1 Samuel 11 - Li Santil hu

¹ Laj Nahas, lix reyeb laj Amón, quixcauresiheb lix soldado ut queꞌco̱eb Jabes re Galaad re teꞌpletik riqꞌuineb. Eb li cui̱nk li cuanqueb Jabes re Galaad queꞌxye re: —Ba̱nu jun li contrato kiqꞌuin ut la̱o takacanab kib rubel a̱cuanquil, chanqueb.

² Ut laj Nahas quixye reheb: —La̱in tinba̱nu jun li contrato e̱riqꞌuin. Abanan tento nak che̱ju̱nkalex tine̱canab chirisinquil li xnakꞌ e̱ru li cuan saꞌ le̱ nim, re nak tincꞌut e̱xuta̱n la̱ex aj Israel, chan.

³ Eb li nequeꞌtaklan aran Jabes queꞌxye re: —Oybenihomak cuukubak cutan re nak takataklaheb li katakl riqꞌuineb chixjunileb laj Israel. Cui ma̱ ani nachal chi coloc ke, la̱o takakꞌaxtesi kib rubel e̱cuanquil, chanqueb.

⁴ Eb li takl queꞌcuulac aran Gabaa saꞌ lix tenamit laj Saúl ut queꞌxye reheb li cꞌaꞌru teꞌxba̱nu eb laj Amón. Nak queꞌrabi li resil aꞌan, queꞌrahoꞌ xchꞌo̱leb ut queꞌoc chi ya̱bac chixjunileb li tenamit.

⁵ Laj Saúl yo̱ chak chi sukꞌi̱c saꞌ cꞌaleba̱l rochben lix bo̱yx. Quixye: —¿Cꞌaꞌru xeꞌxcꞌul li tenamit nak yo̱queb chi ya̱bac? chan. Ut queꞌxye re li cꞌaꞌru queꞌxye li takl li queꞌchal chak Jabes.

⁶ Laj Saúl quirecꞌa nak lix musikꞌ li Dios quichal saꞌ xbe̱n ut cꞌajoꞌ nak quijoskꞌoꞌ nak quirabi li queꞌxye li takl.

⁷ Quixchap cuib li bo̱yx ut quixsetiheb. Quixtakla li tib saꞌ chixjunileb li tenamit Israel. Quixtakla xyebal reheb: —Joꞌcaꞌin takaba̱nu reheb lix bo̱yxeb li incꞌaꞌ teꞌoque̱nk chixtenkꞌanquil chi pletic laj Saúl ut laj Samuel, chan. Cꞌajoꞌ nak queꞌxucuac eb laj Israel. Chi junajeb xchꞌo̱leb queꞌxchꞌutub ribeb re teꞌxic chi pletic.

⁸ Laj Saúl quixchꞌutubeb li cui̱nk aran Bezec ut queꞌajla̱c. Cuanqueb oxib ciento mil (300,000) chi cui̱nk aj Israel ut cuanqueb ajcuiꞌ laje̱b xcaꞌcꞌa̱l mil (30,000) chi cui̱nk aj Judá.

⁹ Quixye reheb li takl li queꞌchal chak Jabes re Galaad: —Saꞌ cuaꞌleb texkacol, chan. Ut eb li takl queꞌco̱eb cuiꞌchic ut queꞌxye reheb li cuanqueb Jabes li cꞌaꞌru quixye laj Saúl. Cꞌajoꞌ nak queꞌsahoꞌ saꞌ xchꞌo̱leb.

¹⁰ Queꞌxye reheb laj Amón: —Cuulaj takakꞌaxtesi kib saꞌ e̱rukꞌ ut te̱ba̱nu li cꞌaꞌru nequeraj kiqꞌuin, chanqueb.

¹¹ Cuulajak chic nak toj ekꞌela, laj Saúl quixjachi lix soldado saꞌ oxib jachal. Nak quisake̱u, queꞌco̱eb saꞌ junpa̱t saꞌ li naꞌajej li cuanqueb cuiꞌ lix muheba̱leb laj Amón ut queꞌoc chi pletic riqꞌuineb. Nak quicuaꞌleboꞌ ac xeꞌxcamsiheb laj Amón ut li incꞌaꞌ queꞌcamsi̱c queꞌxjeqꞌui ribeb ut queꞌe̱lelic chi xjunju̱nkaleb. Ma̱ jun reheb quicana chi cuan rochben.

¹² Eb laj Israel queꞌxye re laj Samuel: —¿Aniheb li cui̱nk li queꞌxye nak laj Saúl incꞌaꞌ ta̱takla̱nk saꞌ kabe̱n? Kꞌaxtesiheb saꞌ kukꞌ re takacamsiheb, chanqueb.

¹³ Ut laj Saúl quixye reheb: —Ma̱ jun reheb laj Israel ta̱camsi̱k anakcuan xban nak saꞌ li cutan aꞌin li Ka̱cuaꞌ coxcol la̱o aj Israel, chan.

¹⁴ Chirix chic aꞌan, laj Samuel quixye reheb li tenamit: —Quimkex. Yoꞌkeb Gilgal re nak takaxakab chi junaj cua laj Saúl chokꞌ rey, chan.

¹⁵ Chixjunileb li tenamit queꞌco̱eb Gilgal ut queꞌxxakab laj Saúl chokꞌ rey chiru li Ka̱cuaꞌ. Ut aran queꞌmayejac ut queꞌxqꞌue xmayejeb re xcꞌambaleb rib saꞌ usilal riqꞌuin li Ka̱cuaꞌ. Quisahoꞌ saꞌ xchꞌo̱l laj Saúl ut queꞌsahoꞌ ajcuiꞌ saꞌ xchꞌo̱leb chixjunileb li tenamit.