queb chi e̱lelic laj filisteo. Queꞌco̱eb ajcuiꞌ eb aꞌan chi pletic riqꞌuineb laj filisteo.

²³ Queꞌpletic toj retal queꞌcuulac saꞌ li tenamit Bet-avén. Ut li Ka̱cuaꞌ Dios quixcoleb laj Israel saꞌ li cutan aꞌan.

²⁴ Saꞌ li cutan aꞌan tacuajenakeb li soldado aj Israel xban nak laj Saúl ac xba̱nu li juramento ut quixye: —Tzꞌekta̱nanbilak li ani ta̱cuaꞌak nak toj ma̱jiꞌ na-oc li kꞌojyi̱n cui toj ma̱jiꞌ nequeꞌke̱chaniheb laj filisteo, chan. Joꞌcan nak incꞌaꞌ queꞌcuaꞌac eb li soldados aj Israel.

²⁵ Eb li soldado aj Israel queꞌcuulac saꞌ jun li qꞌuicheꞌ. Ut aran queꞌxtau li xyaꞌal cab saꞌ li chꞌochꞌ.

²⁶ Nabal li xyaꞌal cab. Yo̱ chi be̱c rok. Abanan ma̱ ani quixchap re xban nak queꞌxucuac xban li juramento li quixye laj Saúl.

²⁷ Abanan laj Jonatán incꞌaꞌ quirabi li cꞌaꞌru quixye laj Saúl reheb li soldado. Joꞌcan nak quixchꞌic lix xukꞌ saꞌ li xyaꞌal cab ut quixlou li xyaꞌal cab li cuan chiru lix xukꞌ. Nak quixlou li xyaꞌal cab quicꞌulun xchꞌo̱l.

²⁸ Jun li soldado quixye re laj Jonatán: —La̱ yucuaꞌ quixba̱nu jun li juramento riqꞌuineb li soldados ut quixye nak tzꞌekta̱nanbilak li ani ta̱tzaca̱nk chiru li cutan aꞌin. Joꞌcan nak tacuajenako, chan.

²⁹ Laj Jonatán quixye re: —Incꞌaꞌ us xba̱nu lin yucuaꞌ. Qꞌue retal. La̱in xcꞌulun inchꞌo̱l xban li xyaꞌal cab li xinlou.

³⁰ Us raj cui ta eb li kasoldados queꞌxtzaca li tzacae̱mk li queꞌre̱chani riqꞌuineb laj filisteo. Kꞌaxal raj cuiꞌchic nabaleb laj filisteo xeꞌkacamsi, chan.

³¹ Saꞌ li cutan aꞌan eb laj Israel queꞌnumta saꞌ xbe̱neb laj filisteo chalen saꞌ li tenamit Micmas toj saꞌ li tenamit Ajalón. Abanan kꞌaxal tacuajenakeb li tenamit.

³² Queꞌco̱eb saꞌ junpa̱t bar cuan cuiꞌ li cꞌaꞌak re ru li xeꞌre̱chani saꞌ li ple̱t. Ut aran queꞌxcamsiheb li cuacax ut li cocꞌ ral. Ut queꞌxcamsiheb ajcuiꞌ li carner ut queꞌxtiu li tib rech xiquic lix quiqꞌuel.

³³ Quiyeheꞌ resil re laj Saúl nak eb laj Israel yo̱queb chi ma̱cobc chiru li Dios xban nak yo̱queb chixtzacanquil li tib li toj cuan xquiqꞌuel. Laj Saúl quixye reheb: —La̱ex xekꞌet li ra̱tin li Dios. Ayukex ut cꞌamomak chak junak li nimla pec arin, chan reheb.

³⁴ Ut quixye ajcuiꞌ reheb: —Yehomak reheb li tenamit nak chi xjunju̱nkaleb teꞌxcꞌam chak eb lix cuacax ut eb lix carner. Teꞌxcamsiheb arin ut teꞌxtiu re nak incꞌaꞌ teꞌma̱cobk chiru li Dios riqꞌuin xtiubal lix quiqꞌuel li xul, chan. Saꞌ li kꞌojyi̱n aꞌan chixju̱nkaleb queꞌxcꞌam lix cuacax ut lix carner ut queꞌxcamsiheb saꞌ li naꞌajej aꞌan re teꞌxtiu.

³⁵ Ut laj Saúl quixyi̱b jun li artal re li Ka̱cuaꞌ. Aꞌan li xbe̱n artal li quixyi̱b chiru li Dios.

³⁶ Laj Saúl quixye reheb lix soldado: —Yoꞌkeb chi pletic riqꞌuineb laj filisteo chiru li kꞌojyi̱n aꞌin. Topletik riqꞌuineb toj ta̱sake̱uk re nak ma̱ jun chic reheb ta̱cana̱k chi yoꞌyo, chan. Eb li soldados queꞌxye: —La̱o takaba̱nu joꞌ ta̱ye, chanqueb. Abanan laj tij quixye: —Kapatzꞌak xbe̱n cua re li Dios ma us toxic chi pletic malaj ut incꞌaꞌ us, chan.

³⁷ Ut laj Saúl quitijoc ut quixye re li Dios: —¿Ma us toxic chi pletic riqꞌuineb laj filisteo? ¿Ma ta̱kꞌaxtesiheb saꞌ kukꞌ? chan. Abanan li Dios incꞌaꞌ quixsume lix tij saꞌ li cutan aꞌan.

³⁸ Joꞌcan nak laj Saúl quixbokeb li nequeꞌcꞌamoc be saꞌ xya̱nkeb li soldados ut quixye reheb: —Quimkex arin. Takatzꞌil a̱tin re xnaubal ani xma̱cob chiru li cutan aꞌin.

