1 Reyes 8 - Li Santil hu

Nak queꞌxkꞌaxtesi li templo saꞌ rukꞌ li Dios

¹ Mokon chic laj Salomón quixchꞌutubeb aran Jerusalén eb laj cꞌamol be saꞌ xya̱nkeb laj Israel, joꞌ eb ajcuiꞌ li nequeꞌtaklan saꞌ xbe̱n xte̱paleb li ralal xcꞌajol laj Israel. Quixchꞌutubeb re nak teꞌxcꞌam chak saꞌ li templo lix Lokꞌlaj Ca̱x li Ka̱cuaꞌ, li xocxo cuiꞌ lix contrato li Dios saꞌ lix tenamit laj David aran Sión.

² Eb li cui̱nk aj Israel queꞌxchꞌutub ribeb riqꞌuin laj Salomón saꞌ xcutanquil li ninkꞌe saꞌ xcuuk li po re li chihab aꞌan, saꞌ li po Etanim.

³ Nak ac chꞌutchꞌu̱queb chixjunileb laj cꞌamol be saꞌ xya̱nkeb laj Israel, eb laj tij queꞌrisi saꞌ li tabernáculo li Lokꞌlaj Ca̱x ut queꞌxcꞌam saꞌ lix templo li Ka̱cuaꞌ.

⁴ Eb li ralal xcꞌajol laj Leví ut eb laj tij queꞌxcꞌam li tabernáculo li nequeꞌxchꞌutub cuiꞌ ribeb joꞌ ajcuiꞌ chixjunil li cꞌaꞌru nacꞌanjelac saꞌ li tabernáculo ut queꞌxcꞌam saꞌ li templo.

⁵ Li rey Salomón ut eb laj Israel queꞌxchꞌutub ribeb chiru li Lokꞌlaj Ca̱x ut queꞌxmayeja li carner ut li bo̱yx. Incꞌaꞌ quiru rajlanquil li xul li queꞌxmayeja xban xqꞌuialeb.

⁶ Eb laj tij queꞌrocsi li Lokꞌlaj Ca̱x saꞌ li templo ut queꞌxcanab saꞌ li Lokꞌlaj Santil Naꞌajej rubel lix xiqꞌueb li querubines.

⁷ Eb li cuib chi querubines aꞌin helho̱queb lix xiqꞌueb saꞌ xbe̱n li Lokꞌlaj Ca̱x joꞌ ajcuiꞌ li cheꞌ li nequeꞌxpako cuiꞌ.

⁸ Caꞌaj cuiꞌ li ruꞌuj li cheꞌ li nequeꞌxpako cuiꞌ li Lokꞌlaj Ca̱x nacꞌutun chak toj saꞌ li Santil Naꞌajej. Abanan incꞌaꞌ nacꞌutun chak toj chirix cab. Ut joꞌcan nak queꞌcana toj chalen anakcuan.

⁹ Ma̱cꞌaꞌ cuan chi saꞌ li Lokꞌlaj Ca̱x aꞌan. Caꞌaj cuiꞌ li cuib pere̱l chi pec li tzꞌi̱banbil cuiꞌ li chakꞌrab. Laj Moisés quixqꞌueheb saꞌ li Lokꞌlaj Ca̱x aran Horeb nak li Dios quixba̱nu li contrato riqꞌuineb li ralal xcꞌajol laj Israel nak queꞌel chak saꞌ li tenamit Egipto.

¹⁰ Nak ac xeꞌel laj tij saꞌ li Lokꞌlaj Santil Naꞌajej, saꞌ junpa̱t quinujac li templo riqꞌuin xlokꞌal li Dios. Chanchan li chok nak quicꞌutun.

¹¹ Ut eb laj tij incꞌaꞌ queꞌru xba̱nunquil lix cꞌanjel xban nak lix lokꞌal li Dios quixnujobresi li Templo.

¹² Ut laj Salomón quitijoc ut quixye: —At Ka̱cuaꞌ, la̱at caye nak nacatcuan saꞌ li chok kꞌojyi̱n ru.

¹³ Abanan la̱in xinyi̱b jun la̱ cuochoch re tatcua̱nk cuiꞌ chi junelic, chan.

¹⁴ Ut li rey Salomón quixsukꞌisi rib ut quixtzꞌa̱ma chiru li Dios nak ta̱rosobtesiheb laj Israel li xakxo̱queb aran.

