1 Samuel 1 - Li Santil hu

Laj Elcana ut lix Ana

¹ Quicuan jun li cui̱nk aj Elcana xcꞌabaꞌ saꞌ li tenamit Ramá, li cuan saꞌ xnaꞌajeb li ralal xcꞌajol laj Efraín, li tzu̱l ru. Laj Elcana, aꞌan li ralal laj Jeroham. Lix yucuaꞌ laj Jeroham, aꞌan laj Eliú. Ut laj Eliú, aꞌan li ralal laj Tohu ut laj Tohu, aꞌan li ralal laj Zuf xcomoneb li ralal xcꞌajol laj Efraín.

² Laj Elcana quicuan cuib li rixakil. Li jun, xAna xcꞌabaꞌ ut li jun chic xPenina xcꞌabaꞌ. Lix Penina cuan xcocꞌal, abanan lix Ana ma̱cꞌaꞌ xcocꞌal.

³ Laj Elcana rajlal chihab naxic Silo chi lokꞌoni̱nc ut chixqꞌuebal lix mayej chiru li nimajcual Dios. Aran Silo cuan laj Elí laj tij rochbeneb li cuib chi ralal, laj Ofni ut laj Finees. Aꞌan aj tijeb ajcuiꞌ chiru li Dios.

⁴ Nak nacuulac xkꞌehil laj Elcana naxqꞌue lix mayej chiru li Dios. Ut naxqꞌue ajcuiꞌ re lix Penina li rixakil li joꞌ qꞌuial li natzꞌak. Ut naxqꞌue ajcuiꞌ reheb li ralal xcꞌajol.

⁵ Naxqꞌue ajcuiꞌ re lix Ana, abanan sicꞌbil ru li naxqꞌue re xban nak kꞌaxal naxra, usta li Dios incꞌaꞌ quixqꞌue chi qꞌuiresi̱nc.

⁶ Joꞌcan nak lix Penina li xcab rixakil naxchꞌiꞌchꞌiꞌi lix Ana ut naxqꞌue xrahil xchꞌo̱l rajlal xban nak li Dios incꞌaꞌ quixqꞌue chi qꞌuiresi̱nc.

⁷ Rajlal chihab nak nequeꞌxic chi lokꞌoni̱nc saꞌ li rochoch li Dios, lix Penina rajlal naxqꞌue chi rahocꞌ xchꞌo̱l lix Ana. Joꞌcan nak lix Ana naya̱bac ut incꞌaꞌ chic nacuaꞌac xban xrahil xchꞌo̱l.

⁸ Ut laj Elcana lix be̱lom lix Ana quixye re: —¿Cꞌaꞌut nak nacatya̱bac? Ut, ¿cꞌaꞌut nak incꞌaꞌ chic nacatcuaꞌac? ¿Cꞌaꞌut nak junelic ra a̱chꞌo̱l? ¿Ma incꞌaꞌ ta biꞌ kꞌaxal us nak cuanquin la̱in chiru laje̱bak chi cocꞌal? chan re.

⁹ Nak cuan lix Ana aran Silo, co̱ saꞌ rochoch li Dios nak ac xrakeꞌ chi tzaca̱nc. Ut laj Elí laj tij chunchu chire li oqueba̱l saꞌ jun li tem.

¹⁰ Lix Ana qui-oc chi tijoc chiru li Ka̱cuaꞌ chi ra saꞌ xchꞌo̱l ut cꞌajoꞌ nak quiya̱bac.

¹¹ Quitijoc chiru li Dios ut quixye: —At nimajcual Dios, chacuil taxak xtokꞌoba̱l cuu xban nak cꞌajoꞌ xrahil saꞌ inchꞌo̱l. Chinjulticokꞌ taxak a̱cue ut incꞌaꞌ taxak ta̱sachk saꞌ a̱chꞌo̱l. Ta̱qꞌue taxak junak incꞌulaꞌal te̱lom ut la̱in tinkꞌaxtesi ajcuiꞌ a̱cue chalen nak ta̱yoꞌla̱k toj chirix lix camic ut incꞌaꞌ ta̱besma̱nk li rismal xjolom, chan.

¹² Najt quitijoc chiru li nimajcual Dios ut laj Elí yo̱ chixqꞌuebal retal lix tzꞌu̱mal re lix Ana nak yo̱ chi tijoc.

¹³ Nak lix Ana yo̱ chi tijoc, caꞌaj cuiꞌ lix tzꞌu̱mal re na-ecꞌan ut laj Elí incꞌaꞌ narabi li cꞌaꞌru yo̱ chixyebal. Joꞌcan nak laj Elí quixcꞌoxla nak ta̱cala̱k.

¹⁴ Ut quixye re: —¿Jokꞌe ta̱canab cala̱c? Ma̱cuucꞌ chic li vino, chan.

