1 Samuel 13 - Li Santil hu

¹ Ac cuan xchihab laj Saúl nak quixtiquib takla̱nc saꞌ xbe̱neb laj Israel. Nak ac cuan cuib chihab roquic chokꞌ rey aran Israel,

² quixsiqꞌueb ru oxib mil li soldado saꞌ xya̱nkeb laj Israel. Cuib mil queꞌcana rochben laj Saúl aran Micmas, ut saꞌ eb li tzu̱l Bet-el. Ut eb li jun mil chic queꞌcana rochben laj Jonatán aran Gabaa saꞌ lix naꞌajeb li ralal xcꞌajol laj Benjamín. Ut eb li jun chꞌol chic queꞌtakla̱c saꞌ xmuheba̱leb.

³ Laj Jonatán quixcamsiheb jun chꞌu̱tal chi xsoldado laj filisteo aran Gabaa. Ut eb laj filisteo queꞌrabi resil. Tojoꞌnak laj Saúl quixtakla xya̱basinquil li trompeta saꞌ chixjunil li tenamit re nak chixjunileb teꞌxnau cꞌaꞌru quicꞌulman.

⁴ Joꞌcan nak chixjunileb laj Israel queꞌrabi resil nak laj Saúl ac xeꞌxcamsi li jun chꞌu̱tal chi soldado li yo̱queb chi cꞌacꞌale̱nc aran Gabaa. Queꞌxnau nak xicꞌ nequeꞌileꞌ xbaneb laj filisteo. Ut chixjunileb queꞌco̱eb Gilgal re teꞌxchꞌutub ribeb riqꞌuin laj Saúl.

⁵ Ut eb laj filisteo queꞌxchꞌutub ribeb chi pletic riqꞌuineb laj Israel. Cuanqueb laje̱b xcaꞌcꞌa̱l mil (30,000) chi carruaje re pletic, cuanqueb cuakib mil (6,000) li soldado li nequeꞌxic chirix cacua̱y, ut cuanqueb ajcuiꞌ nabaleb li soldado li nequeꞌxic chi rokeb joꞌ xqꞌuial li samaib li cuan chire li palau. Queꞌco̱eb ut queꞌxyi̱b lix muheba̱leb aran Micmas li nacana saꞌ xjayal li tenamit Bet-avén, li na-el cuiꞌ chak li sakꞌe.

⁶ Eb laj Israel queꞌril nak cuanqueb saꞌ chꞌaꞌajquilal ut incꞌaꞌ chic queꞌxtau cꞌaꞌru teꞌxba̱nu re xcolbaleb rib. Queꞌxmuk ribeb saꞌ eb li ochoch pec, saꞌ eb li jul, saꞌ eb li sako̱nac, ut saꞌ xya̱nkeb li ni̱nki pec ut queꞌxmuk ajcuiꞌ ribeb saꞌ eb li rok haꞌ li ma̱cꞌaꞌ haꞌ chi saꞌ.

⁷ Cuanqueb ajcuiꞌ laj Israel li queꞌco̱eb jun pacꞌal li nimaꞌ Jordán xbaneb xxiu saꞌ lix naꞌajeb li ralal xcꞌajol laj Gad ut laj Galaad. Abanan laj Saúl quicana aran Gilgal. Ut nequeꞌsicsot xbaneb xxiu chixjunileb li cuanqueb rochben.

⁸ Ut laj Saúl quiroybeni cuukub cutan, joꞌ quiyeheꞌ re xban laj Samuel. Abanan laj Samuel quibay ut incꞌaꞌ quicuulac Gilgal. Xban aꞌan nak queꞌoc chi xic li soldados.

⁹ Joꞌcan nak laj Saúl quixye reheb: —Cꞌamomak chak li xul re takacꞌat ut tomayejak ajcuiꞌ re xcꞌambal kib saꞌ usilal riqꞌuin li Dios, chan. Ut laj Saúl quixcꞌat li mayej xul.

¹⁰ Ut nak quirakeꞌ chixcꞌatbal li mayej xul quicuulac laj Samuel. Co̱ laj Saúl chixcꞌulbal ut chixqꞌuebal xsahil xchꞌo̱l.

¹¹ Tojoꞌnak quixye laj Samuel: —¿Cꞌaꞌru xaba̱nu? Ut quixye laj Saúl: —La̱in xcuil nak eb li soldado yo̱queb chi xic xban nak la̱at incꞌaꞌ xatcꞌulun chiru li jarub cutan xaye cue. Ut xinqꞌue retal nak eb laj filisteo ac xeꞌxchꞌutub ribeb aran Micmas.

