1 Reyes 9 - Li Santil hu

Li Dios quixcꞌutbesi cuiꞌchic rib chiru laj Salomón

¹ Laj Salomón quixchoy xyi̱banquil lix templo li Ka̱cuaꞌ joꞌ ajcuiꞌ lix palacio ut chixjunil li quiraj xyi̱banquil.

² Li Ka̱cuaꞌ quixcꞌutbesi rib chiru laj Salomón xcaꞌ sut joꞌ nak quixcꞌutbesi rib chiru aran Gabaón.

³ Ut li Ka̱cuaꞌ quixye re: —Xcuabi la̱ tij nak xatzꞌa̱ma chicuu. La̱in xinsantobresi li templo aꞌin li xayi̱b re tinlokꞌoni̱k cuiꞌ chi junelic. La̱in junelic tincua̱nk saꞌ li templo ut la̱in tin-ilok re chi junelic.

⁴ Chatcua̱nk saꞌ xya̱lal chicuu joꞌ nak quicuan laj David la̱ yucuaꞌ. Chaba̱nu saꞌ ti̱quilal chixjunil li naxye saꞌ li chakꞌrab.

⁵ Cui ta̱ba̱nu li cꞌaꞌru xinye a̱cue, la̱in tinxakab saꞌ xnaꞌaj la̱ cuanquilal, ut la̱at junelic tattakla̱nk saꞌ xbe̱neb laj Israel joꞌ quinye re laj David la̱ yucuaꞌ nak junelic ta̱cua̱nk junak reheb li ralal xcꞌajol chokꞌ xreyeb laj Israel.

⁶ Abanan cui la̱at ut eb la̱ cualal a̱cꞌajol te̱canab xba̱nunquil li naxye lin chakꞌrab, ut incꞌaꞌ te̱ba̱nu li cꞌaꞌru xinye e̱re, ut cui la̱ex tex-oc chixlokꞌoninquil li jalanil dios ut texcꞌanjelak chiruheb,

⁷ cui te̱ba̱nu chi joꞌcan la̱in texcuisi che̱junilex la̱ex aj Israel saꞌ li chꞌochꞌ li xinqꞌue e̱re. Ut li templo aꞌin li xinsantobresi chokꞌ re inlokꞌoninquil tinsach ru. Ut le̱ tenamit Israel ta̱hobekꞌ ut ta̱seꞌe̱k xbaneb li jalan tenamiteb.

⁸ Li ani teꞌnumekꞌ aran teꞌsachk xchꞌo̱leb ut teꞌxseꞌe li templo li qꞌuebil xlokꞌal ut teꞌxye, “¿Cꞌaꞌut nak li Ka̱cuaꞌ xba̱nu chi joꞌcaꞌin re li tenamit aꞌin ut re li templo aꞌin?” chaꞌkeb.

⁹ Ut eb li jun chꞌol chic teꞌxye, “Joꞌcaꞌin xeꞌxcꞌul xban nak xeꞌxtzꞌekta̱na li Ka̱cuaꞌ Dios li qui-isin chak reheb lix xeꞌto̱nil xyucuaꞌeb aran Egipto. Ut xeꞌoc chixlokꞌoninquil li jalanil dios ut chi cꞌanjelac chiruheb. Joꞌcan nak li Ka̱cuaꞌ xqꞌue li raylal aꞌin saꞌ xbe̱neb,” chaꞌkeb.—

¹⁰ Quinumeꞌ junmay chihab xyi̱banquil lix templo li Dios ut lix palacio li rey Salomón.

¹¹ Laj Hiram lix reyeb laj Tiro quixqꞌue li cꞌaꞌru quicꞌanjelac chiru laj Salomón re li cablac. Quixqꞌue nabal li cheꞌ chacalteꞌ ut ciprés ut quixqꞌue ajcuiꞌ nabal li oro. Joꞌcan nak laj Salomón quixqꞌue re laj Hiram junmay chi tenamit li cuanqueb Galilea.

¹² Laj Hiram co̱ chirilbaleb li tenamit li quiqꞌueheꞌ re xban laj Salomón. Abanan incꞌaꞌ quicuulac chiru.

¹³ Ut quixye: —¿Ma aꞌin eb li tenamit xaqꞌue cue, at cha̱bil cuami̱g? chan re laj Salomón. Ut quixqꞌue “Cabul” chokꞌ xcꞌabaꞌeb li tenamit aꞌan toj chalen anakcuan.

¹⁴ Laj Hiram quixsi re laj Salomón caꞌchꞌin chic ma̱ jun ciento quintal li oro re li cablac.

¹⁵ Laj Salomón quixpuersiheb li tenamit chi cꞌanjelac re xyi̱banquil li templo ut lix palacio, ut li cab Milo xcꞌabaꞌ. Ut quixtakla ajcuiꞌ xyi̱banquil li tzꞌac li sutsu cuiꞌ li tenamit Jerusalén. Joꞌcan ajcuiꞌ eb li tenamit Hazor, Meguido ut Gezer.