¹⁵ Ut lix Ana quixye re: —La̱in incꞌaꞌ yo̱quin chi ucꞌac, at Ka̱cuaꞌ. Incꞌaꞌ nincala. Yo̱quin ban xyotꞌbal inchꞌo̱l chiru li Ka̱cuaꞌ xban nak cꞌajoꞌ li raylal nincꞌul.

¹⁶ Ma̱cꞌoxla nak la̱in jun ixk incꞌaꞌ us innaꞌleb. La̱in yo̱quin chi tijoc chiru li Dios xban nak cꞌajoꞌ li raylal li yo̱quin chixcꞌulbal, chan.

¹⁷ Ut laj Elí quixye re lix Ana: —Ayu chi cꞌojcꞌo a̱chꞌo̱l. Ut aꞌ taxak li Dios li nequeꞌxlokꞌoni laj Israel chi qꞌuehoc a̱cue li cꞌaꞌru xatzꞌa̱ma chiru, chan.

¹⁸ Lix Ana quixchakꞌrabi laj Elí ut quixye re: —Kꞌaxal us raj nak tincꞌul ta li xintzꞌa̱ma joꞌ xaye, chan. Ut chirix aꞌan lix Ana quisukꞌi saꞌ li naꞌajej li yo̱ cuiꞌ chi hila̱nc ut quicuaꞌac. Ut chalen aꞌan, incꞌaꞌ chic quirahoꞌ saꞌ xchꞌo̱l.

Lix yoꞌlajic laj Samuel

¹⁹ Joꞌ cuulajak chic queꞌcuacli toj ekꞌela ut co̱eb chixlokꞌoninquil li Dios. Ut chirix aꞌan queꞌsukꞌi saꞌ li rochocheb aran Ramá. Ut laj Elcana quicuan riqꞌuin lix Ana li rixakil ut quicana chi yaj aj ixk. Joꞌcaꞌin nak li Dios quixsume lix tij lix Ana.

²⁰ Quicuulac xkꞌehil nak quiyoꞌla lix cꞌulaꞌal lix Ana. Ut aj Samuel quixqꞌue chokꞌ xcꞌabaꞌ xban nak li cꞌulaꞌal aꞌan tzꞌa̱manbil chiru li Dios.

²¹ Ut laj Elcana co̱ cuiꞌchic Silo chixqꞌuebal lix mayej chiru li Ka̱cuaꞌ rochbeneb li ralal xcꞌajol joꞌ naxba̱nu rajlal chihab. Quixba̱nu li cꞌaꞌru quixyechiꞌi re li Dios.

²² Abanan lix Ana incꞌaꞌ co̱ chirixeb. Joꞌcan nak quixye re lix be̱lom: —La̱in incꞌaꞌ tinxic. Toj tinmakꞌ xtuꞌ lin cꞌulaꞌal, tojoꞌnak tinxic chixkꞌaxtesinquil re li Ka̱cuaꞌ. Ut aran ta̱cana̱k chi junaj cua, chan re.

²³ Laj Elcana quixye re lix Ana: —Ba̱nu joꞌ nacacꞌoxla nak us xba̱nunquil. Cana̱kat toj ta̱makꞌ xtuꞌ li cꞌulaꞌal. Ut aꞌ taxak li Dios chitenkꞌa̱nk a̱cue chixba̱nunquil li cꞌaꞌru xayechiꞌi re li Dios, chan. Ut lix Ana quicana saꞌ rochoch ut quixqꞌuiresi li cꞌulaꞌal toj quixmakꞌ xtuꞌ.

²⁴ Ut nak ac xmakꞌ xtuꞌ li cꞌulaꞌal, quixcꞌam saꞌ rochoch li Dios aran Silo, usta toj caꞌchꞌin. Quixcꞌam ajcuiꞌ oxib cuacax toj sa̱jeb, jun chacach li cꞌaj ut jun cuc vino.

²⁵ Queꞌxcamsi li cuacax ut queꞌxcꞌam li cꞌulaꞌal chiru laj Elí.

²⁶ Ut lix Ana quixye re laj Elí: —At ka̱cuaꞌ, relic chi ya̱l nak la̱in li ixk li quincꞌulun chi tijoc arin chiru li nimajcual Dios nak chunchu̱cat chire li oqueba̱l.

²⁷ La̱in quintzꞌa̱ma chiru li Dios nak tixqꞌue junak lin cꞌulaꞌal. Ut aꞌan xqꞌue cue li cꞌulaꞌal aꞌin.

²⁸ Joꞌcan nak xinchal chixkꞌaxtesinquil chiru li nimajcual Dios li cꞌulaꞌal aꞌin re ta̱cꞌanjelak chiru joꞌ najtil ta̱cua̱nk saꞌ ruchichꞌochꞌ, chan. Ut queꞌxlokꞌoni li Dios.