¹² La̱in xincꞌoxla nak teꞌxtiquib pletic cuiqꞌuin arin Gilgal, ut la̱in toj ma̱jiꞌ nintzꞌa̱ma rusilal li Ka̱cuaꞌ saꞌ inbe̱n. Joꞌcan nak xinmayeja li cꞌatbil xul chiru li Dios, chan laj Saúl.

¹³ Ut laj Samuel quixye re laj Saúl: —Xma̱cꞌaꞌil a̱naꞌleb xakꞌet cuiꞌ xchakꞌrab li Dios. Incꞌaꞌ xaba̱nu li naxye saꞌ li chakꞌrab li quixqꞌue a̱cue li Ka̱cuaꞌ la̱ Dios. Cui ta xaba̱nu li quixye a̱cue, li Ka̱cuaꞌ xxakab raj la̱ cuanquil saꞌ xnaꞌaj chi junelic, la̱at ut eb la̱ cualal a̱cꞌajol.

¹⁴ Abanan anakcuan incꞌaꞌ chic ta̱cua̱nk a̱cuanquil chi junelic xban nak xakꞌet xchakꞌrab li Dios. Li Ka̱cuaꞌ ac xsicꞌ ru jun chic li cui̱nk li tixba̱nu joꞌ naraj li Dios. Ut aꞌan chic ta̱takla̱nk saꞌ xbe̱neb laj Israel xban nak xakꞌet li ra̱tin li Ka̱cuaꞌ, chan.

¹⁵ Laj Samuel qui-el Gilgal ut co̱ Gabaa saꞌ xnaꞌajeb li ralal xcꞌajol laj Benjamín. Laj Saúl quirajla lix soldados li cuanqueb rochben ut cuakib ciento (600) aj chic li soldados li cuanqueb rochben.

¹⁶ Laj Saúl ut laj Jonatán li ralal joꞌqueb ajcuiꞌ li soldado li cuanqueb rochbeneb queꞌcana aran Gabaa saꞌ xnaꞌajeb li ralal xcꞌajol laj Benjamín. Ut eb laj filisteo cuanqueb lix muheba̱leb aran Micmas.

¹⁷ Oxib chꞌu̱taleb lix soldado laj filisteo queꞌco̱eb chixmakꞌbal li cꞌaꞌru reheb laj Israel. Li xbe̱n chꞌu̱tal queꞌco̱eb saꞌ li be li naxic Ofra saꞌ li naꞌajej Sual.

¹⁸ Li xcab chꞌu̱tal queꞌco̱eb Bet-horón ut li rox chꞌu̱tal queꞌco̱eb saꞌ li nuba̱l re li ru takꞌa re laj Zeboim saꞌ xjayal li chaki chꞌochꞌ.

¹⁹ Ma̱ jun aj tenol chꞌi̱chꞌ cuan saꞌ xya̱nkeb laj Israel xban nak eb laj filisteo incꞌaꞌ queꞌraj nak eb laj Israel teꞌxyi̱b lix chꞌi̱chꞌ re pletic.

²⁰ Tento nak eb laj Israel nequeꞌxic riqꞌuineb laj filisteo re nak eb aꞌan teꞌxqꞌue xkꞌesnal lix chꞌi̱chꞌeb, lix ma̱leb, lix asaroneb, joꞌ eb ajcuiꞌ li chꞌi̱chꞌ li nequeꞌxbec cuiꞌ lix chꞌochꞌ.

²¹ Queꞌxtoj cuib chi tumin plata re nak ta̱qꞌuehekꞌ xkꞌesnal lix chꞌi̱chꞌeb re becoc chꞌochꞌ ut li asaron. Ut queꞌxtoj jun chi tumin plata re ta̱qꞌuehekꞌ xkꞌesnal li ma̱l ut li chꞌi̱chꞌ.

²² Xban aꞌan nak quicuulac xkꞌehil li pletic ma̱ jun li soldado aj Israel cuan xchꞌi̱chꞌ re pletic. Caꞌaj cuiꞌ laj Saúl ut laj Jonatán cuanqueb xchꞌi̱chꞌ saꞌ rukꞌeb.

²³ Jun chꞌu̱tal chi soldados aj filisteo yo̱queb chi cꞌacꞌale̱nc saꞌ li be li naxic Micmas.