¹⁵ Ut quixye: —Lokꞌoninbil taxak li Ka̱cuaꞌ, lix Dioseb laj Israel, xban nak xba̱nu li cꞌaꞌru quixyechiꞌi re laj David lin yucuaꞌ,

¹⁶ nak quixye re, “Chalen nak quicuisiheb chak lin tenamit Israel aran Egipto la̱in incꞌaꞌ quinsicꞌ ru saꞌ xya̱nkeb lix te̱paleb li ralal xcꞌajol laj Israel junak li tenamit li teꞌxyi̱b cuiꞌ li cuochoch bar tineꞌxlokꞌoni cuiꞌ, usta ac xinsicꞌ ru laj David chokꞌ xreyeb lin tenamit Israel,” chan li Dios.—

¹⁷ Ut laj Salomón quixye ajcuiꞌ: —Laj David lin yucuaꞌ qui-ala saꞌ xchꞌo̱l xyi̱banquil jun li templo re teꞌxlokꞌoni cuiꞌ li Ka̱cuaꞌ lix Dios eb laj Israel.

¹⁸ Ut li Ka̱cuaꞌ quixye re laj David lin yucuaꞌ, “Us nak x-ala saꞌ a̱chꞌo̱l xyi̱banquil junak li cab re tineꞌxlokꞌoni cuiꞌ.

¹⁹ Abanan ma̱cuaꞌ la̱at tatyi̱ba̱nk re li cab aꞌan. La̱ cualal ban ta̱yi̱ba̱nk re li cab re tineꞌxlokꞌoni cuiꞌ,” chan li Dios.

²⁰ Ut anakcuan xtzꞌakloc ru li quixye chak li Ka̱cuaꞌ xban nak la̱in xin-oc chokꞌ re̱kaj lin yucuaꞌ. Ut xkꞌaxtesi̱c saꞌ cuukꞌ li cuanquilal re tintakla̱nk saꞌ xbe̱neb li tenamit. Anakcuan la̱in xinyi̱b li templo re takalokꞌoni cuiꞌ li Ka̱cuaꞌ li kaDios la̱o aj Israel.

²¹ Ut xinyi̱b ajcuiꞌ saꞌ li templo lix naꞌaj li Lokꞌlaj Ca̱x li xocxo cuiꞌ lix contrato li Ka̱cuaꞌ li quixba̱nu chak riqꞌuineb li kaxeꞌto̱nil yucuaꞌ nak quirisiheb chak aran Egipto, chan laj Salomón.

²² Chirix aꞌan laj Salomón quixxakab rib chiru lix artal li Ka̱cuaꞌ chiruheb chixjunileb laj Israel li cuanqueb aran. Quixtaksi li rukꞌ saꞌ choxa ut quitijoc.

²³ Quixye: —At Ka̱cuaꞌ, at kaDios la̱o aj Israel, ma̱cꞌaꞌ junak chic Dios joꞌ la̱at, chi moco saꞌ choxa, chi moco saꞌ ruchichꞌochꞌ. La̱at nacaba̱nu li cꞌaꞌru nacayechiꞌi. Ut nacacuuxta̱na ruheb li nequeꞌcꞌanjelac cha̱cuu chi anchaleb xchꞌo̱l ut nequeꞌcuan saꞌ ti̱quilal cha̱cuu.

²⁴ Anakcuan xaba̱nu li cꞌaꞌru cayechiꞌi chak re laj David lin yucuaꞌ. La̱at caye nak ta̱qꞌue ut anakcuan xaba̱nu chiru li cutan aꞌin.

²⁵ Joꞌcan ut at Ka̱cuaꞌ, at kaDios la̱o aj Israel, chaba̱nu taxak li cꞌaꞌru cayechiꞌi chak re laj David lin yucuaꞌ nak caye chi joꞌcaꞌin, “Junelic ta̱cua̱nk junak reheb la̱ cualal a̱cꞌajol li teꞌoc saꞌ li cuanquilal. Abanan tento nak teꞌcua̱nk saꞌ xya̱lal chicuu ut teꞌcua̱nk saꞌ ti̱quilal.”

²⁶ Joꞌcan ut at Ka̱cuaꞌ, at kaDios la̱o aj Israel, chaba̱nu taxak li cꞌaꞌru cayechiꞌi chak re laj David laj cꞌanjel cha̱cuu.