³⁹ Saꞌ xcꞌabaꞌ li yoꞌyo̱quil Dios li nacoloc ke la̱o aj Israel, la̱in ninye e̱re nak ta̱camsi̱k li ani cuan xma̱c, usta aꞌan laj Jonatán li cualal, chan laj Saúl. Abanan ma̱ jun saꞌ xya̱nkeb quichakꞌoc.

⁴⁰ Ut laj Saúl quixye reheb: —La̱ex texxakli̱k aran ut la̱in tinxakli̱k arin cuochben laj Jonatán li cualal, chan. Ut eb li soldados queꞌxye: —Ba̱nu li cꞌaꞌru nacacꞌoxla nak us xba̱nunquil, chanqueb.

⁴¹ Laj Saúl quitijoc ut quixye re li Ka̱cuaꞌ: —At Ka̱cuaꞌ, at kaDios la̱o aj Israel, ¿cꞌaꞌut nak incꞌaꞌ xasume lin tij anakcuan? Cui la̱in ut laj Jonatán cuan kama̱c, nak tobu̱lik, ta̱e̱lk li Urim. Cui ut eb li soldados cuanqueb xma̱queb, ta̱e̱lk li Tumin, chan. Ut nak queꞌbu̱lic, quicꞌutun nak laj Saúl ut laj Jonatán cuanqueb xma̱c. Ma̱cuaꞌeb li soldados li cuanqueb xma̱c.

⁴² Ut laj Saúl quixye reheb: —Texbu̱lik re rilbal ma la̱in cuan inma̱c, malaj ut laj Jonatán cuan xma̱c, chan. Ut nak queꞌbu̱lic, quicꞌutun nak laj Jonatán cuan xma̱c.

⁴³ Laj Saúl quixye re laj Jonatán: —Ye cue cꞌaꞌru li ma̱c xaba̱nu, chan. Laj Jonatán quixye re: —La̱in xinlou caꞌchꞌin li xyaꞌal cab li xcana chi ruꞌuj lin xukꞌ. ¿Ma yal xban aꞌan nak tinca̱mk? chan.

⁴⁴ Laj Saúl quixye re laj Jonatán: —At Jonatán, li Dios tinixqꞌue chixtojbal inma̱c cui incꞌaꞌ tatca̱mk la̱at anakcuan, chan.

⁴⁵ Abanan eb li soldados queꞌxye re laj Saúl: —¿Ma ta̱ru̱k ta biꞌ ta̱ca̱mk laj Jonatán? Incꞌaꞌ, xban nak aꞌan xcoloc ke la̱o aj Israel chiruheb laj filisteo. Incꞌaꞌ ta̱ru̱k ta̱camsi̱k. Saꞌ xcꞌabaꞌ li yoꞌyo̱quil Dios nakaye nak chi moco jun li rismal xjolom ta̱isi̱k xban nak li cꞌaꞌru quixba̱nu anakcuan, quixba̱nu xban nak li Ka̱cuaꞌ quitenkꞌan re, chanqueb. Joꞌcan nak eb li soldados queꞌxcol laj Jonatán ut incꞌaꞌ quicamsi̱c.

⁴⁶ Ut laj Saúl quixcanab pletic riqꞌuineb laj filisteo ut eb laj filisteo queꞌsukꞌi cuiꞌchic saꞌ xnaꞌajeb.

⁴⁷ Nak ac x-oc laj Saúl chokꞌ xreyeb laj Israel, quipletic riqꞌuineb chixjunileb li xicꞌ nequeꞌiloc reheb. Quipletic riqꞌuineb laj Moab, ut eb laj Amón, ut eb laj Edom. Ut quipletic ajcuiꞌ riqꞌuineb lix reyeb laj Soba, joꞌ eb ajcuiꞌ laj filisteo. Saꞌ chixjunil li tenamit li queꞌpletic cuiꞌ, eb laj Israel queꞌnumta saꞌ xbe̱neb li xicꞌ nequeꞌiloc reheb.

⁴⁸ Cau xchꞌo̱l chi pletic laj Saúl. Quixchꞌutubeb lix soldados ut quinumta saꞌ xbe̱neb laj Amalec. Ut quixcoleb laj Israel chiruheb chixjunileb li nequeꞌelkꞌan re li cꞌaꞌru reheb.

⁴⁹ Cuanqueb oxibeb li ralal laj Saúl. Aꞌaneb laj Jonatán, laj Isúi, ut laj Malquisúa. Ut cuanqueb ajcuiꞌ cuib xrabin. Li asbej, aꞌan lix Merab xcꞌabaꞌ ut li i̱tzꞌinbej, aꞌan lix Mical.

⁵⁰ Li rixakil laj Saúl, aꞌan lix Ahinoam, lix rabin laj Ahimaas. Ut li nataklan saꞌ xbe̱neb lix soldados, aꞌan laj Abner, li ralal laj Ner. Laj Ner, aꞌan rican laj Saúl.

⁵¹ Lix yucuaꞌ laj Saúl, aꞌan laj Cis. Ut laj Ner, aꞌan lix yucuaꞌ laj Abner. Laj Cis ut laj Ner, aꞌaneb li ralal laj Abiel.

⁵² Joꞌ najtil quiyoꞌyo, laj Saúl cau quipletic riqꞌuineb laj filisteo. Joꞌcan nak quixqꞌue saꞌ xya̱nkeb lix soldados chixjunileb li cui̱nk li cauheb xchꞌo̱l ut cauheb rib.