¹⁶ Laj faraón, lix reyeb laj Egipto, co̱ chi pletic saꞌ li tenamit Gezer. Quixcꞌat li tenamit ut quixcamsiheb laj cananeo li cuanqueb aran. Ut quixsi re lix rabin nak quisumla li naꞌajej li quire̱chani. Lix rabin, aꞌan li rixakil laj Salomón.

¹⁷ Laj Salomón quixtakla cuiꞌchic xyi̱banquil li tenamit Gezer, joꞌ ajcuiꞌ li tenamit Bet-horón li cuan takꞌa.

¹⁸ Joꞌcan ajcuiꞌ eb li tenamit Baalat ut Tadmor li cuanqueb saꞌ li chaki chꞌochꞌ.

¹⁹ Ut laj Salomón quixtakla ajcuiꞌ xyi̱banquil eb li tenamit li xocxo cuiꞌ li tzacae̱mkeb, ut li tenamit li xocxo cuiꞌ lix carruajeb, li tenamit li cuanqueb cuiꞌ lix soldados li nequeꞌxic chirix cacua̱y. Quixtakla xyi̱banquil li joꞌ qꞌuial quiraj xyi̱banquil aran Jerusalén ut Líbano ut saꞌ eb li naꞌajej li cuanqueb rubel xcuanquil.

²⁰ Cuanqueb li ma̱cuaꞌeb aj Israel li toj queꞌcana saꞌ eb li tenamit aꞌan. Aꞌaneb aꞌin li queꞌcana: eb laj amorreo, eb laj heteo, eb laj ferezeo, eb laj heveo, ut eb laj jebuseo.

²¹ Eb li ralal xcꞌajoleb li queꞌcana chi cua̱nc saꞌ li tenamit Israel queꞌqꞌueheꞌ chi cꞌanjelac chi cau xban laj Salomón re xtojbal rix lix naꞌajeb. Eb aꞌan queꞌcana chi cua̱nc aran xban nak eb laj Israel incꞌaꞌ queꞌru chirisinquileb saꞌ lix naꞌajeb.

²² Ma̱ jun reheb laj Israel queꞌqꞌueheꞌ chi cꞌanjelac joꞌ queꞌcꞌanjelac li jalaneb xtenamit xban nak laj Salomón quixqꞌueheb laj Israel chi cꞌanjelac chokꞌ xsoldado. Cuanqueb li queꞌqꞌueheꞌ xcꞌanjel saꞌ li palacio ut cuanqueb queꞌqꞌueheꞌ chi takla̱nc saꞌ xbe̱neb li nequeꞌxic saꞌ li carruaje re pletic. Ut cuanqueb ajcuiꞌ li queꞌqꞌueheꞌ chi takla̱nc saꞌ xbe̱neb li soldado li nequeꞌxic chirix cacua̱y.

²³ O̱b ciento riqꞌuin mero ciento (550) eb li cui̱nk li quixxakabeb laj Salomón chi takla̱nc saꞌ xbe̱neb li jalaneb xtenamiteb li puersinbileb chi cꞌanjelac.

²⁴ Lix rabin laj faraón qui-el saꞌ li tenamit li quicuan cuiꞌ laj David ut quikꞌaxon saꞌ li rochoch li quiyi̱ba̱c xban laj Salomón. Ut laj Salomón quixqꞌue chi yi̱ba̱c li cab Milo.

²⁵ Laj Salomón quixqꞌue lix cꞌatbil mayej oxib sut chiru li chihab. Ut quixqꞌue ajcuiꞌ saꞌ li artal li quixyi̱b re li Ka̱cuaꞌ. Quixqꞌue lix mayej re xcꞌambaleb rib saꞌ usilal riqꞌuin li Ka̱cuaꞌ. Ut quixcꞌat ajcuiꞌ li incienso saꞌ li artal li cuan chiru li naꞌajej li nahilan cuiꞌ li Ka̱cuaꞌ nak queꞌrakeꞌ chixyi̱banquil li templo.

²⁶ Ut li rey Salomón quixyi̱b nabaleb li ni̱nki jucub saꞌ li tenamit Ezión-geber li cuan nachꞌ riqꞌuin li tenamit Elot chire li Caki Palau li cuan saꞌ xcue̱nt Edom.

²⁷ Ut li rey Hiram quixtaklaheb li nequeꞌcꞌanjelac chiru li nequeꞌxnau chi us xchꞌeꞌbal li jucub. Ut queꞌco̱eb rochbeneb li nequeꞌcꞌanjelac chiru laj Salomón.

²⁸ Eb aꞌan queꞌco̱eb saꞌ li jucub saꞌ li tenamit Ofir ut queꞌxcꞌam chak caꞌchꞌin chic ma̱ cuaklaju quintal li oro ut queꞌxqꞌue re li rey Salomón.