²⁷ ¿Ma naru ta biꞌ nacatcuan saꞌ ruchichꞌochꞌ? Li choxa kꞌaxal nim, abanan aꞌan incꞌaꞌ tzꞌakal chokꞌ a̱naꞌaj, at Ka̱cuaꞌ. ¿Ma tojaꞌ ta chic li cab li xinyi̱b ta̱tzꞌaklok chokꞌ a̱naꞌaj?

²⁸ Joꞌcan ut, at Ka̱cuaꞌ at inDios, chacuabi taxak lin tij. Chacuabi taxak li cꞌaꞌru nintzꞌa̱ma cha̱cuu anakcuan. La̱in laj cꞌanjel cha̱cuu.

²⁹ Junelic taxak chacuilak li naꞌajej aꞌin. Chi kꞌek chi cutan ta̱cuil li templo aꞌin li tatcua̱nk cuiꞌ. Chacuabi taxak lin tij, la̱in laj cꞌanjel cha̱cuu.

³⁰ Chacuabihak taxak lin tij. Ut chacuabihak taxak lix tijeb laj Israel nak teꞌtijok saꞌ li naꞌajej aꞌin. Chacuabihak taxak li katij saꞌ li naꞌajej aꞌin li tatcua̱nk cuiꞌ. Toj saꞌ choxa taxak ta̱cuabi li katij ut ta̱cuy ta̱sach li kama̱c.

³¹ Cui cuan junak ta̱ma̱cobk chiru li ras ri̱tzꞌin ut tixpuersi ru chixba̱nunquil li juramento chiru li artal saꞌ li templo aꞌin,

³² la̱at ta̱cuabi toj saꞌ choxa li cꞌaꞌru teꞌxtzꞌa̱ma cha̱cuu. Tatrakok a̱tin saꞌ xbe̱neb ut ta̱qꞌueheb chixtojbal xma̱c li cuanqueb xma̱queb. Ta̱coleb rix li ma̱cꞌaꞌeb xma̱c saꞌ xcꞌabaꞌ la̱ ti̱quilal.

³³ Nak eb laj Israel teꞌnumta̱k li xicꞌ nequeꞌiloc reheb saꞌ xbe̱neb xban li ma̱c li teꞌxba̱nu cha̱cuu, ut cui eb aꞌan teꞌsukꞌi̱k cuiꞌchic a̱cuiqꞌuin ut teꞌxya̱ba la̱ cꞌabaꞌ ut teꞌtijok cha̱cuu saꞌ li naꞌajej aꞌin,

³⁴ la̱at toj saꞌ choxa ta̱cuabi li cꞌaꞌru teꞌxtzꞌa̱ma cha̱cuu ut ta̱cuyeb xma̱c la̱ tenamit Israel. Ut ta̱qꞌueheb cuiꞌchic chi sukꞌi̱c saꞌ li naꞌajej li caqꞌue reheb lix xeꞌto̱nil xyucuaꞌeb laj Israel.

³⁵ Ut cui incꞌaꞌ chic tixqꞌue li hab xban li ma̱c li teꞌxba̱nu cha̱cuu, ut cui teꞌxjal xcꞌaꞌuxeb ut teꞌxya̱ba la̱ cꞌabaꞌ ut teꞌtijok cha̱cuu, xban li raylal xaqꞌue saꞌ xbe̱neb, ta̱cuabi taxak li cꞌaꞌru teꞌxtzꞌa̱ma cha̱cuu.

³⁶ La̱at, at Ka̱cuaꞌ, toj saꞌ choxa ta̱cuabi lix tijeb ut ta̱cuyeb xma̱queb laj Israel li nequeꞌcꞌanjelac cha̱cuu. Ta̱cꞌut chiruheb chanru nak teꞌcua̱nk saꞌ xya̱lal ut ta̱takla cuiꞌchic li hab saꞌ xbe̱n li chꞌochꞌ li caqꞌue reheb la̱ tenamit.

³⁷ Ut cui ta̱cua̱nk cueꞌej saꞌ xya̱nkeb laj Israel, malaj ut li caki yajel, malaj ut li acui̱mk ta̱chakik xban li tik malaj ut ta̱cha̱lk jalan xyajel li acui̱mk joꞌ li moꞌ, joꞌ laj sa̱cꞌ, ut li motzoꞌ, malaj ut teꞌcha̱lk li xicꞌ nequeꞌiloc ke chixsutbal li katenamit, malaj ut yajel malaj ut cꞌaꞌak chic re ru chi raylalil ta̱cha̱lk saꞌ kabe̱n,

³⁸ chacuabi taxak lix tijeb laj Israel nak teꞌcha̱lk chixya̱banquil la̱ cꞌabaꞌ ut chi tijoc cha̱cuu saꞌ li naꞌajej aꞌin. Chacuabi lix tijeb yalak ani li ta̱cha̱lk chi tijoc saꞌ li naꞌajej aꞌin. Ma̱re la̱ tenamit Israel teꞌcha̱lk chi tijoc cha̱cuu nak teꞌrecꞌa xrahil li raylal li yo̱keb chixcꞌulbal. Ut ma̱re teꞌxtaksi li rukꞌeb chi tijoc saꞌ li templo aꞌin.

³⁹ Ut la̱at ta̱cuabi lix tijeb toj saꞌ li choxa li cuancat cuiꞌ chak. Ut ta̱cuy xma̱queb. La̱at tatrakok a̱tin saꞌ xbe̱neb aꞌ yal chanru lix naꞌlebeb cha̱cuu. La̱at nacanau cꞌaꞌru cuan saꞌ li ra̱meb xban nak la̱at nacanau cꞌaꞌru cuan saꞌ lix cꞌaꞌuxeb li cuanqueb saꞌ li ruchichꞌochꞌ.

⁴⁰ Cui ta̱ba̱nu chi joꞌcan riqꞌuineb, teꞌxxucua a̱cuu joꞌ najtil teꞌcua̱nk saꞌ li chꞌochꞌ li caqꞌue reheb li kaxeꞌto̱nil yucuaꞌ.

⁴¹ Ma̱re cuanqueb jalan xtenamit ma̱cuaꞌ xcomoneb la̱ tenamit Israel teꞌcha̱lk saꞌ najtil tenamit chixya̱banquil la̱ cꞌabaꞌ saꞌ li naꞌajej aꞌin.

⁴² Eb li jalaneb xtenamit teꞌrabi a̱cuesil. Teꞌrabi nak kꞌaxal nim la̱ cuanquil ut nim la̱ cuuxta̱n ut teꞌcha̱lk chi tijoc cha̱cuu saꞌ li templo aꞌin.

⁴³ Ut la̱at, at Ka̱cuaꞌ, toj saꞌ li choxa li cuancat cuiꞌ, ta̱cuabi lix tijeb. Ut ta̱sume li cꞌaꞌru teꞌxtzꞌa̱ma cha̱cuu li jalaneb xtenamit re nak chixjunileb li cuanqueb saꞌ ruchichꞌochꞌ teꞌxnau nak nim a̱cuanquil ut teꞌxxucua a̱cuu joꞌ nakaba̱nu la̱o aj Israel. Ut re ajcuiꞌ nak teꞌxqꞌue retal nak la̱at li tatlokꞌoni̱k saꞌ li templo aꞌin li xinyi̱b la̱in.

⁴⁴ Cui eb la̱ tenamit teꞌxic chi pletic riqꞌuineb li xicꞌ nequeꞌiloc reheb, yalak bar ta̱taklaheb nak teꞌtijok teꞌilok cuan cuiꞌ li tenamit li sicꞌbil ru a̱ban, ut cuan cuiꞌ li templo aꞌin li xinyi̱b chokꞌ re a̱lokꞌoninquil.

⁴⁵ Ut la̱at toj saꞌ choxa ta̱cuabi lix tijeb nak tateꞌxya̱ba. Ut la̱at ta̱tenkꞌaheb saꞌ ti̱quilal.

⁴⁶ Ma̱ ani incꞌaꞌ ta nama̱cob. Nak eb la̱ tenamit ta̱ma̱cobk cha̱cuu, la̱at tatjoskꞌokꞌ riqꞌuineb. Ut ta̱kꞌaxtesiheb saꞌ rukꞌeb li xicꞌ nequeꞌiloc reheb re nak teꞌchapekꞌ ut teꞌcꞌamekꞌ saꞌ xtenamiteb li xicꞌ nequeꞌiloc reheb, usta najt, usta nachꞌ.

⁴⁷ Abanan nak chapcho̱keb xbaneb li jalaneb xtenamit, ma̱re ta̱julticokꞌ reheb nak incꞌaꞌ us xeꞌxba̱nu ut teꞌxjal xcꞌaꞌuxeb. Ut ma̱re teꞌtijok chak saꞌ li tenamit bar cua̱nkeb cuiꞌ chak ut teꞌxye: “Xoma̱cob. Incꞌaꞌ us xkaba̱nu. Xkaba̱nu li ma̱usilal,” chaꞌkeb.

⁴⁸ Ut cui eb aꞌan teꞌxjal xcꞌaꞌuxeb chi anchaleb xchꞌo̱l ut chi anchaleb li ra̱m, nak cua̱nkeb chak saꞌ lix tenamit li xicꞌ nequeꞌiloc reheb, teꞌtijok. Nak yo̱keb chi tijoc, teꞌilok saꞌ xjayal li chꞌochꞌ li caqꞌue reheb lix xeꞌto̱nil xyucuaꞌ. Teꞌilok saꞌ xjayal li tenamit li casicꞌ ru, li xinyi̱b cuiꞌ li templo re a̱lokꞌoninquil.

⁴⁹ Ut la̱at toj saꞌ choxa li cuancat cuiꞌ ta̱cuabi lix tijeb nak tateꞌxya̱ba. Ut la̱at ta̱tenkꞌaheb saꞌ ti̱quilal.

⁵⁰ La̱at ta̱cuy ta̱sach xma̱queb la̱ tenamit nak xeꞌma̱cob cha̱cuu ut xeꞌxkꞌet la̱ cua̱tin. Chakꞌunobresi lix chꞌo̱leb li tenamit li queꞌchapoc reheb re nak teꞌxtokꞌoba ruheb la̱ tenamit.

⁵¹ Chatenkꞌaheb xban nak aꞌan eb la̱ tenamit. Ut aꞌaneb ajcuiꞌ la̱ cualal a̱cꞌajol. La̱at cat-isin chak reheb li kaxeꞌto̱nil yucuaꞌ saꞌ li tenamit Egipto li queꞌxcꞌul cuiꞌ chak li nimla raylal.

⁵² Joꞌcan ut, at Ka̱cuaꞌ, chacuabi taxak lin tij la̱in laj cꞌanjel cha̱cuu. Ut chacuabi ta ajcuiꞌ lix tijeb la̱ tenamit Israel. Chasume taxak chixjunil li cꞌaꞌru teꞌxtzꞌa̱ma cha̱cuu.

⁵³ At Ka̱cuaꞌ, at nimajcual Dios, la̱at catsicꞌoc ruheb saꞌ xya̱nkeb chixjunileb li tenamit li cuanqueb saꞌ ruchichꞌochꞌ. Ut caqꞌueheb chokꞌ a̱cualal a̱cꞌajol joꞌ caye re laj Moisés laj cꞌanjel cha̱cuu nak cacuisiheb chak li kaxeꞌto̱nil yucuaꞌ aran Egipto, chan laj Salomón.

⁵⁴ Nak quitijoc laj Salomón, quicuikꞌla chiru li artal ut quixtaksi li rukꞌ.

⁵⁵ Nak quirakeꞌ chi tijoc, quixakli ut quixtzꞌa̱ma chiru li Dios nak ta̱rosobtesiheb li tenamit Israel li chꞌutchꞌu̱queb aran. Ut quixye chi cau xya̱b xcux:

⁵⁶ —Lokꞌoninbil taxak li Ka̱cuaꞌ Dios xban nak xqꞌue tuktu̱quil usilal saꞌ lix tenamit Israel joꞌ quixyechiꞌi. Ma̱ jun li cꞌaꞌak re ru incꞌaꞌ ta xba̱nu. Quixba̱nu ban chixjunil li quixye chak re laj Moisés laj cꞌanjel chiru.

⁵⁷ Chicua̱nk taxak li Ka̱cuaꞌ kiqꞌuin joꞌ nak quicuan chak riqꞌuineb li kaxeꞌto̱nil yucuaꞌ. Ut incꞌaꞌ taxak toxtzꞌekta̱na chi moco toxcanab kajunes.

⁵⁸ Chikaqꞌuehak taxak kachꞌo̱l chi cua̱nc saꞌ xya̱lal riqꞌuin li Ka̱cuaꞌ Dios. Chikaba̱nuhak joꞌ naraj aꞌan. Ut chocua̱nk taxak joꞌ naxye lix chakꞌrab joꞌ quixtaklaheb cuiꞌ li kaxeꞌto̱nil yucuaꞌ.

⁵⁹ Chixjunil li cꞌaꞌak re ru aꞌin li xintzꞌa̱ma saꞌ lin tij chiru li Ka̱cuaꞌ, junelic taxak chijulticokꞌ re chi kꞌek chi cutan. Tinixtenkꞌa taxak la̱in laj cꞌanjel chiru ut tixtenkꞌa taxak lix tenamit Israel, aꞌ yal cꞌaꞌru teꞌraj cuiꞌ tenkꞌa̱c.

⁶⁰ Choxtenkꞌa taxak re nak eb li tenamit li cuanqueb saꞌ ruchichꞌochꞌ teꞌxqꞌue retal nak li Ka̱cuaꞌ, aꞌan li tzꞌakal Dios. Ma̱cꞌaꞌ chic junak joꞌ aꞌan.

⁶¹ Joꞌcan nak cheqꞌuehak e̱chꞌo̱l chicua̱nk saꞌ ti̱quilal chiru li Ka̱cuaꞌ li kaDios. Chexcua̱nk saꞌ xya̱lal ut cheba̱nuhak li cꞌaꞌru naxye saꞌ li chakꞌrab joꞌ yo̱quex anakcuan.—

⁶² Ut chirix chic aꞌan, li rey joꞌ eb ajcuiꞌ li tenamit Israel queꞌxcamsi li xul re teꞌxmayeja chiru li Ka̱cuaꞌ.

⁶³ Laj Salomón quixqꞌue li mayej chiru li Dios re xcꞌambaleb rib saꞌ usilal riqꞌuin. Cuib xcaꞌcꞌa̱l mil (22,000) li cuacax quixmayeja. Ut quixmayeja ajcuiꞌ jun ciento mil riqꞌuin junmay mil (120,000) li carner. Joꞌcaꞌin nak queꞌxkꞌaxtesi li templo chiru li Dios li rey ut eb li ralal xcꞌajol laj Israel.

⁶⁴ Saꞌ ajcuiꞌ li cutan aꞌan li rey quixkꞌaxtesi saꞌ rukꞌ li Dios li neba̱l li cuan chiru lix templo li Dios. Aran quixqꞌue chak li cꞌatbil mayej ut lix xe̱bul li xul li queꞌcꞌateꞌ chokꞌ xmayejeb re xcꞌambaleb rib saꞌ usilal riqꞌuin li Dios. Ut aran ajcuiꞌ queꞌxqꞌue li cꞌaꞌak chic re ru chi mayejil. Aran quixqꞌue li mayej xban nak incꞌaꞌ qui-oc chixjunil saꞌ xbe̱n li artal yi̱banbil riqꞌuin bronce, li cuan chiru li naꞌajej li nahilan cuiꞌ li Ka̱cuaꞌ xban nak caꞌchꞌin li artal aꞌan.

⁶⁵ Saꞌ eb li cutan aꞌan laj Salomón quixba̱nu jun li ninkꞌe rochbeneb chixjunileb laj Israel. Kꞌaxal nabaleb li chꞌutchꞌu̱queb aran. Eb aꞌan queꞌchal chak saꞌ eb li naꞌajej Hamat ut toj cuan cuiꞌ li nimaꞌ re Egipto. Li ninkꞌe aꞌin queꞌxba̱nu cuukub cutan ut chirix aꞌan queꞌxba̱nu cuukub cutan chic. Ca̱laju cutan queꞌninkꞌei̱c re xlokꞌoninquil li Dios.

⁶⁶ Nak ac xnumeꞌ li ca̱laju cutan, li rey Salomón quixchakꞌrabiheb li tenamit. Ut eb li tenamit queꞌxtzꞌa̱ma chiru li Dios nak ta̱rosobtesi li rey. Chirix chic aꞌan queꞌco̱eb saꞌ li rochocheb chi saheb saꞌ xchꞌo̱l ut chi cꞌojcꞌo̱queb xchꞌo̱l xban chixjunil li usilal li quixba̱nu li Dios riqꞌuineb saꞌ xcꞌabaꞌ laj David laj cꞌanjel chiru.